Kapitulo 18
Katooran ed Nanengneng ya Organisasyon Natan
1, 2. Panon so pantalos ed kasulatan diad Salmo 50:5?
NISULAT ed Salmo 16:10: “Agmo kaindanan so kamarerwak ed Sheol. Agmo abuloyan so matoor mo a makanengneng ed abut.” Tan nisulat ed Salmo 50:5: “Itipon mo ed siak iray matoor ko, saraman so akisipanan ed siak diad bagat.” Kasin saraman so migawaan na sipanan ed si Jehova so mangitarya na “bagat”? Andi, sarayan matoor so agmanggawa na sinansakey a “bagat” ed inkasikaran dili, ya iter daray silalaman a laman da ta pian migawaan na paknaan ed Dios.
2 Panon, sirin, so kagawa na sipanan? Diad “bagat” na “sakey a matoor” a say kamarerwa to so ag-ataynanan ed Sheol noagta apaoli a nanlapud saray inaatey. Inyaplika nen apostol Pedro iray salita na Salmo 16:10 ed si Jesu-Kristo tan intuloy ton imbaga: “Sikato [David] so akanengneng lan akauna tan nansalita nipaakar ed inkioli nen Kristo, a sikato so agkinaindanan ed Hades nisay anengneng na laman to so kabubulok. Sayan Jesus so pinaoli na Dios.”—Gawa 2:25, 27, 31, 32.
3. Siopa raman so natipon unong ed ganggan diad Salmo 50:5, tan akin a sikara so nepeg a napakiwas a mamaneknek a matoor ed Dios?
3 Sayan apaolin Jesus so Manamegley na balon sipanan, tan diad letnegan na bagat to a say balon sipanan so agawan balido. (Hebreos 9:15, 17) Sirin siopa raman so natipon unong ed ganggan ed Salmo 50:5? Sikara so saray babangatan nen Jesus a wala ed balon sipanan diad panamegley na bagat to. Nisesengeg ed pisasalamat ed si Jehova ed sayan agnaparaan a bagat, sikara so nepeg a napakiwas a mamaneknek na katooran ed sikato.
4, 5. (a) Anton aligwas so wala ed si Satanas a Diablo legan na inmunan guerra mundial diad saray sagpot ton maneral ed nanengneng ya organisasyon nen Jehova? (b) Iner so angiyalisan ed hedkuarter na Sosyedad, tan akin? (c) Diad modernon-agew a kasimbangan na Salmo 137:1, anton emosyonal a kipapasen, odino disposisyon, na matoor a nakdaan sanen minurekdek da so alupoy a kipapasen na organisasyon na Dios?
4 Sanen niletneg so Panarian nen Jehova ed katawenan nen 1914, saray nasyones so sinmanok diad isusumpa ed satan a Panarian diad impibiang da ed inmunan guerra mundial, tan saya so inabuloyan na Dios. (Salmo 2:1, 2) Nanggunaetan nen Satanas a Diablo ya usaren itan a gutgutan na mundo diad paneral ed nanengneng a kabiangan na organisasyon nen Jehova. Sikato so tinmalona diad impamaipriso to ed presidente na Watch Tower Bible and Tract Society ed panangipukokan pederal ed Atlanta, Georgia. Pitora nin arum a representante na Sosyedad so nipangaw a kaiba to.
5 Lapud panamasegsegang, say hedkuarter na Sosyedad ed Brooklyn, Nueva York, so inyalis ed sakey ya inabangan ya abung ed Pittsburgh, Pennsylvania. Saya so ginawa pian napantultuloy so panangipalapag ed magasin a Watch Tower. Say mangatatawen a kigloria na saray matoor so inilaloan ed magano. Balet saramay kabiangan na nakdaan so nannangis legan ya inumameng da so inkapairap, alupoy a kipapasen na organisasyon nen Jehova.—Sal. 137:1.
Katooran Legan na Panaon na Inkapriso
6-8. Legan na inkapriso, panon so impangipatnag na presidente na Sosyedad, si J. F. Rutherford, na katooran ed organisasyon nen Jehova?
