Ileta ra ya Vwe Itu i Hibru
7 Fọkime Mẹlkizẹdẹk ọnana ro rhiẹ orodje i Selẹm ọrhẹ orherẹn Osolobrugwẹ rọ Mai Rierun na, ọ vwa Ebraham uvuẹn izede ọke rọ ghwẹrioma nẹ ekete ro yo fiẹ irodje na kparobọ, nọ ha ebrurhọ riẹn. 2 Ebraham nọ yẹ i Mẹlkizẹdẹk* akwa ọrẹ ikpe ekwakwa na ephian. Ọrukaro, odẹ ye o mevirhọ “Orodje Irueruo Ọvwata.” Habaye, ọye yi jẹ orodje i Selẹm, nọyẹ “Orodje Ufuoma.” 3 O vwo ọsẹ-ẹ, o vwo izu-u, o vwo uvwiẹghwa-a, akpenyerẹn yen o vwo ọtonrhọ yanghene oba-a. Ọrẹn, e rurie nọ họhọ Ọmọ Osolobrugwẹ. Omarana, ono rhirhiẹ orherẹn ọke ephian.*
4 Ọhworhare ọnana ọ ghini do omamọ, te erhirhiẹ Ebraham ro rhiẹ urhomu ekrun na ọ yẹ ye akwa ọrẹ ikpe ekwakwa irhorhomu rọ kpare nẹ upheri na rhe. 5 Itiọrurhomẹmro lele Urhi na, a yẹ emọ i Livai ra ha mwu ẹrhẹ irherẹn akama, nẹ aye i ha akwa ọrẹ ikpe mie ihworho na, nọyẹ mie imizu aye, dedevwo aye emọ* Ebraham. 6 Ọrẹn, ọhworhare ọnana ro vwo nẹ uvwiẹ aye rhe na, nọ ha akwa ọrẹ ikpe na mie Ebraham ji ha ebrurhọ rẹn ohworho re vive riẹn na. 7 Vwana, o mwẹro taghene ohworho ọduado yọ ha ebrurhọ rẹn ohworho ọkokamu. 8 Uvuẹn erhirhiẹ owu, itu i Livai re hwuẹ ya kwa akwa ọrẹ ikpe na riẹn. Ọrẹn, uvuẹn erhirhiẹ ọrọrọ, ohworho re se oseri kpahen taghene o nyerẹn, ya kwariẹ riẹn. 9 Ana sabu ta taghene i Livai ra kwa akwa ọrẹ ikpe na riẹn, ọ ji kwa akwa ọrẹ ikpe na nyoma Ebraham, 10 fọkime ọ ji ha usuẹn emọ rẹ ọsẹ ye rode ono vwiẹ obaro na,* ọke i Mẹlkizẹdẹk ọ vwa Ebraham.
11 Ẹkwaphiẹrhotọre irherẹn ri nẹ uvwiẹ i Livai rhe na ọ ha usuẹn Urhi ra ha rẹn ihworho na. Omarana, orhianẹ ohworho ọnọ sabu gba nyoma owian irherẹn ri nẹ uvwiẹ i Livai rhe, mesoriẹ a gwọlọ orherẹn ọrọrọ ra tare taghene ọnọ havwọ jerẹ i Mẹlkizẹdẹk ukperẹ ono rhiẹ Erọn? 12 Ra mẹriẹn taghene e wene owian irherẹn na, nọyẹ o ji fo ne wene Urhi na. 13 Fọkime ọhworhare ọnana ra tẹmro enana kpahen na, o nẹ uvwiẹ ọrọrọ rhe. Ohworho owuorowu uvuẹn uvwiẹ ọrana, o ji ze izobo uvuẹn oberun agbarha na dẹ-ẹ. 14 Fọkime o fiotọre taghene Ọrovwori ọwan o nẹ uvwiẹ i Juda rhe, ọrẹn Mosis ọ ta taghene irherẹn ine nẹ uvwiẹ ọrana rhe-e.
15 Ọnana nọ tobọ fiotọre rhọ ọke orherẹn ọrọrọ rọ họhọ i Mẹlkizẹdẹk ọ homaphia. 16 Ọye ọ gare uvuẹn ẹrhẹ orherẹn, rhi fọkiẹ uvwiẹ ro nurhe jerẹ oborẹ urhi na ọ gwọlọre-e, ọrẹn nyoma omẹgbanhon ọrẹ arhọ ra na ja sabu ghwọghọ na. 17 Fọkime e se oseri kpahiẹn taghene: “Wẹwẹ orherẹn bẹmẹdẹ jerẹ i Mẹlkizẹdẹk.”
18 Omarana, na sẹrerhumuji akama ọrukaro na, fọkime o vwo omẹgbanho-on, ọ vwọ ji rhua erere sa-a. 19 Fọkime Urhi na o ruẹ emru owuorowu gba-a, ọrẹn obọdẹn ifiẹrorhọ rẹ Osolobrugwẹ ọ yẹrẹ ọwan yo ruẹ ekwakwa ephian gba, nyoma yen yẹ ọwan e ji tiẹkẹrẹ Osolobrugwẹ. 20 Habaye, Osolobrugwẹ o dumirhonrin ọke rọ ha i Jesu mwu ẹrhẹ orherẹn. 21 (Itiọrurhomẹmro, o vwo ihworho ri rhiẹ irherẹn dedevwo e dumirhonri-in. Ọrẹn, ọye o rhiẹ orherẹn, ọke Osolobrugwẹ o dumirhonrin kpahiẹn ji ta: “Jehova* o dumirhonrin ne, o wene ẹhẹn ye-en,* ‘Wẹwẹ orherẹn bẹmẹdẹ’”). 22 Omarana, Jesu no mo rhiẹ ohworho rọ lẹrhẹ ọphọ orhorhomu na mwẹro.* 23 Habaye, orherẹn owu orho nie, ọwọrọ nọ ruiẹ, fọkime uhwu ọ vwọ lẹrhẹ aye rhiẹ orherẹn bẹmẹdẹ-ẹ. 24 Ọrẹn, fọkime orherẹn ọnana o nyerẹn bẹmẹdẹ, o vwo ohworho owuorowu rọ nọ ha ẹrhẹ orherẹn na mie yi-i. 25 Omarana, ọnọ sabu simi ihworho re bru Osolobrugwẹ nyoma yen, fọkime ọye o nyerẹn ọke ephian rọ nọ rẹ Osolobrugwẹ rẹn aye.
26 Fọkime o fori ne vwo aruẹ orherẹn ọduado ọrana ro vwo atamwu, rọ vabọ upe, ro vwo gbe omayen aghwa, rọ vẹnẹ iruedandan, ra ji kpare rierun ghwẹ idjuwu na. 27 O fo no ze izobo kẹdẹkẹdẹ jerẹ irherẹn eduado ri hẹrhẹre na-a. Aye e kiki ze izobo fọkiẹ edandan aye vwẹre, orho ru aye ne ze izobo fọkiẹ edandan ihworho na. Ọrẹn, ọye o ruẹ ọnana ukwọgbọ ọvo rhinrin ye te i bẹmẹdẹ ọke rọ ha omayen ze izobo. 28 Fọkime Urhi na ọ ha ihworho ri vwo ovwiẹlẹme mwu ẹrhẹ irherẹn eduado. Ọrẹn, ẹmro irhonrin na rọ homaphia ọke Urhi na o notọre hin, ọ ha Ọmọ rọ gbare mwu bẹmẹdẹ.