2026 АЗЫ 13–19 АПРЕЛЫ
52 ЗАРӔГ Хуыцауӕн нывонддзырд
Донаргъуыд райсын цы нысан кӕны ӕмӕ уый ахсджиаг цӕмӕн у?
«Цӕттӕ кӕнут ахуыргӕнинӕгтӕ. Дӕттут сын донаргъуыд» (МАТФ. 28:19).
МАХ БАЗОНДЗЫСТӔМ
Донаргъуыд райсын ахсджиаг цӕмӕн у, донаргъуыд куы райсӕм, уӕд уымӕй цы равдисӕм ӕмӕ донаргъуыд куыд фӕдӕттынц.
1. Кӕцӕй йӕ зонӕм, донаргъуыд райсын тынг ахсджиаг кӕй у?
КУЫД амондджын вӕййӕм, ногтӕ донаргъуыд куы райсынц, уӕд! Фыццаг ӕнусы цӕрӕг чырыстӕттӕ дӕр тынг цин кодтой, н. э. 33 азы Фӕндзайӕм боны бирӕтӕ донаргъуыд куы райстой, уӕд. Уӕд апостол Петр ӕмбырды йӕ раныхасы дзырдта, донаргъуыд райсын тынг ахсджиаг кӕй у, уый тыххӕй (Хъуыд. 2:38, 40, 41). Петр ма ныффыста, «Чырыстийы тыххӕй сӕйраг ахуырӕдтӕм» кӕй хауынц «алыхуызон аргъуыдтӕ» дӕр (Дзут. 6:1, 2). Уӕдӕ Библийы сӕйраг ахуырӕдтӕй иу у донаргъуыды тыххӕй ахуырад ӕмӕ йӕ хъуамӕ хорз ӕмбарӕм. Цӕмӕн?
2. Донаргъуыды тыххӕй ахуырад ӕмбарын ахсджиаг цӕмӕн у?
2 Цӕмӕй хӕдзар тыхдымгӕйы рӕстӕг ма ныппырх уа, уый тыххӕй йын хъуамӕ уа фидар бындур. Раст афтӕ, кӕд адӕймаджы фӕнды, цӕмӕй йӕ уырнындзинад фидар уа, уӕд хъуамӕ Библийы ахуырӕдтӕ хорз ӕмбара. Уыцы ахуырӕдтӕм хауы донаргъуыды тыххӕй ахуырад дӕр. Ӕмӕ ацы ахуырад хъуамӕ хорз ӕмбарӕм, уӕлдай нӕу, донаргъуыд райсын фӕнд кӕнӕм ӕви донаргъуыд бирӕ азты размӕ райстам, уӕддӕр. Ацы статьяйы ӕркӕсдзыстӕм ахӕм фарстатӕм: «Донаргъуыд райсын ахсджиаг цӕмӕн у? Донаргъуыд куыд фӕдӕттынц? Донаргъуыд Фыд, Фырт ӕмӕ сыгъдӕг тыхы номыл райсын цы нысан кӕны?»
ДОНАРГЪУЫД РАЙСЫН АХСДЖИАГ ЦӔМӔН У?
3. Адӕймаг донаргъуыд кӕй райсы, уымӕй цы равдисы?
3 Адӕймаг донаргъуыд кӕй райсы, уымӕй алкӕй раз дӕр равдисы: Йегъовӕйы ӕмӕ Йесойы тыххӕй Библи цы дзуры, ууыл фидарӕй кӕй ӕууӕнды; йӕ тӕригъӕдтыл кӕй ӕрфӕсмон кодта; йӕ цард кӕй аивта, цӕмӕй Йегъовӕйӕн лӕггад кӕна; Йесойы йӕ Ирвӕзынгӕнӕгыл кӕй нымайы ӕмӕ Йегъовӕйӕн дзырд кӕй радта, йӕ организациимӕ йын иумӕ кӕй лӕггад кӕндзӕн. Адӕймаг Йегъовӕйы тыххӕй цӕрын куы райдайы, уӕд райдайы, ӕнусон цардмӕ чи кӕны, уыцы фӕндагыл цӕуын.
4. Адӕймаджы ӕнӕхъӕнӕй дӕр доны бын кӕй фӕкӕнынц, уый цӕуыл дзурӕг вӕййы? (Кӕс нывмӕ дӕр.)
