Panangipanengneng na Panamabli ed Duaran Sankabalgan a Balikas na Aro
“No nipaakar ed sikatayo, mangaro itayo, lapud sikatayo so inmunan inaro to.”—1 JUAN 4:19.
1. Anton ehemplo so inletneg nen Jesus ed sikatayo?
PANON so sankaabigan a pakapangipanengneng tayo na panamabli ed baleg ya aron imbalikas nen Jehova a Dios tan si Jesu-Kristo ed sikatayo? Say manunan dalan et diad pangalig ed si Jesus, ya andi-kesaw a nantasi ed ngaran nen Ama to tan Panarian. (1 Pedro 2:21) Satan so ginawa to diad saray kaabungan, diad saray sinagoga, diad templo, diad saray alusadsar na palandey, tan diad gilig na baybay. Imanoen tayo so siamiran nikadkaduman dalan a nayarin nilukas ed sikatayo.
Say Kabkaabungan a Kimey
2. Panon so pakapantultuloy tayo ed kimey na panagkabkaabungan?
2 Say ununa, tan angangko et sankabitaran, a dalan a nayarin pangipanengnengan tayo na aro tan panamabli tayo et diad iyakar ed kabkaabungan a sankatarok so maong a balita na Panarian na Dios. Say panggawa na ontan so mankaukolan na peteg a bulos a panagsalita lapud mantultuloy a lalanoren to so direktan piabet ed arum, a dakel ed sikara so mangipasen ed sikatayo a bilang managdisturbo. Nakakaukolan so puron aro ed Dios tan ed kaabay pian mantultuloy ya onla ed saray puerta, anggaman nayarin naabet tayo so agpanangimano, kagonigonan, panggula, odino direktan isusumpa.—Ipareng so Ezequiel 3:7-9.
3. Anton Makasulatan a letnegan so wala ed sikayo diad kimey na kabkaabungan?
3 Say rekord na Ebanghelyo ed saray bilin nen Jesus ed saray 12 apostoles to, tan saginonor diad 70 ebanghelistas, so malinlinew a mangipanengneng a sikara so linma ed kabkaabungan ya angipulong na maong a balita na Panarian na Dios. (Mateo 10:5-14; Lucas 10:1-7) Diad Gawa 20:20 ibabaga nen Pablo so inyakar to ed kabkaabungan. Saraman a salita so inmaplika ed impanggawa to na panagpastol a kimey, balet diad bersikulo 21 et andi-duaruwan tutukoyen to so kimey, lapud inyarum nen Pablo: “Nagnap ya intarok ko so pantasi ed saray Judios tan diad saray Griego”—aliwan diad saray Kristianon agagin lalaki tan bibii—“nipaakar ed panagbabawi ed Dios tan pananisia ed Katawan tayon Jesus.” Sano gawaen so panagpastol ya idadalaw, say sakey a matatken so aliwan gendagendat ya ipaseseg to so ‘panagbabawi ed Dios tan pananisia ed Jesus.’ Imbes, pasesegen toray kaparan Kristianos a nawalaan na mabiskeg ya apresasyon ed saray pantitipon odino diad ministeryo, odino sikara so tulongan to ed saray personal a problema ra.
4. Anto so mamaseseg ed sikatayo a mibiang diad panagpulong ed kabkaabungan?
4 Aliwa lambengat a wala so mabitar a Makasulatan a letnegan diad iyakar tayo ed kabkaabungan noagta saray bunga na satan a kimey so mangipanengneng a say bendisyon nen Jehova so wala ed satan. On, “say kakabatan so napamintuaan a matunong diad panamegley na saray gawa to.” (Mateo 11:19) Mabetbet, saraman so onla ed kabkaabungan so makanengneng na pamatnagan na panangiwanwan na anghel ya angitonton ed sikara diad saraman so nanaerasan tan napepegaan ed inkatunong. Say unabung so angibaga a sikato so mangipipikasi ed tulong tan say indalaw na Tasi so angebat ed satan a pikakasi.
