ଆମମାନଙ୍କୁ କାହିଁକି ମୁକ୍ତିର ମୂଲ୍ୟର ଆବଶ୍ୟକ ରହିଛି ?

୧-୨. ଆମକୁ କେଉଁ ଅବସ୍ଥାରୁ ଉଦ୍ଧାର କରିବାର ଆବଶ୍ୟକ ରହିଛି ଓ କାହିଁକି ? (ରୋମୀୟ ୭:୨୨-୨୪) (ଚିତ୍ର ମଧ୍ୟ ଦେଖନ୍ତୁ ।)

କଳ୍ପନା କରନ୍ତୁ, ଗୋଟିଏ ବଡ଼ ବିଲ୍‌ଡିଙ୍ଗ ଭୁଷୁଡ଼ି ପଡ଼ିଛି ଏବଂ ଜଣେ ବ୍ୟକ୍ତି ତାହା ତଳେ ଦବିଯାଇଛି । ସେ ନିଃଶ୍ୱାସ ତ ନେଉଛି, କିନ୍ତୁ ସେ ନିଜର ହାତ ଗୋଡ଼ ଜମା ବି ହଲାଇପାରୁ ନାହିଁ । ସେ ଭାରି କଷ୍ଟରେ ସାହାଯ୍ୟ ପାଇଁ ଡାକୁଛି ଏବଂ ଏହା ଆଶା କରୁଛି ଯେ କେହି ଆସି ତାକୁ ଉଦ୍ଧାର କରିବେ ।

^୨ ଆମର ବି ଅବସ୍ଥା ସେହି ବ୍ୟକ୍ତି ଭଳି ହିଁ ଅଛି । ଯେବେ ଆଦମ ଈଶ୍ୱରଙ୍କ ସହିତ ବିଦ୍ରୋହ କଲା, ତେବେ ସେ ପାପୀ ହୋଇଗଲା । ଆଗକୁ ଯାଇ ଏହି ପାପ ତାʼ ପିଲାମାନଙ୍କୁ ଉତ୍ତରାଧିକାରୀ ଭାବେ ମିଳିଲା, ତେଣୁ ଆଜି ସମସ୍ତ ମଣିଷ ଏହି ପାପର ବୋଝରେ ଦବି ଯାଇଛନ୍ତି । ଆମେ ଯେତେ ଚେଷ୍ଟା କଲେ ମଧ୍ୟ ନିଜକୁ ଉଦ୍ଧାର କରିପାରିବା ନାହିଁ । ପାଉଲ ରୋମର ମଣ୍ଡଳୀକୁ ଲେଖିଥିବା ନିଜ ଚିଠିରେ ଏହି ଅବସ୍ଥା ବିଷୟରେ କହିଲେ । (ରୋମୀୟ ୭:୨୨-୨୪ ପଢ଼ନ୍ତୁ ।) ସେ କହିଲେ, “ମୋତେ ଏହି ମୃତ୍ୟୁର ଶରୀରରୁ କିଏ ଉଦ୍ଧାର କରିବ ?” ପାଉଲ ଜାଣିଥିଲେ ଯେ ଉତ୍ତରାଧିକାରୀ ଭାବେ ମିଳିଥିବା ପାପର ପରିଣାମ ହେଉଛି, ମୃତ୍ୟୁ । (ରୋମୀ. ୬:୨୩) ଆଜି ଆମେ ବି ଏହି ବୋଝ ତଳେ ଦବିଯାଇଛୁ ଏବଂ ବହୁତ ଅସହାୟ ହୋଇଯାଇଛୁ ।

୩. ମୁକ୍ତିର ମୂଲ୍ୟ ଯୋଗୁଁ କʼଣ ସମ୍ଭବ ହୋଇପାରିଛି ?

^୩ ପାଉଲ ଆଗକୁ ବି କିଛି କହନ୍ତି । ତାଙ୍କ ପାଖରେ ଗୋଟିଏ ଆଶା ଥିଲା । ଏହା କହିବା ପରେ ଯେ “ମୋତେ ଏହି ମୃତ୍ୟୁର ଶରୀରରୁ କିଏ ଉଦ୍ଧାର କରିବ ?” ସେ ନିଜେ ହିଁ ଏହି ପ୍ରଶ୍ନର ଉତ୍ତର ଦିଅନ୍ତି । ସେ କହନ୍ତି, “ଆମ୍ଭମାନଙ୍କ ପ୍ରଭୁ ଯୀଶୁ ଖ୍ରୀଷ୍ଟଙ୍କ ଦ୍ୱାରା ଈଶ୍ୱରଙ୍କର ଧନ୍ୟବାଦ ହେଉ ।” (ରୋମୀ. ୭:୨୫) ପାଉଲ ଯୀଶୁଙ୍କ ମୁକ୍ତିର ମୂଲ୍ୟa ବିଷୟରେ କହୁଥିଲେ । ଏହି ମୁକ୍ତିର ମୂଲ୍ୟ ଯୋଗୁଁ ଆମକୁ (୧) ପାପଗୁଡ଼ିକରୁ କ୍ଷମା ମିଳେ (୨) ଆମର ପାପୀ ଅବସ୍ଥାରୁ ମୁକ୍ତି ମିଳେ ଏବଂ (୩) ଆମେ ଈଶ୍ୱରଙ୍କ ସହିତ ସମ୍ପର୍କ ଗଢ଼ିପାରୁ । ଏହି ଲେଖାରେ ଆମେ ଏହି ତିନୋଟି କଥା ଉପରେ ଚର୍ଚ୍ଚା କରିବା । ଏଥିରୁ “ଭରସାର ଈଶ୍ୱର” ଯିହୋବାଙ୍କ ପାଇଁ ଆମ ପ୍ରେମ ଆହୁରି ବଢ଼ିଯିବ । (ରୋମୀ. ୧୫:୧୩) ତାʼସହିତ ଆମେ ଯୀଶୁଙ୍କର ବି କୃତଜ୍ଞ ମନେ କରିବା, ଯିଏ ‘ମୁକ୍ତିର’ ମୂଲ୍ୟ ଦେଇ ଆମକୁ ଉଦ୍ଧାର କରିଛନ୍ତି ।—କଲ. ୧:୧୪.