4 Адӕймаг донаргъуыд куы фӕисы, уӕд ӕй ӕнӕхъӕнӕй дӕр доны бын фӕкӕнынц ӕмӕ йӕ фӕстӕмӕ сисынцa, цыма йӕ баныгӕдтой ӕмӕ йӕ фӕстӕмӕ цардмӕ раздӕхтой, уыйау. (Абар Колоссӕгтӕм 2:12.) Уый хорз абарст цӕмӕн у? Адӕймаджы доны бын кӕй фӕкӕнынц, уый ууыл дзурӕг вӕййы, ӕмӕ йӕ раздӕры цардӕн амард. Донӕй куы схизы, уӕд та райдайы ног цардӕй цӕрын, ӕмӕ йын царды Хуыцауы фӕндон ӕххӕст кӕнынӕй ахсджиагдӕр ницы вӕййы.
Адӕймаг донаргъуыд куы райсы, уӕд йӕ раздӕры цард ныууадзы ӕмӕ йын ӕппӕты сӕйрагдӕр свӕййы Хуыцауы фӕндон ӕххӕст кӕнын (кӕс 4 абзац)
5. Донаргъуыд райсыны тыххӕй цы хъуамӕ аразӕм, уый цӕимӕ ис абарӕн ӕмӕ цӕмӕн? (1 Петры 3:18–21).
5 Бакӕс 1 Петры 3:18–21. Мыййаг донаргъуыд ӕрӕджы райстай? Кӕд о, уӕд дӕм, чи зоны, афтӕ кӕсы, ӕмӕ донаргъуыд райсыны тыххӕй цы хъуамӕ аразай, уый у, Нойӕн стыр нау аразын куыд зын уыд, афтӕ зын. Фӕлӕ цымӕ уый йӕ фыдӕбоны аргъ у? Куыннӕ. Афтӕ зӕгъӕн цӕмӕн ис? Ахъуыды-ма кӕн Нойыл. Кӕд нау саразын стыр ӕмӕ зын хъуыддаг уыд, уӕддӕр ӕй хъуамӕ Ной сарӕзтаид, цӕмӕй Доны хъаймӕты аирвӕзтаид. Фӕлӕ йӕ Йегъовӕ ӕнӕ ӕххуысӕй нӕ ныууагъта – радта йын бӕлвырд амындтӕ, нау саразын куыд хъӕуы, уый фӕдыл. Нойӕн йӕ бон сси нау саразын, Йегъовӕйыл кӕй ӕууӕндыд, йӕ коммӕ кӕй каст ӕмӕ йын Йегъовӕ кӕй ӕххуыс кодта, уый фӕрцы. Нойау дӕуӕн дӕр дӕ бон суыдзӕн, Хуыцау дын цыдӕриддӕр дзуры, уый аразын (Райд. 6:22).
6. Донаргъуыд нӕ куыд ирвӕзын кӕны?
6 21-ӕм стихы апостол Петр ныффыста, зӕгъгӕ нӕ «донаргъуыд... ирвӕзын кӕны». Кӕй зӕгъын ӕй хъӕуы, доны бын дӕ кӕй фӕкӕндзысты, уый фӕрцы нӕ фервӕздзынӕ ӕмӕ дӕ тӕригъӕдтӕй уый фӕрцы не ссыгъдӕг уыдзынӕ. Нӕ тӕригъӕдтӕй нӕ ӕрмӕстдӕр Йесойы туг сыгъдӕг кӕны (1 Иоан. 1:7). Фӕлӕ уӕддӕр донаргъуыд райсын ахсджиаг у, уымӕн ӕмӕ уый Йегъовӕйы фӕнды. Ӕмӕ донаргъуыд куы райсӕм, уӕд дзы афтӕмӕй фӕкурӕм, цӕмӕй нын «йӕ разы сыгъдӕг цӕсгом уа». Йегъовӕ нын нӕ тӕригъӕдтӕ хатыр кӕнынмӕ алкӕддӕр цӕттӕ вӕййы. Ӕмӕ нӕ донаргъуыд уыцы хуызы ирвӕзын кӕны, ома нын донаргъуыды фӕрцы фӕзыны ӕнустӕм цӕрыны ныфс.
ДОНАРГЪУЫД КУЫД ФӔДӔТТЫНЦ?