6 Say panangipatnag na katooran ed organisasyon nen Jehova legan na panaon na inkapriso to, say presidente na Watch Tower Society, si J. F. Rutherford, nen Disyembre 25, 1918, so nanggawa na nikadkaduman sulat ed si J. A. Bohnet, sakey a napanmatalkan a kaiban aripen nen Jehova. Nipaarap ed sikato diad opisina na Sosyedad ed Pittsburgh. Insulat nen Rutherford so onggendan:
7 “Lapud agko labay so mikumpromiso ed Babilonia, balet sitotoor ya analin manlingkor ed Katawan ko, siak so wala ed prisowan, a siak so misalsalamat. . . . Lablabay kon tuloy so panangabobon To tan imis tan wala ed prisowan, nen say mikumpromiso odino onsuko ed Ayep tan nabulos tan nawalaan na saray panangirayew na interon mundo. Sikato so sakey ya apapalar, masamit ya eksperiensia so panirap nisengeg ed matoor a serbisyo ed Katawan. Diad Panarian et pabpablien tayo so imis na Ama ed labas na amin a bengatla. Saya so sankamatalonaan ed kanonotan na kada anak na Dios. Kaililiw tayo so pikasakey a manggawa ed sikatayon saksakey diman. Siak so maliket, ingen ta kailiw ko so pakanengneng ed sikayon amin lamet. Say kumbension tan tinaon a miting so manasingger la. Komon ta say espiritu nen Kristo so mamano ed puso na amin ya onatendi . . .
8 “Wala ni so dakel a gawaen. Sikato so baleg a pabor a pibiangan. Saraman lambengat so mangaro ed Sikato a sankamatalonaan so matoor tan sirin napagalangan. . . . Sakbay na satan a maliket ya agew et nepeg a wala so panagtasin niiter. . . . Saray linmabas a metodo tan paraan so agmakaabet ed saray nakakaukolan, balet say Katawan ed dilin maabig a dalan To so mangitarya. . . . Siak so maliket ed sayan eksperiensia ed prisowan a nireserba ed sikatayo imbes a diad si Agin Russell. Agko nin balot sigpot a ginula so kaugsan nensaman tan inaro so inkatunong tan nampirawatan so ontulong ed arum. . . . Asingger la so pananalo na Sion.”
Organisasyon na Dios So “Manunan Sengegan na Panliket” da
9. Anton awawey na salmista so impatnag na saray niprison manangilaman na Sosyedad?
9 Anggaman saray ariripen nen Jehova so tinandaan ed mundo a bilang aliwan matoor, traidor, tan aliwan patriotiko, sikara so ag-angitapat ed organisasyon nen Jehova. Agda labay so mikumpromiso ed leksab na satan a panangidesdes. Lablabayen da so pakabalang ed pangusar na kawanan a lima ra odino magmaliw ya umel nen say lingwanan so organisasyon na Dios tan agda la gawaen a sikato so “manunan sengegan na panliket” da.—Salmo 137:5, 6.
10, 11. (a) Diad anto so impikasi na matoor a nakdaan, tan antoran salita na salmista so inala ra nipaakar ed Edom? (b) Anto so ayarian a gawaen na saray kakabusol na nanengneng ya organisasyon nen Jehova, tan anto so agbalot inilaloan na saratan a kakabusol?
10 Saray kakabusol nen Jehova so malisyoson nanliket diad kiwas a sumpad mangaraldalin a manangilaman na sankatalbaan ya organisasyon to. Balet saray ariripen nen Jehova so angipikasi ed agew na panangibales to ya onsabi lapud amin na sarayan panamauges a nibunton ed organisasyon to. Inala ra so saray salita a sinalita na salmista a manutukoy ed kadaanan ya Edom: “Nonoten mo, O Jehova, nipaakar ed saray anak nen Edom so nipaakar ed agew na Jerusalem, a mangibabaga: ‘Bagbag yo! Bagbag yo so letnegan ed dalem to!’” (Salmo 137:7; Galacia 4:26) A, andi, inaro nen Jehova so singa-asawan-biin organisasyon to a pinabpablin tuloy pian lingwanan so ibabaga tan gagawaen na saraman so kabiangan na organisasyon na Diablo a sumpad saray matoor ed mangaraldalin ya organisasyon to.
11 Diad amin ya akinpaway ya indengan ed saman a panaon, saray ontan a mapulitikan manangimasakit ed Babilonia a Baleg so “amagbag ed letnegan diad dalem to” ed nanengneng ya organisasyon nen Jehova. Agdan balot inilaloan a nanengneng ya ontalindeg a manlapud dabok ed sankamundoan ya organisasyon a wala natan.