ମୁକ୍ତିର ମୂଲ୍ୟରୁ ପାପଗୁଡ଼ିକର କ୍ଷମା ମିଳେ

୪-୫. ଆମ ସମସ୍ତଙ୍କୁ କାହିଁକି ମୁକ୍ତିର ମୂଲ୍ୟର ଆବଶ୍ୟକ ରହିଛି ? (ଉପଦେଶକ ୭:୨୦)

^୪ ଆମେ ସମସ୍ତେ ଅପରିପୂର୍ଣ୍ଣ ଅଟୁ ଏବଂ ଆମେ ନିଜ କଥା ଓ କାମଗୁଡ଼ିକରୁ ଭୁଲ କରିଦେଉ । (ଉପଦେଶକ ୭:୨୦ ପଢ଼ନ୍ତୁ ।) ଏହି ଭୁଲ ଓ ପାପଗୁଡ଼ିକରୁ କ୍ଷମା ପାଇବା ପାଇଁ ଆମକୁ ମୁକ୍ତିର ମୂଲ୍ୟର ଆବଶ୍ୟକ ରହିଛି । କିଛି ପାପ ଗମ୍ଭୀର ଥାଏ । ଉଦାହରଣ ପାଇଁ, ବ୍ୟଭିଚାର କରିବା କିମ୍ବା କାହାରି ହତ୍ୟା କରିବା । ମୋଶାଙ୍କ ବ୍ୟବସ୍ଥା ଅନୁସାରେ ଏଗୁଡ଼ିକ ବହୁତ ଗମ୍ଭୀର ପାପ ଥିଲା, ତେଣୁ ଏହାପାଇଁ ମୃତ୍ୟୁ ଦଣ୍ଡ ଦିଆଯାଉଥିଲା । (ଲେବୀ. ୨୦:୧୦; ଗଣ. ୩୫:୩୦, ୩୧) କିଛି ପାପ ଏତେ ଗମ୍ଭୀର ନ ଥାଏ, ତଥାପି ତାହାକୁ ପାପ ବୋଲି କୁହାଯାଏ । ଦାଉଦ ବି ଏପରି ହିଁ ଗୋଟିଏ ପାପ ବିଷୟରେ କହିଲେ, “ମୁଁ ଜିହ୍ୱାରେ ପାପ ନ କରିବା ପାଇଁ ଆପଣା ପଥ ବିଷୟରେ ସାବଧାନ ହେବି ।” (ଗୀତ. ୩୯:୧) ଏହାର ଅର୍ଥ, ଆମେ ନିଜ କଥାରୁ ବି ପାପ କରିଦେଉ ।—ଯାକୁ. ୩:୨.

^୫ ଏବିଷୟରେ ଭାବନ୍ତୁ ଯେ ଆପଣ ପୂର୍ବେ କିପରି ଭାବେ କଥା ହୋଇଥିଲେ ଓ କିପରି କାମ କରିଥିଲେ । କʼଣ ଆପଣ ଅନ୍ୟମାନଙ୍କୁ ଏପରି କିଛି କହିଛନ୍ତି, ଯାହାଯୋଗୁଁ ପରେ ଆପଣଙ୍କୁ ଅବଶୋଷ ହେଲା ? କʼଣ ଆପଣ ଏପରି କିଛି କାମ କରିଛନ୍ତି, ଯାହା ପାଇଁ ଏବେ ବି ଆପଣଙ୍କୁ ବହୁତ ଦୁଃଖ ଲାଗେ ? ଆମେ ସମସ୍ତେ କେବେ ନା କେବେ ଏପରି କଥା କହିଥାଉ କିମ୍ବା ଏପରି କାମ କରିଥାଉ । ବାଇବଲରେ କୁହାଯାଇଛି, ‘ଆମ୍ଭମାନଙ୍କର ପାପ ନାହିଁ, ଏହା ଯଦି କହୁ, ତାହାହେଲେ ନିଜକୁ ଧୋକା ଦେଉ, ପୁଣି ଆମ୍ଭମାନଙ୍କଠାରେ ସତ୍ୟ ନାହିଁ ।’—୧ ଯୋହ. ୧:୮.

୬-୭. ଯିହୋବା କେଉଁ ଆଧାରରେ ଆମ ପାପଗୁଡ଼ିକୁ କ୍ଷମା କରନ୍ତି ? (ଚିତ୍ର ମଧ୍ୟ ଦେଖନ୍ତୁ ।)

^୬ ଯିହୋବା ଆମକୁ କ୍ଷମା କରିବା ପାଇଁ ଚାହାନ୍ତି, ତେଣୁ ଯେବେ ଆମେ କୌଣସି ପାପ କରୁ, ତେବେ ସେ ଆମକୁ କ୍ଷମା କରିଦିଅନ୍ତି । କିନ୍ତୁ ଏହାର ଅର୍ଥ ଏପରି ନୁହେଁ ଯେ ଆମ ପାପଗୁଡ଼ିକରୁ ଯିହୋବାଙ୍କୁ କୌଣସି ଫରକ ପଡ଼େନି ଏବଂ ସେ ଆମ ପାପଗୁଡ଼ିକୁ ଅଣଦେଖା କରିଦିଅନ୍ତି । ଆମେ ଏପରି କାହିଁକି କହିପାରିବା ? କାରଣ ପାପ କରିବା ଯିହୋବାଙ୍କ ଦୃଷ୍ଟିରେ ଗମ୍ଭୀର କଥା ଅଟେ । (ଯିଶା. ୫୯:୨) ଯିହୋବା ନ୍ୟାୟୀ ଈଶ୍ୱର ଅଟନ୍ତି, ସେ ଯାହା ବି କରନ୍ତି ତାହାର ଗୋଟିଏ ଆଧାର ଥାଏ । ଆମ ପାପଗୁଡ଼ିକୁ କ୍ଷମା କରିବା ପାଇଁ ତାଙ୍କୁ ଗୋଟିଏ ଆଧାରର ଆବଶ୍ୟକ ଥିଲା ଏବଂ ସେହି ଆଧାର ହେଉଛି, ମୁକ୍ତିର ମୂଲ୍ୟ ।—ଏଫି. ୧:୭.

