Manliliket So Panama diad Kimey na Panagpaalagey To
SARAY proyekto na panagpaalagey so aliwan balo ed Panama. Diad gapo na sayan siglo, ginmapo so kimey ed abalbaleg a kanal a binmeltang ed sentro na sayan sankaingetan a bansa, ya impantekep to so osyano Atlantico tan Pasipiko. Sayan nikadkaduman proyekto so akagamor ed melanting a Panama na ngaran a “say nansasangaan na mundo.”
Nen Enero 18, 1986, sakey a kimey na sananey a panagpaalagey so akarapat ed pantok to. Diad satan ya agew et saray Tasi nen Jehova so nanggawa na programa na dedikasyon ed balobalon impaalagey a pasilidad na sangan opisina ra. Manwarin 211 labat so akaatendin personal ed programa na dedikasyon, nilibulibo ni so nandengel diad koneksion na telepono. Say balon paalagey so panayaman na saray membro na hedquarter, misioneros, tan imprintaan.
Say impanpaalagey ed sarayan pasilidad, anggaman kuan, so kabiangan na espiritual a programa na panagpaalagey a nagagawa ed Panama nanlapulad sampot na koma-19 siglo. Diad satan a panaon et saray bukel na katuaan na Panarian so nipupor dia. Diad taon 1957, wala so sanlibo o onsulok a manangipalapag na “maong a balita” ed Panama. (Mateo 24:14) Say melag a sangan opisina tan abung na misioneron impaalagey ed saman a taon so magenap. Balet diad 20 taon et say bilang na saray Tasi so dinmakel na amitlo! Kanian nen Setyembre 1982 say Mananguley ya Ulop na saray Tasi nen Jehova so angaproba ed kipaalagey na sakey a balon sangan opisina.
Say pasen? Ngalngalin 12 milyas (19 km) ed paway na Syudad na Panama diad sakey a masansanting a lugar a banbantagen to so sakey a dayat.
Say Angat na Panagpaalagey
Balet siopa so mandesinyo ed paalagey? Panon so kipaalagey to tan diad panamegley na siopa? Nanonotan iray salita ed Salmo 127:1, saray agagi so kinmiwas, a kabat dan sikara so tulongan nen Jehova a manalona ed sarayan singa agnatalonaan iran babeng.
Saray tentatibon plano so ginawa, ya ipapanengneng to so kaawang na espasyon nakaukolan a para ed opisina, librarya, simpenan na literatura, melag ya imprintaan, tan panayaman na saray membro na hedkuarter. Impisakup so maawang a Kingdom Hall. Say ulop na arkitektura ed hedkuarter na Watch Tower Society ed Brooklyn, Nueva York, so tinumbok diad impandesinyo na paalagey a manumpal ed sarayan nakakaukolan.
Ontumbok et sinmabi so angat na panggawa ed aktual a paalagey. Nilasuslasus a Tastasi ed lokal so namboluntaryo. Saray agagin lalaki ed Estados Unidos so angiyopresi met na dunong tan serbisyo ra. Diad loob na anemiran simba lambengat, sakey a dagup na 230 ya ontulong so sinmabi, a pati arum a nanlapud arum iran bansa ed Central America.
Saray agagi ed lokal so maliket ya angilukas ed kaabungan da. Sakey a pamilya so temporaryo ni ingen ya inmalis ed sakey a tolda ta pian nasankaili to so 11 a boluntaryo. Arum a walaan na saray angkelag ya school bus so angitarya na transportasyon ed sarayan komikimey. Ingen saray arum so akibiang diad impangitarya na 30,000 a libren panangan a niserbin mismo ed pampapaalageyan. Saray makarepreskon iinumen a ginawa ed pinya, laranhita, apayas, tan mangga, tan ontan met ed malangwer a niog, so niserbin mabetbet pian napapa so inkapgaan na saraman so mantatrabaho ed ampetapetang ya agew.
Aliwan Tori na Babel
Maples so impantultuloy na kimey. Diad loob na duaran simba et amin a bakor so nipaalagey ed komaduan-grado, arum ed saray pasindeg a balatyang so nipasen, tan say datal na Kingdom Hall ed komaduan grado so nilira. Ginawan bansag so kimey na panangilira ed saray tubo tan elektrikal diad impangigaton ed saray semento, panagplasta, tan impangikabit ed saray bintana tan puerta. Diad kulang a sakey bulan et nipasen so atep, dugaruga ed panaon a mangiter na tarong a manlapud maples ya uran—nikadkaduma ed sayan panaon na taon.
Walaray pigaran problema. No maminsan, anggad 800 a boluntaryo so onsabi, tan kinaukolan to so baleg a kimey na panangorganisa pian amin so mantultuloy ya okupado. Nagkalalo ni, maslak ed saray sankailin agagi so agmakaamta na Espanyol. Imbes a saya so sengegan na itunda ed kimey na panagpaalagey, a singa ed samay bantog a Tori na Babel, saray agagi so angipatnag na bunga na espiritu—tan tinulongan ira na saray manangipatalos.—Galacia 5:22, 23.
Diad interon proyekto, nidanet iray espiritual a pamaakaran. Say maparanay a miting na kongregasyon so ginawa ed pasen na pampapaalageyan, tan nigana so panaon na pibiang ed lawak na ministeryo. Wala met iray panaon na panligliwaan, panagpasyar, tan sosyal iran pantitipon. Ingen saray agagi so manunan wadman pian mankimey, tan saray paalagey so agnambayag et asumpal!
Diad paliwawa to ed dedikasyon, si John Booth na Mananguley ya Ulop so anegek ed pamaakaran a marakerakep, kuanto: “Anto so onsabi a manlapud amin na sayan panagpaalagey a gagawaen tayo? Akin, sikatayo so manpapaalagey a para ed maandon arapen. Aliwan lapud say paalagey so magnayon lawas, noagta say resulta na sayan paalagey tan say sagpot na saray agagi tayo ed interon bansa tan diad interon mundo so totoon manbilay na ando lan ando.” Agpankelawan a saray Tasi ed Panama so manliliket ed lawas-onlalaknab a kimey na panagpaalagey!