5. Anton maabig a katulongan so wala ed sikatayo diad ministeryo a kabkaabungan, tan diad antoran nanduruman dalan so pakatulong na satan ed sikatayo?
5 Agaylan baleg a tulong ed lawak na kimeyan so wala ed sikatayo diad libron Reasoning From the Scriptures! Kinarga to so dakel iran makapasagyat iran panangigapo ed tongtongan diad Biblia tan ontan met ed makanan impormasyon ed dakel iran Makasulatan odino relihyoson tema. Sirin aglabat aawiten noagta itultuloy a bukayen. Saray payunirs ed partikular so angibalikas na baleg ya apresasyon ed sayan mabmablin katulongan ed lawak na kimeyan. Kasin sarag yon ipatnag so apresasyon yo ed aro na Dios diad pangusar ed sayan libro a lalon nagnap tan lalon epektibo?
6. Ontalindeg itayon makagamor na anton personal a gungguna diad iyakar ed kaabungan a sankatarok so mensahe na Panarian?
6 Agtayo ibabaliwala so katuaan a sikatayo so personal a nagunggunaan na baleg diad pibiang ed kabkaabungan a ministeryo. Legan a sikatayon Kristianos so onkiwas ed pananisia tayo, magmaliw a lalon mabiskeg; legan a sikatayo so mansalita a tekep na kumbiksion, sikato so napabiskeg. Agtayo nibaga ed arum so nipaakar ed ilalo tayo ya aglalon magmaliw a masnag so ilalo tayo. Anggapo so kapara na pibiang a maparanay ed kabkaabungan a ministeryo diad panamayubo ed bunga na espiritun abitla ed Galacia 5:22, 23. Talagan ontan, lapud ipapaseguro na Biblia ed sikatayo: “Say mapalangkap a too so onaligwas; siopaman a manalog ed arum et sikato met a dili so nasalog.”—Uliran 11:25, New International Version.
Panaggawa na Panagpawil
7, 8. Diad anton lohikal tan praktikal a rason a sikatayo so manggawa na panagpawil?
7 Say komaduan dalan na ikiwas tayo ed aro ya impanengneng na Dios tan si Kristo ed sikatayo et diad panaggawa na panagpawil ed saray totoon diad akauna et angipanengneng na interes ed mensahe na Panarian. Si Pablo tan Bernabe so sinononot ed saraman so pinulongan da. (Gawa 15:36) Diad tua, say inkamatukoy so mankaukolan a sikatayo so manggawa na panagpawil. Legan a mantatasi ed kabkaabungan, impormal, odino diad saray lansangan, sikatayo so manaanap ed saraman so “manonot ed espiritual a nakakaukolan da.” (Mateo 5:3) Mapatnag, diad pangiter ed sikara, a singa panangibaga, na sanbason espiritual a danum odino sakey a piraso na espiritual a tinapay so kapiganman et aliwan magenap. Pian sikara so makapankurang ed dalan na bilay, nakaukolan da ni so nagkalalon tulong.
8 Say ununan sagpot tayo so nayarin nipareng diad panagtanem ed saray bukel na katuaan. Balet a singa impanengneng nen apostol Pablo ed 1 Corinto 3:6, 7, nagkalalo ni so nakaukolan. Aliwan magenap so impantanem to. Saray bukel met so mankaukolan na danum, a singa inter nen Apollo. Insan nayarin nailaloan a say Dios so mamabaleg ed satan. Say nengneng na kimey so papaulianan na arum, tan ingen et dakel so mangipapasen ed satan a peteg a sankainomayan a nengneng na Kristianon ministeryo. Akin? Lapud saray totoon pawilen tayo so angipanengneng la na interes.