^୭ ମୋଶାଙ୍କ ବ୍ୟବସ୍ଥା ଅନୁସାରେ ଇସ୍ରାଏଲୀୟମାନେ ନିଜ ପାପଗୁଡ଼ିକରୁ କ୍ଷମା ପାଇବା ପାଇଁ ପଶୁମାନଙ୍କର ବଳିଦାନ ଚଢ଼ାଉଥିଲେ । (ଲେବୀ. ୪:୨୭-୩୧; ୧୭:୧୧) ଏହି ବଳିଦାନ ଗୋଟିଏ ଉତ୍ତମ ବ୍ୟବସ୍ଥାର ଛାୟା ଥିଲା । ସେହି ବ୍ୟବସ୍ଥା ହେଉଛି, ଯୀଶୁଙ୍କ ବଳିଦାନ ଯାହାଯୋଗୁଁ ମଣିଷମାନଙ୍କୁ ଆଗକୁ ଯାଇ ଅନେକ ଆଶିଷ ମିଳନ୍ତା । ଏହି ବଳିଦାନ ଯୋଗୁଁ ଯିହୋବାଙ୍କୁ ଆମ ପାପଗୁଡ଼ିକୁ କ୍ଷମା କରିବାର ଗୋଟିଏ ଆଇନଗତ ଆଧାର ମିଳିଯାʼନ୍ତା । ପାଉଲ କରିନ୍ଥର ଖ୍ରୀଷ୍ଟିୟାନମାନଙ୍କୁ ଚିଠି ଲେଖିବା ସମୟରେ ଏହି ବଳିଦାନର ମହତ୍ତ୍ୱ ବିଷୟରେ କହିଲେ । ପ୍ରଥମେ ସେ ଏବିଷୟରେ କହିଲେ ଯେ ସେମାନେ କେଉଁ କାମଗୁଡ଼ିକରେ ଲାଗି ରହିଥିଲେ । ପରେ ସେ କହିଲେ, ‘ପ୍ରଭୁ ଯୀଶୁ ଖ୍ରୀଷ୍ଟଙ୍କ ନାମରେ ଓ ଆମ୍ଭମାନଙ୍କ ଈଶ୍ୱରଙ୍କ ପବିତ୍ର ଶକ୍ତି ଦ୍ୱାରା ତୁମ୍ଭେମାନେ ଧୋଇ ଶୁଦ୍ଧ ହୋଇଅଛ, ପବିତ୍ରୀକୃତ ହୋଇଅଛ ଓ ଧାର୍ମିକ ବୋଲି ଗଣିତ ହୋଇଅଛ ।’—୧ କରି. ୬:୯-୧୧.

୮. ଏହି ବର୍ଷ ସ୍ମାରକ ପୂର୍ବରୁ ଆପଣ କେଉଁ ବିଷୟରେ ଭାବିପାରିବେ ?

^୮ ଏହି ବର୍ଷ ସ୍ମାରକ ପୂର୍ବରୁ କିଛି ସମୟ ବାହାର କରି ଏବିଷୟରେ ଭାବନ୍ତୁ ଯେ ଯିହୋବା ଆମ ପାପଗୁଡ଼ିକର କ୍ଷମା କରନ୍ତି, ଏହା ଆମ ପାଇଁ କେତେ ବଡ଼ କଥା । ଉଦାହରଣ ପାଇଁ, ମୁକ୍ତିର ମୂଲ୍ୟ ଯୋଗୁଁ ଆମେ ନିଜ ଅତୀତର ଭୁଲଗୁଡ଼ିକ ବିଷୟରେ ଭାବି ନିଜକୁ ଦୋଷୀ ଅନୁଭବ କରି ନ ଥାଉ । କିନ୍ତୁ ହୁଏତ ଯେତେ ଚେଷ୍ଟା କଲେ ବି ଆପଣ ଏହା ମାନିପାରୁ ନାହାନ୍ତି ଯେ ଯିହୋବା ଆପଣଙ୍କୁ କ୍ଷମା କରିଦେଇଛନ୍ତି । ହୁଏତ ଆପଣ ଭାବିବେ, ‘ମୁଁ ଜାଣିଛି ଯେ ଯିହୋବା ମୋତେ କ୍ଷମା କରିଦେଇଛନ୍ତି, କିନ୍ତୁ ମୁଁ ନିଜକୁ କେବେ ବି କ୍ଷମା କରିପାରିବି ନାହିଁ ।’ ଏପରି ହେଲେ ଏହା ମନେ ରଖନ୍ତୁ: କାହାକୁ କ୍ଷମା କରିବାର ଅଛି ଓ କାହାକୁ ନୁହେଁ, ଏହା ଯିହୋବା ନିର୍ଣ୍ଣୟ କରନ୍ତି । ସେ ନିଜ ପୁତ୍ରଙ୍କୁ ମଣିଷମାନଙ୍କର ନ୍ୟାୟ କରିବା ପାଇଁ ଅଧିକାର ଦେଇଛନ୍ତି । ଯିହୋବା ଆପଣଙ୍କୁ କିମ୍ବା ଅନ୍ୟ କାହାକୁ ବି ଏହି ଅଧିକାର ଦେଇ ନାହାନ୍ତି । ବାଇବଲରେ ଲେଖାଅଛି, ‘ଯିହୋବା ଯେପରି ଜ୍ୟୋତିର୍ନିବାସୀ, ଆମ୍ଭେମାନେ ଯଦି ସେହିପରି ଜ୍ୟୋତିରେ ଆଚରଣ କରୁ, ତେବେ ତାହାଙ୍କ ପୁତ୍ର ଯୀଶୁଙ୍କ ରକ୍ତ ସମସ୍ତ ପାପରୁ ଆମ୍ଭମାନଙ୍କୁ ପରିଷ୍କାର କରେ ।’ (୧ ଯୋହ. ୧:୬, ୭) ବାଇବଲର ଅନ୍ୟ ଶିକ୍ଷା ଉପରେ ଆମେ ଯେପରି ଭରସା କରୁ, ସେହିପରି ବାଇବଲର ଏହି କଥା ଉପରେ ଆମେ ଭରସା କରିପାରିବା । ମୁକ୍ତିର ମୂଲ୍ୟ ଯୋଗୁଁ ଯିହୋବାଙ୍କୁ ଆମ ମଣିଷମାନଙ୍କ ଉପରେ ଦୟା କରିବା ପାଇଁ ଆଇନଗତ ଅଧିକାର ମିଳିଯାଇଛି । ତାʼସହିତ ତାଙ୍କ ବାକ୍ୟରେ ଲେଖାଅଛି ଯେ ସେ ଆମକୁ “କ୍ଷମା କରିବାକୁ ପ୍ରସ୍ତୁତ” ଥାନ୍ତି ।—ଗୀତ. ୮୬:୫.

