Kapitulo 8
Niliktar a Manlapud Amin a Nasyones
1. Anton sipan so agawa ed si Abraham a mangipanengneng a say panangabobon na Dios so posibli a para ed “amin a pamilya” na katooan?
1 Si Jehova so maaron interesado ed totoo diad amin a nasyones tan tribu. Sikato so nanggawa na paraan ta pian amin a pamilya ed dalin so makapanggayaga ed panangabobon tan panamendisyon to. Diad kinen Abram (Abraham), sakey a kapolian nen Sem ya ilalak nen Noe, inkuan nen Jehova: “Paway ka ed dalin mo tan manlapud saray kakanayon mo tan manlapud abung nen amam diad dalin ya ipanengneng ko ed sika; tan gawaen ko so sakey a baleg a nasyon a manlapud sika tan papalaren ta ka tan gawaen ko so ngaran mo ya abalbaleg; tan mansumpal ka a sakey a bendisyon. Tan papalaren ko raman so mamapalar ed sika, tan saramay mangisamba na mauges ed sika so ayewen ko, tan amin a pamilya ed dalin so peteg a mamapalar na inkasikara diad panamegley mo.” (Genesis 12:1-3; Gawa 7:2-4) “Amin a pamilya ed dalin”—satan so mangisasakup ed sikatayo natan, anggaman anton nasyon so nianakan tayo odino lenguahen sasalitaen tayo.—Salmo 65:2.
2. (a) Singa si Abraham, anton kalidad so nakaukolan tayo? (b) A singa nipanengneng ed Hebreos 11:8-10, panon so impangiter nen Abraham na ebidensya ed sayan kalidad?
2 Say sakey ya angibagaan nen Jehova ed sayan sipan et sakey a too na pananisia, unong a singa sikatayo so nepeg a nawalaan na pananisia no labay tayo so minabang ed bendisyon a manlapud Dios a nisipan dia. (Santiago 2:23; Hebreos 11:6) Say pananisia nen Abraham so aliwa lambengat a pasapasan sisisiaen noagta satan so inulop na aksion. Satan so anagdag ed sikaton ontaynan ed Mesopotamia ya onla ed dalin ya agto nin balot anengneng. “Diad pananisia et sikato so nanayam a bilang sankaili ed dalin ya insipan a singa diad sakey ya arawin dalin,” ya agto insiglaot so inkasikato diad anggan anton syudad-panarian diman. “Lapud sikato so manaalagar ed syudad [Panarian na Dios] a walaan na saray peteg a letnegan, a say managpaalagey tan managgawa ed syudad et say Dios.”—Hebreos 11:8-10.
3. Anton manangusisan subok na pananisia so sinagmak nen Abraham nipaakar ed si Isaac?
3 Sanen arapat nen Abraham so edad a 100 taon tan si asawa ton Sara so 90, sikara so mamilagron pinapalar nen Jehova na sakey ya anak a laki, si Isaac. Nipaakar ed sayan anak, sinagmak nen Abraham so manangusisan subok na pananisia tan katutulok ed Dios. Inwanwan nen Jehova si Abraham ya alaen to si Isaac, a natan et sakey a lakin wala ed kalangweran, ya iyakar ed dalin na Moria tan diman et iyapay to a bilang sakey a pinuulan ya iyaapay. Diad pananisia ed pakayari na Dios a mangipawil ed anak to ed bilay diad kioli, si Abraham so tinmulok. (Hebreos 11:17-19) Si Isaac, matulok ed si ama to, so abalor la ed altar tan wala ed lima nen Abraham so yuro a pamatey ed sikato sanen sinmalet so anghel na Dios. Say subok so nantultuloy ni a mamaneknek a si Abraham et agto ikibot so antokaman ed Dios. Kanian pinekderan na Dios so sipan to ed si Abraham, a singa ibabaga na Biblia:
4. Diad saman ya inkagawa, anton malaknab ya importantin sipan so ginawa na Dios nipaakar ed saray totoo ed amin a nasyones?
4 “‘Sambaan ko ed inkasiak,’ kuan nen Jehova, ‘a makasengeg ed katuaan a ginawam iyan bengatla tan agmo inkibot so anak mo, say alenleneg ya anak mo, peteg a sika so papalaren ko tan peteg a parakelen ko so binim a singa saray bibitewen ed katawenan tan singa saray buer ed gilig na dayat; tan say binim so mangayarian ed pinto na kakabusol to. Tan diad panamegley na binim et amin a nasyones na dalin so peteg a mamapalar na inkasikara nisesengeg ed katuaan a tinalineng mo so boses ko.’”—Genesis 22:15-18.
