Abusua Mɔɔ Bɛnle Ɛzonlenlɛ Ko Anu La Bahola Anyia Anyelielɛ
“Saa wɔmɔ a ɛbalie [wɔ bokavolɛ] ngoane a, asoo ɛze?”—1 KƆL. 7:16.
ƐBANWU MUALƐ NE Ɔ?
Kɛ ɔkɛyɛ na anzondwolɛ ara Keleseɛnema mɔɔ asolo bɛ abusua ne anu amra ɛzonlenlɛ la avinli ɛ?
Kɛzi Keleseɛnenli bie bahola aboa ye abusua ne yeamaa bɛanwu nɔhalɛ ne ɛ?
Duzu a yɛbahola yɛayɛ yɛaboa bɛdabɛ mɔɔ bɛ abusua ne anu amra ɛnle nɔhalɛ ne anu la ɛ?
1. Saa awie nwu nɔhalɛ ne a, kɛzi ɔbahola yeaha ye abusua ne ɛ?
MEKƐ bie mɔɔ Gyisɛse zoanle ye ɛzoanvolɛ ne mɔ la, ɔhanle kɛ: “Saa bɛkɔ a, bɛhɔbɔ nolo kɛ, ‘Anwuma Belemgbunlililɛ ne ɛbikye.’” (Mat. 10:1, 7) Ɛnee menli mɔɔ balie edwɛkpa ɛhye ado nu la banyia anzondwolɛ nee anyelielɛ. Noko Gyisɛse bɔle ye ɛzoanvolɛ ne mɔ kɔkɔ kɛ menli dɔɔnwo badwazo atia edwɛkɛhanlɛ gyima ne. (Mat. 10:16-23) Ɛkpɔlɛ mɔɔ vi awie abusua ne la, anloa ɛgyinlanlɛ bahola ayɛ se.—Bɛgenga Mateyu 10:34-36.
2. Duzu ati a saa yɛ abusua ne anu amra ɛnle nɔhalɛ ne anu bɔbɔ a yɛ nye bahola alie ɛ?
2 Asoo ɛhye kile kɛ saa yɛ abusua ne anu amra ɛnle nɔhalɛ ne anu a, yɛ nye ɛnrɛlie ɔ? Kyɛkyɛ. Keleseɛnema bie mɔ yia abusua ɛkpɔlɛ mɔɔ anu yɛ se la, noko tɛ bɛ muala ɔ. Bieko, abusua ɛkpɔlɛ ɛndɛnla ɛkɛ ne dahuu. Ɔnva nwo tɛnlabelɛ biala mɔɔ yɛwɔ nu la, saa yɛ abusua ne kpɔ yɛ anzɛɛ bɛ nye ɛnlie nɔhalɛ ne anwo, na yɛyɛ mɔɔ fɛta la a yɛ nye balie. Eza Gyihova boa bɛdabɛ mɔɔ bɛdi nɔhalɛ bɛmaa ye la ɔmaa bɛ nye die ɔnva nwo kɛ bɛyia ngyegyelɛ la. Keleseɛnema bahola anyia anyelielɛ saa (1) bɛmaa anzondwolɛ tɛnla bɛ abusua ne anu na (2) bɛbɔ mɔdenle kɛ bɛmaa bɛ abusua ne anwu nɔhalɛ ne a.
MAA ANZONDWOLƐ ƐRƐLA ABUSUA NE ANU
3. Duzu ati a ɔwɔ kɛ Keleseɛnenli bɔ mɔdenle kɛ ɔbamaa anzondwolɛ adɛnla abusua ne anu ɛ?
3 Ɔda ali kɛ abusua ne balie nɔhalɛ ne, saa anzondwolɛ wɔ awuke ne anu a. (Bɛgenga Gyemise 3:18.) Saa abusua ne anu amra ɛnzonle Gyihova bɔbɔ a, ɔwɔ kɛ Keleseɛnenli ne bɔ mɔdenle kɛ ɔbamaa anzondwolɛ adɛnla abusua ne anu. Kɛzi ɔwɔ kɛ ɔyɛ ye ɛ?