ମୁକ୍ତିର ମୂଲ୍ୟରୁ ପାପୀ ଅବସ୍ଥାରୁ ମୁକ୍ତି ମିଳେ

୯. ପାପ ଶବ୍ଦର ଅର୍ଥ କʼଣ ? (ଗୀତସଂହିତା ୫୧:୫)

^୯ ବାଇବଲରେ ଅନେକ ଜାଗାରେ “ପାପ” ଶବ୍ଦର ବ୍ୟବହାର କରାଯାଇଛି । କିନ୍ତୁ ସବୁ ଜାଗାରେ ଏହାର ଅର୍ଥ ଭୁଲ କାମ କରିବା ନୁହେଁ । ଅନେକ ଥର ଏହା ଆମର ଅପରିପୂର୍ଣ୍ଣତା କିମ୍ବା ପାପୀ ଅବସ୍ଥାକୁ ସୂଚାଇବା ପାଇଁ ବି ବ୍ୟବହାର କରାଯାଇଛି । ଜନ୍ମରୁ ହିଁ ଆମର ଏପରି ଅବସ୍ଥା ଥାଏ । (ଗୀତସଂହିତା ୫୧:୫ ପଢ଼ନ୍ତୁ ।) ଏହି ଅବସ୍ଥା ଯୋଗୁଁ ଆମକୁ କେବଳ ଭୁଲ କାମ କରିବା ପାଇଁ ଇଚ୍ଛା ହୁଏନି, ବରଂ ଏହାଯୋଗୁଁ ଆମେ ରୋଗରେ ପଡ଼ିଯାଉ, ବୃଦ୍ଧବୃଦ୍ଧା ହୋଇଯାଉ ଓ ଦିନେ ଆମର ମୃତ୍ୟୁ ହୋଇଯାଏ । ଏହାଯୋଗୁଁ ଛୋଟ ଛୋଟ ପିଲାମାନଙ୍କର, ଯେଉଁମାନେ କୌଣସି ଭୁଲ କରି ନାହାନ୍ତି, ସେମାନେ ବି ରୋଗରେ ପଡ଼ିଯାʼନ୍ତି ଓ ବେଳେବେଳେ ସେମାନଙ୍କର ମୃତ୍ୟୁ ବି ହୋଇଯାଏ । ଦେଖିବାକୁ ଗଲେ ଏପରି ଅବସ୍ଥା ଯୋଗୁଁ ପ୍ରତ୍ୟେକ ମଣିଷର ଦିନେ ମୃତ୍ୟୁ ହୋଇଯାଏ ।

୧୦. ପାପ କଲାପରେ ଆଦମ ଓ ହବାଙ୍କ ସହିତ କʼଣ କʼଣ ହେଲା ?

^୧୦ ଆଦମ ଓ ହବା ପାପ କରିବା ଯୋଗୁଁ ଅପରିପୂର୍ଣ୍ଣ ହୋଇଗଲେ, ତେଣୁ ସେମାନଙ୍କର ଜୀବନ ପୂରାପୂରି ବଦଳିଗଲା । ଈଶ୍ୱରଙ୍କ ବ୍ୟବସ୍ଥା ସେମାନଙ୍କର “ହୃଦୟରେ ଲିଖିତ” ଥିଲା, କିନ୍ତୁ ଯେବେ ସେମାନେ ଏହି ବ୍ୟବସ୍ଥାକୁ ମାନିଲେ ନାହିଁ, ତେବେ ତୁରନ୍ତ ଏହାର ପରିଣାମ ସେମାନଙ୍କୁ ଦେଖିବାକୁ ମିଳିଲା । (ରୋମୀ. ୨:୧୫) ସେମାନଙ୍କୁ ଏହା ଅନୁଭବ ହେଲା ଯେ ସେମାନେ ଏବେ ଆଉ ପୂର୍ବ ଭଳି ନାହାନ୍ତି । ସେଥିପାଇଁ ସେମାନେ ନିଜ ଶରୀରକୁ ଢାଙ୍କିବା ପାଇଁ ଚେଷ୍ଟା କରିବାକୁ ଲାଗିଲେ ଓ ଈଶ୍ୱରଙ୍କଠାରୁ ଲୁଚିବାକୁ ଲାଗିଲେ, ସତେ ଯେପରି ସେମାନେ ଅପରାଧୀ ଅଟନ୍ତି । (ଆଦି. ୩:୭, ୮) ପ୍ରଥମ ଥର ଆଦମ ଓ ହବା ନିଜକୁ ଦୋଷୀ ମନେ କଲେ, ଚିନ୍ତିତ ହେଲେ, ଅଶାନ୍ତ ରହିଲେ, ସେମାନଙ୍କୁ ଦୁଃଖ ହେଲା ଓ ସେମାନେ ଲଜ୍ଜିତ ଅନୁଭବ କଲେ । ଏବେଠାରୁ ମୃତ୍ୟୁ ପର୍ଯ୍ୟନ୍ତ ସେମାନଙ୍କୁ ଏପରି ଭାବନା ସହ ଲଢ଼ିବାକୁ ପଡ଼ନ୍ତା ।—ଆଦି. ୩:୧୬-୧୯.

