Ileta ra ya Vwe Itu i Hibru
12 Omarana, fọkime ọwan i vwo iseri buebun ri họhọ avwre ri kinhariẹ ọwan, jene donron ehwan ephian ọrhẹ ọdandan ro kiki rhiẹ ọgbanrhọ rẹn ọwan na fughwẹ, na zorhẹ rọ ha obaro ọwan rhẹ edirin. 2 Na tẹnrovi Jesu ro rhiẹ Ọkobaro ọrhẹ Orugba esegburhomẹmro ọwan. Fọkiẹ aghọghọ rọ ha obaruiẹ no vwo edirin uvuẹn oberun orhan oja* na vabọ ofa. Vwana, o siyẹ obọrhen aga usun Osolobrugwẹ ne. 3 Omarana, nẹ oma ọ jọ rhọ rhọ are, nẹ are i je rhe fiobọrhotọre, are i gba dabu roro kpahen ohworho ro vwo edirin ọke iruedandan a ta erharhere ẹmro kpahiẹn, ẹmro ri vwa rhua erere vwe aye.
4 Uvuẹn owọnren rẹ are e lele ọdandan ọrana wọnrọn na, are a ji wọnrọn te erhirhiẹ ọbara o ghwe nẹ oma are-e. 5 Urhebro ra yẹrẹ are jerẹ emọ, ọ sẹrerẹ are ẹro phẹlẹphẹlẹ ne, rọ tare: “Ọmọ mẹ, wu vwa ha ukẹro sakamu ni ọghwọghwu i Jehova-a,* yanghene zofu ọrhọ ha ọkpọvi wẹ-ẹn. 6 Fọkime Jehova* ọ ha ọghwọghwu rẹn kohworho kohworho ro vwo ẹgwọlọ kpahen. Itiọrurhomẹmro, ọ fa* kohworho kohworho rọ ha ruẹ ọmọyen.”
7 O fori nẹ are i vwo edirin, fọkime ọ ha usuẹn ọghwọghwu* are. Osolobrugwẹ ọ harẹ are ruẹ emọyen ne. Gbinẹ ọmọ ọgo yẹ ọsẹ ye ọ vwọ ghwọghwẹ? 8 Ọrẹn, orhianẹ a ha ọghwọghwu ọnana rẹn are ephia-an, nọyẹ are emọ ọse, rhẹ emọyen dẹ-ẹn. 9 Habaye, esẹ ọwan uvuẹn otọrakpọ na* a ha ọghwọghwu rẹn ọwan, ọwan na ji họghọ rẹn aye. Orho fo na homariotọre nẹ ẹhẹn rhe rẹn Ọsẹ ọwan rọ ha ẹhẹn ọfuanfon na hẹrote ọwan neneyo erhe nyerẹn? 10 Fọkime aye a ghwọghwu ọwan ibiọke lele oborẹ o serhọ rẹn aye, ọrẹn Osolobrugwẹ ọ ghwọghwẹ ọwan fọkiẹ erhumu ọwan na sabu rhiẹ ihworho ri fonron jerẹ ọye. 11 Itiọrurhomẹmro, o vwo ọghwọghwu rọ merhoma ọke ukaro-o, ukpomaran ọ miama.* Ọrẹn orho ru, ihworho ra hariẹ yono ne vwo ufuoma ji ruẹ irueruo ọvwata.*
12 Omarana, are i ruẹ abọ ri seriotọre gbanhon, omaran ji te igbon re yeghe. 13 Are i rhe ruẹ izede ọphiọnphiọn rẹn aghwẹ are, neneyo aghwẹ ri kruru, i je rhe nẹ ẹrhẹ, ukpomaran ne ne simi aye. 14 Are i lele ihworho ephian nyerẹn ọrẹ ufuoma ji nyerakpọ rọ fonron, fọkime gbobọhiẹn ọnana, o vwo ohworho rọ nọ sabu mẹrẹn Ọrovwori na-a. 15 Are i ni oma so nẹ ẹghẹlẹ esiri rode Osolobrugwẹ ọ jọ rhọ va ohworho owuorowu obọ. Neneyo aghwẹ orhan ro vwo ọdedju, o jo rho mwu phia mọ suẹ okpetu ji gbe ihworho buebun aghwa. 