Ewian Inyikọ na

27 Vwana, ọke re brorhiẹn hin taghene ame i ruẹ ọkuna riẹ Itali, ne tiobọnu i Pọl ọrhẹ ihworho erọrọ re mwu rhẹ ekanron rẹn olotu isodja owu re se i Juliọs, rọ ha usuẹn ẹko isodja Ọgọstọs. 2 Ame ni ruẹ ọkuna ro nẹ Adramitiọm rhe, rọ nọ domaji uvuẹn unuerhuru sansan rọ ha uvwrotọre Esha. Ọke oru, ọkuna na nọ kparerẹ ame nyarhẹn. Aristakọs ro rhiẹ onyẹ i Masidonia ro nẹ i Tẹsalonaika rhe, o ji lele ame. 3 Ẹdẹ ọreva ye, ame ni domaji uvuẹn i Saidọn, Juliọs no dje uruemru esiri rẹn i Pọl nyoma ro kwe taghene i Pọl ọ yọ mẹrẹn igbehian yen neneyo aye i hẹrote yi.

4 Ọke ame a ruẹ ọkuna na nẹ i Saidọn, ame ni ya ghwa okokọ urhie i Saiprọs, fọkime aphẹrẹ na ọ wọnrọn hasuẹ ame. 5 Ọke oru, ame ni nyavrẹn urhie ọduado rọ kẹrẹ i Silisha ọrhẹ i Pamfilia, ji domaji uvuẹn unuerhuru i Maira rọ ha i Lisha. 6 Uvuẹn avwaye, olotu isodja na nọ mẹrẹn ọkuna ro nẹ Alẹzandria riẹ Itali, nọ ta rẹn ame taghene ame i ruẹ ọkuna na. 7 Ọke ọkuna na ọ ghwa bibiesuọn ẹdẹ ezẹko ne, ame ni vabu te i Kanaidọs. Fọkime aphẹrẹ ọgbogbanhon ọ lẹrhiẹ bẹn rẹ ame ina ghwa riẹ obaro, ame ni ya ghwa okokọ urhie i Krit rọ ha i Salmoni. 8 Ọke ame a vabu ghwa okokọ urhie na vrẹn, ame ni te ekete owu re se Obọdẹn Unuerhuru, rọ kẹrẹ amwa i Lesia.

9 Vwana, ẹdẹ buebun i vrẹn ne, urhie na o ji mwuofẹn ẹghwa. Habaye, ọke re zinrin orhọmo Ẹdẹ Omephoro na ọ tobọ vrẹn ne, omarana Pọl nọ djiroro owu rẹn aye. 10 Nọ tare: “Igbehian mẹ, mie nie taghene arha nya onya ọnana riẹ obaro, ọkuna na ono rhue, ehwan ọwan ina ji ghwọghọ, habaye ọwan ina sabu hwu dede.” 11 Ọrẹn, olotu isodja na nọ kerhọ ọrọ ghwa ọkuna na ọrhẹ ọro vwo ọkuna na, ukperẹ ono rhiẹ oborẹ i Pọl ọ tare. 12 Fọkime unuerhuru ọrana o fo ekete re ne rhirhiẹ uvuẹn ọke erinri-in, ihworho buebun ni ha iroro phia taghene aye i ghwa riobaro sẹ aye ina sabu te i Finis ji rhirhiẹ avwaye uvwrọke erinrin na. Ọnana ekete ọkuna e gbo rhọ uvuẹn i Krit rọ dẹrughwaroghwu obọrẹ ọren na ọ va nẹ sa.

