Ileta i Pita Ọreva
1 Saimọn Pita ro rhiẹ ọvrẹn ọrhẹ ọnyikọ i Jesu Kristi. Mia ya ileta ọnana vwe ihworho ri vwo esegburhomẹmro ọghoghanren jerẹ ame nyoma irueruo ọvwata Osolobrugwẹ ọrhẹ i Jesu Kristi ro rhiẹ Osimi ọwan:
2 Jenẹ ẹghẹlẹ esiri rode ọrhẹ ufuoma o bunrhọ rẹn are, fọkime are i vwo irherhe ọgbagba kpahen Osolobrugwẹ ọrhẹ i Jesu ro rhiẹ Ọrovwori ọwan. 3 Omẹgbanhon Osolobrugwẹ ọ lẹrherẹ ọwan vwo ọsoso ekwakwa ra lẹrhẹ ọwan nyerẹn ji fiomarhọ ogame Osolobrugwẹ ne. Ọwan i vwo ekwakwa enana fọkiẹ irherhe ọgbagba kpahen Ohworho ro serẹ ọwan nyoma odidi ọrhẹ orhorhomu ọnẹyen. 4 Nyoma ekwakwa enana yọ yẹ ọwan obọdẹn ive eghoghanren, neneyo a nyoma ekwakwa enana vwo aruẹ odidi rẹ Osolobrugwẹ o vwori. Fọkime ọwan i vabọ nẹ obiobiomu akpọ na ne, rẹ ojemẹ ọsọsọ* ọ rhua sa.
5 Fọkiẹ iroro ọnana, are i gba damoma ha omamọ uruemru ba esegburhomẹmro are, ji ha irherhe ba omamọ uruemru are. 6 Are i ha omerhesun ba irherhe are, ji ha edirin ba omerhesun are, are i ha uruemru re fiomarhọ ogame Osolobrugwẹ ba edirin are, 7 are i ha ẹgwọlọ imizu ba uruemru re fiomarhọ ogame Osolobrugwẹ, nẹ are i ji ha ẹgwọlọ ba ẹgwọlọ imizu. 8 Fọkime are i rhe vwo ekwakwa enana ji vwo yi gbephe uvuẹn oma are, are ni na mọ emamọ fọkiẹ irherhe ọgbagba Ọrovwori ọwan Jesu Kristi, are i ji rhirhiẹ ye furhiemu-u.
9 Fọkime kohworho kohworho ro vwo vwo iruemru enana, otuẹro, o ji rhurhu ikẹruiẹ nọ jọ rhọ mẹrẹn ukpẹ na.* Oborẹ o rurie fon nẹ edandan yen ọke jijiri ne, ọ ji sẹriẹ ẹro ne. 10 Omarana imizu, are i rhe ruẹ ekete omẹgbanhon are o teri neneyo use re serẹ are ọrhẹ ẹdjẹ ra djẹre are ha, ọ dabu mwẹro. Fọkime are erhe ruẹ ekwakwa enana, are ine rhe fiẹkparobọ. 11 Itiọrurhomẹmro, nyoma izede ọnana yẹ are ine vwo obọdẹn uphẹn rẹ are ina ruẹ Uvie i bẹmẹdẹ ọrẹ Ọrovwori ọrhẹ Osimi ọwan Jesu Kristi.
12 Omarana, ni mi vworie rhẹ ẹhẹn mi na karorhọ are kpahen ekwakwa enana ọke ephian, dedevwo are i rheri aye ji dabu mevigbanhon uvuẹn urhomẹmro are i yonorin na ne. 13 Ọrẹn, mie nie rhiẹ oborẹ oserhọ mi na ha okarorhọ rẹn are, ra mẹriẹn taghene mi ji ha uvuẹn i tabanako* ọnana. 14 Mi rheri taghene phẹrẹkpẹ ene tiẹ i tabanako mẹ notọre, jerẹ oborẹ Ọrovwori ọwan Jesu Kristi o djerie fiotọre ha mẹ. 15 Mi ne ruẹ ekete omẹgbanhon mẹ o teri ọke ephian, neneyo mi rha nyarhẹn hin, are ọvo ni na sabu rha karorhọ* ekwakwa enana.
16 Rhi nyoma ikuegbe efian ra dabu gbe, yẹ ame a ta rẹn are kpahen omẹgbanhon ọrhẹ ọke Ọrovwori ọwan Jesu Kristi ọnọ ghwẹrioma rhe-e, ukpomaran ame i rhiẹromẹrẹn odidi ọnẹyen. 17 Fọkime Osolobrugwẹ ro rhiẹ Ọsẹ ro vwo odidi rode na, no tiobọnu ọghọ ọrhẹ odidi rẹn i Jesu ọke rọ tẹmro enana* riẹn: “Ọnana Ọmọ mẹ mi vwo ẹgwọlọ kpahen na, ri mi ji vwo ekwerhọ kpahen na.” 18 Ee, ame i rhonrien ọke ra tẹmro enana nẹ odjuwu rhe, ọke ame ọrhẹ ọye a ha uvuẹn ugbenu ọfuanfon na.
19 Omarana, ọwan i vwo ẹmro aruẹmẹrẹn rọ dabu mwẹro. Are a ji damoma fọkime are a tẹnrovie jerẹ ukpẹ ro lo uvuẹn ekete ro mwuokuku, nọyẹ uvuẹn ọmudu are, (bọmọke ọke na ono rhie ọrhẹ bọmọke ukereti urhiọke na ọnọ ki homaphia). 20 Fọkime are i ghwanreriẹn rhe ọnana ne taghene o vwo aruẹmẹrẹn uvuẹn Eyaya Ọfuanfon na ro nẹ obẹ onyakpọ owuorowu rhe-e. 21 Fọkime o vwo ọke owuorowu ituakpọ a nyoma ọhọre aye mẹraro-o, ọrẹn ẹhẹn ọfuanfon na yo mwurun* aye ta oborẹ Osolobrugwẹ ọ gwọlọre.