Belemgbunlililɛ Mɔɔ Le Kɛ Baka Kpole La

Kenle ko nɔɔzo bie, Nɛbukadenɛza hanle ɛlalɛ ɛzulolɛ bie. Ɔvɛlɛle ye nrɛlɛbɛvolɛma ne amuala kɛ bɛrahile ɔ bo bɛhile ye. Noko bɛ nuhua biala angola angile ye ɛlalɛ ne abo. Nzinlii akee belemgbunli ne hanle hilele Daneɛle.

Nɛbukadenɛza hanle hilele Daneɛle kɛ: ‘Melɛka ɛlalɛ la menwunle baka bie. Baka ne yɛle tendenle hɔle anwuma kpalɛ. Bɛnwunle ye wɔ azɛlɛ ye azo ɛleka biala. Ye nya le ngɛnlɛma yɛɛ ye ma zonle. Ɛbɔ nu nane bada ye alubo ne anu yɛɛ nloma yɛ bɛ sane wɔ ye ngane ne mɔ azo. Akee anwumabɔvolɛ bie vi anwuma dwule aze. Ɔdeanle nu kɛ: “Bɛpɛ baka ne bɛdo aze, bɛpepɛ ye ngane ne mɔ. Bɛgyakyi ye dosinli ne nee ye ndinli ne mɔ azɛlɛ ne anu na bɛva mbulalɛ nee kɔbele bɛkpolo nwolɛ wɔ ndile ne anu. Bɛmaa ye sonla ahonle ne ɛhakyi, na ɔnyia nane ahonle too ɛvolɛ nsuu. Menli kɔsɔɔti banwu kɛ Nyamenle le Tumivolɛ wɔ ewiade belemgbunlililɛ zo, yɛɛ ɔfa ɔmaa awie biala mɔɔ ɔkulo la.”’

Gyihova hilele ɛlalɛ ne abo hilele Daneɛle. Mɔɔ Daneɛle dele ɛlalɛ ne abo la, ye ahonle dule. Ɔhanle kɛ: ‘O nana, me kunlu anu a anrɛɛ ɛlalɛ ne fale wɔ agbɔvolɛ anwo, noko ɔfale ɛ nwo. Baka ne mɔɔ bɛpɛle bɛdole aze la a le ɛdawɔ. Wɔ belemgbunlililɛ ne bavi ɛ sa, na ