Iyẹnrẹn Esiri Luk
1 Ihworho buebun i damoma rẹ aye ine rhe kpahen ekwakwa ri phiare ji ya aye rhotọre, ame i ji vwo imwẹro kpahen ekwakwa enana. 2 Awọrọ ri ji rhiẹromẹrẹn oborẹ ọ phiare nẹ ọtonrhọ rhe, ri ji ghwoghwo urhomedje Osolobrugwẹ, yi nẹ iyẹnrẹn ekwakwa enana rẹn ame. 3 Omarana, ọrẹ e mwuọghọ riẹn Tiofilọs, ni mi brorhiẹn mi na ya ekwakwa enana vwo sekpahen oborẹ aye i phia lele, fọkime mi dabu gbẹrorhotọre gwọlọ ekwakwa ephian gbagba nẹ ọtonrhọ rhe. 4 Mi ruẹ ọnana neneyo ọ sabu mwuo ẹro taghene ekwakwa ra ha unu yonuo bi, ghini urhomẹmro.
5 Uvuẹn ẹdẹ i Hẹrọd* ro rhiẹ orodje i Judia, o vwo orherẹn owu re se Zẹkaraya rọ ha usuẹn ẹko irherẹn ọrẹ Abaijah. Aniẹ o nẹ uvwioghwa Erọn rhe, odẹ ye Ẹlizabẹt. 6 Aye awanva evwata uvuẹn obaro Osolobrugwẹ, aye a nyalele ọsoso ekama ọrhẹ irhi Jehova* vabọ upe. 7 Ọrẹn, aye e ji vwiẹ ọmọ owuorowu-u, fọkime Ẹlizabẹt agẹn. Aye awanva i ji ho ne.
8 Vwana, ọke i Zẹkaraya ọ wian owian orherẹn uvuẹn obaro Osolobrugwẹ ji wian owian ẹko ọnẹyen, 9 no mo te ọke rọ nọ ruẹ ekete ọfuanfon i Jehova ya torhẹ ajijan uvuẹn obaruiẹ, lele uruemru irherẹn na. 10 Ọsoso agbotu ihworho ri ha otafe, na nẹrhomo uvuẹn unọke ra torhẹ ajijan na. 11 Ọmakashe i Jehova* nọ homaphia riẹn ji mevi obọrhen agbarha ajijan na. 12 Ọrẹn, udu no bru i Zẹkaraya ọke rọ mẹriẹn, ofẹn no mwurien omamọ. 13 Ọmakashe na nọ ta riẹn: “Zẹkaraya, wu vwe jẹ ofẹn mwuo-o, fọkime Osolobrugwẹ ọ dabu rhon orẹ ọnọ ne. Anuọ ro rhiẹ Ẹlizabẹt ono vwiẹ ọmọ ọhworhare, ne wu ne seyi Jọn. 14 Wu ne vwo aghọghọ ọrhẹ omamerhomẹ rode, ihworho buebun ni na ji ghọghọ fọkiẹ uvwiẹ ọmọ na. 15 Fọkime ono rhiẹ ohworho ọduado uvuẹn ukẹro i Jehova.* Ọrẹn, ọ vwọ da iwaini yanghene enyo owuorowu ro mwu awa-an. Ẹhẹn ọfuanfon na ọnọ ruẹ omayen bọmọke ene ki vwiẹ ye.* 16 Nọ nọ ha userhumu rẹn emọ Izrẹl buebun ghwẹrioma bru i Jehova* Osolobrugwẹ aye. 17 Habaye, ọnọ kobaro riẹn rhẹ ẹhẹn kugbe omẹgbanhon Ẹlaijah, neneyo ọ ghwẹriẹ ọmudu esẹ nẹ aye i họhọ ọmudu emọvwerhe. Ọnọ ji lẹrhẹ eri rhiẹ iludu vwo obọdẹn ẹghwanren ọrẹ ihworho evwata na, neneyo o mwuegbe ihworho harẹn i Jehova.”*
18 Zẹkaraya nọ ta rẹn ọmakashe na: “Marhẹ emru ọnana ono ru mwu mẹ ẹro? Fọkime mi ho ne, ane mẹ dede ọ ji ho ne.” 19 Ọmakashe na nọ kpahenrhọ riẹn: “Mẹmẹ i Gebrẹl ro meviẹ obaro Osolobrugwẹ, e djeri mẹ rhe mo leluo tẹmro ji ghwoghwo iyẹnrẹn esiri ọnana ha wẹn. 20 Ọrẹn, nughe! unuo ono dion, wu rha sabu tẹmro bọmọke ekwakwa enana ina ki phia-a. Fọkime we vwo imwẹro kpahen ẹmro mẹ ri ne rugba uvuẹn ọke re bruru na-a.” 21 Ọrẹn uvwrọke ọnana, ihworho na a hẹrhẹ i Zẹkaraya, no gbe aye unu taghene o kpọke omamọ uvuẹn ekete ọfuanfon na. 22 Ọke i Zẹkaraya ọ ruẹ otafe, ọrhọ sabu tẹmro rẹn aye-e. Ihworho na ni mẹrẹnvwrurhe taghene ọ mẹrẹn emru oghẹnrensan* uvuẹn ekete ọfuanfon na. Nọ ha abọ ye tẹmro rẹn aye, fọkime o diunu. 23 Ọke ẹdẹ rọ wian owian ọfuanfon ọnẹyen a gba, nọ ghwẹrioma riẹ oghwa ye.