13 Ọke aphẹrẹ na o zuẹ nẹ obọrẹ o riotọre na sa bibiesuọn, aye ne roro taghene aye ina sabu te ekete aye i tare na. Omarana, aye ni tiẹ ọtan na nẹ uvuẹn ame ji ghwa okokọ urhie i Krit vrẹn. 14 Ọrẹn o jiri-i, ogiribo ọgbogbanhon re se Yuroakwilo* no zuẹ. 15 Ọke ogiribo ọgbogbanhon na o zuẹ ọkuna na, ọrhọ sabu dẹrughwaroghwu ogiribo na-a, ame ni ha uphẹn riẹn nọ kpare ame nyarhẹn. 16 Ọke oru, ame ni jọphẹrẹ ghwa ọkuna na kẹrẹ otọre ọkokamu owu rẹ ame o kinhariẹ, re se i Kọda. Omẹgbanhon ya ame a sabu simi ibiẹ owọ rọ ha oberhumu ọkuna na. 17 Ọrẹn, ọke aye a kpare owọ ọkokamu na rhẹ uvuien hin, aye ni ha ifi gba ọkuna na. Fọkime ofẹn o mwu aye taghene ọkuna na ọnọ sabu gbanrhọ otọre uvuẹn i Sẹtis,* aye ni rhan ewẹn ọkuna na ji nyajevwo nẹ aphẹrẹ ọ kpare ọkuna na nyarhẹn. 18 Uvuẹn ẹdẹ ọreva ye, aye ni donron ehwan ezẹko fughwẹ nẹ ọkuna na ọ pharhe, fọkime ogiribo ọgbogbanhon ọ kpare ame sa kpare ame rie. 19 Uvuẹn ẹdẹ ọresa ye, aye ọvo ni donron ekwakwa ezẹko rẹ aye a ha ruiruo uvuẹn ọkuna na fughwẹ.

20 Uvwre ẹdẹ buebun, ọren ọrhẹ ikereti na a homaphia-a. Ogiribo ọgbogbanhon nọ kpare ame sa kpare ame rie, nọ họhọre taghene ame e vwo ifiẹrorhọ rẹ ame ine simirhọ-ọ. 21 O vwo ohworho owuorowu rọ riẹ emaren uvwre ẹdẹ buebu-un. Omarana, Pọl no mevi uvwre aye ji ta: “Igbehian mẹ, orhianẹ are i kerhọ irorẹdjẹ mẹ bi taghene a vwa ghwa ọkuna na nẹ i Kriti-i, manẹ a vwa rioja okpetu ọnana rọ lẹrhẹ ekwakwa ọwan vru na-a. 22 Ọrẹn vwana, mia ha urhebro rẹn are taghene are i vwe brudu-u, fọkime o vwo ohworho owuorowu usuẹn are ro no hwuo-o, ọkuna na ọvo yọ nọ ghwọghọ. 23 Uvuẹn ason rọ vrẹnren na, Osolobrugwẹ ro vwori mẹ, ri mia ji ha ogame ọfuanfon riẹn, no dje ọmakashe ọnẹyen vwe mẹ. 24 Nọ ta mẹ: ‘Wu vwa zofẹ-ẹn, Pọl. Wu ne mevi obaro i Siza. Nughe! Osolobrugwẹ ono simuo ọrhẹ ọsoso ihworho ri ha ọkuna na.’ 25 Omarana igbehian mẹ, are i vwe brudu-u, fọkime mi hẹroso Osolobrugwẹ taghene ono ruẹ oborẹ a ta mẹ na. 26 Ọrẹn, ọkuna ọwan ono vi rhue uvuẹn otọre owu rẹ ame o kinhariẹ.”

27 Vwana, ọke ason ọrẹ ikperẹne o te, aphẹrẹ nọ kpare ame sa kpare ame rie uvuẹn Urhie Ọduado ọrẹ Edria. Uvuẹn erhẹrhẹ ason, era ghwa ọkuna na ne roro taghene aye i joma te akpa ne. 28 Aye ni vwanvwọn okokodo urhie na ji mẹriẹn taghene o kodo te isinhianghwẹ 120.* Omarana, aye ni ghwa riẹ obaro ibiesuọn ji rharhumu vwanvwọn okokodo urhie na, aye ni mẹrenriẹn taghene o kodo te isinhianghwẹ 90.* 29 Fọkime ofẹn o mwu aye taghene ọkuna ame ọnọ bọmọ itita ri ha obotọre urhie na, aye ni donron ọtan ẹne ri ha oberhumu ọkuna na rhẹ ame, aye ne fiẹrorhọ ọke urhiọke ono te. 30 Ọrẹn era ghwa ọkuna na, na damoma rẹ aye ina zẹ nẹ uvuẹn ọkuna na, aye na lọrọ ewọ ekokamu na rhẹ uvuẹn ame ji ruẹ kamẹriẹn ọtan ri ha obaro ọkuna na yẹ aye e fiẹ rhẹ uvuẹn ame na. 31 Ọke i Pọl ọ mẹrẹn ọnana, nọ ta rẹn olotu isodja na ọrhẹ isodja na taghene: “Ehworhare enana i rhe nẹ uvuẹn ọkuna na, are i sabu simẹrhọ-ọ.” 32 Omarana, isodja na ni bru ifi ri mọren owọ ọkokamu na, owọ na no serhẹ ame.

