Katuloyan na Kapitulo 13
Makapambilay Kayo na Ando lan Ando ed Paraiso diad Dalin
Panangiyuksoy ed Balon Gobierno ed Dalin
10. (a) Kapigan so impakanengneng na Dios ed pankaukolan nipaakar ed sakey a balon gobierno? (b) Diad Biblia, iner so inmunan akatukoyan ed sayan gobierno? (c) Siopa so inrepresenta na uleg?
10 Sanen atagaan la nen Satanas si Adan tan Eva a mikasakey ed sikato diad impanrebelde ya anengneng nen Jehova so pankaukolan na sakey a balon gobierno ed katooan. Kanian imbaga na Dios a tampol so gagala to diad pangiletneg na ontan a gobierno. Sayan gobierno so tinukoy to sanen imbalikas to so sentensya ed uleg, ya ibabaga ton peteg ed si Satanas a Diablo: “Mangyan ak na gulaan ed baetan mo tan ed bii tan ed baetan na binim tan bini to. Mekmeken to ka ed ulo tan sikato so sugaten mo ed mukor.”—Genesis 3:14, 15.
11. Diad baetan na siopa a wala so panggulaan?
11 Ingen nayarin itepet yo: ‘Iner dia so imbaga ton gobierno?’ Imanoen tayon maalwar ed sayan balikas tan nengnengen tayo. Ibabaga na kasulatan a wala so panggulaan odino pambusolan ed baetan nen Satanas tan “say bii.” Niarum ni, wala so panggulaan ed baetan na “bini” nen Satanas, odino ananak, tan say “bini” na bii, odino ananak. Ununa ed amin, nakaukolan tayon anapen no siopa “so bii.”
12. Anto so nibaga nipaakar ed “bii” diad Apocalipsis kapitulo 12?
12 Sikato so aliwan sakey a biin mangaraldalin. Si Satanas so andian na nikaduman panggula ed anggan siopan toon bii. Noag ingen, saya so sakey a simbolikon bii. Salanti, tatalindegan to so sakey a bengatla. Saya so nipanengneng ed unor a libro na Biblia, Apocalipsis, a niiter so malaem ya impormasyon nipaakar ed sikato. Ditan et “say bii” so adeskriben “aparakpan na agew, a manalalagey ed bulan, tan saray labinduan bibitewen so wala ed ulo to.” Pian natulongan itayon makaamta ed no siopa so irerepresenta na sayan “bii,” imanoen so ibaga na Apocalipsis nipaakar ed anak to: “Say bii so angiyanak na sakey ya ugaw a laki ed mundo, say anak a lakin manuley ed amin a nasyones ed tayukor a balatyang, tan say ugaw so tampol a niyakar ed Dios tan ed trono to.”—Apocalipsis 12:1-5, The Jerusalem Bible.
13. Siopa odino anto so irepresenta na “ugaw a laki” tan “say bii”?
13 Say pakaamta ed no siopa odino no anto so irerepresenta na “ugaw a laki” so ontulong ed sikatayon makaamta ed no siopa odino ed no anto so irerepresenta “na bii.” Say ugaw so aliwan sakey a literal a too, a singa say bii so aliwan sakey a peteg a toon bii. Ipapanengneng na kasulatan a sayan “ugaw a laki” o “manuley ed amin a nasyones.” Kanian say “ugaw” so mangirerepresenta ed gobierno na Dios a si Jesu-Kristo so manuley bilang Ari. “Say bii,” sirin, so mangirepresenta ed muyongan na Dios na matoor iran mangatatawen a pinalsa. Unong a singa say “ugaw a laki” so nanlapud “bii,” ontan met ed Ari, si Jesu-Kristo, so nanlapud mangatatawen a muyongan, say ulop na matoor iran maespiritun pinalsa ed tawen a mankikimey a mankakasakey diad panumpal ed gagala na Dios. Sayan muyongan so tinawag na Galacia 4:26 a “say Jerusalem ed tagey.” Kanian, sirin, sanen si Adan tan Eva so inmunan nanrebelde a sumpad pananguley na Dios, ginawa nen Jehova iray oksuyan a para ed gobiernon Panarian a manserbin ilalo na saray maaro ed inkatunong.
Nonoten nen Jehova So Sipan To
14. (a) Panoy impangipanengneng nen Jehova ya anonotan to so sipan to nipaakar ed “bini” a manmekmek ed si Satanas? (b) Siopa iyan insipan a “bini”?
