PART 5

Pawil Kayo La ed “Managpastol tan Manangasikaso na Kamarerwa Yo”

Kasin asalim la so sakey odino pigara ed saray subok ya abitla ed sayan brosyur? Diad tua et asali met iratan na dakel ya matoor ya lingkor na Dios nensaman tan diad panaon tayo. No tinulongan ira nen Jehova pian nasarag da iratan ya subok, seguradon tulongan to ka met.

Agka paulyanan nen Jehova no ompawil ka ed sikato

TANDAAN mo ya agka paulyanan nen Jehova diad ipawil mo ed sikato. Tulongan to kan nasarag so kapagaan mo, naekal so sakit na liknaan mo, tan nawalaan kay mareen ya nonot tan puso lapud malinis lay konsiensiam. Maliket ka lamet ya makapanlingkor ed si Jehova kaiba iray agagi ed kongregasyon. Say situasyon mo et singa ed saray arum ya Kristiano nen inmunan siglo ya sinulatan nen apostol Pedro: “Nensaman et singa kayo karneron nababalang, balet natan et akapawil kayo la ed managpastol tan manangasikaso na kamarerwa yo.”—1 Pedro 2:25.

Say ipawil ed si Jehova so sankaabigan ya nagawaan mo. Akin? Ta no gawaen mo itan, napaliket moy puso nen Aman Jehova. (Proverbio 27:11) Antam ya walay liknaan nen Jehova, kanian nayarin naliketan o naermenan ed saray gawaen mo. Siempre, ag-itayo piliten nen Jehova ya sikatoy aroen tan panlingkoran tayo. (Deuteronomio 30:19, 20) Oniay imbaga na sakey ya Bible scholar nipaakar ed satan: “Anggapo lay arum ya makapangilukas ed pusom, sika labat.” No mandayew tayo ed si Jehova lapud sikatoy inar-aro tayo, nibagan nilukasan tayoy puso tayo. No ontan so gawaen tayo, iikdan tayoy mabmablin regalo si Jehova—say katooran tayo—tan seguradon napaliket tayoy puso to. Seguradon anggapoy makapipara ed liket ya nalikna tayo no iter tayod si Jehova so dayew ya kanepegan to.—Gawa 20:35; Apocalipsis 4:11.

In-welcome na agagi so inactive ya sister ya pinmawil ed kongregasyon

Niarum ni, no ituloy mo lamet so mandayew ed si Jehova, napenek so espiritual a pankaukolan mo. (Mateo 5:3) Diad anton paraan? Itetepet na dakel ya totoo ed interon mundo, ‘Akin ya manbibilay tayo?’ Labalabay dan naamtaan so ebat ed saray tepet nipaakar ed gagala na bilay. Natural labat itan ya naiisip da ta pinalsa tayo nen Jehova ya walaan na ontan ya pankaukolan. Kanian maliket tayo no manlingkor tayo ed sikato. Pian nalikna tayo sirin so tuan liket tan inkapnek, idayew tayoy Jehova lapud panangaro tayod sikato.—Salmo 63:1-5.

Labalabay nen Aman Jehova ya ompawil ka ed sikato. Akin ya segurado kad satan? Isip mo pa: Panamegley na dakel ya pikakasi, maal-alwar ya imparaan iyan brosyur. Insan inter iyad sika na sakey ya elder, odino sakey ya agi. Binasam iya tan labay mon iyaplika ed bilay mo. Amin iraya et prueba ya agka nilingwanan nen Jehova. Sikatoy maar-aron manggagaway paraan pian onasingger ka lamet ed sikato.—Juan 6:44.

Makapaliket ya naamtaan ya agbalot lilingwanan nen Jehova iray akaarawin lingkor to. Ontan ya mismo so alikna nen Donna. Inkuan to: “Kalkalna ak ya akaarawi ed katuaan, balet naynay kon nanononotan imay ibabaga na Salmo 139:23, 24 ya: ‘Komon ta usisaen mo ak, O Dios, tan amtaen moy pusok. Komon ta surien mo ak, tan amtaen moy nanaaburidon kanonotan ko. Nengneng mo no kasin walaan ak na makapasakit a tendensia, tan itonton mo ak ed dalan na andi-anggaan.’ Amtak ya aliwa ak ya kabiangan na mundo, noagta kabiangan ak na organisasyon nen Jehova. Lapud satan et aliknak ya agak tinaynan nen Jehova; kaukolan ko labat so ompawil ed sikato. Tan malikeliket ak ta ontan so ginawak!”

“Lapud satan et aliknak ya agak tinaynan nen Jehova; kaukolan ko labat so ompawil ed sikato”

Lanang min ipipikasi ya naliknam lamet komon so “liket ya iiter nen Jehova.” (Nehemias 8:10) Agmon balot pagbabawian no ompawil kad si Jehova.

Ebat ed Saray Tepet Nipaakar ed Ipawil ed si Jehova

ANTOY UNONAN GAWAEN KO?