୧୧. ପାପ ଯୋଗୁଁ ମଣିଷମାନଙ୍କ ଉପରେ କʼଣ ପ୍ରଭାବ ପଡ଼ିଛି ?

^୧୧ ଆଦମ ଓ ହବାର ସନ୍ତାନ ହେବା ଯୋଗୁଁ ଆମେ ଜନ୍ମରୁ ହିଁ ପାପୀ ଅଟୁ । ତେଣୁ ଭୁଲ କରିବା ଯୋଗୁଁ ଆମେ ବି ଦୋଷୀ ଅନୁଭବ କରୁ ଓ ଲଜ୍ଜିତ ଅନୁଭବ କରୁ । ଦେଖିବାକୁ ଗଲେ ଆମର ପାପୀ ଅବସ୍ଥା ଯୋଗୁଁ ହିଁ ଆମକୁ ପ୍ରତ୍ୟେକ ଦୁଃଖକଷ୍ଟ ସହିବାକୁ ପଡ଼ୁଛି । ପାପୀ ଥିବା ପର୍ଯ୍ୟନ୍ତ ଆମେ ଯେତେ ଚେଷ୍ଟା କଲେ ମଧ୍ୟ ନିଜର ଏହି ସମସ୍ୟାଗୁଡ଼ିକରୁ ମୁକ୍ତି ପାଇପାରିବା ନାହିଁ । ବାଇବଲରେ ବି ଲେଖାଅଛି, “ସୃଷ୍ଟି ଅସାରତାର ବଶୀଭୂତ ହେଲା ।” (ରୋମୀ. ୮:୨୦) ଭାବନ୍ତୁ, ମଣିଷମାନେ ଏହି ପୃଥିବୀର ପରିବେଶକୁ ସୁଧାରିବା ପାଇଁ, ଅପରାଧ ରୋକିବା ପାଇଁ, ଦାରିଦ୍ରତାକୁ ଦୂର କରିବା ପାଇଁ ଓ ଦୁନିଆରେ ଶାନ୍ତି ଆଣିବା ପାଇଁ କେତେ ଚେଷ୍ଟା କରିଛନ୍ତି । ତଥାପି ଏହି ଚେଷ୍ଟାଗୁଡ଼ିକ ବ୍ୟର୍ଥ ଓ ବିଫଳ ହୋଇଯାଇଛି । କିନ୍ତୁ ମୁକ୍ତିର ମୂଲ୍ୟ ଯୋଗୁଁ କିପରି ଆମକୁ ପାପୀ ଅବସ୍ଥାରୁ ମୁକ୍ତି ମିଳିପାରିବ ?

୧୨. ମୁକ୍ତିର ମୂଲ୍ୟରୁ ଆମକୁ କʼଣ ଆଶା ମିଳେ ?

^୧୨ ମୁକ୍ତିର ମୂଲ୍ୟ ଯୋଗୁଁ ଆମ ପାଖରେ ଏହି ଆଶା ରହିଛି ଯେ ‘ସୃଷ୍ଟି କ୍ଷୟର ଦାସତ୍ୱରୁ ମୁକ୍ତ ହେବ ।’ (ରୋମୀ. ୮:୨୧) ନୂଆ ଦୁନିଆରେ ଆମକୁ ମୁକ୍ତିର ମୂଲ୍ୟରୁ ଆହୁରି ଅନେକ ଲାଭ ମିଳିବ । ଉଦାହରଣ ପାଇଁ, ଆମ ମଧ୍ୟରୁ କେହି ବି ରୋଗୀ ନ ଥିବେ, କୌଣସି ଚିନ୍ତା ନ ଥିବ ଓ ଖରାପ ସ୍ମୃତିଗୁଡ଼ିକ ମଧ୍ୟ ଆମକୁ ମନେ ପଡ଼ିବ ନାହିଁ । ତାʼସହିତ ଆମେ କେବେ ବି ନିଜକୁ ଦୋଷୀ ଓ ଲଜ୍ଜିତ ଅନୁଭବ କରିବା ନାହିଁ । ଆମେ ଅଶାନ୍ତ ରହିବା ନାହିଁ କିମ୍ବା ଦୁଃଖି ଅନୁଭବ କରିବା ନାହିଁ । କେବଳ ଏତିକି ନୁହେଁ, ପୃଥିବୀରେ ଭଲ ପରିବେଶ ଥିବ ଏବଂ ଚାରିଆଡ଼େ ଶାନ୍ତି ରହିବ, କାରଣ ମଣିଷମାନଙ୍କ ଉପରେ “ଶାନ୍ତିରାଜା” ଯୀଶୁ ଖ୍ରୀଷ୍ଟ ଶାସନ କରିବେ, ଯିଏ ଆମ ପାଇଁ ମୁକ୍ତିର ମୂଲ୍ୟ ଦେଇଥିଲେ ।—ଯିଶା. ୯:୬, ୭.

୧୩. ଏହି ବର୍ଷ ସ୍ମାରକରେ ଭାଗ ନେବା ପୂର୍ବରୁ ଆପଣ ଆଉ କେଉଁ ବିଷୟରେ ଭାବିପାରିବେ ?

