Daneɛle La Awenade Tunli Nu

Medeanli Dalayɛse noko rayɛle Babelɔn belemgbunli. Dalayɛse nwunle kɛ Daneɛle le sonla titili. Ɔmaanle Daneɛle nleanle amɛnladoma mɔɔ wɔ maanle ne anu la anwo zo. Menli ɛhye mɔ anye bolole Daneɛle yemɔti ɛnee bɛkpondɛ kɛ bɛku ye. Ɛnee bɛze kɛ Daneɛle yɛ asɔne fane nsa kenle ko biala, yemɔti bɛhanle bɛhilele Dalayɛse kɛ: ‘O belemgbunli, di mɛla kɛ ɛ ngomekye a ɔwɔ kɛ awie biala fa ye asɔneyɛlɛ to ɛ nyunlu a. Awie biala mɔɔ anli mɛla ɛhye azo la, ɔwɔ kɛ bɛfuandi ye bɛto awenade ne mɔ tunli ne anu.’ Dalayɛse liele dole nu na ɔvale ɔ sa ɔwulale mɛla ne abo.

Mɔɔ Daneɛle dele mɛla ne anwo bie la, ɔhɔle sua nu. Ɔbukele ye nvɛnzɛlɛ ne na ɔhotole ɛkɛ ne ɔzɛlɛle Gyihova. Daneɛle agbɔvolɛ ne mɔ hɔdole ye wɔ ye sua ne anu kɛ ɔlɛyɛ asɔne. Bɛhɔhanle bɛhilele Dalayɛse kɛ: ‘Daneɛle andie wɔ. Kenle ko biala ɔsɛlɛ ye Nyamenle ne fane nsa.’ Ɛnee Dalayɛse kulo Daneɛle edwɛkɛ yemɔti ɛnee ɔngulo kɛ ɔwu. Alehyenlɛ ne anu amuala, ɛnee ɔlɛkpondɛ adenle yealua zo yealie Daneɛle. Noko belemgbunli ne bɔbɔ ɛnrɛhola ɛnrɛhakyi mɛla mɔɔ yeva ɔ sa yewula ɔ bo la. Ɛnee ɔwɔ kɛ ɔmaa bɛfuandi Daneɛle bɛto awenade ne mɔ tunli ne anu.

Daneɛle edwɛkɛ ne gyegyele Dalayɛse kpalɛ, yemɔti zɔhane nɔe ne yeangola da. Dalayɛse hɔle tunli ne anwo nwonlomɔ ne ala na ɔdeanle nu ɔbizale Daneɛle kɛ: ‘Wɔ Nyamenle ne ɛlie wɔ ngoane ɔ?’

Dalayɛse dele ɛnelɛ bie. Daneɛle ɔ! Ɔhanle ɔhilele Dalayɛse kɛ: ‘Gyihova anwumabɔvolɛ ratotole awenade ne mɔ anloa anu, yemɔti bɛanva bɛ nloa bɛanga me.’ Dalayɛse anye liele kpole! Ɔhanle kɛ bɛye Daneɛle bɛvi tunli ne anu. Ɛhwee anyɛ Daneɛle. Akee belemgbunli ne hanle kɛ: ‘Bɛvuandi menli mɔɔ bɛdole Daneɛle ɛzonle la bɛgua tunli ne anu.’ Mɔɔ bɛvuandinle bɛ bɛguale tunli ne anu la, awenade ne mɔ tetele bɛ nu.

Dalayɛse hanle hilele ye menli ne kɛ: ‘Awie biala ɛzonle Daneɛle Nyamenle ne. Yelie Daneɛle yevi awenade ne mɔ asa anu.’

Asoo ɛsɛlɛ Gyihova dahuu kɛ mɔɔ ɛnee Daneɛle yɛ la?