No say sakey et nansakit, nayarin agto tampol nipawil iramay inagew-agew ya gagawaen to. Ontan met ed situasyon mo. Pian ompawil so seseg mo, kaukolan moy mangan na sandaraiset iran espiritual ya naakan kada agew. Agmo iisipen ya nagawaan mon amin ya tampol. Diad gapo, nayarin pigaran minuto ka ya manbasa odino ondengel na recording na Biblia, manaral na sakey ed saray publikasyon tayo, man-browse ed jw.org ya website tayo, odino manbantay na video ed jw.org. Salim met so miaral ya tampol. Tan say sankaimportantian ya gawaen mo, manpikasi kad si Jehova tan kerew moy tulong to. ‘Ipaawit mod sikato so amin a kapagaan mo, lapud iyaansakit to ka.’—1 Pedro 5:7.

“Nen nagmaliw ak ya inactive, nababaingan ak ya maong ya manpikasi. Balet nen awalaan ak na pakpel ya manpikasi, walay elder ya binmisita ed siak. Impanonot tod siak ya agsinmawa si Jehova ya papawilen ak. Pinaseseg ak na samay elder ya gapoan koy manbasa na Biblia ya inagew-agew. Nen ginawak iman, apakiwas ak ya miaral lamet. Ag-abayag, manpupulong ak met la. Malikeliket ak ta agsinmawa si Jehova ya tulongan ak.”—Eeva.

ANTO KASI REAKSION NA AGAGI NO OMPAWIL AK?

Seguradon malikeliket kan i-welcome na saray agagi ed kongregasyon. Agda ka balawen odino husgaan, noagta ipalikna da ya inar-aro da ka, tan gawaen day anggaay nayarian da pian napaseseg ka.—Hebreo 10:24, 25.

“Nababaingan ak ya onla ed Kingdom Hall. Iisipen ko no panon ak ya tratoen na saray agagi. Walay maedad ya sister ya wadman lad saman ya kongregasyon 30 taon lay apalabas ya kuantod siak: ‘Malikeliket ak ta amawil ka anako.’ Sinmabid pusok so imbaga to. Talagan inar-aro ak na saray agagi.”—Javier.

“Akiaral ak ed Kingdom Hall tan inmirong ak ed bandad beneg pian anggapoy makaimano ed siak. Balet dakel so akabidbir ya siak imay ugaw ya mimiaral nensaman. In-welcome tan nilakap da ak kanian dinmeen so liknaan ko. Impalikna da ya kapamilya da ak.”—Marco.

PANON AK YA NATULONGAN NA SARAY ELDER?

Maaro kan tulongan na saray elder. Komendaan da ka ta labay mon ipawil imay “panangaron walad sika diad gapo.” (Apocalipsis 2:4) Tulongan da kan ipetek iray lingon agawaan mo, tan gawaen da itan “diad espiritu na inkaulimek.” (Galacia 6:1; Proverbio 28:13) Nayarin mangiyasain iray elder na mangiyaral ed sika na libron Panliketan so Bilay ya Anggapoy Anggaan! odino Onapit ed si Jehova. Seguradon agka paulyan na saray elder. Pabiskegen tan tulongan da ka anggad ombiskeg kad espiritual.—Isaias 32:1, 2.

“Legan na waloy taon ya inactive ak, lanang ak ya papasesegen na saray elder. Aminsan, walay elder ya angipanengneng na saray daan ya litrato mi. Impanonot na saraman iray balibalin nagagawaan ko nensaman kanian labay ko lamet ya nalikna imay liket nen manlilingkor ak ed si Jehova. Maaro ak ya tinulongan na saray elder pian nipawil lamet so seseg ko.”—Victor.

“Pabiskegen To Ka”

Diad songbook tayon “Mangansion a Malikeliket” Parad si Jehova, wala ray makapabiskeg tan makapaligliwan kansion ya makatulong ed sika ed ipawil mo. Singa bilang, imanom pa so lyrics na kansion numero 38. Nibase iya ed 1 Pedro 5:10 ya say title to et “Pabiskegen To Ka.”

Tinawag ka na Dios manlapud bilunget

tan impaamta to so katuaan.

Diad pusom et anengneng Ton pirawat mon

nakabat mo tan gawaey duga.

Sipan mon sikato so unoren.

Diad satan et tinulongan to ka.
Anak toy inter To ya para ed sika.

Pirawat toy pankaabigan mo.

No say mismon Anak to agto insiblet,

manmatalek kan biskeg iter to.

Say panangarom agto lingwanan.

Saray lingkor to agto pulyanan.

(KORO)

Dinondon ka na Dios tan kayarian to ka la.

Kanian pasesegen, pabiskegen to ka.

Protektaan, igiya ka ya anggad angga.

Pasesegen to ka, pabiskegen to ka.

Pian narengel iyan kansion ya walay boses, ontan met ed arum ni ran Kingdom song, i-scan so code odino onlad jw.org.