Sakey a Misteryo​—Siopa So Balangkantis a Babilonia a Baleg?

SAKEY a bii, makapabaing a balangkantis, ya angimpluensya ed bilay na saray binilyon a totoo, so inatey, pinatey. Balet saya so aliwan ordinaryon panamatey. Anto so manggawa ed satan a duma? Say managpatey so sakey ya ayep, sakey ya atap a nanlabos ed sikato, tan anabsab ed laman to, tan insan saray kera ed sikato so dineral na apuy. Siopa iyan manangimpluensyan bii? Akin a sikato so atakien na sakey ya atap ya ayep? Anto so ginawa to pian makana ed sayan maruksan anggaan?a​—Apocalipsis 17:16, 17.

Saya so nayarin letnegan na makagutgut a misteryon estorya​—nilikud ta saya so aliwan plano nipaakar ed sakey a nobela. Sikato so sakey a maawaran a kapetegan a sikato so wala ed kurang na kasumpalan. Tan makana ed sikayo lapud sayan makapabaing a balangkantis so nayarin angimpluensya ed mismon bilay yo natan. Nagkalalo ni, balanglan sikayo so mansiansia ed sikato odino onsian et kabaliksan to so pandumaan na bilay tan patey. Sirin siopa iyan bii?

Saray Kliente na Misteryon Bii

Sayan femme fatale, sayan andi-baing a managtukso, so deniskribe nen Juan diad mapropetikon libro na Biblia ya Apocalipsis, nabasa tayo: “Tan [say anghel] so angitarok ed siak diad pakayari na espiritu diad kalawakan. Tan anengneng ko so sakey a biin manyudyurong ed eskarlatan-kolor ya atap ya ayep a napno na saray makapabaing a ngaran tan awalaan na pitoran ulo tan samploran saklor. Tan say bii so akawesan na purpora tan eskarlata, tan aparakpan na balitok tan angkablin bato tan perlas tan sankaegnaan to so binmalitok a kopa a napno na makapadimlan bengatla tan saray marutak a bengatla na pilalawanan to. Tan diad muling to et nisulat so sakey a ngaran, sakey a misteryo: ‘Babilonia a Baleg, say ina na saray balangkantis tan ed saray makapadimlan bengatla ed dalin.’”​—Apocalipsis 17:3-5.

Natan sayan “Babilonia a Baleg” so sakey a talagan makapakebbiew a bii, lapud ibabaga na salaysay ed bersikulo 1 a sikato so “manyudyorong ed dakerakel a danum.” Anto so kabaliksan na satan? Impaliwawa na anghel na Dios ed si Juan: “Saray danum ya anengneng mo, a panyudyurongan na balangkantis, kabaliksan to so totoo tan ulop tan nasyones tan pansasalita.” (Apocalipsis 17:15) Anggapoy duaruwa a saya so sakey a balangkantis a walaan na sankamundoan ya impluensya. Balet ta sikato so aliwan ordinaryon balangkantis. Sikato so “ina na saray balangkantis,” say madam na institusyon. Sano nipaakar ed pilalawanan to, sikato so mangiter na saray bilin. Balet sikato so walaan met na saray nikaduman kliente.

Imparungtal na anghel no siopa irayan apaboran a kliente na baleg a balangkantis. Panon so impamidbir to ed sikara? Ibabaga to a say Babilonia a Baleg so sakey “ya akilawanan na saray arari na dalin, bangta saraman so manaayam ed dalin so abuanges ed alak na impilawanan to.” (Apocalipsis 17:2) Saya so manangayat a balangkantis a walaan na saray maabig a koneksion a nayarian ton ingganyoen iray mapulitikan manuley na mundo, saray mismon “arari na dalin”! Sirin siopa iyan bii?

Ibabaga na anghel a sikato so walaan na sakey a ngaran, sakey a misteryon ngaran, “Babilonia a Baleg.” Natan wadia so pamidbiran ed sikato​—sakey ed saray klienten papaboran to tan say sananey et say ngaran to, Babilonia a Baleg. Diad anton konklusyon so pangipaarapan na saratan a pamidbiran?

[Paimano ed leksab]