7. Донаргъуыд куыд фӕисынц?
7 Библийы фыст ис, адӕймаджы донаргъуыд исгӕйӕ ӕнӕхъӕнӕй дӕр доны бын фӕкӕнын кӕй хъӕуы. Фӕлӕ донаргъуыд дӕттын куыд хъӕуы, уый тыххӕй дзы бирӕ лыстӕг хабӕрттӕ нӕй фыст. Фӕлӕ уӕддӕр Библийы фӕрцы ӕмбарӕм, донаргъуыды рӕстӕг цы ’мбӕлы ӕмӕ цы не ’мбӕлы аразын, уый. Зӕгъӕм, Библийы уагӕвӕрдты фӕрцы зонӕм, донаргъуыд чи исдзӕн, уыдонӕн донаргъуыд исгӕйӕ сӕ конд цавӕр хъуамӕ уа, уый. Стӕй зонӕм, донаргъуыд куыд исдзысты, уымӕ чи кӕсдзӕн, уыдон сӕхи куыд хъуамӕ дарой, уый дӕр (1 Кор. 14:40; 1 Тим. 2:9). Донаргъуыд фылдӕр хатт фӕдӕттынц хистӕр нӕлгоймӕгтӕ, фӕлӕ сын мах хъуамӕ уый тыххӕй уӕлдай кад ма кӕнӕм (1 Кор. 1:14, 15). Стӕй, адӕймаг донаргъуыд куыд исы, уымӕ цал адӕймаджы кӕсы, уый дӕр ахсджиаг нӕу (Хъуыд. 8:36).
8. Донаргъуыд чи фӕисы, уыдонмӕ цавӕр фарстатӕ раттынц ӕмӕ цӕмӕн? (Хъуыддӕгтӕ 2:38–42). (Кӕс нывмӕ дӕр.)
8 Библийы фыст ис, нӕ уырнындзинады тыххӕй ӕргом куы дзурӕм, уӕд кӕй фервӕздзыстӕм (Ром. 10:9, 10; кӕс комментари дзырдбастмӕ «рассказываешь другим», «Учебная Библия»-йы). Нӕ уырнындзинады тыххӕй ӕргом фӕдзурӕм, иннӕтӕн хорз хабар куы фӕхъусын кӕнӕм, ӕрмӕст уӕд нӕ, фӕлӕ донаргъуыд куы фӕисӕм, уӕд дӕр. Уымӕ гӕсгӕ, донаргъуыд чи фӕисы, уыдонмӕ раттынц дыууӕ фарстайы. Фыццаг фарста: «Дӕ тӕригъӕдтыл ӕрфӕсмон кодтай, дӕхи Йегъовӕйӕн снывонд кодтай ӕмӕ, Хуыцау адӕмы Йесо Чырыстийы фӕрцы кӕй ирвӕзын кӕны, ууыл баууӕндыдтӕ?» Адӕймаг ацы фарстайӕн разыйы дзуапп кӕй ратты, уымӕй равдисы, донаргъуыд райсынмӕ цӕттӕ кӕй у. Петр дӕр Фӕндзайӕм боны адӕмӕн загъта, цӕмӕй сӕ тӕригъӕдтыл ӕрфӕсмон кодтаиккой ӕмӕ донаргъуыд райстаиккой. Дыккаг фарста: «Ӕмбарыс ӕй, донаргъуыд куы райсай, уӕд Йегъовӕйы Ӕвдисӕн кӕй суыдзынӕ ӕмӕ Йегъовӕйы организацийы кӕй лӕггад кӕндзынӕ?» Адӕймаг ацы фарстайӕн разыйы дзуапп кӕй ратты, уымӕй равдисы, Йегъовӕйы организацийы амындтӕ кӕй ӕххӕст кӕндзӕн ӕмӕ хотӕ ӕмӕ ’фсымӕртимӕ иумӕ кӕй лӕггад кӕндзӕн. Раст афтӕ кодтой, Фӕндзайӕм боны донаргъуыд чи райста, уыдон дӕр. (Бакӕс Хъуыддӕгтӕ 2:38–42.) Адӕймаг дыууӕ фарстайӕн дӕр разыйы дзуапп куы ратты, уӕд йӕ бон вӕййы донаргъуыд райсын.
