Машинӕ ма мын скъӕрӕн ис?

Кӕд дӕ хабар афтӕ у, уӕд дӕ бон куыд у бамбарын, машинӕ ма дын ис скъӕрӕн ӕви нӕ?

Иуӕй-иу бӕстӕты ис ахӕм закъон, ӕмӕ цӕмӕй адӕймаг кӕцыдӕр карӕй фӕстӕмӕ дӕр машинӕ скъӕра, уый тыххӕй йӕ хъӕуы дохтыртӕй гӕххӕтт райсын. Ӕмӕ чырыстӕттӕ уыцы закъон ӕххӕст кӕнынц (Ром. 13:1). Фӕлӕ кӕцыфӕнды бӕстӕйы ма цӕрай, уӕддӕр ис ахӕм амындтӕ, ӕмӕ дын баххуыс кӕндзысты, машинӕ ма дӕ бон ӕдасӕй скъӕрын у ӕви нӕ, уый бамбарынӕн.

МАШИНӔ КУЫД СКЪӔРЫС, УУЫЛ АХЪУЫДЫ КӔН

Ацӕргӕ каримӕ баст фарстатӕ чи иртасы, иу ахӕм организаци йӕ сайты ныффыста, цӕмӕй, машинӕ чи скъӕры, уыдон ахъуыды кӕной ахӕм фарстатыл:

• Фӕндаджы амонӕнтыл цы фыстытӕ вӕййы, уыдон кӕсын мын зын нӕу? Талынджы ӕвзӕр нӕ уынын?

• Мыййаг, ме уӕнгтӕ раздӕрау мӕ коммӕ нал кӕсынц ӕмӕ мын уый тыххӕй зын вӕййы мӕ сӕр азилын, цӕмӕй-иу кӕсӕнтӕм бакӕсон ӕмӕ, кӕсӕнӕй фенӕн кӕй нӕй, фӕндаджы уыцы хӕйттӕ фенон?

• Зын мын нӕ вӕййы тагъд исты ацаразын, зӕгъӕм, мӕ къах газы педалӕй айсын ӕмӕ тормозы педалыл ныххӕцын?

• Ӕгӕр сабыр нӕ фӕцӕуын ӕмӕ уымӕй иннӕ шофырты нӕ фӕхъыгдарын?

• Афтӕ-иу уыдис, ӕмӕ-иу мӕ авари скӕнынмӕ бирӕ нал хъуыд? Кӕнӕ-иу мӕ машинӕ истӕуыл сцавтон, ӕмӕ мын цӕфтӕ ӕмӕ хӕфтытӕ у?

• Фӕндаджы инспектор мӕ искуы баурӕдта, машинӕ куыд скъӕрын, уый тыххӕй?

• Афтӕ искуы уыд, ӕмӕ машинӕ скъӕргӕйӕ ӕрфынӕй дӕн?

• Машинӕ куыд скъӕрын, ууыл чи фӕзыны, ахӕм хостӕ нуазын?

• Машинӕ куыд скъӕрын, уый мӕ бинонты ӕмӕ ме ’мбӕлтты мӕты ӕфтауы?

Кӕд ацы фарстатӕй иуӕн кӕнӕ дыууӕйӕн дӕ дзуапп «о» уыд, уӕд дӕ, чи зоны, хъӕуы исты саразын. Зӕгъӕм, дӕ машинӕйыл афтӕ арӕх мауал цу, уӕлдайдӕр та талынгӕй. Дӕ хъус-иу дар, раздӕр куыд хорз скъӕрдтай, ныр дӕр ма афтӕ скъӕрыс ӕви нӕ, уымӕ. Дӕ бон у бафӕрсын дӕ бинонты кӕнӕ де ’мбӕлтты, машинӕ куыд скъӕрыс, уый тыххӕй цы хъуыды кӕнынц, уымӕй. Бацӕуӕн ма ис, машинӕ ӕдас скъӕрын кӕм ахуыр кӕнынц, ахӕм курсытӕм. Фӕлӕ кӕд, уӕлдӕр цы фарстатӕ ис, уыдонӕй дзуапп «о» цалдӕрӕн радтай, уӕд, ӕвӕццӕгӕн, хуыздӕр уаид, машинӕ куы нал скъӕрисa.

