Ewian Inyikọ na

10 Vwana, o vwo ọhworhare owu uvuẹn i Sẹseria re se i Kọniliọs, ọye olotu isodja* uvuẹn ẹko isodja Itali.* 2 Ọye ọrhẹ ọsoso ekruien e mwuọghọ okokodo rẹn Osolobrugwẹ ji zofẹn yen. O tiobọnẹ ẹghẹlẹ* buebun rẹn ihworho ji nẹrhomo vwe Osolobrugwẹ nẹ ẹhẹn sa ọke ephian. 3 Emrẹ ughwọdjọ esa erhẹrhuvo,* nọ mẹrẹn ọmakashe Osolobrugwẹ ro brurie rhe uvuẹn emena arudo, no serie: “Kọniliọs!” 4 Kọniliọs no nie ji phariẹ, nọ nọriẹn: “Me, Ọrovwori?” Ọmakashe na nọ kpahenrhọ riẹn: “Osolobrugwẹ o rhon ẹrhomo enọ ji karorhọ ẹghẹlẹ* enọ ne.” 5 Omarana, gbe dje ihworho riẹ i Jọpa ye se ọhworhare owu re se i Saimọn Pita. 6 O jedọn rhẹ* oghwa i Saimọn ro ruẹ ọphiẹn,* rẹ oghwa ye ọ kẹrẹ urhie ọduado na.” 7 Ogege ọmakashe ro lelie tẹmro na ọ nyarhẹn, no se idibo yi awanva ọrhẹ isodja owu ro mwuọghọ rẹn Osolobrugwẹ usuẹn ihworho ra wian riẹn. 8 Nọ ta rẹn aye kpahen ọsoso oborẹ ọ phiare na ji dje aye riẹ i Jọpa.

9 Ẹdẹ ọreva ye ọke aye a ji ha izede, ji joma te amwa na ne, Pita no riẹ oberun oghwa na ya nẹrhomo emrẹ ughwọdjọ ikpereva erhẹrhuvo.* 10 Ọrẹn, orhọmo no kpe yi omamọ, nọ ji gwọlọ oborẹ ọnọ riọ. Uvwrọke re sere emaren na, nọ menemena arudo. 11 Nọ mẹrẹn odjuwu na ro rhiefirhọ, ọrhẹ oborẹ* ọ họhọ owẹn ọduado ra mọrẹn igogo ẹniẹ, ra ji kpara rhiẹ otọrakpọ na. 12 Aruẹ eranmo sansan ri vwo aghwẹ ẹne, ọrhẹ emama ra ranran uvuẹn otọrakpọ na kugbe efen odjuwu na i ha uvuien. 13 Uphele owu nọ ta riẹn: “Pita, vẹnrẹn ne wu kpe eranmo na re!” 14 Ọrẹn, Pita nọ ta riẹn: “Ẹjo Ọrovwori. Mi sabu ruie-e, fọkime mia ji riẹ emru aghwa yanghene oborẹ ọ vwọ fon dẹ-ẹ.” 15 Uphele na nọ rharhumu tẹmro riẹn ọgbọreva ye: “Wu vwe se ekwakwa Osolobrugwẹ o ru fon ne, emru aghwa-a.” 16 Omaran yọ ji phia ọgbọresa ye, na kpare ekwakwa na* riẹ odjuwu ogege.