4. Kɛ ɔkɛyɛ na yɛabɔ yɛ anzondwolɛ ne anwo bane ɛ?
4 Ɔwɔ kɛ yɛsie yɛ nwo nane diinyi anzɛɛ yɛnyia abotane. Amaa yɛayɛ ɛhye la, ɔwɔ kɛ yɛsɛlɛ “Nyamenle [anzondwolɛ] ne mɔɔ bo sonla ndelebɛbo muala azo la.” (Fel. 4:6, 7) Gyihova anwo debie ɛzukoalɛ nee Baebolo ngyinlazo mɔɔ yɛfa yɛbɔ yɛ ɛbɛla la maa yɛnyia anyelielɛ nee anzondwolɛ. (Aye. 54:13) Eza ɔwɔ kɛ yɛkɔ debiezukoalɛ na yɛbɔ mɔdenle wɔ daselɛlilɛ nu, saa yɛkpondɛ kɛ yɛnyia anyelielɛ nee anzondwolɛ a. Mekɛ dɔɔnwo ne ala, bɛdabɛ mɔɔ asolo bɛ abusua ne anu amra ɛzonlenlɛ la kpondɛ adenle yɛ ninyɛne ɛhye mɔ mɔɔ anwo hyia la. Kɛ neazo la, ɛnee adiema raalɛ bie mɔɔ bɛfɛlɛ ye Enza la ɔ hu dwazo tia ye ɛsesebɛ. Saa ɔwie ye sua nu gyima yɛ a ɔkɔ daselɛlilɛ. Enzaa ka kɛ: “Mekɛ biala mɔɔ mebabɔ mɔdenle kɛ meka edwɛkpa ne meahile awie mɔ la, Gyihova boa me ɔmaa ninyɛne kpalɛ fi nu ba.” Nyilalɛ ɛhye mɔ maa ɔnyia anzondwolɛ, ahunlundwolɛ nee anyelielɛ.
5. Duzu a ye ɛyɛlɛ bahola ayɛ se amaa bɛdabɛ mɔɔ bɛ abusua ɛnle nɔhalɛ ne anu la ɛ? Nienwu a bɛbahola bɛanyia moalɛ bɛavi a?
5 Ɔwɔ kɛ yɛbɔ mɔdenle kpalɛ yɛmaa anzondwolɛ tɛnla yɛ nee yɛ abusua ne anu amra mɔɔ bɛnle nɔhalɛ ne anu la avinli. Ɛhye ɛyɛlɛ ɛnla aze ɔluakɛ ɔdwu mekɛ ne bie a ɛnee bɛkpondɛ kɛ yɛyɛ ninyɛne mɔɔ ɔtia Baebolo ngyinlazo la. Yɛ abusua ne anu amra mɔɔ bɛnle nɔhalɛ ne anu la kola fa ɛya wɔ mekɛ mɔɔ yɛkulo kɛ yɛdi Baebolo ne azo nɔhalɛ nu la. Ɔnle kɛ ɛhye maa yɛgyakyi kɛ yɛbayɛ mɔɔ ɔtenrɛ la. Saa yɛbɔ mɔdenle a kenle ko dedee anzondwolɛ bara abusua ne anu. Yɛ nee yɛ abusua ne bɔ nu yɛ ninyɛne mɔɔ ɛntia Baebolo ngyinlazo la. Saa yɛyɛ ɛhye a, yɛkoati kpolerazulɛ mɔɔ nvasoɛ ɛnle zo la. (Bɛgenga Mrɛlɛbulɛ 16:7.) Ngyegyelɛ ba a, ɔwɔ kɛ yɛkpondɛ Baebolo nu folɛdulɛ wɔ mbuluku mɔɔ akɛlɛ nɔhavo nee nrɛlɛbɛvolɛ ne ɛyɛ la anu. Eza yɛbahola yɛakpondɛ moalɛ yɛavi mgbanyima ne mɔ ɛkɛ.—Mrɛ. 11:14.
