Iyẹnrẹn Esiri Luk

19 Ọke i Jesu ọ ruẹ i Jẹriko, nọ nya amwa na vrẹn. 2 Vwana, ọhworhare owu re se i Zakiọs ọ ha avwaye, ọye ohworho ọduado usuẹn ere vwiosa urhomu na, jeghwai ọdafe. 3 Nọ damoma rọ nọ mẹrẹn ohworho re se i Jesu na. Ọrẹn fọkime ọye ọ kpẹtẹre ọrhẹ fọkiẹ otu na, ọrhọ sabu mẹriẹ-ẹn. 4 Omarana, nọ zẹ karo ye rhenren orhan isikamọ* owu neneyo ọ sabu mẹriẹn, fọkime Jesu ọ gwọlọ nya izede ọrana vrẹn. 5 Ọke i Jesu o te avwaye, no ni oberun ji ta riẹn: “Zakiọs, brokpakpa ruotọre, fọkime mi ne vi rhirhiẹ oghwa ọnọ inyenana.” 6 Omarana, no brokpakpa ruotọre, ji rhiabọ dedie ruẹ oghwa ye rhẹ aghọghọ. 7 Ọke ihworho a mẹrẹn ọnana, aye ephian ne brenu taghene: “O rhiẹ ọpha ruẹ ọhworhare ro rhiẹ oruọdandan.” 8 Ọrẹn, Zakiọs no vẹnrẹnren ji ta rẹn Ọrovwori na: “Nughe! Ọrovwori, mi na ha owuobọ enyerẹn mẹ rẹn ivwiegbere na, kemru kemru mi ji ken* mie ihworho bi, mi na kwa ye rẹn aye ọgbọ ẹne dede.” 9 Omarana, Jesu nọ ta riẹn: “Inyenana, e simi uvwioghwa ọnana ne, fọkime wẹwẹ dede jẹ ọmọ Ebraham. 10 Fọkime Ọmọ onyakpọ na ọ rhe ma gwọlọ ihworho ri vruru, no ji simi aye.”

11 Ọke aye a kerhọ ẹmro enana, nọ ha udje ọrọrọ phia fọkime ọ joma te i Jerusalẹm ne, aye e ji roro taghene Uvie Osolobrugwẹ ọnọ homaphia ogege. 12 Omarana, nọ tare: “Ọhworhare owu ro nẹ uvwiẹ irodje rhe, no riẹ ẹkwotọre oseseri ya ha omẹgbanhon nọ sabu rhiẹ orodje. Orho ru, nọ nọ ghwẹrioma rhe. 13 Omarana, no se evrẹn yen awan ikpe, nọ ha imaina ikpe* rẹn aye ji ta rẹn aye, ‘Are i ha aye sueyi bọmọke mi na ki ghwẹrioma rhe.’ 14 Ọrẹn, ihworho ẹkwotọriẹ i vwo utuoma kpahiẹn. Omarana, aye ni dje ihworho lelie ya ta taghene, ‘Ame a gwọlọ nẹ ọhworhare ọnana o rhiẹ orodje ame-e.’

15 “Ọke omẹgbanhon orodje* o te yi obọ hin, nọ ghwẹrioma rhe. Omarana, no se evrẹn rọ ha igho* riẹn na neneyo ọ nọ aye kpahen erere aye i mẹrẹn nẹ eyẹsuọ aye. 16 Ọrukaro na no brurie rhe ji ta, ‘Ọrovwori, mi mẹrẹn erere imaina ikpe nẹ imaina wu yẹre mẹ na.’ 17 Nọ ta riẹn, ‘Wẹ nobiruo owian, omamọ ọvrẹn! Fọkime wu fuephan kpahen emru ọkokamu omamọ, gbe sun emwa ikpe.’ 18 Ọreva ye nọ rhere ji ta taghene, ‘Ọrovwori, mi mẹrẹn erere imaina isionrin nẹ imaina wu yẹre mẹ na.’ 19 Nọ ji ta rẹn ọvrẹn ọnana, ‘Wẹwẹ gbe sun emwa isionrin.’ 20 Ọrẹn, ọvrẹn ọrọrọ nọ rhere ji ta taghene, ‘Ọrovwori, mie imaina ọnọ. Mi gbariẹ tinu rhẹ uvuẹn ewun bi. 21 Itiọrurhomẹmro, mia zofọn fọkime wa djoma omamọ, wa ha oborẹ wu vwa sẹroriẹ ji vuẹn oborẹ wu vwa wọ.’ 22 Nọ ta riẹn, ‘Mi na ha ẹmro enọ guon ẹzọn, ọvwọkon na. Wu rheri taghene mia djoma, mia ha oborẹ mi vwa sẹroriẹ ji vuẹn oborẹ mi vwa wọ, rhomaran? 23 Omarana, mesoriẹ wu vwe fiẹ igho* mẹ rhẹ ekete ra sẹrorẹ igho? Manẹ mia haye ọrhẹ erere rọ ha oberuien ọke mi ghwẹrioma rhe.’