33 Vwana, ọke urhiọke ọ joma te ne, Pọl nọ ha urhebro rẹn aye ephian taghene aye i riẹ emaren, nọ ta rẹn aye: “Inyenana yẹ ẹdẹ ọrẹ ikperẹne rẹ are a hẹrhẹ rhẹ uduebro, are a ji riẹ emru owuorowu-u. 34 Omarana, mie jirie rẹn are nẹ are i riẹ emaren fọkiẹ erhumu are. Fọkime o vwo ohworho owuorowu usuẹn are rẹ ẹton urhomie ọnọ kpanren se-e.” 35 Ọke i Pọl ọ tẹmro enana hin, nọ ha ibrẹdi ji kpẹmẹ Osolobrugwẹ uvuẹn obaro aye ephian, no bru ibrẹdi na ji tuẹn emaren ẹriọ rhọ. 36 Omarana, ẹhẹn aye ephian nọ gbanhonron, aye ni ya riẹ emaren. 37 Ame ephian ri ha uvuẹn ọkuna na awan 276. 38 Ọke aye a dabu riẹ ephan aye vuọn ne, aye ni donron iwiti na rhẹ uvuẹn urhie ọduado na neneyo ọkuna na ọ pharhe.

39 Ọke ẹdẹ na o rhie fiotọre ne, aye ni mẹrẹn otọre owu rẹ aye i vwe rhe, ọrẹn eyẹn ọ vuọnriẹn. Omarana, aye ni brorhiẹn rẹ aye ina ghwa ọkuna na riẹ otọre ọrana, orhianẹ aye ina sabu ru te omaran. 40 Omarana, aye ni bru ifi ri mọren ọtan na neneyo aye i serhẹ uvuẹn ame na, aye ni ji rhan ifi ri mọren uvi ọkuna na. Ọke aye a rhan owẹn rọ ha obaro ọkuna na nẹ aphẹrẹ o zuie, aye ni ghwa riẹ otọre na. 41 Ọrẹn ọkuna na nọ ghwa ruẹ eyẹn rẹ ukolame ọ fa koko. Ọke ọkuna na o ze otọre, obaruiẹ nọ gbanrhọ, ọ vwọ rhọ sabu ghwa riẹ obaro-o. Ukolame nọ ghwọghọ oberhumu ọkuna na yẹghẹyẹghẹ. 42 Omarana, isodja na ni brorhiẹn rẹ aye ine kpe ere mwu rhẹ ekanron na hwu, neneyo ohworho owuorowu usuẹn aye ọ jọ rhọ rhẹnrhẹn vabọ. 43 Fọkime olotu isodja na o brorhiẹn ro no simi Pọl, nọ dobọ irorẹdjẹ isodja na ji. Nọ ta rẹn ihworho ri rhe oborẹ a rhẹnrhẹn taghene aye i pho ruẹ ame na ji kiki rhẹnrhẹn te akpa. 44 Eri hẹrhẹre ni na ha kpahen aye, ihworho ezẹko ina ruẹ oberun evwẹre erhan, awọrọ ina ruẹ oberun erhan ri sha nẹ ọkuna na. Omarana, ame ephian ni rhẹnrhẹn te akpa ẹfẹrọvo.