6, 7. (a) Duzu ati a bie mɔ kpɔ bɛ abusua ne anu amra mɔɔ nee Gyihova Alasevolɛ sukoa la ɛ? (b) Duzu a ɔwɔ kɛ Baebolo sukoavo anzɛɛ Dasevolɛ bie yɛ wɔ abusua ɛkpɔlɛ nwo a?
6 Anzondwolɛ bara abusua ne anu, saa yɛfa yɛ rɛle yɛwula Gyihova anu na yɛbɔ mɔdenle yɛte yɛ abusua ne edwɛkɛ bo a. (Mrɛ. 16:20) Baebolo sukoavoma bɔbɔ bahola abɔ mɔdenle ayɛ ɛhye. Kunlima anzɛɛ yelɛma bie mɔ mɔɔ bɛnle diedima la ɛndwazo ɛntia bɛ bokavolɛ mɔɔ ɛlɛsukoa Baebolo ne la. Bɛbahola bɛaha bɔbɔ kɛ ɛhye kola boa bɛ abusua ne. Noko bie mɔ badwazo atia ɛsesebɛ. Esther, mɔɔ kɛkala ɛyɛ Dasevolɛ la ka kɛ, mekɛ mɔɔ ɔ hu bɔle ɔ bo kɛ ɔ nee Gyihova Alasevolɛ sukoa la ɔvale ɛya kpole kpalɛ. Ɔse: “Mefuandi ye mbuluku ne mɔ megua bɛ lɔ anzɛɛ meyela bɛ.” Mekɛ mɔɔ Howard aye bɔle ɔ bo kɛ ɔsukoa Baebolo ne la, ɔdwazole ɔtiale ye. Howard ka kɛ mrenya dɔɔnwo sulo kɛ bɛ ye mɔ ɛlɛfa bɛ nwo ahɔbɔ ɛzonlenlɛ mɔɔ ɛbɛlɛbɛla bɛ la. Eza ɔka kɛ kɛmɔ kunli ne dwenle kɛ ɔ ye wɔ esiane nu la ati, ɔbahola yeava ɛya na yeayɛ basabasa.
7 Ɔwɔ kɛ yɛboa Baebolo sukoavo mɔɔ ye bokavolɛ dwazo tia ye la yɛmaa ɔte ɔ bo kɛ ɔnle kɛ ɔgyakyi Baebolo ne ɛzukoalɛ. Saa ɔbɛlɛ ɔ nwo aze na ɔbu ye bokavolɛ ne a ninyɛne bahɔ boɛ. (1 Pita 3:15) Howard ka kɛ: “Me nye die nwo kpalɛ kɛ me ye ziele ɔ nwo diinyi na yeanyɛ basabasa la!” Ɔ ye ka kɛ: “Howard hanle kɛ mengyakyi Baebolo ne ɛzukoalɛ ɔluakɛ Alasevolɛ ne mɔ ɛbɛlɛbɛla me. Kɛ anrɛɛ me nee ye bazu kpolera la, menganle kɛ mɔɔ ɔlɛka la bahola ayɛ nɔhalɛ, noko mame, mennwu ye zɔ. Yemɔti menganle mengilele ye kɛ ɔgenga buluku ne mɔɔ melɛsukoa la. Ɔgengale na yeangola yeanzu edwɛkɛ mɔɔ ɔwɔ nu la anwo kpolera. Ɛhye hanle ye kpalɛ.” Ɔwɔ kɛ yɛkakye kɛ menli bade nganeɛ kɛ yeha bɛ ngome anzɛɛ bɛ agyalɛ ne bazɛkye, saa bɛ bokavolɛ gyakyi bɛ kɔ debiezukoalɛ anzɛɛ daselɛlilɛ a. Noko Baebolo sukoavo anzɛɛ Dasevolɛ bahola adendɛ kɛnlɛma ahile ye bokavolɛ. Ɛhye ɛnrɛmaa ye bokavolɛ ne ɛnrɛva ɛya.
