Ileta i Jud

1 Jud ro rhiẹ ọvrẹn i Jesu Kristi ọrhẹ omizu i Jems. Mia ya ileta ọnana vwe ihworho rẹ Osolobrugwẹ ro rhiẹ Ọsẹ na o seri ji vwo ẹgwọlọ kpahen, rọ ji sẹrorẹ aye rẹn i Jesu Kristi:

2 Jenẹ arodọmẹ ọrhẹ ufuoma kugbe ẹgwọlọ o bunrhọ rẹn are.

3 Imizu mi vwo ẹgwọlọ kpahen, dedevwo mia damoma mi na ya vwe are kpahen usimirhọ ọwan i vwo kugbe na, mi nirien rhiẹ oborẹ oserhọ mi na ha urhebro rẹn are nyoma ileta, nẹ are i rha wọnrọn gbanhan fọkiẹ esegburhomẹmro na re tiobọnu rẹn ihworho efuanfon na ukwọgbọ ọvo rhinrin ye te i bẹmẹdẹ. 4 Mia ya ileta ọnana fọkime ihworho ezẹko i bẹbẹ ruẹ uvwre are ne. Eyaya Efuanfon na i tariẹ rhotọre ọke jijiri ne taghene aye ine rhiẹromẹrẹn aruẹ ẹzenguon ọnana. Aye ihworho ri vwe mwuọghọ rẹn Osolobrugwẹ, ra ji ha ẹghẹlẹ esiri rode Osolobrugwẹ ọwan kpahen obọ ruẹ irueruo aghwa.* Aye ne ji djephia taghene aye i tiẹn onini ọrhẹ Ọrovwori ọwan Jesu Kristi ne.

5 Dedevwo are i ghwanreriẹn rhe kpahen ọsoso ekwakwa enana ne, mi gwọlọ karorhọ are taghene ọke i Jehova o simi ihworho enẹyen nẹ otọre Ijipt, nọ ghwọghọ ihworho ri vwe dje esegburhomẹmro phia ọke oru. 6 Harẹn emakashe ri vwa sẹrorẹ ẹrhẹ aye nẹ ọtonrhọ, ri ji sẹrerhumuji ekete ro fori nẹ aye i rhirhiẹ, nọ ha ejọrọ kanren aye bẹmẹdẹ rhẹ uvuẹn ekete ro mwuokuku omamọ, bọmọke ana ha oja riẹ aye uvuẹn ẹdẹ rode na. 7 Omaran i Sodọm ọrhẹ Gomora kugbe emwa ri kinhariẹ aye, i ji fiomarhọ irueruo ọfanrhiẹn* rọ vrẹn ovwan jeghwai nyalele ojemẹ ugboma rọ vẹnẹ oborẹ a maren aye lele. Aye ni rhiẹ udje orhetio rẹn ọwan, ọke Osolobrugwẹ ọ ha aye guẹnzọn ji ha erhanren i bẹmẹdẹ ghwọghọ aye.

8 Udabọ ọnana, ehworhare erana e ji roro* ekwakwa ibiobiomu ọke ephian, aye e gbe ugboma na aghwa, aye a kparahasuẹ omẹgbanhon usun ji ta erharhere ẹmro kpahen ihworho ri vwo odidi na. 9 Ọrẹn, ọke i Maikẹl ro rhiẹ olotu emakashe na o leli Dẹbolo wene ẹmro ji frẹfro kpahen orinmi Mosis, Maikẹl o hinmi haye guẹnzọn yanghene ta erharhere ẹmro hasuiẹ-ẹ. Ukpomaran, nọ tare: “Jenẹ i Jehova* ọ ghwọghwuo.” 10 Ọrẹn, ehworhare enana a ta erharhere ẹmro kpahen ọsoso ekwakwa aye i vwe ghini vwẹruọ ye. Aye e vwẹruọ ekwakwa jerẹ eranmo rẹ eroma o suẹn, ri vwe ji roro. Aye na ha ekwakwa enana gbe oma aye ghwẹ.

