Ɛsalɛ Bie Hɛlɛle Bane Ne Anwo

Nzinlii, Bɛlehyaza rayɛle Babelɔn belemgbunli. Kenle ko nɔsolɛ nu, ɔdole ye menli titili apenle ko mɔɔ wɔ maanle ne anu la ɛkponle kpole bie. Ɔmaanle ye azonvolɛ hɔvale nvutuke kanrɛlɛ ne mɔ mɔɔ Nɛbukadenɛza sesale bɛ wɔ Gyihova ɛzonlenlɛsua ne anu la rale. Bɛlehyaza nee ye nyɛvolɛ ne mɔ nlonle kanrɛlɛ ne mɔ anu na bɛhanvole bɛ nyamenle ne mɔ. Arɛlevilɛ nu ala, ɛsalɛ bie vindele na ɔbɔle ɔ bo kɛ ɔkɛlɛ ɛleka mɔɔ bɛlɛdi aleɛ ne la bane ne anwo.

Ɛzulolɛ kpole hanle Bɛlehyaza. Ɔvɛlɛle ye ngonyiama ne na ɔbɔle bɛ ɛwɔkɛ kɛ: ‘Awie biala mɔɔ kɛhola kɛhile ngɛlɛlera ɛhye abo la, mebayɛ ye sonlakpole mɔɔ tɔ zolɛ nsa wɔ Babelɔn.’ Bɛbɔle mɔdenle biala, noko bɛ nuhua ko bɔbɔ angola angile ɔ bo. Akee ɔbahyema ne rahanle kɛ: ‘Ɛnee nrenyia bie mɔɔ bɛfɛlɛ ye Daneɛle la ta kile ninyɛne bo kile Nɛbukadenɛza. Ɔbahola yeahile edwɛkɛ ɛhye abo yeahile wɔ.’

Daneɛle rale belemgbunli ne ɛkɛ. Bɛlehyaza hanle hilele ye kɛ: ‘Saa ɛkola ɛkenga edwɛkɛ ɛhye na ɛkile ɔ bo a, mebamaa wɔ nvutuke ndweabane, na wɔayɛ sonlakpole mɔɔ tɔ zolɛ nsa wɔ Babelɔn.’ Daneɛle hanle kɛ: ‘Mengulo wɔ ahyɛlɛdeɛ ne, noko mebahile edwɛkɛ ne abo meahile wɔ. Wɔ papa Nɛbukadenɛza memaanle ɔ nwo zo, na Gyihova bɛlɛle ye aze. Ɛze mɔɔ dole ye la amuala, noko wɔambu Gyihova, bɛnlo nwanye wɔ nvutuke kanrɛlɛ ne mɔ mɔɔ bɛvale bɛvile ye ɛzonlenlɛsua ne anu la anu. Yemɔti Nyamenle a ɛhɛlɛ edwɛkɛ ɛhye a: Mini, Mini, Tikɛle nee Pasen. Edwɛkɛ ne abo kile kɛ Medeama nee Pɛhyeama bali Babelɔn anwo zo konim, na ɛnrɛyɛ belemgbunli bieko.’

Ɛnee ɔzɔho kɛ awie biala ɛnrɛhola ɛnrɛli Babelɔn anwo zo konim. Bane kpole nee azule mɔɔ le kuma la bɔ suakpole ne anwo bane. Noko wɔ zɔhane nɔe ne, Medeama nee Pɛhyeama tetale Babelɔn. Pɛhyea Belemgbunli Saelɛse pɛle gota dole azule ne anwo maanle nzule ne vale nu na ɔsesanle amaa ye sogyama ahola ahɔ suakpole ne azo. Mɔɔ bɛdwule anlenkɛ ne anwo la ɛnee bɛbuke! Sogyama ne lile suakpole ne azo konim, na bɛhunle belemgbunli ne. Akee Saelɛse rayɛle Babelɔn belemgbunli.

Wɔ ɛvolɛ ko anu, ɔhanle kɛ: ‘Gyihova ɛha ɛhile me kɛ menzi ye ɛzonlenlɛsua ne mɔɔ wɔ Gyɛlusalɛm la bieko. Ye sonvolɛ biala mɔɔ ɔkulo kɛ ɔkɔboa la bahola ahɔ.’ Yemɔti kɛ mɔɔ Gyihova hanle la, Dwuuma dɔɔnwo ziale hɔle bɛ sua zo Gyɛlusalɛm wɔ ɛvolɛ 70 anzi. Saelɛse vale nvutuke nee dwɛtɛ fufule kanrɛlɛ ne mɔ nee ninyɛne mɔɔ Nɛbukadenɛza sesale vile ɛzonlenlɛsua ne anu la ziale hɔle. Wɔnwu kɛzi Gyihova maanle Saelɛse boale ye menli ne la ɔ?