Iyẹnrẹn Esiri Luk
16 Ọke oru, Jesu nọ ji ta rẹn idibo yi: “O vwo ọdafe owu ra nẹ iyẹnrẹn riẹn taghene odibo yi* ọ ghwọghọ enyerẹn yen fughwẹ.” 2 Omarana, oninie no serie ji nọ yen, ‘Me yi mie rhon kpahuọn na? Ha ọbe iyẹnrẹn rọ ta kpahen ọsoso ewian enọ rhe, fọkime wu sabu hẹrote oghwa na ghwomara-an.’ 3 Omarana, odibo na nọ ta rẹn omayen, ‘Me mi ne ruo vwana? Fọkime onini mẹ ọ gwọlọ ha owian mẹ mie mẹ. Mie vwo omẹgbanhon mi ne voro otọre-e, ofa ọ ji ro mẹ mi na rẹ erarẹ. 4 Ẹhẹn! Mi rhe oborẹ mi ne ruo, neneyo erhe le mẹ nẹ owian na, ihworho ni ne rhiabọ dedi mẹ ruẹ oghwa aye.’ 5 Omarana, no se owuowọnwan rọ riosa oninie, nọ nọ ohworho ọrukaro, ‘Emwa wa riosa onini mẹ?’ 6 Nọ kpahenrhọ riẹn, ‘Ovwanvwọn emri olivi uzusionrin.’* Odibo na nọ ta riẹn, ‘Ọnana yẹ ọbe osa wu fiobọrhọ na. Haye, ne wu siyẹ ji brokpakpa ya 50 rhọye.’ 7 Ọke oru, odibo na nọ nọ ohworho ọrọrọ, ‘Wẹwẹ vwo, emwa wa riosa?’ Nọ tare, ‘Ovwanvwọn iwiti eduado uzusionrin.’* Nọ ta riẹn: ‘Ọnana yẹ ọbe osa wu fiobọrhọ na. Haye, ne wu ya 80 rhọye.’ 8 Onini na no jiri odibo ọrana. Dedevwo oborẹ o ruru na ọ sọre, ọrẹn ọ kparẹ idjaghwẹ ẹghwanren. Fọkime emọ enyerakpọ ọnana* i ghwanren ghwẹ emọ ukpẹ na sekpahen oborẹ aye e lele uvwiẹ aye nyerẹn lele.
9 “Habaye, mia ta rẹn are: Are i ha efe ri vwa fon mwu ugbehian, neneyo aruẹ efe erana i rhe sefughwẹ, aye ni na sabu rhiabọ dede are ruẹ ekete re nyerẹn bẹmẹdẹ na. 10 Ohworho rọ fuephan kpahen oborẹ ọ kamurun, ọnọ ji fuephan kpahen oborẹ o bunrun. Ohworho rọ vwọ fuephan kpahen oborẹ ọ kamurun, ọ ji fuephan kpahen oborẹ o bunru-un. 11 Omarana, orhianẹ are a fuephan sekpahen efe ri vwa fon na-a, nẹ ọrọmo yo no tiobọnu obọdẹn efe rẹn are mọren? 12 Habaye, orhianẹ are a fuephan kpahen emru ohworho ọrọrọ-ọ, nẹ ọrọmo yọ nọ yẹ are oborẹ a sẹroriẹ rẹn are? 13 O vwo odibo rọ nọ sabu ga inini eva-a, fọkime ono vwo utuoma kpahen owu, o vwo rho vwo ẹgwọlọ kpahen ọreva ye, yanghene ono tigban owu ji ni ọreva ye sakamu. Are i sabu rhiẹ ọvrẹn rẹn Osolobrugwẹ ọrhẹ Efe-e.”
14 Vwana, itu i Farisi na ri vwo ẹgwọlọ kpahen igho, na kerhọ ọsoso ẹmro enana, aye na ha i Jesu djechẹẹ. 15 Omarana, nọ ta rẹn aye: “Are ye dje oma are rhiẹ evwata obaro ituakpọ, ọrẹn Osolobrugwẹ o rhe ọmudu are. Fọkime oborẹ ihworho e nẹ ghanghanren yo tuẹn Osolobrugwẹ oma.
