Nagagawa ed North tan South America

Makabawas na Stress so Matalag ya Pan-check na E-mail?

Nayarin nabawasan so stress no mamitlo labat ed sanagew ya i-check so e-mail imbes ya mabetbet, base ed research ya ginawad Vancouver, Canada. Imbaga nen Kostadin Kushlev, say head ed sayan research: “Naiirapan iray totoo ya labanan so tukson lanang ya man-check na e-mail, balet no labanan da itan ya tukso, nabawasan so stress da.”

ISIPEN PA: Lapud manbibilay tayod “mapeligro tan mair-irap a panaon,” agta maabig no manggawa tayoy paraan pian nabawasay stress?—2 Timoteo 3:1.

Idadakel Lamet na Saray Sira

“Ondarakel lamet iray conch, lobster, tan sira ed saray lugar ya protektado na gobierno” ed Belize tan arum nin lugar ed Carribean, so inreport ed Wildlife Conservation Society (WCS). Inyarum ni na satan: “Say idakel lamet na saray nanaupot lan species ed saray protektadon lugar . . . et nayarin nagawa ed loob labat na 1-6 taon, balet pigaran dekada so kaukolan pian talagan ondakerakel iratan.” Oniay imbaga nen Janet Gibson, direktor na WCS, ed nagagawad Belize: “Malinew sirin ya makatulong so pamproprotekta na gobierno ed saray dayat pian ondakel lamet so sira tan nanduruman klase na bilay ed sayan bansa.”

ISIPEN PA: Agta say abilidad ya manparakel lamet na nanduruman klase na bilay et prueba ya walay makabat ya Amalsa?—Salmo 104:24, 25.

Krimen ed Brazil

Ondarakel so kason panagpatey ed Brazil, so imbalita na Agência Brasil. Nen 2012, say bilang na kason panagpatey et masulok ya 56,000—atan la so sankarakelan base ed rekord na Ministry of Health. Imbaga na public security specialist ya si Luís Sapori ya saya so pakanengnengan ya mauge-uges lay panaon tayo. No anggapo lay respeto na totoo ed saray ganggan, “magmaliw la ran brutal pian naala day labay da,” so kuan to.

KASIN ANTAM LA? Impasakbay la na Biblia ya onsabi panaon et “ombetel so panangaro na karaklan” tan ondakel so kaugsan.—Mateo 24:3, 12.