Ileta ra ya Vwe Itu i Hibru
3 Omarana, imizu efuanfon ri vwo use ọrẹ odjuwu na, are i rhe roro kpahen i Jesu ro rhiẹ ọnyikọ ọrhẹ orherẹn ọduado rẹ ọwan i rheri na. 2 Ọye ọ fuephan kpahen Ohworho rọ hariẹ mwu na, jerẹ oborẹ i Mosis ọ ji fuephan uvuẹn ọsoso oghwa Osolobrugwẹ. 3 E nirien rhiẹ ohworho* re brọghọ rhọye oma ghwẹ i Mosis, fọkime a họghọ rẹn ohworho rọ bọn oghwa ghwẹ ukperhumu oghwa na. 4 Itiọrurhomẹmro, ohworho yọ bọn i koghwa koghwa, ọrẹn Osolobrugwẹ yọ ma ekwakwa ephian. 5 Vwana, Mosis ọ fuephan jerẹ odibo uvuẹn oghwa Osolobrugwẹ, no rhiẹ oseri kpahen ekwakwa ra na ta obaro na. 6 Ọrẹn, Kristi na ọmọ rọ fuephan hẹrote oghwa Osolobrugwẹ. Ọwan yẹ oghwa Osolobrugwẹ, orhianẹ a dabu sanbọmwu ugbomọphẹ ẹmro ẹta ọrhẹ ifiẹrorhọ ọwan a ha yenyan ye te ẹta.
7 Omarana, ẹhẹn ọfuanfon na nọ tare, “Inyenana are i rha kerhọ uphele yi, 8 are i vwe ruẹ ọmudu are gbanhon jerẹ ọke aye a lẹrhi mẹ tuekwẹre ọgbogbanho-on, ọrhẹ ẹdẹ aye a dami mẹ ni uvuẹn ato na-a. 9 Fọkime esẹ are ride i damirin mẹ ni, dedevwo aye i mẹrẹn ewian mẹ uvwre ẹgbukpe 40. 10 Ọnana yọ soriẹ mie biomephan kpahen uvwiẹ ọnana, ni mi tare: ‘Ọke ephian yẹ aye e beghe uvuẹn ọmudu aye, habaye aye e rhe kpahen izede mẹ-ẹ.’ 11 Omarana, ni mi tuekwẹre dumirhonrin taghene: ‘Aye i ruẹ uvuẹn omeronmo mẹ-ẹ.’”
12 Imizu, are i ni oma so nẹ ohworho owuorowu usuẹn are o jo rho vwo ọmudu ọkon ro vwo vwo esegburhomẹmro, nyoma ro no tiomaha nẹ Osolobrugwẹ ro nyerẹn na. 13 Ọrẹn, are i rha ha urhebro rẹn owuowọnwan kẹdẹkẹdẹ, takpu e serie “Inyenana” ne, neneyo omẹgbanhon ọphiẹrhọ ọdandan ọ jọ rhọ lẹrhẹ ohworho owuorowu rhiẹ ọludu. 14 Fọkime ọwan ine ghini vwo oborẹ i Kristi na o vwori, orhianẹ ọwan i sẹrorẹ imwẹro re vwori uvuẹn ọtonrhọ na ye toba. 15 Jerẹ oborẹ a tare, “Inyenana are i rha kerhọ uphele yi, are i vwe ruẹ ọmudu are gbanhon jerẹ ọke aye a lẹrhi mẹ tuekwẹre ọgbogbanho-on.”
16 Fọkime ayọmo yi lẹrheriẹ tuekwẹre ọgbogbanhon dedevwo aye i rhon ẹmriẹn? Rhẹ ọsoso ihworho ri leli Mosis nẹ Ijipt? 17 Habaye, ayọmo yi lẹrhẹ Osolobrugwẹ biomephan uvwre ẹgbukpe 40? Rhẹ ihworho ri ruẹ ọdandan, ri ji hwu uvuẹn ato na? 18 Nẹ ayọmo yo dumirhonrin riẹn taghene aye i ruẹ uvuẹn omeronmo ọnẹye-en? Rhẹ ọsoso ihworho ri tiẹn uphele yi? 19 Omarana, ọwan i mẹrenriẹn ne taghene aye a sabu ruiẹ-ẹ, fọkime aye e vwo esegburhomẹmro-o.