Iyẹnrẹn Esiri Luk

21 Vwana, ọke i Jesu ọ kparughwaro rierun, nọ mẹrẹn edafe re fiẹ ẹghẹlẹ aye rhẹ ikpeti itetoro na. 2 Ọke oru, nọ mẹrẹn ọmase uku owu ro rhiẹ ovwiegbere ro fiẹ isele ekokamu eva ri vwe te emru owuorowu* rhọye. 3 Jesu nọ tare: “Itiọrurhomẹmro mia ta rẹn are taghene itetoro ọmase uku ọnana ro rhiẹ ovwiegbere na, o bun ghwẹ ọrẹ aye ephian. 4 Fọkime ihworho enana ephian i toro ẹghẹlẹ nẹ ekwakwa buebun aye i vwori, ọrẹn dedevwo ọmase na ọ ha erhirhiẹ ọkanronmẹ,* o toro i kemru kemru ro vwori uvuẹn akpenyerẹn yen.”

5 Ọke oru, ọke ihworho ezẹko a ta kpahen oghwa ẹga na ọrhẹ itita irhorhomu ra ha bọn yen, kugbe ekwakwa ra ha kpahontọre rẹn Osolobrugwẹ, 6 Jesu nọ tare: “Ekwakwa enana are a mẹrẹn vwana, ẹdẹ na a sa ra na ja nyaji atita owuorowu vwo rhẹ oberun atita ọrọrọ, ana ghwọghọ aye totọre.” 7 Omarana, aye ni nọriẹn taghene: “Oyono, ọkiọgo ye ekwakwa enana ina ghini phia? Me yo no rhiẹ oka ro no djephia taghene ekwakwa enana i samọ phia ne?” 8 Nọ tare: “Are i ni oma so ne je rhe sun are vru, fọkime ihworho buebun ina rhiọ ji ha odẹ mẹ ruiruo. Aye ina ta taghene, ‘Mẹmẹ yẹ ohworho na,’ ọrhẹ ‘Ọke re bruru na o tikẹrẹ ne.’ Ọrẹn, are i vwe lele aye-e. 9 Habaye, are i rhe rhon kpahen ipheri ọrhẹ ọyanghan, are i vwa zofẹ-ẹn. Fọkime ekwakwa enana ina vi phia vwẹre, ọrẹn oba na ọ sa ogege-e.”

10 Nọ ji ta rẹn aye: “Agbamwa ọnọ kparehaso agbamwa, uvie ọnọ ji kparehaso uvie. 11 Etọre ine kpogho gbangbanhon, ọkanronmẹ emaren ọrhẹ emiamo egbogbanhon ina homaphia nẹ ekete owu riẹ ọrọrọ. Ana mẹrẹn ekwakwa re mwuofẹn ọrhẹ eka eduado obẹ odjuwu.

12 “Ọrẹn bọmọke ekwakwa enana ina ki phia, ihworho ine mwu are ji kparehaso are, aye ni na kpare are riẹ i sinagọg ọrhẹ ekanron. Ana ha are mevi obaro irodje ọrhẹ igọvunọ fọkiẹ odẹ mẹ. 13 Ọnana no no lele fiẹ ọrẹ are ine se oseri rẹn aye. 14 Omarana, are i brorhiẹn uvuẹn ọmudu are rẹ are ine je mwuegbe rhotọre kpahen oborẹ are ina chochọn oma are lele. 15 Fọkime mi na yẹ are ẹmro ọrhẹ ẹghwanren rẹ ọsoso ihworho ra kparahasuẹ are, ina ja sabu tẹn yanghene frẹfro kpahen. 16 Habaye, eri vwiẹre are, imizu are, ihworho ekrun are ọrhẹ igbehian are dede, ina ha are kpahontọre,* aye ni na tobọ kpe ezẹko usuẹn are hwu. 17 Ihworho ephian ni ne vwo utuoma kpahen are fọkiẹ odẹ mẹ. 18 Ọrẹn, o vwo ẹton owuorowu uvuẹn urhomu are rọ nọ ghwọghọ-ọ. 19 Are ine simi arhọ are, are i rhe vwo edirin.