БИБЛИ ДЫН КУЫД БАХХУЫС КӔНДЗӔН РАСТ УЫНАФФӔ РАХӔССЫНӔН?

Чи зоны йӕ ӕмбаргӕ дӕр нӕ кӕнӕм, машинӕ хорз кӕй нал скъӕрӕм, уый. Ӕмӕ рулыл мауал сбадӕм, ууыл ӕрмӕст хъуыды куы акӕнӕм, уӕд дӕр нын зын вӕййы. Уӕдӕ дын Библийӕ цавӕр уагӕвӕрдтӕ баххуыс кӕндзысты, цӕмӕй дӕ уавӕрмӕ раст цӕстӕй ракӕсай ӕмӕ раст уынаффӕ рахӕссай? Дыууӕйыл дзы аныхас кӕнӕм.

Бонзонгӕ у (Ӕмб. 11:2). Адӕймагыл азтӕ сӕ уӕз куы ’руадзынц, уӕд йӕ цӕстырухс ӕрмынӕгдӕр вӕййы, хъусӕй хорз нал фӕхъусы, йе уӕнгты фаг хъару нал вӕййы ӕмӕ йӕ фезмӕлд фӕсындӕгдӕр вӕййы. Зӕгъӕм, спорты кӕцыдӕр хуызтӕ ацӕргӕтӕн тӕссаг сты. Бирӕтӕ уый ӕмбарынц, ӕмӕ сыл азтӕ куы рацӕуы, уӕд ахӕм спорт ныууадзынц, кӕд ӕй бирӕ уарзтой, уӕддӕр. Ӕмӕ уый зӕгъӕн ис машинӕ скъӕрынӕй дӕр. Бонзонгӕ адӕймаг куы бамбары, йӕ кары машинӕ скъӕрын ӕдас кӕй нал у, уӕд рулыл нал сбады (Ӕмб. 22:3). Кӕнӕ йын иннӕтӕ куы фӕзӕгъынц, йӕ кары машинӕ скъӕрын тӕссаг кӕй у, уӕд сӕм байхъусы. (Абар 2 Самуилы 21:15–17.)

Тугныккалдӕй дӕхи хиз (Дык. з. 22:8). Машинӕ арӕхстгай куы не скъӕрай, уӕд, гӕнӕн ис, ӕмӕ искӕй скъуырай. Ӕмӕ ма, гӕнӕн ис, уыцы адӕймаг мӕлгӕ дӕр акӕна. Машинӕ хорз скъӕрын йӕ бон кӕмӕн нал у, ахӕм адӕймаг йӕхи цард дӕр ӕмӕ иннӕты цард дӕр тӕссаг уавӕры ӕппары. Гӕнӕн ис, ӕмӕ йӕ аххосӕй исчи фӕмард уа.

Афтӕ ма хъуыды кӕн, ӕмӕ, машинӕ куы нал скъӕрай, уӕд иннӕты цӕсты дӕ кад дӕлӕмӕ ӕрхаудзӕн. Йегъовӕ дӕ уарзы дӕ хорз миниуджыты тыххӕй, зӕгъӕм, бонзонгӕ ӕмӕ сӕрныллӕг кӕй дӕ ӕмӕ иннӕты хорзыл кӕй хъуыды кӕныс, уый тыххӕй. Ӕмӕ дын зӕрдӕ ӕвӕры, кӕй дын ӕххуыс кӕндзӕн ӕмӕ дӕ кӕй фидар кӕндзӕн (Ис. 46:4). Уый дӕ никуы ныууадздзӕн. Уӕдӕ дзы зонд ӕмӕ разамынд кур, цӕмӕй раст уынаффӕ рахӕссай, машинӕ ма скъӕрдзынӕ ӕви нӕ, уый фӕдыл.