Iyẹnrẹn Esiri Luk
5 Ọke owu ri Jesu o mevi okokọ urhie i Gẹnẹsẹrẹt,* otu buebun ne kenkien ọke aye a kerhọ ẹmro Osolobrugwẹ. 2 Nọ mẹrẹn ewọ eva ra gba kẹrẹ okokọ urhie na, ọrẹn ikpirhenrin na a ha uvuẹn aye-e, fọkime aye e ghwe iriri aye. 3 Ọke i Jesu ọ ruẹ owu usuẹn ewọ na, nọyẹ owọ i Saimọn, nọ ta riẹn no bi nẹ akpa ibiesuọn. Omarana, no siyẹ ji yono otu na nẹ uvuẹn owọ na sa. 4 Ọke ro fuẹn ẹmriẹn hin, nọ ta rẹn i Saimọn: “Bi owọ na riẹ ekete ro kodori, nẹ are i ha iriri na tan uvuẹn urhie na nẹ are i sabu mwu irhenrin.” 5 Ọrẹn, Saimọn nọ tare: “Oyono, ame i wianren omamọ ọsoso ason na, ọrẹn ame e mwu erhenrin owuorowu-u. Ọrẹn wa ta omaran na, mi na ha iriri na tan.” 6 Omarana, ọke aye a ha iriri na tan, aye ni mwu irhenrin buebun te erhirhiẹ iriri aye a bẹrẹ. 7 Omarana, aye ni ha abọ se ereva aye ri ha owọ rọ hẹrhẹre na nẹ aye i mọ ha userhumu rẹn aye. Aye ni rhere ji kwrọ irhenrin vuọn ewọ eva na, te erhirhiẹ ewọ na a joma rhue. 8 Ọke i Saimọn Pita ọ mẹrẹn ọnana, no sighwẹ rhẹ obaro i Jesu ji ta: “Nyaji mẹ vwo, Ọrovwori, fọkime mẹmẹ oruọdandan.” 9 Fọkime irhenrin aye i mwurun na o gberie unu omamọ, omaran ji te ihworho ri hẹrhẹre na. 10 Omaran o ji gbe i Jems ọrhẹ Jọn unu, ri rhiẹ emọ i Zẹbẹdi re leli Saimọn wian. Ọrẹn, Jesu nọ ta rẹn Saimọn: “Wu vwa zofẹ-ẹn. Nẹ ọke ọnana nyarhẹn, wu ne rhe mwu ihworho ekpokpọ.” 11 Omarana, ọke aye e bi owọ na te akpa, aye ni nyaji kemru kemru vwo ji leli Jesu.
12 Ọke ọrọrọ ri Jesu ọ ha uvuẹn amwa owu, nughe! ọhworhare owu rẹ emiamo oti ọ vuọn omayen nọ mẹrẹn i Jesu. No se gbughwaro rhotọre ji rẹ ye: “Ọrovwori, wu rha gwọlọ, wu na sabu ru mẹ fon.” 13 Omarana, Jesu nọ rionbọ ji hobọte ọhworhare na, nọ tare: “Mi gwọlọ simuo! Gba fon.” Ogege, emiamo oti na no nẹ omayen. 14 Nọ ha orhetio rẹn ọhworhare na taghene ọ vwọ ta rẹn ohworho owuorowu-u, nọ tare: “Nyarhẹn ye dje oma rẹn orherẹn na, ne wu ji ze izobo ra na ha ruo fon, jerẹ oborẹ i Mosis ọ tare, no rhiẹ oseri rẹn aye.” 15 Ọrẹn, iyẹnrẹn kpahen i Jesu no kperusi lele ekete ephian, otu buebun na ghwiẹ sa mọ kerhọ ye, neneyo o ji simi emiamo aye. 16 Ọrẹn, ọgbọ buebun, Jesu no riẹ ekete kologho ya nẹrhomo.
