Kpuya Mɔɔ Vi Kengavolɛma Ɛkɛ

Mɔɔ Gyisɛse hanle kɛ, “Bɛmmadwenle kɛ menvale anzodwolɛ a membale” la, duzu a ɛnee ɔlɛkile a?

Gyisɛse hilehilele menli kɛzi bɛ nee awie mɔ badɛnla anzodwolɛ nu la. Noko kenle ko bie ɔhanle ɔhilele ye ɛzoanvolɛma ne kɛ: “Bɛmmadwenle kɛ menvale anzodwolɛ membale azɛlɛ ye azo, meanva anzodwolɛ meamba, emomu konle dadeɛ. Ɔluakɛ menvale mgbakyemgbakyenu membale, ralɛ nrenyia badwazo atia ye papa, na ralɛ raalɛ adwazo ati ye mame, na agyalɛ raalɛ adwazo atia ye ase.” (Mat. 10:34, 35) Duzu a ɛnee Gyisɛse ɛlɛkile a?

Ɛnee Gyisɛse ɛngulo kɛ ɔfa mgbakyemgbakyenu ɔba abusua nu, noko ɛnee ɔze kɛ ye ngilehilelɛ ne bava mgbakyemgbakyenu ara mbusua bie mɔ anu. Ɛhye ati, ɛnee ɔwɔ kɛ menli mɔɔ bɛkulo kɛ bɛbayɛ Kelaese ɛdoavolɛma na bɛmaa bɛsɔne bɛ la te ɔ bo kɛ, ɔdwu mekɛ ne bie a bɛ mbusuafoɔ anye ɛnrɛlie bɛ kpɔkɛzilɛ ne anwo. Saa bɛ ye anzɛɛ bɛ hu anzɛɛ abusua ne anu amra gyɛne mɔɔ ɛnle diedima la dwazo tia bɛ a, ɔbahola yeamaa yeayɛ se kɛ bɛbava Kelaese ngilehilelɛ ne bɛali gyima.

Baebolo ne maa Kilisienema anwosesebɛ kɛ, “bɛ nee menli kɔsɔɔti ɛdɛnla anzodwolɛ nu.” (Wlo. 12:18) Noko Gyisɛse ngilehilelɛ ne bahola ayɛ kɛ “konle dadeɛ” wɔ mbusua bie mɔ anu. Saa abusua ne anu amra bie mɔ die Gyisɛse ngilehilelɛ ne to nu na bie mɔ dwazo tia ye a, yɛɛ ɛhye si a. Saa ɔba ye zɛhae a, mbusuafoɔ zɔhane mɔ​—menli mɔɔ wɔ awuke ne anu la​—bayɛ ahenle mɔɔ ɛlɛsukoa nɔhalɛ ne la “agbɔvolɛ.”​—Mat. 10:36.

Ɔdwu mekɛ ne bie a Kelaese ɛdoavolɛma mɔɔ bɛ nee bɛ mbusuafoɔ ɛnle ɛzonlenlɛ ko anu la yia tɛnlabelɛ bie mɔɔ sɔ ɛlɔlɛ mɔɔ bɛlɛ bɛmaa Gyihova nee Gyisɛse nea la. Kɛ neazo la, mbusuafoɔ mɔɔ bɛnle diedima la bahola atinlitinli bɛ nwo zo kɛ bɛli ɛzonlenlɛ nu ɛvoyia bie. Saa bɛyia sɔnea zɛhae a, nwane a bɛbahulo kɛ bɛbayɛ mɔɔ sɔ ɔ nye la a? Gyisɛse hanle kɛ: “Awie biala mɔɔ kulo ye papa anzɛɛ ye mame tɛla me la ɛnfɛta me.” (Mat. 10:37) Gyisɛse anga kɛ saa awie kulo kɛ ɔyɛ ye ɛdoavolɛ a, ɔnle kɛ ɔkulo ye awovolɛ kpalɛ. Emomu, ɛnee ɔlɛsi zo kɛ ɔwɔ kɛ bɛfa ninyɛne mɔɔ hyia la bɛdimoa. Saa yɛlɛbɔ mɔdenle yɛazonle Gyihova na yɛ mbusuafoɔ dwazo tia yɛ a, yɛkɔ zo yɛkulo bɛ, noko yɛkakye kɛ Nyamenle anwo ɛlɔlɛ mɔɔ yɛlɛ la a dimoa a.

Nɔhalɛ nu, saa wɔ mbusuafoɔ dwazo tia wɔ a, ɔkola ɔyɛ nyane kpalɛ. Noko ɔwɔ kɛ Gyisɛse ɛdoavolɛma kakye ye edwɛkɛ ɛhye: “Awie biala mɔɔ ɛnlie ye amaneɛnwunlɛ baka ne na ɔndoa me la ɛnfɛta me.” (Mat. 10:38) Wɔ adenle fofolɛ zo, Kilisienema bu dwazotia mɔɔ vi bɛ mbusuafoɔ ɛkɛ la kɛ ɔle amaneɛnwunlɛ mɔɔ ɔwɔ kɛ Kelaese ɛdoavolɛma gyinla ɔ nloa la bie. Mekɛ ko ne ala, bɛlɛ anyelazo kɛ bɛ subane kpalɛ ne baha bɛ mbusuafoɔ mɔɔ bɛnle diedima la ahonle yeamaa bɛahakyi bɛ adwenle na bɛazukoa Baebolo ne anu edwɛkɛ ne.​—1 Pita 3:1, 2.