16 Are i ji ni oma so na ja rha mẹrẹn ohworho owuorowu ro vwobọrhọ irueruo ọfanrhiẹn* uvwre are, yanghene ohworho ro vwo vwo ọdaremẹro kpahen ekwakwa efuanfon jerẹ Isọ, ro tiobọnu ẹrhẹ ọmọkpako ọnẹyen fọkiẹ emaren ukwọgbọ ọvo. 17 Fọkime are i rheri taghene ọke oru, ọke rọ gwọlọ ha ebrurhọ na riuku, erhe kwe riẹ-ẹn. Dedevwo ọ viẹre ji damoma ro no wene orhienbro na,* ọ sabu ruie-e.*
18 Fọkime are e tikẹrẹ oborẹ ana sabu hobọte yanghene oborẹ e fi erhanren rhọ-ọ, rhẹ ukolo avwre ọrhẹ oborẹ o mwuokuku omamọ yanghene ogiribo-o, 19 rhẹ edon ukpori ọrhẹ uphele rọ tẹmro-o. Ọke ihworho na e rhon uphele na, aye na rẹ taghene a vwa tẹmro rẹn aye ghwomara-an. 20 Fọkime ofẹn o mwurun aye omamọ fọkiẹ akama ọnana rọ tare taghene: “Ọrhọ tobọ rhianẹ oma aranmo o te ugbenu na, ene vi fie kpe.” 21 Habaye, oborẹ aye i mẹrẹnren na, o mwuofẹn omamọ te erhirhiẹ i Mosis ọ ta taghene: “Ofẹn o mwu mẹ, mia ji phariẹ.” 22 Ọrẹn, are i tikẹrẹ ugbenu i Zayọn ọrhẹ amwa Osolobrugwẹ ro nyerẹn na, ro rhiẹ i Jerusalẹm rọ ha obẹ odjuwu, kugbe emakashe buebun* 23 ri koko kugbe. Omaran ji te ukoko ọmọkpako na ra ya edẹ aye rhẹ idjuwu na, ọrhẹ Osolobrugwẹ ro rhiẹ Oguẹnzọn ihworho ephian, rọ hẹrote arhọ ihworho evwata na re ru gba ne, nyoma ẹhẹn ọfuanfon na. 24 Are i ji tikẹrẹ i Jesu ro rhiẹ usuọpha uvuẹn ọphọ ọkpokpọ na, kugbe ọbara ọnẹyen re miririn, rọ tẹmro uvuẹn izede ro rhomu ghwẹ ọbara Ebẹl.
25 Are i damoma kerhọ ohworho rọ tẹmro na.* Fọkime orhianẹ ihworho ri vwe kwe kerhọ orhetio Osolobrugwẹ uvuẹn otọrakpọ na a sabu vabọ-ọ, ni marhẹ ọwan ine ru vabọ orhianẹ e kwe kerhọ ohworho rọ tẹmro nẹ idjuwu na rhe-e? 26 Ọke ọrana uphele yi no kpogho otọrakpọ na. Ọrẹn vwana, o vive ne taghene: “Mi ne kpogho otọrakpọ na ọrhẹ odjuwu na ọgbọrọrọ.” 27 Ẹmro na “ọgbọrọrọ,” o djephia taghene ene tiẹ ekwakwa re kpoghori na nie, nọyẹ ekwakwa Osolobrugwẹ ọ vwọ ma, neneyo ekwakwa ri vwe kpogho na i rhirhiẹ ye. 28 Omarana, ra mẹriẹn taghene ana yẹ ọwan Uvie rọ nọ jọ sabu kpogho na, jene rhe rhiabọ dede ẹghẹlẹ esiri rode na, ra na sabu nyoma yen ha ogame ọfuanfon phia, rhẹ ofẹnzẹ Osolobrugwẹ kugbe ọghọ okokodo, rẹ Osolobrugwẹ ono ji kwerhọ. 29 Fọkime Osolobrugwẹ ọwan, erhanren rọ torhẹ ekwakwa mwuotọre.