^୧୩ କଳ୍ପନା କରନ୍ତୁ, ନୂଆ ଦୁନିଆରେ ଯେବେ ଆପଣ ପାପୀ ଅବସ୍ଥାରୁ ମୁକ୍ତ ହୋଇଯିବେ, ତେବେ ଆପଣଙ୍କର ଜୀବନ କିପରି ଥିବ ? ପ୍ରତ୍ୟେକ ଦିନ ଯେବେ ଆପଣ ଉଠିବେ, ଆପଣ ସୁସ୍ଥ ଅନୁଭବ କରିବେ । ଆପଣଙ୍କୁ ଏହି ଚିନ୍ତା ବି ରହିବ ନାହିଁ ଯେ ଆପଣଙ୍କ ପିଲାମାନଙ୍କୁ ଭୋକରେ ରହିବାକୁ ପଡ଼ିବ, ଆପଣ ରୋଗରେ ପଡ଼ିଯିବେ କିମ୍ବା ଆପଣଙ୍କର ମୃତ୍ୟୁ ହୋଇଯିବ । ତାʼସହିତ ଭବିଷ୍ୟତ ପାଇଁ ନିଜ ଆଶା ବିଷୟରେ ଭାବି ଆଜି ବି ଆପଣଙ୍କୁ ଶାନ୍ତି ମିଳିପାରିବ । ଏହି ଆଶା “ଆମ୍ଭମାନଙ୍କ ଲଙ୍ଗର ସ୍ୱରୂପ” ଯାହା “ଦୃଢ଼ ଓ ଅଟଳ ।” (ଏବ୍ରୀ ୬:୧୮, ୧୯) ଯେପରି ଭାବରେ ଲଙ୍ଗର ଝଡ଼ ତୋଫାନ ସମୟରେ ନୌକାକୁ ସମ୍ଭାଳି ରଖେ, ଠିକ୍‌ ସେହିପରି ନିଜ ଆଶା ବିଷୟରେ ଭାବି ଆପଣ ସମସ୍ୟା ସମୟରେ ନିଜକୁ ସମ୍ଭାଳି ପାରିବେ, ଧୈର୍ଯ୍ୟ ଧରି ପାରିବେ ଏବଂ ନିଜ ବିଶ୍ୱାସକୁ ଆହୁରି ଦୃଢ଼ କରିପାରିବେ । ଭରସା ରଖନ୍ତୁ, ଯେ ଯିହୋବା “ତାହାଙ୍କ ଅନ୍ୱେଷଣକାରୀମାନଙ୍କର ପୁରସ୍କାରଦାତା ।” (ଏବ୍ରୀ ୧୧:୬) ଭବିଷ୍ୟତ ପାଇଁ ଆପଣଙ୍କ ପାଖରେ ଯେଉଁ ଆଶା ରହିଛି ଏବଂ ଏଥିରୁ ଆପଣଙ୍କୁ ଯେଉଁ ସାନ୍ତ୍ୱନା ମିଳୁଛି, ତାହା କେବଳ ମୁକ୍ତିର ମୂଲ୍ୟ ଯୋଗୁଁ ହିଁ ସମ୍ଭବ ହୋଇପାରିଛି ।

ମୁକ୍ତିର ମୂଲ୍ୟ ଯୋଗୁଁ ଆମେ ଈଶ୍ୱରଙ୍କ ସହିତ ପୁଣିଥରେ ସମ୍ପର୍କ ଗଢ଼ିପାରୁ

୧୪. ଆଦମ ଓ ହବା ପାପ କରିବା ଯୋଗୁଁ କʼଣ ହେଲା ଏବଂ କାହିଁକି ?

^୧୪ ଆଦମ ଓ ହବା ତ ପାପ କରି ଈଶ୍ୱରଙ୍କଠାରୁ ଦୂରେଇ ଗଲେ, କିନ୍ତୁ ଆଗକୁ ଯାଇ ମଣିଷମାନେ ବି ତାଙ୍କଠାରୁ ଦୂରେଇ ଗଲେ । ବାଇବଲରେ ଏପରି କୁହାଯାଇଛି ଯେ ମଣିଷମାନେ ଈଶ୍ୱରଙ୍କର ଶତ୍ରୁ ହୋଇଗଲେ । (ରୋମୀ. ୮:୭, ୮; କଲ. ୧:୨୧) ଏପରି କାହିଁକି ହେଲା ? କାରଣ ଯିହୋବାଙ୍କ ସ୍ତର ଅତି ଉଚ୍ଚ ଏବଂ ସେ ପାପକୁ ଅଣଦେଖା କରନ୍ତି ନାହିଁ । ବାଇବଲରେ ତାଙ୍କ ବିଷୟରେ ଲେଖାଅଛି, ‘ତୁମ୍ଭର ତ ଏପରି ନିର୍ମଳ ଚକ୍ଷୁ ଯେ, ମନ୍ଦ ଦେଖି ନ ପାର ଓ ତୁମ୍ଭେ କୁଟିଳାଚରଣ ପ୍ରତି ଦୃଷ୍ଟି କରି ନ ପାର ।’ (ହବ. ୧:୧୩) ସେଥିପାଇଁ ଯେବେ ଆଦମ ଓ ହବା ପାପ କଲେ, ତେବେ ଯିହୋବା ଏବଂ ମଣିଷମାନଙ୍କ ସମ୍ପର୍କରେ ଫାଟ ସୃଷ୍ଟି ହୋଇଗଲା । କିନ୍ତୁ ମୁକ୍ତିର ମୂଲ୍ୟ ଯୋଗୁଁ ହିଁ ଏହି ସମ୍ପର୍କକୁ ପୁଣିଥରେ ଗଢ଼ିବା ସମ୍ଭବ ହୋଇପାରିଲା ।

୧୫. ମୁକ୍ତିର ମୂଲ୍ୟ ପାଇଁ ଯିହୋବା କାହିଁକି ଖୁସି ହେଲେ ଏବଂ ଏଥିରୁ କʼଣ ସମ୍ଭବ ହୋଇପାରିଲା ?