Panangikondukta na Saray Panangiyaral ed Biblia
9. Akin a say panangikondukta na panangiyaral ed Biblia so nepeg a kalat yo?
9 Sano saray panagpawil so nagawan maparanay ed totoon angipanengneng na interes ed mensahe na Panarian, say resulta so mabetbet a panangiyaral ed Biblia—say komatlon pakapangipanengnengan tayo na apresasyon tayo. Peteg a sikato so sankagayagaan tan makatumang a tuloy a nengneng na ministeryo tayo. Akin? Bueno, agaylan gayaga so pakanengneng ed saray totoon ombubulaslas ed pikakabat tan panamabli ed saray katuaan na Biblia, a sikara so nanengneng a mamapasimbalo ed saray bilay da, tan tulongan ira ya anggad idedika ra so bilay da a manggawa ed linawa na Dios tan nabautismoan! Saray ontan so tuan nipasen a bilang espiritual ya ananak tayo tan sikatayo so espiritual ya atateng da.—Ipareng so 1 Corinto 4:14, 15; 1 Pedro 5:13.
10. Anton tipikon ehemplo so mangipanengneng ed kablian na panangikondukta ed saray panangiyaral na Biblia?
10 Imanoen so sakey a tipikon alimbawa. Sakey a misioneron mankakabkaabungan ed sakey ya isla na Caribbean so akapitongtong ed sanasawan hippie a say abung da so aliwan mauksoy tan asiwaklat. Ingen imbalikas da so interes. Nipalima so sakey a katulongan ed panagaral na Biblia, tan nigapo so panagaral na Biblia ed sanasawa, ya agni nankasal anggaman sikara so walaan na pigaran ananak. Diad pantutuloy na panagaral, say ayaman so ginmapon nengneng to so lalon presentabli tan ontan met ed sanasawa tan saray anak da. Agnambayag et say sanasawa so angerew ed misionero a sikara so kasalen to, a nilukasan to so dalan diad inkabautismoan da. Insan sakey ya agew et say balon agin laki so malikeliket ya angipanengneng na lisensya to ed panagmaneho na auto, say sankaunaan ya agamoran to. On, antis a sikato so nagmaliw a Tasi nen Jehova, agto anengneng so pankaukolan na pangala na balanglan lisensya ed kasal odino lisensya ed panagmaneho, balet natan et sikato so ontutulok ed saray ganggan na Dios tan ed saray ganggan nen caesar.
Panagtasi ed Lansangan
11, 12. (a) Walaan itayo na anton Makasulatan a panamaseseg a mibiang ed panagtasi diad lansangan? (b) Antoran rason so wala diad panggawa tayo na ontan?
11 Say komapat a dalan na pakapangipanengneng tayo na panamabli ed ginawa na Dios tan si Kristo ed sikatayo et diad panagtasi ed lansangan. Sano sikatayo so mibiang, sikatayo so ontutulongan diad kasumpalan na Uliran 1:20, 21 ed bengatlan literal a dalan: “Say tuan kakabatan so mankelyaw a maksil ed mismon lansangan. Ibesngaw to so boses to ed mapalaway a pasen. Sikato so onkelyaw ed atagey a sampot na saray mangalangal a lansangan.”
12 Lawas a wala so dakel iran maabig a rason tayo a mibiang a maparanay ed sayan nengneng na panangipulong ed Panarian. Diad dakel iran pasen, nagkalalon mairap so pakasabi ed saray totoo diad abung. Sikara so balanglan mibibiang ed arum a nengneng na panligliwaan, panagsaliw, odino panagtrabaho. Ontan met, dakel a totoo so manbibilay ed saray mairap a looban iran apartment odino condominiums, ya agla salambiten iraman so manaayam ed saray hotel. Balet mabetbet a walaray totoon nanengneng ed saray lansangan.
