Magmaliw a Kaaro na Dios ed Ando lan Ando!

Kaukolan so pansagpot pian nawalaan na kaaro; kaukolan so pansagpot pian napansiansiay kaaro. Saray sagpot mon magmaliw tan mansiansian kaaro na Dios so mayamyaman a nabendisionan. Inkuan nen Jesus ed saraman so anisia ed sikato: “Say katuaan sikayo so gawaen to a bulos.” (Juan 8:32) Anto so kabaliksan na saya?

Napanggayagaan moy kawayangan natan. Nibulos ka manlapud palso iran bangat tan katilaan ya inkayat la nen Satanas. Nibulos ka manlapud kaandiay ilalo a mangaapekta ed bilay na minilyon a totoon agmikabat ed si Jehova. (Roma 8:22) Saray kakaaro na Dios so bulos ni ingen ed ‘takot ed ipapatey.’​—Hebreos 2:​14, 15.

Napanggayagaan moy kawayangan ed balon mundo na Dios. Agaylan makapakelkelaw a kawayangan so napanggayagaan mo ed arapen! Diad Paraison dalin, niwala so kawayangan manlapud bakal, sakit, tan krimen. Kawayangan manlapud inkaduka tan eras. Kawayangan manlapud itatakken tan ipapatey. Kawayangan manlapud takot, panamairap, tan ag-inkahustisya. Oniay ibabaga na Biblia nipaakar ed Dios: “Sika buskagen mo so limam, tan peneken mo so saray pilalek na ami’ bengatlan mabilay.”​—Salmo 145:16.

Manbilay ya ando lan ando iray kakaaro na Dios. Say andi-anggaan a bilay so sakey a mablin regalo ya iter na Dios ed amin a manggugunaet a mikaaro ed sikato. (Roma 6:23) Isipen pa no anto so kabaliksan na andi-anggaan a bilay a parad sika!

Nawalaan kay panaon a manggawa na dakel a bengatla. Anganko et labay mon naaralan no panon so panogtog ed sakey ya instrumento ed musika. Odino nayarin labay mon naaralan so pangipinta na saray litrato odino magmaliw a karpentero. Nayarin labay mon naaralan so nipaakar ed saray ayayep odino tanaman. Odino nayarin labay moy manbiahe tan nengnengen so nanduruman daldalin tan totoo. Lapud walaan ka na andi-anggaan a bilay et posibli irayan amin a bengatla!

Nawalaan ka na panaon ed pakawalaan na dakel a kakaaro. Say pambilay ya ando lan ando et pagmaliwen ton posibli so pakapikabat ed dakel nin totoo a nagmaliw a kakaaro na Dios. Naamtaan mo iray dunong tan maong iran kualidad da, tan sikaray magmaliw a kakaarom met. Naarom ira, tan aroen da ka met. (1 Corinto 13:8) Say pakawalaan na magnayon a bilay et mangiter ed sika na pankanawnawa a mikaaro ed siopaman ed dalin! Importanti ed amin, say pikakaarom ed si Jehova so lalon onelet legay ilalabas na saray siglo. Komon ta magmaliw kan kaaro na Dios ed ando lan ando!