Адӕймаг донаргъуыд куы райсы, уӕд йӕ уырнындзинады тыххӕй ӕргом фӕзӕгъы (кӕс 8 абзац)d
9. Цӕмӕй нӕ Йегъовӕ райгонд уа, уый тыххӕй нӕ цы хъӕуы аразын?
9 Фӕлӕ донаргъуыд райсыны размӕ дӕр, чи зоны, ӕгъдауджын адӕймаг уыдтӕ ӕмӕ уӕззау тӕригъӕдтӕ нӕ сарӕзтай. Кӕнӕ та дын дӕ ныййарджытӕ – Йегъовӕйы Ӕвдисӕнтӕ – Йегъовӕйы бауарзын кодтой. Цымӕ дӕ уӕддӕр хъӕуы дӕ тӕригъӕдтыл ӕрфӕсмон кӕнын ӕмӕ донаргъуыд райсын, цӕмӕй дӕ Хуыцау райгонд уа? О. Мах иууылдӕр тӕригъӕды райгуырдыстӕм ӕмӕ уый тыххӕй нӕ бон нӕу, ӕмӕ Йегъовӕйы хӕлӕрттӕ уӕм (Пс. 51:5). Фӕлӕ йӕ хуыздӕр куы базонӕм, уӕд нын йӕ фӕндон ӕххӕст кӕнын свӕййы ӕппӕты ахсджиагдӕр. Нӕ тӕригъӕдтыл ӕппӕт зӕрдӕйӕ ӕрфӕсмон кӕнӕм, Йегъовӕйы зӕрдӕмӕ чи нӕ цӕуы, уыцы хъуыддӕгтыл нӕ къух сисӕм ӕмӕ нӕ цард йӕ фӕндонмӕ гӕсгӕ аразын райдайӕм. Ӕмӕ уӕд нӕ бон вӕййы донаргъуыд райсын (Хъуыд. 3:19).
10. Кӕд раздӕр ӕндӕр диныл хӕст уыдтӕ, ӕмӕ дын уым аргъуыд радтой, уӕддӕр дӕ цы хъӕуы саразын?
10 Кӕд раздӕр ӕндӕр диныл хӕст уыдтӕ, ӕмӕ дын уым аргъуыд радтой, уӕддӕр дӕ хъӕуы ногӕй донаргъуыд райсын, цӕмӕй Йегъовӕйы Ӕвдисӕн суай. Цӕмӕн? Уымӕн ӕмӕ уӕд Йегъовӕйы ӕмӕ Йесойы тыххӕй рӕстдзинад нӕ зыдтай. Ӕмӕ кӕд дӕхи Хуыцауӕн снывонд кодтай, уӕддӕр ын цы дзырд радтай, уый йӕ фӕндонмӕ гӕсгӕ нӕ уыд. Апостол Павел Ефесы сӕмбӕлд, Йесойы тыххӕй рӕстдзинад чи нӕ зыдта, афтӕмӕй донаргъуыд чи уыд, ахӕм адӕмыл. Ӕмӕ сын загъта, ногӕй сӕ кӕй хъӕуы донаргъуыд райсын (Хъуыд. 19:1–5)b. Раст афтӕ абон дӕр, адӕймаг хъуамӕ донаргъуыд райса, Хуыцауы фӕндон цӕй мидӕг ис, уый раст куы ’мбара, ӕрмӕстдӕр уӕд.
«ФЫД, ФЫРТ ӔМӔ СЫГЪДӔГ ТЫХЫ НОМЫЛ»
11. «Фыд, Фырт ӕмӕ сыгъдӕг тыхы номыл» донаргъуыд райсын цы нысан кӕны? (Матфейы 28:18–20).