24 Ẹdẹ ezẹko a vrẹn, Ẹlizabẹt ro rhiẹ ane i Zẹkaraya nọ mẹrenphan, ọrhọ ruẹ otafe uvwre ibiamo isionri-in. Ẹlizabẹt nọ tare: 25 “E gbe ni oborẹ i Jehova* o ru ha mẹ uvuẹn ọke ọnana ne. Ọ karorhọ mẹ ne, nyoma ro tiẹ ofa nẹ oma mẹ uvwre ituakpọ.”
26 Ọke ephan Ẹlizabẹt o te ibiamo erhan ne, Osolobrugwẹ no dje ọmakashe re se i Gebrẹl riẹ amwa i Nazarẹt rọ ha i Galili. 27 No bru ọgbọtọ owu ro vwo ji chiọghọ, rẹ ọhworhare owu re se Josẹf ro nẹ uvwioghwa i Devid rhe, ọ san rhotọre. Odẹ ọgbọtọ na yi Meri. 28 Ọke ọmakashe na ọ vwa ye, nọ ta riẹn: “Doo, wẹwẹ rẹ Osolobrugwẹ ọ ha ebrurhọ ọduado riẹn na, Jehova* ọrhẹ owẹwẹ i gba havwiẹ.” 29 Ọrẹn, udu no brurie omamọ fọkiẹ ẹmro ọmakashe na, nọ ji damoma ro no vwẹruọ oborẹ ẹmroma na o mevirhọ. 30 Omarana, ọmakashe na nọ ta riẹn: “Meri, wu vwe jẹ ofẹn mwuo-o, fọkime wu vwo ekwerhọ Osolobrugwẹ ne. 31 Nughe! wu na mẹrenphan ji vwiẹ ọmọ ọhworhare, ne wu ne seyi Jesu. 32 Ọmọ ọnana ono rhiẹ ohworho ọduado, ne ne se yi Ọmọ Ọrọ Mai Rierun na. Jehova* Osolobrugwẹ nọ nọ yẹ ye aga usun i Devid ro rhiẹ ọsẹ ye. 33 No no rhiẹ Orodje ro no suẹn oghwa i Jekọb bẹmẹdẹ, Uvie ọnẹyen o ji vwoba dẹ-ẹ.”
34 Ọrẹn, Meri nọ ta rẹn ọmakashe na: “Marhẹ ọnana ono ru sabu phia, ra mẹriẹn taghene mie ji lele ọhworhare bru ehware dẹ-ẹ?” 35 Ọmakashe na nọ ta rẹn i Meri: “Ẹhẹn ọfuanfon na ọnọ ruọ oma, omẹgbanhon Ọrọ Mai Rierun na ono rhurhuo. Fọkiẹ ọrana, ne ne se ọmọ wu ne vwiẹ na ohworho ọfuanfon, Ọmọ Osolobrugwẹ. 36 Nughe! Ẹlizabẹt ro rhiẹ ohworho ekruon ọ mẹrenphan ne uvuẹn ọke ọho ọnẹyen, ono vwiẹ ọmọ ọhworhare. Ephan na o te ibiamo erhan ne, dedevwo ihworho e seyi ọmase agẹn bi. 37 Fọkime o vwo emru owuorowu rẹ Osolobrugwẹ ọ tare rọ nọ jọ sabu ru-u.” 38 Meri nọ tare: “Nughe! Mẹmẹ ọvrẹn ọgbọtọ i Jehova!* Jenọ phia mẹ lele ẹmro wu tare na.” Omarana, ọmakashe na nọ nyajevwo.