17 Ẹdẹ owu ri Jesu o yono ihworho, itu i Farisi ọrhẹ ere yono ihworho Urhi na, ri nẹ ọsoso ọko ri ha i Galili ọrhẹ i Judia kugbe i Jerusalẹm rhe ni rhiẹ avwaye. Jehova* nọ yẹ i Jesu omẹgbanhon ro no simi ihworho. 18 Nughe! o vwo ehworhare ezẹko ra ha ekpa kpare ọhworhare owu sa, rẹ ugboma yen o hwuru. Aye na damoma rẹ aye ina kpariẹ rhiẹ ekete i Jesu ọ havwọ ji kpariẹ rhẹ obaruiẹ. 19 Ọrẹn fọkiẹ otu na, aye arha sabu kpariẹ ruẹ uvuẹn oghwa na-a. Omarana, aye ni rhenren oberun oghwa na ji bru ophiọ rhẹ oberuien, aye ni nya avwaye kpare ọhworhare rọ ha ekpa na ruotọre rhẹ obaro i Jesu. 20 Ọke i Jesu ọ mẹrẹn esegburhomẹmro aye, nọ tare: “Ọse, a ha edandan enọ harhomuo ne.” 21 Omarana, eyẹbe na ọrhẹ itu i Farisi na ne roro taghene: “Ọnana ọrọmo rọ rhaphiẹ Osolobrugwẹ? Gbobọhiẹn Osolobrugwẹ ọvo, ọrọmo yọ nọ sabu harhomu edandan?” 22 Ọrẹn, ọke i Jesu o rhe iroro aye, nọ nọren aye: “Me yẹ are e roro uvuẹn ọmudu are? 23 Ọgo yọ nọ phẹrẹ ẹta, ‘A ha edandan enọ harhomuo ne,’ gbinẹ, ‘Vẹnrẹn wu nya’? 24 Ọrẹn, nẹ are i rhe taghene Ọmọ onyakpọ na o vwo omẹgbanhon rọ nọ harhomu edandan uvuẹn otọrakpọ na—” nọ ta rẹn ọhworhare rẹ ugboma yen o hwuru na: “Mia ta wẹn, Vẹnrẹn, kpare ekpa ne wu riẹ oghwa ọnọ.” 25 Omarana, ọhworhare na no vẹnrẹn mevi udaro aye, nọ kpare ekpa ro semerhẹn bi na, no jiri Osolobrugwẹ ọke ro riẹ oghwa ye. 26 Oborẹ ọ phiare na no gbe ihworho ephian unu, ofẹn no ji mwu aye, aye ne jiri Osolobrugwẹ taghene: “Ame i mẹrẹn ekwakwa igbevwunu inyenana!”
27 Ọke oru, Jesu nọ ruẹ otafe. Nọ mẹrẹn ọhworhare owu re se i Livai ro vwiosa urhomu, ro siyẹ oghwa ra kwosa urhomu na. Nọ ta riẹn: “Rhiẹ odibo mẹ.”* 28 Omarana, no vẹnrẹnren ji nyaji kemru kemru vwo, nọ nyalelie. 29 Ọke oru, Livai no mwuegbe orẹ ọduado harẹn i Jesu uvuẹn oghwa ye, otu buebun re vwiosa urhomu ọrhẹ awọrọ ne lele aye riẹ emaren* kugbe. 30 Ọke itu i Farisi na ọrhẹ eyẹbe aye a mẹrẹn ọnana, aye ne brenu ji ta rẹn idibo i Jesu taghene: “Mesoriẹ are a ria ji da kugbe rhẹ ere vwiosa urhomu ọrhẹ iruedandan?” 31 Jesu nọ ta rẹn aye: “Ihworho ri vwo omọkpokpọ a gwọlọ idọkitọ-ọ, ọrẹn ere kpomẹ yi gwọlọ idọkitọ. 32 Mi rhiẹ otọrakpọ na me se iruedandan nẹ aye i ghwẹriẹ, rhẹ evwata-a.”
33 Aye ni ta riẹn: “Idibo i Jọn e zinrin orhọmo kọke kọke ji nẹrhomo nẹ ẹhẹn sa, omaran idibo itu i Farisi na e ji ruẹ, ọrẹn idibo enọ a ria ji da.” 34 Jesu nọ ta rẹn aye: “Are ina sabu lẹrhẹ igbehian ọhworhare rọ rọnmọ na zinrin orhọmo ọke rọ ha uvwre aye? 35 Ọrẹn, ẹdẹ na a sa ra na ha ọhworhare rọ rọnmọ na nyaji aye vwo. Ọke ọrana, aye ni ne zinrin orhọmo.”
36 Nọ ji ha udje owu phia rẹn aye: “O vwo ohworho ro bru ovwẹrowẹn ọkpokpọ ji ko yi mwu ewun ahwanre-en. Orho ruie omaran, ewun ọkpokpọ na ọnọ fan nie. Habaye, ovwẹrowẹn ọkpokpọ na ọrhẹ ọrẹ ahwanren na i ji sabu serhọ-ọ. 37 Habaye, o vwo ohworho ro rhie enyo ọkpokpọ rhẹ ẹkpa enyo ahwanre-en. Orho ruie omaran, ẹkpa enyo na ni na sa ji rhie enyo na fughwẹ, ẹkpa enyo na ni na ji ghwọghọ. 38 Ọrẹn, ẹkpa enyo ọkpokpọ ye vi rhie enyo ọkpokpọ rhọ. 39 O vwo ohworho rọ da iwaini ahwanren hin, rọ gwọlọ ọrẹ ọkpokpọ-ọ. Fọkime ọravwọ ọnọ ta, ‘Ọrẹ ahwanren na ọ merhenren.’”