BOA BƐ MAA BƐNWU NƆHALƐ NE
8. Folɛ boni a Pɔɔlo dule menli mɔɔ bɛ bokavolɛ ɛnle Keleseɛnema la ɛ?
8 Ɛzoanvolɛ Pɔɔlo dule Keleseɛnema folɛ kɛ bɛnrɛhola bɛnrɛbɔ bɛ bokavolɛ ewole ɔluakɛ ɔnle Keleseɛnenli la ati.b (Bɛgenga 1 Kɔlentema 7:12-16.) Saa Keleseɛnenli kakye kɛ kenlebie ye bokavolɛ banwu nɔhalɛ ne a, ɔbamaa ɔ nye alie. Noko ɔwɔ kɛ ɔnea kɛzi ɔbaboa ye yeamaa yeade nɔhalɛ ne abo la boɛ, kɛmɔ anwubielɛ ɛhye mɔ maa yɛnwu ye la.
9. Saa Keleseɛnenli bie kpondɛ kɛ ɔka Baebolo ne anu nɔhalɛ ne ɔkile ye abusua ne a, duzu a ɔnle kɛ ɔyɛ a?
9 Mekɛ mɔɔ Jason nwunle nɔhalɛ ne la ɔ nye liele kpole. Ɔka kɛ: “Ɛnee mekpondɛ kɛ meka mekile awie biala!” Saa Baebolo sukoavo bie nwu kɛ mɔɔ yezukoa ye wɔ Baebolo ne anu la a le nɔhalɛ ne a, ɔ nye balie kpole na yeaha nwolɛ edwɛkɛ dahuu. Ɔbahulo kɛ ye abusua ne balie nɔhalɛ ne ado nu ɛkɛ ne ala, noko bie a bɛ nee ye ɛnrɛyɛ adwenle. Kɛzi Jason aye ne yɛle ye debie wɔ Jason anyelielɛ ne anwo ɛ? Ɔ ye ka kɛ ɛnee ɔte nganeɛ kɛ ɔ hu ɛnrɛgyakyi nɔhalɛ ne anwo edwɛkɛ ɛhanlɛ ɛlɛ. Raalɛ ko mɔɔ ɔ hu nwunle nɔhalɛ ne la ye ɛvolɛ 18 na yealie la hanle kɛ ɛnee ɔwɔ kɛ ɔsukoa nɔhalɛ ne ngyikyi ngyikyi. Bie a ɛ nee awie mɔɔ ye bokavolɛ anye ɛnlie nɔhalɛ ne anwo la sukoa debie. Ɔbayɛ kpalɛ kɛ ɛbahile sukoavo ne kɛzi ɔbahilehile nɔhalɛ ne anu wɔ adenle kpalɛ zo na ye bokavolɛ ne anva ɛya la anu wɔahile ye. Ngapezonli Mosisi hanle kɛ: “Me ngilehilelɛ badɔ kɛ ezule, me ɛdendɛlɛ bavie kɛ ɛbɔlɛ. Me ɛdendɛlɛ bayɛ kɛ nyenyesuo mɔɔ gugua ndile zo.” (Mɛla 32:2) Nɔhalɛ ne anwo edwɛkɛ ekyi mɔɔ ɛbaha ye wɔ adenle kpalɛ zo nee mekɛ kpalɛ nu la bahola azo ma adɛla edwɛkɛ dɔɔnwo mɔɔ ɛbaha la.
10-12. (a) Folɛ boni a ɛzoanvolɛ Pita dule bɛdabɛ mɔɔ bɛ bokavolɛ ɛnle Keleseɛnema la ɛ? (b) Kɛzi Baebolo sukoavo bie vale folɛ mɔɔ wɔ 1 Pita 3:1, 2 la lile gyima ɛ?