24 “Omarana, nọ ta rẹn ihworho ri mevi avwaye, ‘Are i ha imaina na mie yi, nẹ are i haye rẹn ọro vwo imaina ikpe na.’ 25 Ọrẹn aye ni ta riẹn, ‘Ọrovwori, ọ ghwanreriẹn vwo imaina ikpe ne!’— 26 ‘Mia ta rẹn are, kohworho kohworho ro vwo emru, ana haba oborẹ o vwori na. Ọrẹn ohworho ro vwo vwo, oborẹ ọ tobọ vwo dede, ana haye mie yi. 27 Habaye, are i ha evwreghrẹn mẹ erana rhiẹ aran, ri vwa gwọlọ ni mi rhiẹ orodje aye na, nẹ are i kpe aye hwu uvuẹn obaro mẹ.’”

28 Ọke i Jesu ọ tẹmro enana hin, nọ ruẹ izede riẹ i Jerusalẹm. 29 Ọke rọ joma te i Bẹtfeji ọrhẹ i Bẹtani rọ ha uvuẹn ugbenu re se Ugbenu Oliv, Jesu no dje idibo yi awanva urhomu 30 taghene: “Are i ruẹ uvuẹn ọko ra kpararo mẹrẹn na. Are i rhe te avwaye, are ina mẹrẹn ọmọ ekẹrẹkẹtẹ ra gbare, rẹ ohworho owuorowu o vwo ji siyẹ oberuien dẹ. Are i rhan ye, nẹ are i haye rhiẹ aran. 31 Ohworho ọrhọ nọ are taghene, ‘Mesoriẹ are a rhan ye?’ are i ta riẹn taghene, ‘Ọrovwori na ọ gwọlọ haye ruiruo.’” 32 Omarana, idibo re djeri urhomu na ni nyarhẹn ji mẹriẹn jerẹ oborẹ ọ ta rẹn aye na. 33 Ọrẹn, ọke aye a rhan ọmọ ekẹrẹkẹtẹ na, eri vworie ni nọren aye: “Mesoriẹ are a rhan ọmọ ekẹrẹkẹtẹ na?” 34 Aye ni tare: “Ọrovwori na ọ gwọlọ haye ruiruo.” 35 Aye ni ha ọmọ ekẹrẹkẹtẹ na vwe i Jesu ji ha ewun otafe aye kpa ye, aye ni ha i Jesu siyẹ oberuien.

36 Ọke rọ nyarhẹn, ihworho na ha ewun otafe aye kpa izede. 37 Ogege rọ joma te izede re rhenren ruotọre nẹ Ugbenu Oliv, idibo na ephian na ghọghọ jeghwai jiri Osolobrugwẹ rhẹ uphele gorigori, fọkiẹ ọsoso ewian igbevwunu aye i mẹrẹn ne. 38 Aye na ta: “Ebrurhọ o rhirhiẹ ye rẹn Orodje rọ sa rhẹ odẹ i Jehova!* Ufuoma o rhirhiẹ obẹ odjuwu, ujiri o rhirhiẹ ye rẹn Osolobrugwẹ obẹ idjuwu na!” 39 Ọrẹn, itu i Farisi ezẹko uvuẹn otu na ni ta riẹn: “Oyono, vanghwu idibo enọ.” 40 Ọrẹn, Jesu nọ ta rẹn aye: “Mia ta rẹn are taghene ihworho enana i rhe kudu, itita na ine kperi phia.”

41 Ọke i Jesu ọ joma te i Jerusalẹm, no ni amwa na ji viẹ fọkiẹ amwa na. 42 Nọ tare taghene: “Manẹ orhomu orhianẹ wu vwẹruọ oborẹ ekwakwa ri sekpahen ufuoma i mevirhọ inyenana, ọrẹn vwana e tiri aye nu ha wẹn ne. 43 Fọkime ẹdẹ na a sa rẹ evwreghrẹn enọ ina gbogba kinharuọ rhẹ erhan epiopiọrọ, aye ni ne kinharuọ ji kparehasuọ nẹ ekete ephian rhe. 44 Aye ina ghwọghuọ ọrhẹ emọ enọ ri ha uvuẹn amwa na. Aye i nyaji atita owu vwo rhẹ oberun atita ọrọrọ uvuẹn ekete ara-an, fọkime we vwẹruọ ọke re nuo so-o.”

45 Ọke oru, Jesu nọ ruẹ oghwa ẹga na, no le ọsoso ihworho ra rhẹ ekwakwa uvuien ruẹ otafe. 46 Nọ ta rẹn aye: “A yariẹ rhotọre taghene, ‘Oghwa mẹ ono rhiẹ oghwa ẹrhomo,’ ọrẹn are i ghwẹreriẹ rhiẹ unu ihi e tiomanuẹ ne.”

47 No ji yono ihworho kẹdẹkẹdẹ uvuẹn oghwa ẹga na. Ọrẹn, ilori irherẹn ọrhẹ eyẹbe na kugbe eri titiri usuẹn ihworho na, na gwọlọ izede aye ine kpe yi hwu. 48 Ọrẹn aye a mẹrẹn uphẹn owuorowu aye ine kpe yi hwu-u, fọkime ọsoso ihworho na a ghwiẹ lelie nẹ aye i sabu kerhọ ẹmriẹn.