13. Say panagtasi ed lansangan so nayarin nawalaan na antoran resulta? Iyilustra.
13 Sakey a matatken ed Estados Unidos so kaplesan a mangikokondukta na apatiran panangiyaral na Biblia ed saray totoon inmunan apitongtongan to ed kimey na panagtasi ed lansangan. Siempre, sikato lambengat so agnantayareg ya andi-esel (anggaman diad arum iran dalin et ontan so iyaabuloy na ganggan). Noag ingen, diad sakey a makaaron imis tan magayagan boses, inasinggeran toray totoon akatanyareg, manaalagar na luluganan, odino manaakar. Saray ‘balikas to so masayaksak, atimplaan na asin,’ tan inusar to so pakatebek ed no panon so pitongtong ed kada sakey. (Colosas 4:5, 6; 1 Pedro 3:15) Aliwa lambengat a sikato so akagamor na saray panangiyaral ed Biblia diad ontan a panagtasi ed lansangan noagta sikato met so maaligwas diad panangipalima na literatura ed saray dakel. On, diad pagmaliw a maayos ed panagkawes tan nawalaan na makaaron imis a tekep na mabulos a panagsalita, sikayo so magmaliw ya epektibo diad panagtasi ed lansangan. Diad tua, limaran Tasi so agano nin akapalima na masulok a 30 kopya na libron Life—How Did It Get Here? By Evolution or by Creation? diad saray pasen na mapublikon panagsaliwan. Dakel ed saray libro so inala na totoon manyudyurong ed luluganan da.
Impormal a Panagtasi
14. Panon a mapatnag so kablian na impormal a panagtasi?
14 Say komaliman dalan a pakapangipanengnengan tayo na panamabli ed baleg ya aron imbalikas na Dios tan si Kristo ed sikatayo et diad impormal a panagtasi. Agaylan saya so mabetbet ya epektibo, namparan diad pananap ed saray totoon nanaerasan tan napepegaan ed inkatunong tan diad panangipalima ed literatura! Peteg a sikato so sakey a dalan a pakatalineng tayo ed simbawan naromog diad Efeso 5:15, 16, ‘say panganamot ed pankanawnawan panaon ed inkasikatayo.’ Inggapo na sakey a misionero so pitongtong ed kaparan pasahero ed taksi. Impanengneng na laki so interes. Agawa so panagpawil tan nigapo so panangiyaral ed Biblia. Natan et saman a laki so sakey a Kristianon matatken. Diad arum a pasen et sakey a matatken so angigapo na impitongtong ed sakey a bii, a diad kaunoran, et sinalatan to so relihyon to diad pangasawa na sakey a Judio. Kinaliktan to ya amtaen no siopa so inmuna, si Moises, Noe, David, tan arum nira. Imbaga na matatken ed bii a say nakaukolan to et say libron Bible Stories, a mangipipresenta ed saray agawgawa ed Biblia diad kronologon oksuyan. Anggaman sikato so sigpot ya agto kabkabat, say bii so sipaparaan ya angiter ed ngaran to tan address tan say nakaukolan a kontribusyon ta pian nipatulor to ed sikato so libro.
15. Anto so ontulong ed sikatayo diad pagmaliw ya alerto ed saray pankanawnawa ed impormal a panagtasi?
15 No maminsan, diad takot ya ompan nainsulto, nayarin sikatayo so masuyat a mangigapo na tongtongan ed sakey a manbibiahe a kaabay tayo. Panon kabetbet, anggaman kuan, a sikatayo so siyayaman ya atumangan no sikatayo so awalaan na tepel a manggawa na ontan! Say apresasyon ed kaabigan na Dios tan say pankaukolan na totoo so ontulong ed sikatayon nawalaan na nakaukolan a tepel. On, nonoten a say “Dios so ag-angiter ed sikatayo na espiritu na inkamabaing, noagta espiritu na biskeg, na aro tan ed dilin-disiplina.”—2 Timoteo 1:7, NIV.
