Ileta ra ya Vwe Itu i Hibru

10 Urhi na ghwai uhoho ekwakwa irhorhomu ra sa, ọrẹn rhẹ ọye yẹ obọdẹn ekwakwa na-a. Omarana, ihworho re bru Osolobrugwẹ sa, i sabu rhiẹ ihworho ri gbare nyoma izobo re ze kẹgbukpe kẹgbukpe-e. 2 Orho rhiomaran, manẹ a vwa dobọ izobo eze ji? Fọkime erhe ruẹ ihworho ra ga ogame ọfuanfon fon hin, aye i rhe brudu kpahen ọdandan ghwomara-an. 3 Ọrẹ ovẹnẹ, izobo enana a karorhọ ọwan kpahen edandan kẹgbukpe kẹgbukpe. 4 Fọkime ọbara erhuẹn ọrhẹ ọrẹ ẹvwe, i sabu tiẹ edandan notọre-e.

5 Omarana, ọke i Kristi ọ rhiẹ akpọ na, nọ tare: “‘Wa gwọlọ izobo ọrhẹ ẹghẹlẹ-ẹ, ukpomaran ne wu mwuegbe ugboma ha mẹ. 6 We vwo ekwerhọ kpahen izobo ẹtorhẹ ọrhẹ izobo ọdanda-an.’ 7 Omarana, ni mi tare: ‘Nughe! Mi rhe me ruẹ ọhọruọ, O Osolobrugwẹ. (A yariẹ rhẹ uvuẹn ukpitọbe na* sekpahen mẹ).’” 8 Ọke ukaro, nọ ta kpahen izobo ra haphia lele Urhi na, taghene: “Wa gwọlọ yanghene vwo ekwerhọ kpahen izobo ọrhẹ ẹghẹlẹ ọrhẹ izobo ẹtorhẹ kugbe izobo ọdanda-an.” 9 Ọke oru, nọ tare: “Nughe! Mi rhe me ruẹ ọhọruọ.” O kiki tiẹ emru ọrukaro na notọre, neneyo ọ sabu ha ọreva ye mwu. 10 Nyoma “ọhọre” ọnana ye ruẹ ọwan fon ọke i Jesu Kristi ọ ha ugboma yen kpahontọre ukwọgbọ ọvo.

11 Habaye, korherẹn korherẹn o meviẹ ẹrhẹ ọnẹyen kẹdẹkẹdẹ ji wian owian ọfuanfon,* no ji ze aruẹ izobo owu ọgbọ buebun. Izobo enana i vwa sabu tiẹ edandan notọre phẹlẹphẹlẹ-ẹ. 12 Ọrẹn, ukwọgbọ ọvo yi Kristi na o ze izobo fọkiẹ edandan, no ji siyẹ obọrhen Osolobrugwẹ. 13 Nẹ ọke ọrana nyarhẹn, nọ hẹrhẹ ọke ra na ha evwreghrẹn yen ruẹ akaba rhẹ obotọre aghwẹ ye. 14 Fọkime nyoma izobo owu ọvo, yo ruẹ ihworho re ru fon na rhiẹ ihworho ri gbare ọke ephian. 15 Habaye, ẹhẹn ọfuanfon na o ji se oseri rẹn ọwan, ọke rọ ta taghene: 16 “‘Ọnana yẹ ọphọ mi ne lele aye re ẹdẹ erana i rha vrẹn hin. Mi ne fiẹ irhi mẹ rhẹ uvuẹn ọmudu aye, mi na ji ya aye rhẹ uvuẹn iroro aye,’ omaran i Jehova* ọ tare.” 17 Ọke oru, nọ ji ta: “Mi rha karorhọ edandan aye ọrhẹ irueruo ibiobiomu aye ghwomara-an.” 18 Vwana, orhianẹ a harhomu edandan enana ne, orho vwo oborẹ ọsoriẹ re ne ze izobo ọdandan ghwomara-an.