10 Nyamenle manle ɛzoanvolɛ Pita dule Keleseɛne mraalɛ mɔɔ bɛ hu mɔ ɛnle Keleseɛnema la folɛ kɛ: “Bɛmɛ nwuvolɛ mraalɛ, bɛbɛlɛ bɛ nwo aze bɛmaa bɛ hu mɔ, amaa nuhua mɔɔ ɔ hu ɛnlie Nyamenle Edwɛkɛ ne ɛnli la, bɛalua bɛ nyɛleɛ zo bɛahwe ye bɛarɛlɛ Nyamenle, mɔɔ ɔnrɛhyia kɛ bɛkɛha edwɛkɛ kpɔkɛ ko bɔbɔ a, ɔboalekɛ bɛbanwu bɛ nwo enililɛ nee bɛ anwondelɛ wɔ bɛ nyɛleɛ nu.” (1 Pita 3:1, 2) Saa raalɛ bɛlɛ ɔ nwo aze maa ɔ hu na ɔbu ye wɔ mekɛ mɔɔ ɔyɛ ye atisesebɛ bɔbɔ la a, ɔbahola yeaboa ye yeamaa yealie nɔhalɛ ne. Ɔwɔ kɛ kunli mɔɔ le diedinli la noko yɛ mɔɔ Nyamenle kpondɛ kɛ ɔyɛ la—abusua tile mɔɔ lɛ ɛlɔlɛ, ɔnva nwo kɛ ɔ ye dwazo tia ye la.—1 Pita 3:7-9.
11 Keleseɛnema dɔɔnwo mɔɔ vale Pita folɛdulɛ ne lile gyima la ɛnyia zolɛ nvasoɛ. Bɛ nuhua ko a le Selma. Mekɛ mɔɔ ɔbɔle ɔ bo kɛ ɔ nee Gyihova Alasevolɛ sukoa Baebolo ne la yeanyɛ ɔ hu Steve fɛ. Ɔ hu vale ɛya, ɔhwenle nungule na ɛnee ɔsulo. Selma hanle kɛ kolaa na yeanwu nɔhalɛ ne bɔbɔ la, ɛnee ɔ hu edwɛkɛ yɛ se. Ɛnee ɔwɔ kɛ ɔnea boɛ wɔ edwɛkɛ biala mɔɔ ɔbaha nee debie biala mɔɔ ɔbayɛ la anwo. Selma eza ka kɛ, ɛnee ɔ hu ta fa ɛya, noko mɔɔ ɔbɔle ɔ bo kɛ ɔsukoa Baebolo ne la ɔ hu ɛya ne akee yɛle kpole. Duzu a boale ye a?
12 Selma kakye debie bie mɔɔ ɔzukoale ye wɔ dasevolɛ ne mɔɔ nee ye zukoale ɛkɛ la. Ɔka kɛ: “Kenle ko bie, ɛnee memkpondɛ kɛ yɛsukoa. Ɛnee Steve ɛbo me nɔe ne wɔ mekɛ mɔɔ ɛnee melɛkilehile edwɛkɛ bie anu la na ɔmanle menlile alɔbɔlɛ nee nyane. Mekɛ mɔɔ menganle mɔɔ zile nee kɛzi mete nganeɛ mengilele adiema raalɛ ne la ɔmanle mengengale 1 Kɔlentema 13:4-7. Mɔlebɛbo ne menganle kɛ, ‘Steve ɛnyɛ ɛhye mɔ anu biala ɛmmaa me.’ Noko adiema raalɛ ne manle mendwenlenle nwo wɔ adenle fofolɛ zo ɔlua kpuyia ɛhye mɔɔ ɔbizale me la azo, ‘Ninyɛne ɛhye mɔ anu boni a ɛyɛ ɛmaa ɛ hu a?’ Membuale kɛ, ‘Menyɛ nuhua biala, ɔluakɛ ye edwɛkɛ yɛ se.’ Adiema raalɛ ne hanle ye bɛtɛɛ kɛ, ‘Selma, nwane a kpondɛ kɛ ɔyɛ Keleseɛnenli a? Ɛdawɔ anzɛɛ Steve?’” Selma nwunle kɛ ɔwɔ kɛ ɔkakyi ye adwenle. Ɔhanle kɛ: “Menzɛlɛle Gyihova kɛ ɔboa me ɔmaa menyia ɛlɔlɛ kpole memaa Steve. Ngyikyi ngyikyi ninyɛne bɔle ɔ bo hakyile.” Ɛvolɛ 17 anzi, Steve liele nɔhalɛ ne.
KƐZI AWIE MƆ BAHOLA ABOA LA
13, 14. Duzu a yɛbahola yɛayɛ yɛaboa menli mɔɔ bɛ mbusua ɛnle nɔhalɛ ne anu la ɛ?