Panamarawes ed Saray Estranghero
16. Akin a sikatayo so nepeg ya alerton mangimano ed saray estranghero ya ondadalaw ed Kingdom Hall tayo?
16 Say komanem a dalan na pakapangipanengnengan tayo na pisasalamat ed Dios tan si Kristo et diad panamarawes ed saray estranghero ya ondago ed Kingdom Hall tayo. Say aro ed kaabay so manggawa ed sikatayon alerton mangimano ed anggan siopan estranghero ya ondalaw ed pasen na panagdayewan tayo. Pambanikelan tayon sikato so manliknan relaks, a manliknan sikato so walad limog na saray kakaaron masimoon ya interesado ed espiritual a pankaabigan to. Nayari angangko, ya aliwa labatlan say inkausyoso so anagdag ed sikato ya ondago. Nayarin peteg a sikato so nanaerasan tan napepegaan ed inkatunong. Say puron imano tayo ed sikato so nayarin mansumpal diad pangigapo tayo na panangiyaral ed Biblia, a tulongan tayo ed dalan na bilay. (Mateo 5:3, 6; 7:13, 14) Diad tua, sayan mismon bengatla so agawan mabetbet. Sakey a misionero ed inmunan klase na Watchtower Bible School of Gilead so akaimano a saray duaran maaligwas ya inyaralan to ed Biblia et saraman so inmunan apitongtongan to ed Kingdom Hall.
Panagtasi ed Panamegley na Sulat
17. Say panagtasi ed panamegley na sulat so nayarin nawalaan na antoran resulta?
17 Say komapiton dalan na pakapantasi tayo, diad ikiwas ed aron impanengneng na Dios tan si Kristo ed sikatayo, et diad pansulat. Mabetbet, saramay manguusar ed sayan porma na panagtasi so makakaawat na saray panamablin bales. Saya so sakey a metodon inusar na arum iran sigpot-panaon a ministros a temporaryon agmakayarin mankabkaabungan lapud pisikal a kaleteyan. Alimbawa: Wala so sakey a pamilyan walaan na 12 anak. Sakey ya agew et say ama so anempet a nalmoan ton limara ed sikara so pinatey na sakey ed saray onkakaraw ed marikit to. Kaapaan so impananap to na ligliwa ed saray klero na Kakristianoan. Insan sakey ya agew et sikato so akaawat na sulat a nanlapud sakey ya estranghero, sakey a Tasin akabasa ed peryodiko na trahedya to tan kinaliktan ton ligliwaen, ya intekep to so libron Katuaan. Saya so aanapen na saman a laki. Natan et sikato, met, la so sakey a magunaet a Tasi.a
Panagtelepono
18, 19. Anto so arum a paraan diad panangipulong ed maong a balita so aromog na arum ya epektibo, tan akin?
18 Diad pamitla ed komawalon nengneng na panagtasi, wala so pankanawnawan mangusar ed telepono diad panangipulong ed maong a balita na Panarian. Ombabaleg a saya so napapaneknekan a makapaliket tan epektibon porma na panagtasi. Lalon ondarakel a Tasi so magmamaliw ya onsiano ed sayan nengneng na ministeryo, a walaan na malaem a pangirekomenda ed satan. Diad panamegley na satan et napitongtongan tayo so arum a totoon agtayo napiarapan diad kimey na kabkaabungan. Sano nagawan sikakabat so panagtasi ed telepono, a tekep na panangasi, taktika, tan inkamakabat, arum so akaromog na lalon magmaong a kiwas nen say idalaw ed ontan iran totoo diad kaabungan da.
19 Sakey a kongregasyon a Hapones ed bansan mansasalita na Ingles so manguusar na libro na telepono a bilang kabiangan na teritorya to. Saray manangipalapag so mantelepono ed kangaranan na saray Hapones tan iyuksoy da so idalaw a personal ed saraman so interesado. Literal a nigapo ra so dinosenan panangiyaral ed sayan paraan.
