Sakey a Katoliko So Manliliket ed Satan
Sakey ed saray Tasi nen Jehova so akepesan na goma ed sakey a baryo ed Virginia, E.U.A. Walad asingger so sakey ya abung, tan sikato so tinmuktok ed puerta. Say bii ed abung so amaloob ed sikato pian makatawag na tulong. Saginonor et say Tasi so angipawit na insulat a pisasalamat, ya angitekep na sakey a regalon kopya na libron You Can Live Forever in Paradise on Earth. Say onggendan, ed kabiangan, so ebat a naawat to:
“Siak so prankan tuloy tan simamatua ed sika, siak so sakey a Romano Katoliko. Tan kapiganman a wala so ontuktok ed puertak a sankaawit to so Watchtower odino anggan arum a tracts, saratan so agko sinalin awaten. No sikara so impilit da ed siak, sikara so ibantak ko ed basuraan. Talagan nigalegalet a tuloy so Katolisismo ed siak nanlapulad inkaugaw ko.
“Anggaman kuan, siak so asagyat ed librom lapud walaan na ‘Paradise’ ed dalem na titulo tan lapud say pakabasa so malinew tan mainomay. Saray tepet ed leksab na saray pahina so angipaseseg na pamasa, tan saray retrato so makapasagyat ed siak. Nagkalautlan labalabay ko so pahina 11 lapud sasalien kon palesaen so ontan a paraiso dia ed saray manok tan ayayep. Siak so walaan na usa, rabit, chipmunks, squirrels, atap a pabo tan manomanok ed amin a nengneng. . . .
“Peteg ya akagawa na bengatla diad impakasagyat mo ed sakey a Katoliko a mamasa ed libro na sananey a relihyon. Ha! Panduaruwaan ko so nakumberte ed sananey a relihyon. Balet ta basaen ko so libro, tan say masiken ko so mamabasa natan ed satan. Salamat lamet!”
Sayan maabig a palapagan so walaan na 256 iran pahina, a parehon kabaleg na sayan magasin, tan sikato so walaan na masulok a 150 ilustrasyon, kaslakan to et diad mararakep a kolor. Mangipawit lambengat na ₱35.00; melag ₱17.50.
Ipangasin ipawit, libre-koreo, so libron You Can Live Forever in Paradise on Earth. Ipanengneng diad pananda ed onggendan iran kahon no kasin labay yo so baleg ya edisyon ed ₱35.00 [ ] odino nayarin labay yo so melag ya edisyon diad ₱17.50 tan [ ] akalaktip so manepeg a kantidad.