Pian Napansiansiam so Kaaro, Nepeg a Magmaliw Kan Kaaro

Say pikakaaro so nibase ed aro. Diad lalon pakakaaral mo nipaakar ed si Jehova, lalon oneelet so panangarom ed sikato. Legan ya ombubulaslas so panangarom ed Dios, ombulaslas met so pilalek mon manlingkor ed sikato. Saya so mamakiwas ed sikan magmaliw a babangatan nen Jesu-Kristo. (Mateo 28:19) Diad piulop ed maliket a pamilya na Tastasi nen Jehova, naeksperiensiam so pikakaaro na Dios ed ando lan ando. Anto so nepeg mon gawaen?

Nepeg mon ipanengneng so panangarom ed Dios diad itulok ed saray ganggan to. “Saya so aro na Dios, a sumpalen tayo so saray ganggan to: tan saray ganggan to aliwa ran ambelat.”​—1 Juan 5:3.

Iyaplikam so nanaaralan mo. Insalaysay nen Jesus so sakey ya istorya a mangiyiilustra ed saya. Sakey a makabat a too so angipaalagey na abung to ed sakey a bato. Sakey a makulangkulang a too so angipaalagey na abung to ed kabueran. Sanen sinmabi maksil a bagyo, ag-aderal imay abung ya impaalagey ed bato, balet akusbo imay abung a nipaalagey ed kabueran. Inkuan nen Jesus a saraman so makarengel ed saray bangat to tan manggawa ed saratan et aliling day makabat a too ya angipaalagey ed bato. Balet saraman so dinmengel ed saray bangat to tan agda ginawa iratan et aliling day makulangkulang a too ya angipaalagey ed kabueran. Siopan too so labay mon pagmaliwan?​—Mateo 7:​24-27.

Dedikasyon. Kabaliksan na saya ya onasingger ka ed si Jehova diad pikakasi tan ibagam ed sikato a labay mon gawaen so linawa to ed ando lan ando. Say panggawa ed linawa na Dios so pakapatnagan a sakey kan babangatan nen Jesu-Kristo.​—Mateo 11:29.

Bautismo. “Manbinyag ka et urasan mo so saray kasalanan mo, a tawagen mo so ngaran to.”​—Gawa 22:16.

Sigpot a panlingkoran so Dios. “Dinanman a gawaen yo, gawaen yon mabulos, a singa nipaakar ed Katawan, et aliwan dia ed saray totoo.”​—Colosas 3:23.