^୧୫ ବାଇବଲରେ କୁହାଯାଇଛି ଯେ ଯୀଶୁ ଆମ ‘ପାପ ନିମନ୍ତେ ପ୍ରାୟଶ୍ଚିତ୍ତ ସ୍ୱରୂପ ଅଟନ୍ତି ।’ (୧ ଯୋହ. ୨:୨) ଏଠାରେ ଯେଉଁ ଗ୍ରୀକ୍‌ ଶବ୍ଦର ଅନୁବାଦ “ପ୍ରାୟଶ୍ଚିତ୍ତ” କରାଯାଇଛି, ତାହାର ଅର୍ଥ ‘ଯାହା ଈଶ୍ୱରଙ୍କୁ ଖୁସି କରେ’ ବି ହୋଇପାରେ । କିନ୍ତୁ ଯୀଶୁଙ୍କ ମୁକ୍ତିର ମୂଲ୍ୟରୁ ଯିହୋବା କାହିଁକି ଖୁସି ହେଲେ ? ଏପରି ନୁହେଁ ଯେ ସେ ନିଜ ପୁତ୍ରର ମୃତ୍ୟୁ ପାଇଁ ଖୁସି ହେଲେ, ବରଂ ମୁକ୍ତିର ମୂଲ୍ୟ ଯୋଗୁଁ ସେ ମଣିଷମାନଙ୍କ ସହ ପୁଣିଥରେ ସମ୍ପର୍କ ଗଢ଼ିପାରିଲେ, ତେଣୁ ସେ ଖୁସି ହେଲେ । (ରୋମୀ. ୩:୨୩-୨୬) ଧ୍ୟାନ ଦିଅନ୍ତୁ ଯେ ଯିହୋବା ଯୀଶୁଙ୍କ ମୃତ୍ୟୁ ପୂର୍ବରୁ ହିଁ ତାଙ୍କର ମୁକ୍ତିର ମୂଲ୍ୟ ଆଧାରରେ ନିଜ ବିଶ୍ୱସ୍ତ ସେବକମାନଙ୍କୁ ଧାର୍ମିକ ଗଣନା କଲେ । ଏପରି କାହିଁକି ? କାରଣ ତାଙ୍କୁ ପୂରା ଭରସା ଥିଲା ଯେ ତାଙ୍କ ପୁତ୍ର ଆଗକୁ ଯାଇ ମୁକ୍ତିର ମୂଲ୍ୟ ନିଶ୍ଚୟ ଦେବ ।—ଆଦି. ୧୫:୧, ୬; ଯିଶା. ୪୬:୧୦.

୧୬. ଏହି ବର୍ଷ ସ୍ମାରକରେ ଭାଗ ନେବା ପୂର୍ବରୁ ଆପଣ ଆଉ କେଉଁ ବିଷୟରେ ଭାବିପାରିବେ ? (ଚିତ୍ର ମଧ୍ୟ ଦେଖନ୍ତୁ ।)

^୧୬ ଭାବନ୍ତୁ ଏହା ଆମ ପାଇଁ କେତେ ବଡ଼ କଥା ଯେ ମୁକ୍ତିର ମୂଲ୍ୟ ଯୋଗୁଁ ଆମେ ଯିହୋବାଙ୍କ ସହ ସମ୍ପର୍କ ଗଢ଼ିପାରିଲୁ ! ଏହାଯୋଗୁଁ ଆପଣ ଯିହୋବାଙ୍କୁ ନିଜ “ପିତା” କହିପାରନ୍ତି, ଯେପରି ଯୀଶୁ ବି ଶିଖାଇଥିଲେ । (ମାଥି. ୬:୯) ଆପଣ ଚାହିଁଲେ ତାଙ୍କୁ ନିଜ “ମିତ୍ର” ବି କହିପାରିବେ । କିନ୍ତୁ ଆପଣଙ୍କୁ ଗଭୀର ଶ୍ରଦ୍ଧା ଓ ଆଦର ସହ ଏପରି କହିବା ଉଚିତ୍‌ । କାରଣ ପାପୀ ହେବା ଯୋଗୁଁ ଆମେ ନିଜ ବଳରେ କେବେ ବି ଯିହୋବାଙ୍କର ଏତେ ନିକଟତର ହୋଇପାରି ନ ଥାʼନ୍ତୁ । କେବଳ ଯୀଶୁଙ୍କ ଯୋଗୁଁ ହିଁ ଆମେ ଯିହୋବାଙ୍କ ସହ ଏତେ ଭଲ ସମ୍ପର୍କ ଗଢ଼ି ପାରିଛୁ । ଯିହୋବା ଯୀଶୁଙ୍କର ‘ଯାତନା ଖୁଣ୍ଟର ରକ୍ତରେ ଶାନ୍ତି ସ୍ଥାପନ କରି ତାହାଙ୍କ ଦ୍ୱାରା ଆପଣା ସହିତ ସମସ୍ତର ମିଳନ କରନ୍ତି ।’ (କଲ. ୧:୧୯, ୨୦) ମୁକ୍ତିର ମୂଲ୍ୟ ଯୋଗୁଁ ହିଁ ଆମେ ଅପରିପୂର୍ଣ୍ଣ ହେବା ସତ୍ତ୍ୱେ ଯିହୋବାଙ୍କ ସହିତ ସମ୍ପର୍କ ଗଢ଼ି ପାରିଥାଉ ।

ମୁକ୍ତିର ମୂଲ୍ୟ ପ୍ରମାଣ ଦିଏ ଯେ ଯିହୋବା କେତେ ଦୟାଳୁ

୧୭. ମୁକ୍ତିର ମୂଲ୍ୟରୁ କିପରି ଜଣାପଡ଼େ ଯେ ଯିହୋବା ଦୟାଳୁ ଈଶ୍ୱର ଅଟନ୍ତି ? (ଏଫିସୀୟ ୨:୪, ୫)