5. (a) Anto so inyanino na impanggetma nen Abraham a mangiyapay ed si Isaac? (b) Diad kasumpalan na Genesis 12:3, panon a saray totoo so ‘mangisamba na mauges’ ed si Babaleg ya Abraham, tan diad anton pansumpalan? (c) Panon so “pamendito” tayo ed sikato?
5 Sano natebek tayo a say Babaleg ya Abraham et si Jehova tan si Isaac so angiyanino ed si Jesu-Kristo, et naapresya tayo no panon a sarayan agawgawa so importante ed sikatayo a personal. Diad katuaan, sikato no panon so ikiwas tayo ed si Jehova a Dios so mangigeter na arapen. Say ilalo ed maandon bilay so posibli ed sikatayo lapud say Dios so peteg ya angiter ed bogbogtong ya Anak to a bilang sakey a bagat ed saray kasalanan tayo, a singa inyilustra na impanggetma nen Abraham a mangiyapay ed si Isaac. (Juan 3:16) Anggan siopan ‘mangisamba na mauges’ ed si Jehova, a modmoraen odino leglemewen toray maaron gagala to, so onsilong ed ayew a mankabaliksan na maandon kadederal da. (Ipareng so 1 Samuel 3:12-14; 2:12.) Balet no sikatayo so manangapresyan totoo, “benditoen” tayo so Babaleg ya Abraham. Panon? Diad sibubulos a pamidbir a manlapud si Jehova so amin a maabig a bengatla, a pati say agkanepegan a langkap na bilay diad panamegley na Anak to. Ontan met, ibaga tayo ed arum so nipaakar ed kaabigan nen Jehova tan say masnag iran kalidad na inkaari to. (Santiago 1:17; Salmo 145:7-13) Diad onia et idadasig tayo so inkasikatayo a mangawat ed saray bendisyon a manlapud sikato diad ando lan ando.
Say Insipan a “Bini” nen Abraham
6. (a) Siopa so manunan “bini” nen Abraham? (b) Panon so pakagungguna tayo na bendisyon ya onsabi ed panamegley to?
6 Bilang kabiangan na oksuyan to diad pamendisyon ed katooan, ginagala nen Jehova so sakey a matunong a mangatatawen a gobierno. Si Jesu-Kristo so nianak a bilang kapolian nen Abraham, a bilang sankaimportantian ya ilalak to, odino “bini,” tan diad sikato so pangiteran nen Jehova na inkaari. (Galacia 3:16; Mateo 1:1) Sirin, a singa impanengneng na sinambaan na Dios a sipan ed si Abraham, sikato so diad panamegley nen Jesu-Kristo a saray totoo ed amin a nasyones so napapalar. Kasin gagawaen mo so nakakaukolan ta pian napawalam ed inkasika itan a bendisyon? Alimbawa, kasin say kurang na bilay mo so mangipapanengneng a papablien mo no panon kaimportante ed sika so nibagat a bilay nen Jesus? Tua kasin isusukom so inkasika ed autoridad to a bilang Ari?—Juan 3:36; Gawa 4:12.
7. (a) Siopa ni so nisakup ed “bini nen Abraham” (b) Panoy pikabat tayo ya aliwan amin a matoor a manlingkor ed Dios so onla ed tawen?
7 Si apostol Juan so naikdan na sakey a mapropetikon impakanengneng ed mangatatawen iran agawa ya anengneng toray arum a nikasakey ed si Jesu-Kristo diad mangatatawen a Palandey Sion. Sikara, met, so kabiangan na “bini nen Abraham.” A singa nibaga ed Apocalipsis 14:1-5, sikara so “asaliw a manlapud limog na katooan” tan manbilang na 144,000. (Galacia 3:26-29) Siopa so isasakup da? Ipapalinew a maong na Biblia ya agbalot gagala na Dios so pangawit ed amin a totoon matunong diad tawen. (Mateo 11:11; Gawa 2:34; Salmo 37:29) Say engranden pribilehyo na pibiang ed si Kristo diad Panarian ed tawen so ageteran ed “melag a pulok” a sikara so magmaliw ya arari tan saserdote a kaiba to diad sanlibon taon.—Lucas 12:32; Apocalipsis 5:9, 10; 20:6.
