Iyẹnrẹn Esiri Luk

3 Uvuẹn ẹgbukpe ọrẹ ikpesionrin rẹ Taiberiọs Siza o suẹn, ọke i Pọntiọs Pailet o rhiẹ igọvunọ i Judia, Hẹrọd* yo suẹn uvwrotọre i Galili. Filip ro rhiẹ omizie yo suẹn uvwrotọre emwa Ituria ọrhẹ Trakonaitis. Laisenias nọ yo suẹn uvwrotọre Abilini. 2 Uvuẹn ẹdẹ Anas ro rhiẹ olori irherẹn na ọrhẹ Keyafas, Osolobrugwẹ nọ tẹmro rẹn i Jọn ro rhiẹ ọmọ i Zẹkaraya uvuẹn ato na.

3 Omarana, no riẹ ọsoso ẹkwotọre ri kinhariẹ Urhie i Jọdan na, no ghwoghwo taghene ihworho i bromarhame, no rhiẹ oka ẹghwẹriẹ, na ji harhomu edandan aye. 4 Jerẹ oborẹ a ya rhẹ uvuẹn ọbe ọmẹraro Aizaya: “Uphele owu o korunu phia uvuẹn ato na taghene: ‘Are i mwuegbe izede i Jehova!* Are i ruẹ izede yi phiọn. 5 Ana kwrọ eyẹn vọnrọn ekete ephian ri seriotọre, ene ruẹ ugbenu eduado ọrhẹ ekokamu riotọre. Izede ri vwa phiọn, ene ruẹ aye phiọn. Izede ri havwọ yanghan yanghan, ene ruẹ aye serhọ. 6 Ihworho ephian ni na mẹrẹn usimi Osolobrugwẹ.’”*

7 Omarana, Jọn nọ ta rẹn otu ra ghwiẹ sa me bromarhame taghene: “Emọ ibodirin na, ọrọmo yọ ha orhetio rẹn are nẹ are i zẹ vabọ rẹn ekwẹre ọgbogbanhon Osolobrugwẹ rọ sa na? 8 Omarana, are i gbe ru oborẹ o djerie phia taghene are i ghwẹriẹ ne. Are i vwa ta rẹn oma are taghene ‘Ebraham yẹ ọsẹ are-e.’ Fọkime mia ta rẹn are taghene Osolobrugwẹ ọnọ sabu ha emọ rẹn Ebraham nẹ uvuẹn itita enana rhe. 9 Itiọrurhomẹmro, ukeke na ọ ghwanreriẹn ha uvuẹn esiri erhan na ne. Omarana, korhan korhan rọ vwọ mọ emamọ irhorhomu, ana hẹn yen se ji donrien rhẹ uvuẹn erhanren.”

10 Ihworho na na nọ yen: “Ni me yẹ ame ine ruo?” 11 Nọ kpahenrhọ rẹn aye: “Jenẹ ohworho ro vwo ewun eva* o tiobọnu owu rẹn ohworho ro vwo vwo. Jenẹ ohworho ro vwo oborẹ ọnọ riọ, ọ yẹ ohworho ro vwo vwo.” 12 Ere vwiosa urhomu dede ni ji me bromarhame, aye na nọ yen: “Oyono, me yẹ ame ine ruo?” 13 Nọ ta rẹn aye: “Are i vwa haba uchunu igho osa urhomu na-a.” 14 Habaye era wian owian isodja, na nọ yen: “Me yẹ ame ine ruo?” Nọ ta rẹn aye: “Are i vwe sehiẹn ohworho owuorowu* yanghene mọrenfian banren ohworho owuorowu-u. Ukpomaran, jenẹ oborẹ* a yẹrẹ are ọ da are ẹro.”

15 Vwana, fọkime ihworho na e fiẹrorhọ i Kristi na, aye ephian ne roro kpahen i Jọn uvuẹn ọmudu aye taghene, “Gbinẹ ọnana yi Kristi na?” 16 Jọn nọ kpahenrhọ rẹn aye ephian taghene: “Harẹn omẹmẹ, mi bruru are rhẹ ame. Ọrẹn ohworho rọ gbanhonma ghwẹ mẹ ọ sa, mie mwuovwan mi na rhan ufi isabatu ọnẹye-en. Ọye ono bru are rhẹ ame nyoma ẹhẹn ọfuanfon na ọrhẹ erhanren. 17 Ọye ọ mọrọn isọboro rọ ha fa ikeri ewawọ rhẹ obọ. No no ruẹ ekete ra fa ikeri ewawọ na dabu fon jeghwai koko iwiti na rhẹ oghwa ra sẹrorẹ ekwakwa rhọ. Ọrẹn, nọ nọ torhẹ ephianron iwiti na rhẹ erhanren ra na ja sabu fun.”

18 Jọn ọ ji ha urhebro buebun erọrọ rẹn ihworho na, no ji ghwoghwo iyẹnrẹn esiri rẹn aye. 19 Ọrẹn, Jọn nọ ghwọghwu i Hẹrọd ro suẹn uvwrotọre ọrana fọkiẹ oborẹ ọ phiare uvwre i Hẹrọd ọrhẹ Hẹrodias ro rhiẹ ane omizu i Hẹrọd, kugbe ọsoso ekwakwa ibiobiomu ri Hẹrọd o ru ne. 20 Habaye, Hẹrọd no ji ruẹ emru obiobiomu ọnana: No mwu i Jọn rhẹ ekanron.

21 Vwana, ọke re bru ọsoso ihworho na rhẹ ame, ne ji bru i Jesu rhẹ ame. Ọke rọ nẹrhomo, odjuwu na no rhiefirhọ. 22 Ẹhẹn ọfuanfon na rọ homaphia jerẹ erurẹ nọ daji oberuien. Uphele owu nọ tẹmro nẹ odjuwu rhe taghene: “Wẹwẹ Ọmọ mẹ mi vwo ẹgwọlọ kpahen, mi vwo ekwerhọ kpahuọn.”