Ileta Ọrukaro ra ya Vwe Itu i Kọrint

16 Vwana, sekpahen itetoro re ne toro rẹn ihworho efuanfon na, are ina sabu nyalele ọkpọvi mi tiobọnu rẹn ikoko ri ha i Galesha. 2 Uvuẹn ẹdẹ ọrukaro uvuẹn kọkprughwre kọkprughwre, are owuowọnwan i fiẹ emru rhẹ okokọ lele ekete omẹgbanhon are o teri, ne je rhe toro itetoro na mi rha rhe. 3 Ọrẹn mi rha rhe, mi ne dje ehworhare rẹ are i kwerhọ uvuẹn ileta are, nẹ aye i kpare ẹghẹlẹ are i toro nẹ ẹhẹn rhe na riẹ i Jerusalẹm. 4 Ọrẹn, orho rhiẹ oborẹ o serhọ, mi ne ji riẹ i Jerusalẹm, aye ni ne leli mẹ nya.

5 Ọrẹn, mi ne bru are rhe mi rha nya i Masidonia vrẹn hin, fọkime mi vworie rhẹ ẹhẹn mi na nya i Masidonia vrẹn. 6 Ọkezẹko, mi ne lele are rhirhiẹ ye ibiọke, yanghene lele are rhirhiẹ uvwrọke erinrin na, neneyo are i sabu sun mẹ te izede riẹ ekete mia nya. 7 Mia gwọlọ ghwai vwẹriẹ mẹrẹn are ọke mia nyavrẹ-ẹn, ọrẹn mi gwọlọ lele are ghwọghọ ọke kugbe, orho rhiẹ ọhọre i Jehova.* 8 Ọrẹn, mi na daji uvuẹn Ẹfisọs ye te ọke ra na Riorẹ i Pẹntikọst na. 9 Fọkime uphẹn ọduado* o rhiefirhọ mẹ mi na wian ewian buebun, ọrẹn ihworho buebun a kparahaso mẹ.

10 Vwana, Timoti ọrhọ rhe, jeno mwu are ẹro taghene o vwo emru owuorowu rọ nọ lẹrhiẹ zofẹn uvwre are-e, fọkime ọye ọ wian owian i Jehova* jerẹ omẹmẹ. 11 Omarana, ohworho owuorowu o vwo nie sakamu-u. Are i tiobọnie ọrẹ ufuoma neneyo o bru mẹ rhe, fọkime mẹmẹ ọrhẹ imizu na, a hẹrhiẹ.

12 Vwana, sekpahen Apolọs ro rhiẹ omizu ọwan, mi dabu rẹ ye omamọ nẹ ọye ọrhẹ imizu na i bru are rhe. O vwo yi rhẹ ẹhẹn rọ nọ rhe ọke ọnana bi-i, ọrẹn ono bru are rhe uphẹn na orho rhiefirhọ.

13 Are i rha dẹrẹ, are i mevigbanhon uvuẹn esegburhomẹmro na, are i fiudugbere ji gbanhon. 14 Jenẹ ẹgwọlọ o mwu are ruẹ kemru kemru.

15 Are i rheri taghene unuoghwa i Stẹfanas yẹ idibo erukaro* uvuẹn Akeya, aye ni ji homakpahontọre gbodibo rẹn ihworho efuanfon na. Omarana imizu, mie jirie rẹn are taghene: 16 Are i rha homakpahontọre rẹn aruẹ imizu erana, ọrhẹ ọsoso imizu ra wian gbanhan ji wian kuẹgbe. 17 Ọrẹn, mia ghọghọ fọkime i Stẹfanas, Fọtunetọs ọrhẹ Akeikọs i ha obonẹ, fọkime aye i ha userhumu rẹn are wian owian rẹ are a wian bi, orhianẹ are i ha obonẹ. 18 Fọkime aye i ruẹ ẹhẹn mẹ ọrhẹ ọrẹ are gbanhon. Omarana, are i họghọ rẹn aruẹ ehworhare erana.

19 Ikoko ri ha Esha i farẹ ọwo ẹmroma aye vwe are. Akwila ọrhẹ Priska kugbe ukoko rọ ha uvuẹn oghwa aye, i mromirẹ are sasasa uvuẹn Ọrovwori na. 20 Ọsoso imizu na ri ha obonẹ i farẹ ọwo ẹmroma aye vwe are. Are i mroma owuowọnwan ghwologhwolo.*

21 Ọnana yẹ ẹmroma mẹ, rẹ omẹmẹ i Pọl i ha obọ mẹ ya.

22 Kohworho kohworho ro vwo vwo ẹgwọlọ okokodo kpahen Ọrovwori na, jenẹ irhonrin o rhirhiẹ ye riẹn. O Ọrovwori ame, biko mọ! 23 Jenẹ ẹghẹlẹ esiri rode ọrẹ Ọrovwori Jesu o lele are rhirhiẹ ye. 24 Mie dje ẹgwọlọ mẹ vwe are ephian ri rhiẹ idibo i Kristi Jesu.