11 Йесо загъта, ног ахуыргӕнинӕгтӕ донаргъуыд кӕй хъуамӕ исой «Фыд, Фырт ӕмӕ сыгъдӕг тыхы номыл». (Бакӕс Матфейы 28:18–20.) Уымӕй йӕ цы зӕгъын фӕндыд? Библийы дзырд «ном» арӕх фӕамоны, адӕймагӕн иннӕты цӕсты кад ис ӕви нӕ, уымӕ. Стӕй ма фӕамоны, адӕймаг цы бынат ахсы ӕмӕ йӕм цы бартӕ ис, уымӕ. Ӕмӕ адӕймаг Йегъовӕйы ӕмӕ Чырыстийы номыл куы райсы донаргъуыд, уӕд уый ууыл дзурӕг вӕййы, ӕмӕ ӕмбары, уый бар сын кӕй ис, цӕмӕй йын амоной, цы хъуамӕ араза, уый. Сыгъдӕг тыхы номыл куы райсы донаргъуыд, уӕд уый та ууыл дзурӕг вӕййы, ӕмӕ йӕ разамындмӕ гӕсгӕ архайы. Лӕмбынӕгдӕр-ма аныхас кӕнӕм, уый йӕ бон куыд у аразын, ууыл.
12. Фыды номыл донаргъуыд райсын цы нысан кӕны? (Раргомад 4:11). (Кӕс нывмӕ дӕр.)
12 Фыды номыл. Мах Йегъовӕйы нымайӕм нӕ уӕларвон Фыдыл ӕмӕ нӕ Царддӕттӕгыл. Уый у Ӕппӕтхъомысджын Хуыцау, алцыдӕр уый сфӕлдыста. (Бакӕс Раргомад 4:11.) Мах зонӕм, Йегъовӕ кӕй у, куывдтытӕ чи хъусы, уыцы Хуыцау. Ӕмӕ йӕм куы фӕкувӕм, уӕд ӕм йӕ номӕй фӕдзурӕм. Стӕй иннӕтӕн Хуыцауы тыххӕй куы фӕдзурӕм, уӕд дӕр ын йӕ ном фӕдзурӕм (Пс. 65:2). Фӕлӕ цӕмӕй Фыды номыл донаргъуыд райсай, уый тыххӕй фылдӕр цыдӕр хъӕуы. Фӕндзайӕм боны Петрмӕ чи хъуыста, уыдон Йегъовӕйы тыххӕй зыдтой, фӕлӕ хъуамӕ бамбӕрстаиккой, Йегъовӕ ӕнусон ирвӕзындзинад ӕрмӕстдӕр Йесо Чырыстийы уылты кӕй дӕтты (Ром. 5:8).
Донаргъуыды фӕстӕ дӕр Фыды коммӕ кӕс (кӕс 12 абзац)
13. Фырты номыл донаргъуыд райсын цы нысан кӕны? (Кӕс нывмӕ дӕр.)
13 Фырты номыл. Мах зонӕм, Чырысти кӕй у Хуыцауы иунӕггуырд Фырт. Чырысти у «фӕндаг», ӕмӕ Йегъовӕмӕ Йесойы уылты йеддӕмӕ ӕрцӕуӕн никӕуылты ис (Иоан. 14:6). Чырысти ма у нӕ Ӕлхӕнӕг дӕр. Уый мах тыххӕй амард, цӕмӕй ӕнусон цардӕй хайджын уӕм. Ӕмӕ нӕ уымӕ гӕсгӕ фӕнды Йесойы алы бон дӕр фӕзмын, донаргъуыд куы фӕисӕм, ӕрмӕст уыцы бон нӕ, фӕлӕ (1 Иоан. 2:6). Уӕдӕ уый бар ницӕмӕн дӕттӕм, цӕмӕй нӕ бахъыгдара Йесойау зынгзӕрдӕйӕ хъусын кӕнын (Лук. 4:43). Хуыцауӕн иузӕрдионӕй кӕй лӕггад кӕнӕм, уый тыххӕй ма суанг ӕфхӕрд ӕййафынмӕ дӕр цӕттӕ стӕм (2 Тим. 3:12). «Чырысти ӕмбырды... сӕр» у, ӕмӕ йын кад кӕнӕм. Ӕмӕ уымӕ гӕсгӕ цӕттӕ стӕм, разамынд нын кӕй уылты дӕтты, уыдоны коммӕ кӕсынмӕ (Еф. 4:8, 11, 12; 5:23).
Донаргъуыды фӕстӕ дӕр Фырты коммӕ кӕс (кӕс 13 абзац)
14. а) Сыгъдӕг тыхы номыл донаргъуыд райсын цы нысан кӕны? (Кӕс нывмӕ дӕр.) б) Сӕрст чырыстӕттӕ ма ноджыдӕр цавӕр аргъуыд райсынц? (Кӕс рамкӕ «Сӕрст чырыстӕттӕ кӕй райсынц, уыцы аргъуыд».)