17 Ọke i Pita o roro kpahen oborẹ emena arudo rọ mẹrẹnren na ọnọ sabu mevirhọ, ehworhare ri Kọniliọs o djerhe na, ra ji nekpẹn oghwa i Saimọn ni rhere uvuẹn unọke ọrana ji mevi anurẹsẹ na. 18 Aye ni nọren rhẹ uphele gorigori sẹ ọhworhare re se i Saimọn Pita, o jedọn rhẹ oghwa na. 19 Ọke i Pita o ji roro kpahen emena arudo na, ẹhẹn na nọ ta riẹn: “Nughe! Ehworhare awansa a nekpọn. 20 Omarana gbe vẹnrẹn, ne wu ruotọre lele aye, wu vwe vwo ẹhẹn eveva-a, fọkime mẹmẹ yi djerẹ aye rhe.” 21 Ọke oru, Pita nọ ruotọre bru ehworhare na nya, nọ tare: “Mẹmẹ yẹ ohworho are a gwọlọ na. Mesoriẹ are a rhe?” 22 Aye ni ta riẹn: “Ọmakashe ọfuanfon owu yọ yẹ i Kọniliọs ọkpọvi taghene o dje ihworho me so rhiẹ oghwa ye, neneyo ọ kerhọ oborẹ wu na ta riẹn. Ọye olotu isodja ro rhiẹ ọvwata, rọ ji zofẹn Osolobrugwẹ. Ọsoso agbamwa itu i Ju na a ji nẹ omamọ iyẹnrẹn kpahiẹn.” 23 Omarana, no seri aye ruẹ oghwa ji ta rẹn aye nẹ aye i lelie rhirhiẹ.

Ọke ro vẹnrẹn ẹdẹ ọreva ye, no leliri aye nyarhẹn, imizu ezẹko uvuẹn i Jọpa ni ji lelie. 24 Ẹdẹ rọ ha kpahiẹn, no te i Sẹseria. Itiọrurhomẹmro, Kọniliọs ọ hẹrhẹ aye, o ji se ihworho ekruien ọrhẹ igbehian yen ri kpẹnkpẹnren koko ne. 25 Ọke i Pita ọ rhe, Kọniliọs no brurie nya ji sighwẹ rhẹ obaruiẹ, no gburhomu rhotọre riẹn. 26 Ọrẹn, Pita nọ kpareriẹ vẹnrẹn ji ta riẹn: “Vẹnrẹn, mẹmẹ onyakpọ jerẹ owẹwẹ.” 27 Ọke ro lelie tẹmro, nọ ruẹ uvuẹn oghwa na ji mẹrẹn ihworho buebun ri kokori. 28 Pita nọ ta rẹn aye: “Are i dabu rhe taghene ọ hasuẹ urhi rẹ onyẹ i Ju ono kwomakugbe ohworho agbamwa ọrọrọ yanghene tikẹriẹ. Ọrẹn, Osolobrugwẹ o djerie mẹ ne taghene o fo ni mi se onyakpọ owuorowu emru aghwa yanghene oborẹ ọ vwọ fo-on. 29 Itiọrurhomẹmro, ni mi rhere ọke re me se mẹ, mia te-en. Omarana, mia nọ are, mesoriẹ are e dje ihworho me se mẹ?”

30 Kọniliọs nọ tare: “Emrẹ unọke ọnana ẹdọke ẹne ri vrẹnren na, ọke mia nẹrhomo uvuẹn oghwa mẹ emrẹ ughwọdjọ esa erhẹrhuvo;* ọhworhare owu ro kuẹ ewun ọfuanfon rhọ, nọ homaphia uvuẹn obaro mẹ. 31 Nọ ta mẹ taghene: ‘Kọniliọs, Osolobrugwẹ ọ dabu rhon ẹrhomo ọnọ ji karorhọ ẹghẹlẹ* enọ ne. 32 Omarana, dje ihworho riẹ i Jọpa ye se i Saimọn Pita. O jedọn rhẹ oghwa i Saimọn ro ruẹ ọphiẹn,* rẹ oghwa ye ọ kẹrẹ urhie ọduado na.’ 33 Omarana, ni mi dje ihworho ye so ogege, wẹwẹ nobiruo ẹrhiọ. Vwana, ame ephian i kokori obaro Osolobrugwẹ, neneyo ame i rhon ọsoso ekwakwa ri Jehova* o djeruo mọ ta rẹn ame.”