Panagtasi Diad Panamegley na Maabig a Kondukta
20, 21. Say kondukta tayo so nayarin nawalaan na antoran maabig ya epekto? Iyilustra.
20 Say komasian a dalan a pakapangitarokan tayo na dayew ed Dios et diad maabig a kondukta tayo. Aminsan et imbaga na sakey a Ruson dyurnalista a say maabig a kondukta tayo so sankaabigan a sermon tayo. Diad tua, naulit-ulit a say peryodiko so nankomento ed atagey a moralidad na saray Tasi nen Jehova. Inreport na sakey: “Saray Tasi nen Jehova so abidbir a sankamatuaan a totoo ed Republika Pederal na Alemanya.” Diad gapo na paneeskuela to, intarok na sakey a biin Tasi so brosyur ya School ed maestro to. Satan so maunganget ya impulisay na maestro to, a kuanton agto labay so antokaman nipaakar ed saray Tasi. Anggaman ontan, sinmabi panaon a say maabig a kondukta na Tasin bii so anagyat ed sikaton mangirayew tan sengegan na interamentin impanguman na awawey to ed saray Tastasi. Diad mipadparan kabaliksan et say sulat a naawat na atateng a Tasi a nanlapud maestro na ananak da: “Say agnipukay a sukat na aligwas ed pananisia yo et saray anak yo.”
21 Saramay taga mundo so agmakapangibaga na maabig nipaakar ed saray Tasi nen Jehova ya agda itarok so dayew ed Dios tan si Kristo. Ontan a peteg so pansumpalan to. Agta imbaga nen Jesus a nepeg tayon isindag so liwawa tayo ta pian nanengneng na totoo so maabig iran gawa tayo tan iter da so dayew ed mangatatawen ya Ama tayo? (Mateo 5:16) Peteg, diad maabig a kondukta tayo, naparakep tayo so katuaan. (Tito 2:10) Segurado, say katuaan a say maabig a kondukta tayo so mangitarok na dayew ed Dios tan si Kristo tan tulongan to so arum a mankurang ed dalan na bilay so mabiskeg a rason diad pagmaliw tayon sinononot a tuloy a say kondukta tayo ed amin a panaon so andian na pakabalawan.
22. Diad dinan iran dalan na panangipanengneng na panamabli so pambabanikelan yo, tan akin?
22 A singa anengneng tayo la, walaray dakel a dalan a pakapangipanengnengan tayo na panamabli ed amin a ginawa nen Jehova tan si Jesu-Kristo ed sikatayo, nagkalautla ed baleg a balikas na aro ra. Diad pankurang, napaneknekan tayo so panangaro tayo ed kaabay.—Marcos 12:30, 31.
23. Diad anton unor a dalan so pakapangipanengnengan yo na panamabli ed Dios tan si Jesus?
23 Kaunoran, imanoen tayo a nipanengneng tayo so panamabli ed duaran sankabalgan a balikas na aro diad panselebra ed Pangdem na Katawan. Diad samay ultimon labi to ed dalin bilang sakey a too, inggapo nen Jesus so tinaon a panagselebra ed pangdem na tinapay tan alak, a mangirerepresenta ed laman to tan dala to. Ingganggan to a sayan selebrasyon so gawaen diad pakanodnonotan ed sikato. (1 Corinto 11:23-26) Sayan taon say Pangdem na Katawan so ombana ed Simba, Abril 12, kaselek na agew. Diad sankadalinan, saray Tasi nen Jehova so mandaragup diad katutulok ed ganggan nen Jesus. Agsasaewen!
[Paimano ed Leksab]
a Para ed detalye, nengnengen so Awake!, Oktubre 22, 1986, pahina 12-16.
[Tepetepet ed Panrepaso]
◻ Panon tan iner so nantasian nen Jesus?
◻ Diad antoran dalan so nayarin pangalig tayo ed si Jesus diad panangipanengneng na panamabli ed baleg ya aro na Dios?