11 Erhirhiẹ aye o biomurun omamọ, fọkime aye i nyalele idjaghwẹ i Ken, ji brokpakpa hẹrokele udje ọsọsọ i Belam fọkiẹ osẹkwa. Aye i ji hwu ne fọkime aye i tẹmro ẹkparehaso jerẹ i Kora! 12 Ọke aye a riorẹ kugbe rhẹ are, ji dje ẹgwọlọ rẹn owuowọnwan, aye i họhọ itita ri tiomanu rhẹ obotọre ame. Aye isuingegede ri vwa zofẹn rẹ aye ina ghẹrẹ oma aye ọvo. Aye avwre ri vwe vwo ame rẹ aphẹrẹ ọ kpara sa kpara rie, aye erhan ri vwa mọ emamọ uvuẹn ọke aye, ri hwu te ọgbeva ne,* re ji ghwie notọre ne. 13 Aye ukolame ọgbogbanhon uvuẹn urhie ọduado na, re gbiphughu ọrẹ ophọphọme aye phia. Aye ikereti re beghe, ekete rọ mai mwuokuku yọ hẹrhẹ aye bẹmẹdẹ.

14 Itiọrurhomẹmro, Inọk ro rhiẹ ohworho ọrẹ irhiruẹ erhe kelie nẹ Adam rhe, ọ ji mẹraro kpahen aye ọke rọ ta: “Nughe! Jehova* nọ rhere rhẹ emakashe efuanfon buebun* enẹyen, 15 nọ mọ ha aye ephian guẹnzọn. No ji brorhiẹn kpe ọsoso evwọkon na sekpahen irueruo ọkon aye i ruru uvuẹn izede ọvwiavwia, ọrhẹ sekpahen ekwakwa re gbunu rẹ iruedandan erana ri vwe mwuọghọ rẹn Osolobrugwẹ, i ta hasuiẹ.”

16 Ehworhare erana e gun igueguon, ji brenu kpahen oborẹ ọ phia uvuẹn akpenyerẹn aye. Aye a nyalele ojemẹ ugboma aye ji ha ugbunu yenyan eduado, aye a gemai jiri awọrọ fọkiẹ erere omobọ aye.*

17 Ọrẹn harẹn are, imizu mi vwo ẹgwọlọ kpahen, are i karorhọ ẹmro inyikọ Ọrovwori ọwan Jesu Kristi i ta vrẹn ne,* 18 ọrhẹ oborẹ aye e ru ta rẹn are taghene: “Uvuẹn ẹdẹ ri koba na, era ha awan djechẹẹ ji nyalele ojemẹ ibiobiomu erẹ ugboma aye, ina homaphia.” 19 Enana yẹ ihworho ra suẹ oghalẹ ji ruẹ jerẹ eranmo.* Aye e vwo ẹhẹn ọfuanfon Osolobrugwẹ-ẹ.* 20 Ọrẹn, imizu mi vwo ẹgwọlọ kpahen, are i bọn oma are gbanhon nyoma esegburhomẹmro are rọ mai fon na, nẹ are i ji nẹrhomo nyoma ẹhẹn ọfuanfon na. 21 Neneyo are i sabu sẹrorẹ oma are rhẹ uvuẹn ẹgwọlọ Osolobrugwẹ, nẹ are i ji hẹrhẹ arodọmẹ Ọrovwori ọwan Jesu Kristi ro no sun are vwo arhọ i bẹmẹdẹ. 22 Habaye, are i rhe gbe arodọmẹ rẹn ihworho ri vwo ẹhẹn eveva. 23 Are i simi aye nyoma are ine fru aye nẹ erhanren na. Are i ji rhe gbe arodọmẹ rẹn ihworho erọrọ. Ọrẹn, are i ruie rhẹ ofẹnzẹ, ji vwo utuoma kpahen ewun rẹ ugboma na o gbe ghwu ne.

24 Osolobrugwẹ ọwan ọnọ sabu sẹrorẹ are nẹ are i je rhe se. Ọnọ sabu ha userhumu rẹn are vabọ upe, ji yẹ are aghọghọ rode uvuẹn obaruiẹ ro vwo odidi. 25 Jenẹ ujiri, ọdo, omẹgbanhon ọrhẹ omẹgbanhon usun ephian nẹ ọke ahwanren rhe me te ọke ọnana ya ruẹ i bẹmẹdẹ, o rhirhiẹ ye rẹn Osolobrugwẹ ọwan ọvo, ọrhẹ Osimi ọwan nyoma i Jesu Kristi ro rhiẹ Ọrovwori ọwan. Isẹ.