16 “Urhi na ọrhẹ emẹraro na, i havwiẹ ye te ọke i Jọn. Nẹ ọke ọrana rhe, ne ghwoghwo iyẹnrẹn esiri Uvie Osolobrugwẹ, aruẹ ihworho ephian na damoma aye ina ruẹ uvuien. 17 Itiọrurhomẹmro, ọnọ phẹrẹ rẹ odjuwu ọrhẹ otọrakpọ na ina nyavrẹn, ghwẹ ọrẹ ibiẹ ẹmro owu uvuẹn Urhi na ono jo rugba.
18 “Kohworho kohworho rọ fonrọnmo rhẹ aniẹ ji ya rọnmọ ọwọrọ, ọ ghwọwe. Habaye, kohworho kohworho rọ rọnmọ ọmase rẹ esa ye ọ fonrọnmiẹ, ọ ghwọwe.
19 “O vwo ọdafe owu ro kuẹ ewun ikọlọ ipọpo ọrhẹ obọdẹn ewun rhọ, rọ riakpọ kẹdẹkẹdẹ rhẹ ekwakwa eghoghanren. 20 Ọrẹn, o vwo ọrerarẹ owu re se i Lazarọs, ra kpara ye siyẹ anurẹsẹ ọdafe na. Omayen ọ vuọnren rhẹ era. 21 Ọ gwọlọ riẹ emaren ri se nẹ imẹdjẹ ọdafe na. Habaye, erimwamwa ri tobọ ha avwaye, na lalọ era ye. 22 Ọke oru, ọrerarẹ na no hwuru, emakashe ni kpareriẹ kẹrẹ Ebraham.*
“Habaye, ọdafe na no ji hwu, ne sinrien. 23 Omarana, nọ kparughwaro rierun uvuẹn Usin* rọ rioja na, nọ mẹrẹn Ebraham uvuẹn ekete oseseri ọrhẹ i Lazarọs rọ kẹreriẹ.* 24 Omarana, nọ tare rhẹ uphele gorigori, ‘Ọsẹ mẹ Ebraham, gbe arodọmẹ mẹ, ne wu dje i Lazarọs no dumu urhianbọ ye rhẹ ame ji suien rhẹ ẹrẹnmo mẹ, fọkime mia rioja omamọ uvuẹn erhanren ọnana rọ bara gidigidi na.’ 25 Ọrẹn, Ebraham nọ tare, ‘Ọmọ mẹ, karorhọ taghene wu riamerhen ekwakwa irhorhomu buebun ọke wa ha akpọ, ọrẹn ekwakwa ibiobiomu ọvo yi phia rẹn i Lazarọs. Vwana, e bruie urhe obonẹ ne, ọrẹn wẹwẹ a rioja. 26 Gbobọhiẹn ọrana, ọgọdọ ọduado ọ ha uvwre ame rhẹ are ne. Ihworho i rha tobọ gwọlọ nẹ obonẹ riẹ oboran, aye i sabu nya-a. Ihworho ri ha oboran i ji sabu bru ame sa-a.’ 27 Omarana, nọ tare, ‘Orho rhiomaran ọsẹ mẹ, biko gbe djeyi riẹ oghwa ọsẹ mẹ, 28 no yo se oseri ro fiotọre rẹn imizu mẹ ehworhare awan isionrin, neneyo aye i ja rha rhiẹ ekete oja ọnana.’ 29 Ọrẹn, Ebraham nọ tare, ‘Aye i vwo i Mosis ọrhẹ emẹraro na oboran, jenẹ aye i kerhọ aye.’ 30 Omarana nọ tare, ‘Ẹjo, ọsẹ mẹ Ebraham, aye i kerhọ-ọ. Ọrẹn ohworho rọ rhọmọ nuhwu orho bru aye nya, aye ni na ghwẹriẹ.’ 31 Ọrẹn nọ ta riẹn, ‘Aye arha kerhọ i Mosis ọrhẹ emẹraro na-a, aye i ji kerhọ orhianẹ ohworho ọ rhọmọ nuhwu bru aye nya-a.’”