Iyẹnrẹn Esiri Luk

14 Uvuẹn erhirhiẹ ọrọrọ uvuẹn Ẹdẹ Omeronmo na, Jesu nọ yọ riẹ emaren uvuẹn oghwa owuọwan usuẹn ere suẹn itu i Farisi na, aye ne nie kiọkiọkiọ. 2 Nughe! ọhworhare owu ọ ha obaruiẹ ro kpomu emiamo rọ lẹrhẹ omayen fuẹ.* 3 Omarana, Jesu nọ nọ eri dabu rhe Urhi na ọrhẹ itu i Farisi na: “O fori ne simi ohworho uvuẹn Ẹdẹ Omeronmo na gbinẹ o fo-o?” 4 Ọrẹn, aye a kpahẹnmro owuorowu-u. Omarana, Jesu nọ mọrẹn ọhworhare na ji simie. Ọke oru, nọ ta riẹn nọ nyarhẹn. 5 Omarana, nọ ta rẹn aye: “Ọrọmo usuẹn are na yẹ ọmọyen ọhworhare yanghene erhuẹn yen ono se rhẹ edje uvuẹn Ẹdẹ Omeronmo na, ro no jo brokpakpa ya kpariẹ nie?” 6 Aye a sabu kpahenrhọ onọ na-a.

7 Jesu no dje udje owu rẹn ihworho ra ha use riẹn na, ọke rọ mẹrẹn aye ra sanọ ekete ri mai rhomu. Nọ ta rẹn aye: 8 “Ohworho ọrhọ ha use wẹn riẹ akpẹriọ orọnmo, wu vwe siyẹ ekete rọ mai rhomu-u. Ọkezẹko, ọ ji ha use rẹn ohworho ro titi ghwuọ. 9 Omarana, ohworho rọ ha use rẹn are awanva na, no no bruo rhe ji ta wẹn, ‘Vẹnrẹn nẹ ọhworhare ọnana o siyẹ aga na.’ Ọke ọrana, ne wu na ha ofa ye siyẹ ekete rọ mai riotọre. 10 Ọrẹn, arha ha use wẹn, nyarhẹn ye siyẹ ekete rọ mai riotọre, neneyo ohworho rọ ha use wẹn na ọrhọ rhe, nọ nọ ta wẹn, ‘Ọse, me siyẹ ekete ro rierun.’ Ọke ọrana, ne ne brọghọ rhọ oma udaro ihworho erọrọ ra ji ha use riẹn. 11 Fọkime kohworho kohworho rọ kparoma, ana phọphiẹ. Ọrẹn kohworho kohworho rọ homariotọre, ana kpariẹ rierun.”

12 Ọke oru, Jesu nọ ta rẹn ọhworhare rọ ha use riẹn na: “We rhe mwuegbe emaren yanghene akpẹriọ re ruẹ owuọwọn, wu vwe se igbehian, yanghene imizuo, yanghene ihworho ekruon, yanghene ereva ri rhiẹ edafe-e. Wu rhe ruẹ omaran, aye dede ni na ji ha use wẹn, ọrana no no rhiẹ osẹkwa ọnọ. 13 Ọrẹn we rhe mwuegbe akpẹriọ, ha use rẹn ivwiegbere na, ikpolo na, eri krabọ kraghwẹ, kugbe ituẹro na. 14 Oma nọ nọ merhuọn fọkime aye e vwo oborẹ aye ina ha kwosa wẹ-ẹn. Na na kwosa wẹn ọke ra na rhọmọ evwata na nuhwu.”

15 Ọke owuọwan usuẹn era ha use riẹn na o rhon ẹmro enana, nọ tare: “Omamerhomẹ ọ havwiẹ rẹn ohworho rọ riẹ emaren* uvuẹn Uvie Osolobrugwẹ.”