19 Omarana imizu, fọkiẹ ọbara i Jesu, ọwan ina sabu fiudugbere* ruẹ ekete ọfuanfon na, 20 rẹ ọye o rhiefirhọ* rẹn ọwan jerẹ izede ọkpokpọ ro suẹn riẹ arhọ nyoma ikọtini na ro rhiẹ ugboma yen. 21 Ra mẹriẹn taghene ọwan i vwo orherẹn ọduado rọ hẹrote oghwa Osolobrugwẹ na, 22 jene bruie nya rhẹ ọmudu ro fiotọre kugbe esegburhomẹmro rọ gbare, fọkime e ruẹ ọmudu ọwan fon nẹ ẹhẹn obrorhiẹn ọkon ne, a ji ha ame rọ fonron wọ ugboma ọwan fon ne. 23 Jena sanbọmwu aghwoghwo afiede ọrẹ ifiẹrorhọ ọwan vabọ ẹhẹn eveva, fọkime ana sabu hẹrosuẹ ohworho ro vive na. 24 Jene rhe roro kpahen* owuowọnwan, neneyo a sabu ghwa oruru rhẹ owuowọnwan oma ne dje ẹgwọlọ ọrhẹ iruo esiri phia. 25 O fo na sẹrerhumuji uruemru ra vwoma kuẹgbe-e, jerẹ oborẹ ihworho ezẹko e ruẹ. Ukpomaran, jena rha ha urhebro rẹn owuowọnwan, maido rẹ are a mẹriẹn taghene ẹdẹ na o tiẹkẹrẹ ne na.

26 Orhianẹ ọwan a ha arudo ruẹ ọdandan, dedevwo e vwo irherhe ọgbagba ọrẹ urhomẹmro na ne, nọyẹ orho vwo izobo edandan re ne ze fọkiẹ ọwan ghwomara-an. 27 Ọrẹn, o vwo ẹzenguon ro mwuofẹn rọ sa ọrhẹ ekwẹre rọ torhẹ jerẹ erhanren, rọ nọ torhẹ ihworho ra kparahasua na. 28 E vwe gbe arodọmẹ rẹn ohworho rọ kparehaso Urhi Mosisi-i. Ukpomaran, ne kpe yi hwuẹ orhianẹ ihworho awanva yanghene awansa, i se oseri hasuiẹ. 29 Gbe roro oborẹ ojẹriọ ohworho ọnọ do te orhianẹ o ni Ọmọ Osolobrugwẹ sakamu, yanghene o ni ọbara ọphọ ra ha ruie fon na sakamu yanghene ọ lẹrhẹ ẹhẹn ọrẹ ẹghẹlẹ esiri rode na tuekwẹre fọkime ọ djẹriẹ fughwẹ. 30 Fọkime ọwan i rhe ohworho rọ tare taghene: “Orukele ọnẹmẹ; mẹmẹ yi na kwosa ye.” Nọ ji ta: “Jehova* ọnọ ha ihworho yi guẹnzọn.” 31 Emru imwofẹn re ne serhẹ abọ Osolobrugwẹ ro nyerẹn na.

32 Ọrẹn, o fori nẹ are i rha karorhọ ẹdẹ erẹ ahwanren na. Ọke are a mẹrẹn ukpẹ ọrẹ urhomẹmro na hin, are ni diẹn ebẹnbẹn ọrhẹ ojẹriọ buebun. 33 Uvuẹn erhirhiẹ ezẹko, are i dẹrughwaroghwu echẹdjẹ ọrhẹ ikpokpogho uvuẹn afiede.* Uvuẹn ọke ọrọrọ, are ni mevi kẹrẹ* ihworho ra dẹrughwaroghwẹ erhirhiẹ enana. 34 Fọkime are i gbe arodọmẹ rẹn ihworho ri ha ekanron. Ọke ra kpare enyerẹn are ha, are na ji ghọghọ fọkime are i rheri taghene are i vwo obọdẹn enyerẹn rọ nọ tọ.

35 Omarana, are i vwe jenẹ ohinmi* are ọ va are obọ-ọ, fọkime ana kwosa ọduado rẹn are. 36 Are i gwọlọ edirin, neneyo are i rhe ruẹ ọhọre Osolobrugwẹ hin, are ni na sabu mẹrẹn orugba ive na. 37 O kurhẹ “ibiọke vwaran,” “ohworho rọ sa na nọ nọ rhiọ, orho kpọke ghwomara-an.” 38 “Ọrẹn, ohworho mẹ ro rhiẹ ọvwata, ono nyerẹn fọkiẹ esegburhomẹmro,” ọrẹn “orho tirierhumu, oma ọrhọ merhen mẹ kpahiẹ-ẹn.” 39 Vwana, ọwan rhẹ aruẹ ihworho re tiẹrierhumu riẹ oghwọghọ-ọ, ọrẹn ọwan aruẹ ihworho ri vwo esegburhomẹmro rọ nọ sabu simi arhọ ọwan.