^୧୭ ମୁକ୍ତିର ମୂଲ୍ୟ ପ୍ରମାଣ ଦିଏ ଯେ ଯିହୋବା “ଦୟାସାଗର ।” ଆମେ ନିଜ ‘ଅପରାଧ ଯୋଗୁଁ ମୃତ’ ହୋଇଯାଇଥିଲୁ, କିନ୍ତୁ ଯିହୋବା ଆମକୁ ‘ଜୀବିତ କଲେ ।’ (ଏଫିସୀୟ ୨:୪, ୫ ପଢ଼ନ୍ତୁ ।) ଗୋଟିଏ ବିଲ୍‌ଡିଙ୍ଗ ତଳେ ଦବି ଯାଇଥିବା ବ୍ୟକ୍ତି ଭଳି ଆଜି ଏପରି ଅନେକ ନମ୍ର ଲୋକମାନେ ଅଛନ୍ତି, ଯେଉଁମାନେ ନିଜ ପାପର ବୋଝରେ ଦବି ଯାଇଛନ୍ତି । ତେଣୁ ସେମାନେ ସାହାଯ୍ୟ ପାଇଁ ଈଶ୍ୱରଙ୍କୁ ଡାକୁଛନ୍ତି । (ପ୍ରେରି. ୧୩:୪୮) ଯିହୋବା ସେମାନଙ୍କର ଡାକ ଶୁଣନ୍ତି ଏବଂ ସେମାନଙ୍କୁ ରାଜ୍ୟର ସନ୍ଦେଶ ଜାଣିବା ପାଇଁ ସାହାଯ୍ୟ କରନ୍ତି । କାରଣ ସେ ଚାହାନ୍ତି ଯେ ସେମାନେ ଏହାଦ୍ୱାରା ତାଙ୍କୁ ଏବଂ ତାଙ୍କ ପୁତ୍ର ଯୀଶୁ ଖ୍ରୀଷ୍ଟଙ୍କୁ ଜାଣିପାରନ୍ତୁ । (ଯୋହ. ୧୭:୩) ଶୟତାନ ଭାବୁଥିଲା ଯେ ଆଦମ ଓ ହବାଙ୍କ ପାପ ଯୋଗୁଁ ଯିହୋବାଙ୍କର ଉଦ୍ଦେଶ୍ୟ ପୂରା ହୋଇପାରିବ ନାହିଁ, କିନ୍ତୁ ସେ ଭୁଲ ଭାବୁଥିଲା ।

୧୮. ମୁକ୍ତିର ମୂଲ୍ୟ ଉପରେ ଚିନ୍ତନ କରିବା ସମୟରେ ଆମକୁ ଆଉ କେଉଁ କଥା ମନେ ରଖିବା ଉଚିତ୍‌ ?

^୧୮ ମୁକ୍ତିର ମୂଲ୍ୟ ଯୋଗୁଁ ଆମକୁ ଅନେକ ଆଶିଷ ମିଳିଛି ଏବଂ ଆମକୁ ତାହା ଉପରେ ଚିନ୍ତନ ବି କରିବା ଉଚିତ୍‌ । କିନ୍ତୁ ଆମକୁ ଏହା ବି ମନେ ରଖିବା ଉଚିତ୍‌ ଯେ ମୁକ୍ତିର ମୂଲ୍ୟ ଦେବା ପଛରେ ଆଉ ଏକ ବଡ଼ କାରଣ ମଧ୍ୟ ରହିଛି । ଯିହୋବା କେବଳ ଆମକୁ ଉଦ୍ଧାର ଦେବା ପାଇଁ ଯୀଶୁଙ୍କ ମୁକ୍ତିର ମୂଲ୍ୟର ବ୍ୟବସ୍ଥା କଲେ ନାହିଁ, ବରଂ ଏଦନ ବଗିଚାରେ ଶୟତାନ ଯେଉଁ ପ୍ରଶ୍ନ କରିଥିଲା ତାହାର ଉତ୍ତର ଦେବା ପାଇଁ ମଧ୍ୟ ସେ ଏହାର ବ୍ୟବସ୍ଥା କଲେ । (ଆଦି. ୩:୧-୫, ୧୫) ଏପରି କରି ଯିହୋବା ନିଜ ନାମକୁ ପବିତ୍ର କରିବେ ଏବଂ ତାଙ୍କ ଉପରେ ଯାହା ସବୁ ଆରୋପ ଲାଗିଛି, ସେଗୁଡ଼ିକୁ ମିଛ ସାବ୍ୟସ୍ତ କରିବେ । ଯିହୋବା ଆମକୁ ବହୁତ ପ୍ରେମ କରନ୍ତି, ସେଥିପାଇଁ ସେ ମୁକ୍ତିର ମୂଲ୍ୟ ଜରିଆରେ ଆମକୁ ପାପ ଓ ମୃତ୍ୟୁରୁ ରକ୍ଷା କରିବେ । କେବଳ ଏତିକି ନୁହେଁ, ଯିହୋବା ଆମ ମଣିଷମାନଙ୍କ ଉପରେ ବହୁତ ମହାକୃପା କରିଛନ୍ତି । ଆମେ ପାପୀ ଅଟୁ ତଥାପି ସେ ଆମକୁ ସୁଯୋଗ ଦେଇଛନ୍ତି ଯେ ଶୟତାନର ଆରୋପକୁ ମିଛ ସାବ୍ୟସ୍ତ କରୁ । (ହିତୋ. ୨୭:୧୧) ଆପଣ କିପରି ଦେଖାଇପାରିବେ ଯେ ଆପଣ ମୁକ୍ତିର ମୂଲ୍ୟ ପାଇଁ ଯିହୋବାଙ୍କର କୃତଜ୍ଞ ଅଛନ୍ତି ? ଏହି ପ୍ରଶ୍ନର ଉତ୍ତର ଆମକୁ ପରବର୍ତ୍ତୀ ଲେଖାରେ ମିଳିବ ।