16 Jesu nọ ta riẹn: “Ọhworhare owu no mwuegbe akpẹriọ ọduado re ruẹ uvuẹn owuọwọn, nọ ha use rẹn ihworho buebun. 17 Ọke ra na riẹ emaren owuọwọn na no teri. Omarana, no dje ọvrẹn yen owu ye se ihworho ra ha use riẹn na taghene, ‘Are i mọ, fọkime e mwuegbe ekwakwa ephian ne.’ 18 Ọrẹn, aye ephian na djikilo. Ọrukaro nọ tare, ‘Mi dẹ otọre owu, mia gwọlọ ye nie vwẹre, wu vwa ghwọ-ọ, mi sabu sa-a.’ 19 Ọrọrọ nọ tare, ‘Mi dẹ imalu ikpe, mia gwọlọ ye ni aye so, wu vwa ghwọ-ọ, mi sabu sa-a.’ 20 Ohworho ọrọrọ nọ ji ta, ‘Mi ghwai rọnmọ hin ọbo, fọkiẹ ọrana mi sabu sa-a.’ 21 Omarana, ọvrẹn na nọ mọ nẹ iyẹnrẹn oborẹ ọ phiare rẹn oninie. Onini oghwa na nọ tuekwẹre omamọ. Nọ ta rẹn ọvrẹn yen, ‘Brokpakpa riẹ idumu eduado ọrhẹ idumu ekokamu amwa na, ne wu se ivwiegbere na, ikpolo na, eri tuẹro kugbe eri krabọ kraghwẹ.’ 22 Ọke oru, ọvrẹn na nọ tare, ‘Onini, e ruẹ oborẹ wu tare na ne, ọrẹn oghwa na ọ ji vuọ-ọn.’ 23 Omarana, onini na nọ ta rẹn ọvrẹn na, ‘Riẹ izede eduado ọrhẹ izede ekokamu na, ne wu ya gba ihworho rhe, neneyo oghwa mẹ ọ vuọn. 24 Mia ta wẹn taghene o vwo ohworho owuorowu usuẹn era ha use riẹn bi na, rẹ unu aye ono te emaren owuọwọn mẹ-ẹ.’”

25 Vwana, otu buebun ne leli Jesu, omarana, nọ dẹrughwaroghwu aye ji ta: 26 “Kohworho kohworho ro bruru mẹ rhe ro vwo vwo utuoma kpahen* ọsẹ ye, izie, aniẹ, emọyen, imizie ehworhare ọrhẹ imizie emẹse, tobọ te arhọ ọnẹyen dede, ọ sabu rhiẹ odibo mẹ-ẹ. 27 Kohworho kohworho rọ vwọ kpare orhan oja* ọnẹyen ji leli mẹ, ọ sabu rhiẹ odibo mẹ-ẹ. 28 Jerẹ udje, ọrọmo usuẹn are rọ gwọlọ bọn ọkponghwa ro no jo siyẹ vwẹre ji roro uchunu igho ro no mwuie, sẹ o vwo igho ro no te ha bọn yen hin? 29 Orhiomara-an, ọnọ sabu tuẹn usimo yi rhọ, ọrẹn ọ sabu bọn yen hiẹ-ẹn. Ọke ọrana, ọsoso ihworho ra nyavrẹn ni na haye djechẹẹ 30 taghene: ‘Ọhworhare ọnana ọ tuẹn oghwa ẹbọn rhọ, ọrẹn ọ sabu bọn yen hi-in.’ 31 Gbinẹ orodje ọgo rọ gwọlọ ye lele orodje ọrọrọ fiupheri, ro no jo siyẹ vwẹre ji lele ibrurhe yi djiroro sẹ ọnọ sabu ha isodja ye ri te 10,000 wọnrọn haso ọro bruie sa rhẹ isodja ri te 20,000? 32 Itiọrurhomẹmro, ọrhọ mẹrẹnvwrurhe taghene ọ sabu fiẹkparobọ-ọ, no no dje ihworho bru orodje na nẹ aye i kwaphiẹ ẹmro na rhọ, ọke orodje na ọ ji ha ekete oseseri. 33 Omaran ọ ji havwọ, jeno mwu are ẹro taghene kohworho kohworho ro vwo kpogho obọ rẹn* ọsoso enyerẹn yen, ọ sabu rhiẹ odibo mẹ-ẹ.

34 “Itiọrurhomẹmro, adawun orhomurun. Ọrẹn, orhianẹ adawun na ọ tẹ ne, ni marhẹ ono ru rharhumu vwo amerhen? 35 A sabu haye ruẹ otọre na yanghene ewawọ rhomẹ-ẹ. Ukpomaran, ne tue yi fughwẹ. Jenẹ ọro vwo erhọ rọ nọ kerhọ, ọ kerhọ.”