PANGOBSERBA ED NAGAGAWAD MUNDO

Interon Mundo

Say panagduksa ed saray bibii et “problema ya dinmakel a singa epidemya diad interon mundo,” unong ed World Health Organization (WHO). “Manga 35% ed amin ya bibii so makakaeksperiensya na panagduksa na asawa, ka-live in da, odino arum nin lalaki,” so kuan na WHO. “Mas dakel so kaso na panagduksa na karelasyon . . . , ya apektaen toy 30% ed saray bibii diad interon mundo.”

Britain

Unong ed impan-survey ed 64,303 a totoo, iisipen na 79 porsiento ya say “relihyon so sengegan na graben ermen tan gulo ed mundo natan.” Ontan met, ipapanengneng na census ed England tan Wales nen 2011 ya 59 porsiento labat na populasyon so angibagan Kristiano ira, inmabeba itan manlapud 72 porsiento nen 2001. Legan met na satan a panaon, say porsiento na mangibabagan anggapoy relihyon da et tinmagey, manlapud 15 et nagmaliw ya 25.

China

Unong ed balita, diad agano nin inuman a ley, nepeg ya saray adulton anak et agda labat bisitaen ya mabetbet iray matatken lan atateng da noagta asikasoen da met so “emosyonal a pankaukolan” na ateng da. Balet diad satan a ley, “anggapoy malinew ya abitlan dusa” parad saray anak ya ag-onunor.

Europe

Pepekien la natan na saray kriminal iray inagew-agew ya sasaliwen, a singa say cosmetics, sabon, tan anggan saray naakan. “Amin la lawarin ingredient ya anggano mamurmura et posiblin napeke,” so imbaga na presidente na sakey ya food-security consultancy. Unong ed tantiya na sakey ya eksperto, 10 porsiento na saray naakan ya nasaliw ed maaligwas iran bansa et aliwan puro.