8. Kapigan so inggapo na panagpili ed “melag a pulok,” tan panon kabayag so pantultuloy to?
8 Panon so inggapo na impanpili ed satan a “melag a pulok”? Say magayagan imbitasyon na pibiang ed mangatatawen a Panarian so inmunan ninatnat ed saray Israelitas ed laman. Balet lapud kakulangan da na pananisia, agda niiter so sigpot a 144,000. Kanian saray Samaritanos tan, saginonor, totoo na amin a nasyones so naimbitaan. (Gawa 1:8) Say inmuna et saray kaiban tomatawir nen Kristo so alanaan na masanton espiritu diad Pentecostes nen 33 K.P. Say impanpili ed sayan grupo so nantultuloy ya anggad say 144,000 so tinatakan na Dios a bilang naabobonan. Insan say imano so nipaarap diad katipon na saray totoon manbilay diad dalin a bilang manamablin uuleyan na mangatatawen a gobierno.
9. (a) Anto ran balikas ed Biblia so onaplika ed sayan mangatatawen a klase? (b) Siopa so inyanino na silalaman ya Israelitas?
9 Saramay mananawir ed mangatatawen a Panarian a kaiba nen Kristo so atukoy ed Kasulatan a bilang “pinili,” “sasantos,” totoon “nilanaan . . . [na] Dios.” (2 Timoteo 2:10; 1 Corinto 6:1, 2; 2 Corinto 1:21) Sikara met so adeskriben tugyop a bilang say “nobya” nen Kristo. (Apocalipsis 21:2, 9; Efeso 5:22-32) Moriaen a manlapud sananey a punto de bista, sikara so tinawag na “agagi” nen Kristo, “kaiban tomatawir nen Kristo” tan “ananak” na Dios. (Hebreos 2:10, 11; Roma 8:15-17; Efeso 1:5) Anggaman anto so nasyonalidad da, sikara, espiritual a panagsalita, “so Israel na Dios.” (Galacia 6:16; Roma 2:28, 29; 9:6-8) Sanen impanampot nen Jehova so Ganggan a sipanan to ed silalaman ya Israel, intarok to so espiritual ya Israel ed balon sipanan diad inkasikato. Balet saray impideneng to ed silalaman ya Israel legan a sikara so wala ed silong na Ganggan so angiletneg na padron na saray bengatlan onsabi. (Hebreos 10:1) Siopa, sirin, so inyanino na nasyon na silalaman ya Israel, a pinili na Dios a bilang “nikaduman kayarian” to? Saray katuaan so mangituturo ed espiritual ya Israel, saraman so pinili na Dios a miuley a kaiba nen Kristo ed tawen. (Ipareng so Exodo 19:5, 6 ed 1 Pedro 1:3, 4 tan 2:9.) Kaiba si Kristo et tibukelen da so ahensya a diad panamegley to et saray bendisyon so ninatnat ed amin a matulok nin arum diad limog na katooan. Say apresasyon ed saya so tombok na pakatalos ed Biblia.
Saramay Napapalar diad Panamegley na “Bini”
10. Siopa so inretrato na saray aliwan-Israelitas a managdayew ed si Jehova?
10 Legan na panaon na impideneng na Dios ed nikaduman dalan diad nasyon na Israel, sikato met so nanggawa na maaron probisyon a para ed totoo ya aliwa lambengat ed saman a nasyon noagta saray puso ra so amakiwas ed sikaran mibiang diad tuan panagdayew a mikasakey ed saray Israelitas. Makatantandan asalambit so agawa ed sikara diad rekord na Biblia. Kasin sikara, met, so walaan na modernon-agew a kapetekan? On, peteg. Ireretrato ra ed dakel a dalan iraman so aliwan espiritual ya Israelitas balet ta panggagayagaan da so makapakelaw ya ilalo ed maandon bilay a bilang mangaraldalin ya uuleyan na Panarian na Dios. Sikaraya so sinalita na Dios ed si Abraham, a kuanton totoo a nanlapud “amin a nasyones na dalin” a mamapalar ed inkasikara diad panamegley na “bini” to.—Genesis 22:18; Deuteronomio 32:43.