14 Сыгъдӕг тыхы номыл. Мах ӕууӕндӕм, Библийы сыгъдӕг тыхы тыххӕй цы фыст ис, ууыл. Сыгъдӕг тых удгоймаг кӕнӕ Троицӕйы хай нӕу, фӕлӕ у Хуыцауы архайгӕ тых. Мах зонӕм, Йегъовӕ-иу йӕ сыгъдӕг тыхы фӕрцы пехуымпартӕн ӕмӕ, Библи чи фыста, уыдонӕн кӕй ӕмбарын кодта, цы дзурой ӕмӕ цы фыссой, уый. Уый тыххӕй алы бон дӕр Библи фӕкӕсӕм ӕмӕ фӕархайӕм йӕ ахуырӕдтӕм гӕсгӕ (2 Пет. 1:20, 21). Стӕй нӕхи стыр тӕригъӕд саразынӕй хизӕм, цӕмӕй Хуыцауы сыгъдӕг тыхӕй ӕнӕхай нӕхи дӕр ма фӕкӕнӕм ӕмӕ ӕмбырд дӕр (Еф. 4:30).
Донаргъуыды фӕстӕ дӕр сыгъдӕг тыхы разамындмӕ гӕсгӕ архай (кӕс 14 абзац)
15. Дӕ зӕрдыл цы хъуамӕ дарай?
15 Кӕд донаргъуыд хъусынгӕнӕг дӕ, уӕддӕр дӕ зӕрдыл дар, «алыхуызон аргъуыдты»c тыххӕй ахуырӕдтӕ зонын ахсджиаг цӕмӕн у, уый. Стӕй ӕххӕст кӕн, Йегъовӕйӕн дӕхи куы снывонд кодтай ӕмӕ донаргъуыд куы истай, уӕд ын цы дзырд радтай, уый. Кӕд донаргъуыд нӕма райстай, уӕд та? Исты дӕ хъыгдары донаргъуыд райсын? Иннӕ статьяйы дзырд цӕуы, донаргъуыд райсынӕн дын цы баххуыс кӕндзӕн, ууыл.
161 ЗАРӔГ Дӕ фӕндон у мӕнӕн сӕйраг
a Библийы «донаргъуыд»-ӕй цы грекъаг дзырд ӕрцыд тӕлмац, ба́птисма, зӕгъгӕ, уый нысан кӕны «доны бын фӕкӕнын, фӕдӕлдон кӕнын». Уӕдӕ донаргъуыд, иуӕй-иу динтӕ куыд амонынц, афтӕ донӕй бапырх кӕнынмӕ нӕ амоны, фӕлӕ адӕймаджы ӕнӕхъӕнӕй дӕр доны бын фӕкӕнынмӕ.
b Ефесы чи уыд, уыцы нӕлгоймӕгтӕ райстой, «Иоанн кӕй тыххӕй хъусын кодта, уыцы аргъуыд» (Хъуыд. 19:3). Аргъауӕг Иоанн дзуттӕгтӕн дзырдта, цӕмӕй, Моисейы закъоны ныхмӕ кӕй сарӕзтой, уыцы тӕригъӕдтыл ӕрфӕсмон кодтаиккой. Ӕмӕ-иу чи ӕрфӕсмон кодта, уыдонӕн-иу донаргъуыд радта (Мар. 1:4, 5). Фӕлӕ Моисейы закъон йӕ тыхы куы нал уыд, уӕд, Иоанн кӕй лӕвӕрдта, уыцы донаргъуыд нал хъуыди исын. Уӕдӕй фӕстӕмӕ Хуыцауы цӕсты раст у «иу аргъуыд» – ирвӕзындзинадмӕ чи кӕны, уыцы аргъуыд (Еф. 4:5).
c Сайты jw.org ӕмӕ приложенийы JW Library® рубрикӕйы «Библи: фарстатӕ ӕмӕ дзуаппытӕ» кӕс статья «Цы у донаргъуыд?».
d НЫВ. Донаргъуыд райсынмӕ чи хъавы, уыдон разыйы дзуапп дӕттынц, донаргъуыд райсыны размӕ адӕймагмӕ цы дыууӕ фарстайы фӕдӕттынц, уыдонӕн.