20 “Habaye, are i rha mẹrẹn i Jerusalẹm rẹ isodja i gbogba kinhariẹ, are i gbe rhe taghene ọke ra na ghwọghiẹ o tikẹrẹ ne. 21 Ọke ọrana, jenẹ eri ha i Judia i rha zẹ riẹ igbenu na, jenẹ ihworho ri ha uvuẹn amwa na i nẹ uvuien. Ihworho re rhirhiẹ kinhariẹ ye, i vwa ruẹ uvuie-en. 22 Fọkime ẹdẹ erana yẹ Osolobrugwẹ ọnọ ha ihworho guẹnzọn* neneyo ọsoso oborẹ a ya rhotọre i te orugba. 23 Ukpokpogho ono rhirhiẹ ye rẹn emẹse ri mẹrenphan ọrhẹ emẹse ra yẹ emeboban enye uvuẹn ẹdẹ erana! Fọkime ebẹnbẹn egbogbanhon ina homaphia uvuẹn otọre na, omaran ji te ekwẹre ọgbogbanhon haso ihworho enana. 24 Ene kpe ezẹko rhẹ odan ọlọkọ ji kpare ezẹko riẹ abọ evrẹn uvuẹn egbamwa na ephian. Egbamwa na ni ne sinhin i Jerusalẹm botọre bọmọke ọke re bru rẹn egbamwa na ine te orugba.

25 “Habaye, eka ina homaphia uvuẹn ọren na, ubiamo na ọrhẹ ikereti na. Egbamwa na ni na zofẹn uvuẹn otọrakpọ na fọkime aye e rhe oborẹ aye ine ru vabọ edon ọgbogbanhon urhie ọduado na ọrhẹ oborẹ ọ wọnrọn lele-e. 26 Ihworho ni ne dophie fọkiẹ ofẹn ọrhẹ fọkiẹ ekwakwa aye e fiẹrorhọ taghene ina phia uvuẹn otọrakpọ na, fọkime omẹgbanhon idjuwu na ni ne kpogho. 27 Aye ni na mẹrẹn Ọmọ onyakpọ na rọ sa uvuẹn avwre na rhẹ omẹgbanhon kugbe odidi rode. 28 Ọrẹn, ekwakwa enana arha phia ne, are i vẹnrẹn mevi ji kparughwaro rierun, fọkime usimi are o tiẹkẹrẹ ne.”

29 Omarana, no dje udje owu rẹn aye: “Are i djokarhọ orhan ifigi na ọrhẹ erhan ri hẹrhẹre na. 30 Aye arha kwrọ ẹbe rhọ ne, are na mẹriẹn ji rhe taghene ọke uvo o tiẹkẹrẹ ne. 31 Omaran ọ ji havwọ, are arha mẹrẹn ekwakwa enana ra phia ne, are i gbe rhe taghene Uvie Osolobrugwẹ o tikẹrẹ ne. 32 Itiọrurhomẹmro mia ta rẹn are taghene uvwiẹ ọnana ọ nyavrẹ-ẹn, jokpanẹ ọsoso ekwakwa enana i phiare vwẹre. 33 Odjuwu ọrhẹ otọrakpọ na ina nyavrẹn, ọrẹn ẹmro mẹ i sefughwẹ dẹ-ẹ.

34 “Ọrẹn are i ni oma so, neneyo ọmudu are o jo rho seriotọre fọkiẹ emaren ẹre bun phan, ọrhẹ inyo ẹda bun phan, kugbe ọfiamu akpenyerẹn, neneyo ẹdẹ ọrana ọ jọ rhọ ruẹ are ọrhan 35 jerẹ ufi. Fọkime ọnọ hobọte ihworho ephian re rhirhiẹ ọsoso otọrakpọ na. 36 Omarana, are i rha dẹrẹ ji rha rẹ Osolobrugwẹ ọke ephian neneyo are i sabu vabọ ọsoso ekwakwa ri na vi phia na, nẹ are i ji mevi obaro Ọmọ onyakpọ na.”

37 Omarana, Jesu no yono ihworho uvuẹn oghwa ẹga na uvuẹn ẹdẹ na, ọrẹn ason orho te, no yo jedọn rhẹ ugbenu owu re se Ugbenu Oliv. 38 Uvuẹn igidurhiọke, ọsoso ihworho na na ghwiẹ sa mọ kerhọ ye uvuẹn oghwa ẹga na.