13 Kɛmɔ nyenyesuo doɔloa azɛlɛ na ɔmaa mbaka fifi la, zɔhane ala a awie ko biala mɔɔ wɔ asafo ne anu la bahola aboa amaa menli mɔɔ wɔ abusua mɔɔ asolo bɛ ɛzonlenlɛ nu la anye alie a. Elvina mɔɔ wɔ Brazil la ka kɛ, “Ɛlɔlɛ mɔɔ mediema ne mɔ lale ye ali la a boale me manle mengyinlanle kpundii wɔ nɔhalɛ ne anu a.”
14 Atiakunlukɛnlɛma nee menli nwo anyelielɛ mɔɔ asafo ne anu amra da ye ali la kola maa awie mɔɔ ɔnle diedinli la kakyi ye adwenle. Adiema nrenya bie mɔɔ ɔwɔ Nigeria mɔɔ ɔ ye nwunle nɔhalɛ ne la ye ɛvolɛ 13 kolaa na yealie la hanle kɛ: “Mekɛ bie mɔɔ ɛnee me nee Dasevolɛ bie ɛlɛtu adenle la ye kale ne zɛkyele. Ɔhɔkpondɛle ɔ mediema Alasevolɛ wɔ namule bie mɔɔ bikye ɛkɛ la azo na bɛmanle yɛ ɛleka yɛlale ye nɔe ne. Bɛnleanle yɛ kɛ asɛɛ ɛnee bɛze yɛ dɛba la. Ɛkɛ ne ala, mengakyele Keleseɛne ɛlɔlɛ ne mɔɔ ɛnee me ye ka nwolɛ edwɛkɛ dahuu la.” Wɔ England, adiema raalɛ bie mɔɔ ɔ hu nwunle nɔhalɛ ne la ye ɛvolɛ 18 na yealie la hanle kɛ: “Ɛnee Alasevolɛ ne mɔ to ɛsalɛ fɛlɛ yɛ mu nwiɔ maa yɛkɔdi debie, ɛnee me nye die kpalɛ.”c Nrenya bie mɔɔ ɔvi England mɔɔ awieleɛ bɔkɔɔ ne ɔrayɛle Dasevolɛ la ka kɛ: “Ɛnee Mediema mrenya nee mraalɛ bakpɔla yɛ anzɛɛ bɛto ɛsalɛ bɛfɛlɛ yɛ na ɔmanle menwunle kɛ bɛdwenle sonla nwo. Menwunle ɛhye wienyi wɔ mekɛ mɔɔ ɛnee mela asopiti na bɛ nuhua dɔɔnwo rakpɔlale me la.” Asoo ɛbahola wɔahile anyelielɛ ko ne ala bie wɔahile menli mɔɔ bɛ ngome a bɛwɔ nɔhalɛ ne anu la mbusua ɔ?
15, 16. Duzu a bahola aboa menli mɔɔ bɛ ngome a bɛwɔ nɔhalɛ ne anu la yeamaa bɛ nye alie ɛ?
15 Saa yɛyɛ mɔɔ tenrɛ na yɛdua adenle kpalɛ zo yɛdi daselɛ ɛvolɛ dɔɔnwo bɔbɔ a, tɛ awie biala mɔɔ wɔ yɛ abusua ne anu la a balie nɔhalɛ ne a. Bie mɔ anye ɛnrɛlie nwo anzɛɛ bɛbakpɔ yɛ kpalɛ. (Mat. 10:35-37) Noko saa yɛda subane kpalɛ ali a, ninyɛne kpalɛ bahola avi nu ara. Nrenya bie mɔɔ ɔ ye rayɛle adiema kolaa na yearayɛ adiema la hanle kɛ, bie a ɛnrɛnwu kɛzi Keleseɛne subane kpalɛ baha wɔ bokavolɛ ne adwenle nee ye ahonle la. Eza ɔhanle kɛ: “Mmagyakyi wɔ bokavolɛ ne ɛboalɛ ɛlɛ.”