14 Agnilingwanan nen Jehova so sipan to a mangibaki na sakey a “binin” magmaliw a manuley ed gobierno na Dios. Sayan manuley so maneral ed si Satanas diad kamekmek to ed ulo. (Roma 16:20; Hebreos 2:14) Saginonor, inkuan nen Jehova a say nisipan a bini so onsabi ed panamegley na matoor a toon si Abraham. Imbaga nen Jehova ed si Abraham: “Diad panamegley na binim amin a nasyones ed dalin so peteg a napapalar.” (Genesis 22:18) Siopa so sayan “bini” a nisipan ya onsabi ed panamegley na linya nen Abraham? Iter na Biblia ed saginonor so ebat, a kuanto: “Natan saray sipan so asalita ed si Abraham tan ed bini to. Inkuanto, aliwan: ‘Tan diad saray binim,’ a singa ed kipapasen na dakel, noagta a singa ed kipapasen na sakey: ‘Tan ed binim,’ salanti si Kristo.” (Galacia 3:16) Imbaga met nen Jehova ed si Isaac ya ilalak nen Abraham tan si apo ton Jacob a say “bini” na “biin-pinagkaasawa” na Dios so onsabi ed panamegley na linya na kapolian da.—Genesis 26:1-5; 28:10-14.
15, 16. Antoy mamaneknek a say “bini” so magmaliw a manuley ya ari?
15 Diad impangipalinew to a sayan “bini” so magmaliw a manuley ya ari, sayan balikas so imbaga nen Jacob ed si ilalak ton Juda: “Say setro [odino, autoridad na panuley] so ag-onarawi ed Juda, nisay say tayukor na managganggan a manlapud leet na saray sali to, ya anggad isabi na Shiloh; tan kayarian to so katutulok na totoo.” (Genesis 49:10) Si Jesu-Kristo so nanlapud tribu na Juda. Pinaneknekan to a sikato so “Shiloh” a “makankayarian ed katutulok na totoo.”—Hebreos 7:14.
16 Ngalngalin 700 taon kayari na saman a balikas ed si Juda, inkuan nen Jehova nipaakar ed si David ed tribu na Juda: “Aromog ko si David ya aripen . . . Tan peteg a siak so mangiletneg ed bini to diad ando lan ando tan ed trono a singa saray agew na tawen.” (Salmo 89:20, 29) Sanen inkuan na Dios a say “bini” nen David so niletneg ed “ando lan ando” tan say “trono” to so mantultuloy a “singa saray agew na tawen,” anto so labay ton ibaga? Tutukoyen nen Jehovan Dios so katuaan a say gobiernon Panarian ed lima na tinuro ton manuley, si Jesu-Kristo, so maando lawas. Panoy pikabat tayo?
17. Panoy pakaamta tayo a say nisipan a manuley et si Jesu-Kristo?
17 Bueno, nonoten so imbaga na anghel nen Jehova a si Gabriel ed si Maria nipaakar ed ugaw a yanak to. Inkuanto: “Tawagen mo so ngaran to a Jesus.” Balet si Jesus so agmansiansia lambengat a sakey ya ugaw, odino anggan sakey a too, ed dalin. Intuloy nen Gabriel ya ibaga: “Sayan sakey so magmaliw a baleg tan natawag na Anak na Sankatageyan; tan iter nen Jehova a Dios ed sikato so trono nen David ya ama to, tan sikato so manuley ya ari ed abung nen Jacob lawas, tan anggapo so anggaan na panarian to.” (Lucas 1:31-33) Agta tuan makapakelkelaw a ginawa nen Jehova iray oksuyan diad pangiletneg ed matunong a gobierno a para ed andi-anggaan a pankaabigan na saraman so mangaro tan manmatalek ed sikato?
18. (a) Panoy paneskribe na Biblia ed anggaan na mangaraldalin iran gobierno? (b) Anto so gawaen na gobierno na Dios ed totoo?
18 Say panaon so asingger la natan sano say gobiernon Panarian na Dios so onkiwas lan maneral ed amin na saray gobierno ed mundo. Insan si Jesu-Kristo so onkiwas a bilang mananalon Ari. Dedeskribien to ‘yan bakal, kuan na Biblia: “Diad saray agew na saratan ya arari say Dios na tawen so mangiletneg na sakey a panarian ya aglan balot naderal. . . . Mekmeken tan panganggaen to so amin na sarayan panarian, tan sikaton dili so mansiansia lawas.” (Daniel 2:44; Apocalipsis 19:11-16) Diad kaandi na amin nin arum a gobierno, say gobierno na Dios so mamenek ed peteg a pankaukolan na saray totoo. Say manuley, si Jesu-Kristo, so mangimano ya anggapo so matoor ya uuleyan to a mansakit, ontatken odino ompatey. Say krimen, problema ed abung, eras tan amin nin arum a problema so naresolbe la. Wala la so tuan kareenan tan kaligenan ed sankadalinan. (2 Pedro 3:13; Apocalipsis 21:3-5) Anggaman kuan, nakaukolan tayon aralen ni so nipaakar ed saramay magmaliw a manuley ed sayan gobiernon Panarian na Dios.