34 Omarana, Pita nọ tuẹn ẹmro ẹta rhọ taghene: “Vwana, mi ghini vwẹruọ ye ne taghene Osolobrugwẹ o vwo ni ohworho ruẹ-ẹ, 35 ọrẹn o rhiabọ dede kohworho kohworho rọ zofẹn yen ji ruẹ oborẹ ọgbare uvuẹn egbamwa na ephian. 36 Osolobrugwẹ o dje urhomu vwe emọ Izrẹl na, ne ji ghwoghwo rẹn aye kpahen iyẹnrẹn esiri ọrẹ ufuoma na nyoma i Jesu Kristi ro rhiẹ Ọrovwori ihworho ephian. 37 Gbobọhiẹn omebrurhame ri Jọn o ghwoghwo kpahen, are i rheri taghene oborẹ ihworho i mai ta kpahen nẹ i Galili ye te ọsoso i Judia yẹ: 38 Jesu ro rhiẹ onyẹ i Nazarẹt na, ọrhẹ oborẹ Osolobrugwẹ o ru djẹ ye ha rhẹ ẹhẹn ọfuanfon ji yẹ ye omẹgbanhon, kugbe oborẹ o ru ruẹ ekwakwa irhorhomu uvuẹn ọsoso otọre na ji simi ihworho ri Dẹbolo o sehiẹn, fọkime Osolobrugwẹ rhẹ ọye i gba havwiẹ. 39 Ame i rhiẹromẹrẹn ọsoso ekwakwa ro ruru uvuẹn ẹkwotọre itu i Ju na ọrhẹ uvuẹn i Jerusalẹm. Ọrẹn, aye ni kperie hwu nyoma aye a kanriẹn mwu orhan. 40 Osolobrugwẹ nọ rhọmeriẹn nuhwu uvuẹn ẹdẹ ọresa ye ji ruie nẹ ihworho i mẹriẹn.* 41 Rhẹ ihworho ephian yi mẹrenriẹ-ẹn, ọrẹn iseri rẹ Osolobrugwẹ ọ ha mwu rhotọre bi ne yi mẹrenriẹn, nọyẹ ame ri lelirie riẹ emaren ji da kugbe ọke rọ rhọmọ nuhwu hin. 42 Habaye, no jurhi rẹn ame nẹ ame i ghwoghwo rẹn ihworho ji se oseri ro fiotọre taghene ọye yẹ Osolobrugwẹ ọ ha mwu, nọ ha ihworho re nyerẹn ọrhẹ eri hwu ne guẹnzọn. 43 Ọsoso emẹraro na i se oseri kpahiẹn taghene kohworho kohworho ro vwo esegburhomẹmro kpahiẹn, ana harhomu edandan ọravwọ nyoma odẹ ye.”

44 Ọke i Pita ọ ji tẹmro kpahen ekwakwa enana, ẹhẹn ọfuanfon na nọ ruẹ oma ọsoso ihworho ra kerhọ ẹmro na. 45 Ekwakwa enana ni rhiẹ emru igbevwunu rẹn imizu ri samo ne* ri leli Pita rhe na, fọkime e rhie ẹghẹlẹ ọphẹ ọrẹ ẹhẹn ọfuanfon na ghwu ihworho egbamwa na ne. 46 Aye ne rhon aye ra djẹ edjadjẹ sansan* jeghwai jiri Osolobrugwẹ. Pita nọ tare: 47 “E tiobọnẹ ẹhẹn ọfuanfon na rẹn ihworho enana jerẹ oborẹ e ji tiobọnie rẹn ọwan, omarana ọrọmo yọ nọ sabu ta taghene aye i vwe bromarhame-e?” 48 Omarana, Pita nọ tare taghene e bru aye rhẹ ame nyoma odẹ i Jesu Kristi. Ọke oru, ihworho na ni ta riẹn no lele aye rhirhiẹ ye ẹdẹ ezẹko.