16 Menli mɔɔ bɛ abusua ɛnle nɔhalɛ ne anu la anye bahola alie. Adiema raalɛ ko ɛva ɛvolɛ 21 ɛli ɔ hu daselɛ noko ɔ hu ɛtɛdiele nɔhalɛ ne. Ɔka kɛ ɔ nye die dahuu ɔluakɛ ɔbɔ mɔdenle ɔyɛ mɔɔ sɔ Gyihova anye, ɔdi nɔhalɛ ɔmaa ye, na ɔ nee ye nyia agɔnwolɛvalɛ mɔɔ anu yɛ se. Eza ɔka kɛ ɔyɛ bɛtianwo debiezukoalɛ, ɔkɔ debiezukoalɛ nee daselɛlilɛ na ɔboa menli mɔɔ wɔ asafo ne anu la dahuu. Ɛhye ɛboa ye ɛmaa yebikye Gyihova na yehɔ zo yeli nɔhalɛ.—Mrɛ. 4:23.
MMAMAA Ɛ SA NU TO!
17, 18. Kɛzi Keleseɛnenli mɔɔ wɔ abusua mɔɔ asolo biala ɛzonlenlɛ nu la bahola anyia anyelazo ɛ?
17 Saa ɛle Keleseɛnenli mɔɔ wɔ abusua ne ɛnle nɔhalɛ ne anu a, mmamaa ɛ sa nu to. Kakye kɛ Gyihova ɛnrɛgyakyi ye menli ne ɛlɛ. (1 Sam. 12:22) Saa wɔamkpo ye a, ɔnrɛkpo wɔ ɛlɛ. (Bɛgenga 2 Edwɛkɛsisilɛ 15:2.) Yemɔti, fa anyelielɛ sukoa Gyihova anwo debie na “fa ɛ rɛle wula ye nu.” (Edw. 37:4, 5) “Bɛyɛ nzɛlɛlɛ dahuu,” na bɛnyia diedi kɛ yɛ anwuma Selɛ ne mɔɔ lɛ ɛlɔlɛ la baboa bɛ yeamaa bɛagyinla ngyegyelɛ biala anloa.—Wulo. 12:12.
18 Sɛlɛ Gyihova na maa ye sunsum nwuanzanwuanza ne ɛboa wɔ na anzondwolɛ ara wɔ abusua ne anu. (Hib. 12:14) Ɛyɛ zɔ a, ɛbayɛ neazo kpalɛ wɔamaa wɔ abusua ne anu amra mɔɔ bɛnle nɔhalɛ ne anu la. Saa bɛdi edwɛkɛ mɔɔ se: “Debie biala mɔɔ bɛyɛ la . . . bɛyɛ bɛde Nyamenle anyunlu” azo a, bɛ nye bɛalie na bɛanyia anzondwolɛ. (1 Kɔl. 10:31) Bieko, ɛbahola wɔanyia anwodozo kɛ mediema ne mɔ bɛanyia ɛlɔlɛ amaa wɔ na bɛaboa wɔ.
[Ɔ bo ɛkɛ ne edwɛkɛ ne mɔ]
a Tɛ bɛ aluma kpalɛ ɔ.
b Pɔɔlo folɛ ne ɛngile kɛ Keleseɛnema ɛnrɛhola ɛnrɛtete agyalɛ nu wɔ mekɛ mɔɔ bɛlɛyia ɛkpɔlɛ mɔɔ anu yɛ se kpalɛ la. Ɛhye le bɛ ti anwo kpɔkɛzilɛ mɔɔ anyebolo wɔ nu. Nea “Bɛzie Bɛ Nwo wɔ Nyamenle Ɛhulolɛ ne Anu” buluku ne, mukelɛ 220-221.
c Baebolo ne ɛnga kɛ yɛ nee menli mɔɔ bɛnle nɔhalɛ ne anu la mmadi aleɛ.—1 Kɔl. 10:27.
[Nvoninli wɔ mukelɛ 30]
Kilehile wɔ diedi ne anu wɔ mekɛ kpalɛ nu
[Nvoninli wɔ mukelɛ 31]
Kile kɛ ɛdwenle bokavolɛ mɔɔ ɔnle diedinli la anwo