11. (a) Anton impanalambit so agawa ed sayan grupo diad dedikasyon na templo nen Solomon? (b) Panon a saray “sankaili” so ‘angikasakey na inkasikara ed si Jehova’ diad agew tayo, a singa nipasakbay ed Isaias 56:6, 7?
11 Sikato so naynay a gagala na Dios ed amin a katooan so pankakasakey ed tuan panagdayew. Matukotukoy, diad samay dedikasyon na templon impaalagey nen Solomon ed Jerusalem, say ari so nampikasi a dengelen komon nen Jehova so pikakasi na saray sankailin angiyapay na makapaliket a panagdayew a kaiba so Israel. (2 Awaran 6:32, 33) Tan, diad Isaias 56:6, 7, insipan na Dios: “Saray sankailin akikasakey ed si Jehova pian manlingkor ed sikato tan pian mangaro ed ngaran nen Jehova, ta pian magmaliw ya ariripen to, . . . sikara met so itarok ko ed masanton palandey ko tan panliketen ko ra ed dalem na abung na pikakasi. . . . Nipaakar ed dilin abung ko et natawag na sakey ya abung na pikakasi a para ed amin a totoo.” Isindag so espiritun tutukoyen dia, say modernon-agew iran “sankaili” so natitipon natan a manlapud amin a nasyones, ya aliwa lambengat a basta manag-imaton, noagta bilang totoon ‘akikasakey ed si Jehova.’ Saya so gagawaen da diad pangidedika ra na bilay da ed sikato, a saya so isimbobolo ra diad kipalgep ed danum tan insan manlingkor ed nengneng a mangipatnag na aro ra ed “ngaran nen Jehova” tan ed amin ya irepresenta to.—Mateo 28:19, 20.
12. Panon so pangipanengneng na Mosaicon Ganggan no kasin saramay say ilalo ra et magmaliw a mangaraldalin ya uuleyan na Panarian na Dios so nepeg ya ontumbok ed saray atagey ya estandarte ya onaplika ed espiritual ya Israel?
12 Parehon katooran so nakakaukolan ed sikara a singa saraman so alanaan-na-espiritun Kristianos. Diad silong na Ganggan Mosaico, kinakukolan nen Jehova so “sankailin manaayam” ya ontalindeg ed tuan panagdayew pian mitunosan ed parehon ganggan a nipasakbat ed Israel. (Numeros 15:15, 16) Say siglaotan da so aliwan sakey lambengat a panangipalugar noagta diad puron aro. (Levitico 19:34) Ontan met, saraman so inyanino na sankailin manaayam so mangitatarok na bilay diad sigpot a pitunosan ed saray nakakaukolan nen Jehova tan manlingkor ed maaron pikakasakey ed nakdaan na espiritual ya Israel.—Isaias 61:5.
13. Anto ran detalye ed Isaias 2:1-4 so ipapuso tayo no labay so makaliktar ya onloob ed “balon dalin”?
13 Diad panamegley nen propeta ton Isaias, dineskribe nen Jehova so magunaet ya ulop na totoon nanlapu ed “amin a nasyones” a natan et ondadagsa ed sankatalbaan ya abung na panagdayew ed si Jehova. Impasakbay to: “Dakel a totoo so onla tan kuan da: ‘Dago kayo, sikayon totoo, tan ontatdang itayo ed palandey nen Jehova, diad abung na Dios nen Jacob; tan sikatayo so bangatan to ed saray dalan to, tan sikatayo so manakar ed saray basbas to.’” Bilang nansumpalan, sikara la so ‘amitpit ed saray kampilan da ya impagmaliw a dingding na lukoy’ tan, anggan diad utel na atabek-na-gulon mundo, sikara so ‘agla manaral na bakal.’ (Isaias 2:1-4) Kasin nanengneng mo so inkasika ed satan a maliket ya ulop? Kasin sika so mibibiang diad pilalek dan mangaral ed saray nakakaukolan nen Jehova, a mangiyaplika ed saraya diad bilay mo tan ontunda lan onsaral ed saray armas ed bakal? Insipan na Dios a sakey a baleg ya ulop a manumbok ed sayan kurang ya “ompaway ed baleg a kairapan” a bilang niliktar ya onloob ed mareen a “balon dalin.”—Apocalipsis 7:9, 10, 14; Salmo 46:8, 9.