ପାଉଲଙ୍କୁ ରୋମ ପଠାଗଲା

ପାଉଲଙ୍କ ପ୍ରଚାରର ତୃତୀୟ ଯାତ୍ରା ଯିରୂଶାଲମରେ ଶେଷ ହେଲା । ସେଠାରେ ତାଙ୍କୁ ଗିରଫ କରାଗଲା ଏବଂ ଜେଲରେ ବନ୍ଦୀ କରାଗଲା । ଦିନେ ରାତିରେ ଦର୍ଶନରେ ଯୀଶୁ ତାଙ୍କୁ କହିଲେ, ‘ତମେ ରୋମକୁ ଯିବ ଏବଂ ସେଠାରେ ପ୍ରଚାର କରିବ ।’ ପାଉଲଙ୍କୁ ଯିରୂଶାଲମରୁ କାଇସରିଆକୁ ନିଆଗଲା, ଯେଉଁଠାରେ ସେ ଦୁଇ ବର୍ଷ ଯାଏ ଜେଲରେ ରହିଲେ । ଯେବେ ତାଙ୍କ ମାମଲାକୁ ରାଜ୍ୟପାଳ ଫେଷ୍ଟଙ୍କ ପାଖକୁ ନିଆଗଲା ତେବେ ସେ ଫେଷ୍ଟଙ୍କୁ କହିଲେ, ‘ମୁଁ ଚାହେଁ ଯେ ରୋମର ସମ୍ରାଟ ମୋର ନ୍ୟାୟ କରନ୍ତୁ ।’ ଫେଷ୍ଟ କହିଲେ, ‘ତମେ ସମ୍ରାଟକୁ ନିବେଦନ କରିଛ, ତମେ ସମ୍ରାଟ ପାଖକୁ ଯିବ ।’ ପାଉଲଙ୍କୁ ରୋମକୁ ଯାଉଥିବା ଜାହାଜରେ ଚଢ଼ାଗଲା । ତାଙ୍କ ସହ ଦୁଇ ଜଣ ଖ୍ରୀଷ୍ଟିୟାନ ଭାଇ, ଲୂକ ଓ ଆରିସ୍ତାର୍ଖ ମଧ୍ୟ ଗଲେ ।

ଯେତେବେଳେ ଜାହାଜ ସମୁଦ୍ର ମଝିରେ ଥିଲା ସେତେବେଳେ ଗୋଟିଏ ବଡ଼ ଝଡ଼ ତୋଫାନ ଉଠିଲା ଏବଂ ଅନେକ ଦିନ ଯାଏ ରହିଲା । ସମସ୍ତେ ଭାବିଲେ ଏବେ ସେମାନେ ମରିଯିବେ । କିନ୍ତୁ ପାଉଲ କହିଲେ, ‘ଲୋକମାନେ, ଜଣେ ସ୍ୱର୍ଗଦୂତ ମୋତେ ସ୍ୱପ୍ନରେ କହିଲେ, “ପାଉଲ, ଡର ନାହିଁ । ତମେ ନିଶ୍ଚୟ ରୋମକୁ ଯିବ ଏବଂ ତମ ସହିତ ଜାହାଜରେ ଯେତେ ଲୋକ ଅଛନ୍ତି ସେସମସ୍ତେ ବଞ୍ଚିବେ ।” ତେଣୁ ସାହସ ଧର । ଆମେ ମରିବା ନାହିଁ ।’

ଝଡ଼ ତୋଫାନ ୧୪ ଦିନ ଯାଏ ଚାଲିଲା । ଶେଷରେ ସେମାନଙ୍କୁ ଜମି ଦେଖାଗଲା । ତାହା ମେଲିତୀ (ମାଲ୍‌ଟା) ଦ୍ୱୀପ ଥିଲା । ଜାହାଜ ବାଲିରେ ଫସି ଅଟକି ଗଲା ଏବଂ ତାହା ଭାଙ୍ଗି ଖଣ୍ଡ ଖଣ୍ଡ ହୋଇଗଲା । କିନ୍ତୁ ସେହି ଜାହାଜରେ ଥିବା ସମସ୍ତ ୨୭୬ ଜଣ ଲୋକ ବଞ୍ଚିଗଲେ । କିଛି ଲୋକ ପହଁରି କୂଳକୁ ପହଞ୍ଚିଗଲେ, ଆଉ କିଛି ଜାହାଜର ଭଙ୍ଗା ଖଣ୍ଡର ସାହାରା ନେଇ କୂଳକୁ ପହଞ୍ଚିଗଲେ । ମାଲ୍‌ଟାର ଲୋକମାନେ ସେମାନଙ୍କ ଦେଖାଶୁଣା କଲେ ଏବଂ ସେମାନଙ୍କ ପାଇଁ ନିଆଁ ଜାଳିଦେଲେ ଯାହାଦ୍ୱାରା ସେମାନେ ନିଜକୁ ଗରମ ରଖିପାରିବେ ।

ତିନି ମାସ ପରେ, ସୈନିକମାନେ ପାଉଲଙ୍କୁ ଆଉ ଗୋଟିଏ ଜାହାଜରେ ରୋମକୁ ନେଇଗଲେ । ଯେବେ ସେ ରୋମକୁ ପହଞ୍ଚିଲେ ତେବେ ସେଠାର ଭାଇମାନେ ତାଙ୍କୁ ଭେଟିବା ପାଇଁ ଆସିଲେ । ଯେତେବେଳେ ପାଉଲ ସେମାନଙ୍କୁ ଦେଖିଲେ ସେ ଯିହୋବାଙ୍କୁ ଧନ୍ୟବାଦ ଦେଲେ ଏବଂ ତାଙ୍କୁ ସାହସ ମିଳିଲା । ପାଉଲ ଜଣେ କଏଦୀ ଥିଲେ, ତଥାପି ତାଙ୍କୁ ରୋମରେ ଗୋଟିଏ ଭଡ଼ା ଘରେ ରହିବା ପାଇଁ ଦିଆଗଲା । ଜଣେ ସୈନିକ ପାଉଲଙ୍କୁ ପହରା ଦେଉଥିଲା । ପାଉଲ ରୋମରେ ଦୁଇ ବର୍ଷ ରହିଲେ । ଲୋକମାନେ ତାଙ୍କୁ ଭେଟିବା ପାଇଁ ଆସୁଥିଲେ ଏବଂ ସେ ସେମାନଙ୍କୁ ଈଶ୍ୱରଙ୍କ ରାଜ୍ୟ ଓ ଯୀଶୁଙ୍କ ବିଷୟରେ ଶିଖାଉଥିଲେ । ପାଉଲ ସେଠାରେ ରହିବା ସମୟରେ ଏସିଆ ମାଇନର ଓ ଯିହୁଦାର ମଣ୍ଡଳୀଗୁଡ଼ିକୁ ଚିଠିଗୁଡ଼ିକ ମଧ୍ୟ ଲେଖିଲେ । ଯିହୋବା ସତରେ ପାଉଲଙ୍କ ଜରିଆରେ ଅନେକ ଦେଶ ଯାଏ ଖୁସିର ଖବର ପହଞ୍ଚାଇଲେ ।