39 Ọke oru, Meri no brokpakpa riẹ amwa owu rọ ha uvwrotọre igbenu uvuẹn i Juda. 40 Nọ ruẹ uvuẹn oghwa i Zẹkaraya ji mroma Ẹlizabẹt. 41 Ọke Ẹlizabẹt o rhon ẹmroma i Meri, ọmọ rọ ha uvuẹn oghwuvwiẹ ye no phori, ẹhẹn ọfuanfon na nọ vuọn oma Ẹlizabẹt. 42 Nọ tare rhẹ uphele gorigori: “Ebrurhọ o rhirhiẹ ye wẹn uvwre emẹse, ebrurhọ o rhirhiẹ ye rẹn ọmọ rọ ha uvuẹn oghwuvwiẹ ọnọ! 43 Ọnana ghini uphẹn ọduado ha mẹ, rẹ izu Ọrovwori mẹ o bru mẹ rhe! 44 Nughe! ogege erhọ mẹ e rhon ẹmroma ọnọ, ọmọ rọ ha uvuẹn oghwuvwiẹ mẹ no phori rhẹ aghọghọ. 45 Omamerhomẹ ọ havwiẹ rẹn ọmase ro vwo imwẹro kpahen ekwakwa ri Jehova* ọ ta riẹn na, fọkime aye ephian ine vi rugba.”
46 Meri nọ tare: “Mia ha arhọ mẹ* jiri Jehova.* 47 Ọmudu mẹ ọ ji ghọghọ omamọ fọkiẹ Osolobrugwẹ ro rhiẹ Osimi mẹ. 48 Fọkime ọ djokarhọ erhirhiẹ ọvrẹn ọgbọtọ ye ro vwo fiemru owuorowu. Nughe! nẹ ọke ọnana nyarhẹn, ọsoso ivwiẹ na ni ne se mẹ ohworho rẹ oma ọ merhan. 49 Fọkime Osolobrugwẹ ro vwo omẹgbanhon na, o ruẹ ekwakwa igbevwunu ha mẹ ne, odẹ ye ọ ji fon. 50 Nẹ uvwiẹ fiẹ uvwiẹ, o ji gbe arodọmẹ rẹn ihworho ra zofẹn yen. 51 O ruẹ ekwakwa igbevwunu rhẹ obọ ọnẹyen, ọ ji hra ihworho ra kparoma uvuẹn ọmudu aye. 52 O tiẹ ehworhare ri vwo omẹgbanhon nẹ aga usun ne, ọ ji kpare ihworho ri vwo omeriotọre rierun ne. 53 O tiobọnu ekwakwa irhorhomu rẹn ihworho orhọmo o kpe, neneyo ephan ọ dabu vuọn aye, ọrẹn o le edafe na nyarhẹn rhẹ abọ ọkaka. 54 Ọ ha userhumu rẹn Izrẹl ro rhiẹ odibo ọnẹyen ne, no djephia taghene ọ karorhọ ive arodọmẹ ọnẹyen, 55 ro ve rẹn Ebraham ọrhẹ emọ* enẹyen bẹmẹdẹ, jerẹ oborẹ ọ ta rẹn esẹ ọwan ride.” 56 Meri no lele Ẹlizabẹt rhirhiẹ emrẹ ibiamo esa, ọke oru nọ ghwẹrioma riẹ oghwa ye.
57 Vwana, no mo te ọke Ẹlizabẹt ono vwiẹ, no vwiẹ ọmọ ọhworhare. 58 Ihworho re rhirhiẹ kẹrẹ aye kugbe ihworho ekruien ni rhonrin taghene i Jehova* o gbe arodọmẹ rode riẹn ne, aye ni lelirie ghọghọ. 59 Ẹdọke ọrẹ ẹrẹnren o te, aye ni rhe mọ samo ọmọ na, aye na gwọlọ mwu i Zẹkaraya ro rhiẹ odẹ ọsẹ ye harẹn ọmọ na. 60 Ọrẹn, izu ọmọ na nọ ta rẹn aye: “Ẹjo! Jọn ye ne seyi.” 61 Ọrẹn aye ni ta riẹn: “O vwo ohworho owuorowu uvuẹn ekrun are ro vwo odẹ ọnana-a.” 62 Omarana, aye ni ha abọ tẹmro rẹn ọsẹ ọmọ na ji nọ yen odẹ rọ gwọlọ mwu rẹn ọmọ na. 63 Nọ tare taghene a yẹ ye ibiẹ ophanphan, nọ ya rhọye taghene: “Jọn yẹ odẹ ye.” Ọnana no gberẹ aye ephian unu omamọ. 64 Ogege, ugbunuie no rhieri, ẹrẹnmuiẹ ọrhọ tamwu otọre ghwomara-an. Nọ sabu tẹmro ji jiri Osolobrugwẹ. 65 Ofẹn no mwu ọsoso ihworho re rhirhiẹ kẹrẹ aye, ihworho na ji ta kpahen ekwakwa enana ephian uvuẹn ọsoso uvwrotọre igbenu i Judia. 66 Ọsoso ihworho ri rhon kpahiẹn ni sẹrorẹ ẹmro enana rhẹ ọmudu aye, aye na ta: “Aruẹ ohworho ọgo yẹ ọmọ ọnana ono rhirhiẹ ọrhọ ghwanren ne?” Aye i tẹmro ọnana fọkime obọ i Jehova* rhẹ ọmọ na i gba havwiẹ.
67 Ẹhẹn ọfuanfon na nọ vuọn oma i Zẹkaraya ro rhiẹ ọsẹ ọmọ na, nọ mẹraro taghene: 68 “Jene jiri Jehova* ro rhiẹ Osolobrugwẹ Izrẹl, fọkime ọ karorhọ ihworho yi ji ha usimi vwe aye ne. 69 Ọ yẹrẹ ọwan ighoro usimirhọ* ne, uvuẹn oghwa i Devid ro rhiẹ odibo ọnẹyen. 70 Jerẹ oborẹ ọ tare nyoma unu emẹraro efuanfon enẹyen ọke ahwanren, 71 taghene ono simi ọwan nẹ abọ evwreghrẹn ọwan ọrhẹ ọsoso ihworho ri vwo utuoma kpahen ọwan. 72 Ono gbe arodọmẹ rẹn ọwan fọkiẹ esẹ ọwan ride ji karorhọ ọphọ ọfuanfon ọnẹyen. 73 Ọnana yẹ ive ro ve rẹn Ebraham ro rhiẹ ọsẹ ọwan rode, 74 taghene orho simi ọwan nẹ abọ evwreghrẹn ọwan hin, nọ nọ yẹ ọwan uphẹn ra na ha ogame ọfuanfon hariẹn vabọ ofẹn, 75 neneyo e vwo atamwu ji rhiẹ evwata obaruiẹ uvuẹn ọsoso ẹdẹ ọwan. 76 Ọrẹn, harẹn owẹwẹ ọmọ mẹ, ene so ọmẹraro Ọrọ Mai Rierun na, fọkime wu na kobaro rẹn i Jehova* ye mwuegbe izede yi. 77 Wu ne yono ihworho yi taghene ọnọ ha usimi rẹn aye nyoma rọ nọ harhomu edandan aye. 78 Fọkime Osolobrugwẹ ọwan o vwo aruẹdọn omamọ. Fọkiẹ aruẹdọn ọnana, ude no no lo mwu ọwan nẹ obẹ odjuwu rhe. 79 Ono ji lo ukpẹ mwu ihworho ri siyẹ okuku ọrhẹ eri ha uvwrotọre rẹ uhwu ọ họhọ okuku rode, no no ji suẹn idjaghwẹ ọwan na nya izede ufuoma.”
80 Ọmọ na nọ mọ duọ ji ru riaro nyoma ẹhẹn ọfuanfon Osolobrugwẹ, nọ daji uvuẹn ato na bọmọke ẹdẹ na o ki te ro dje omayen phia rẹn ihworho Izrẹl.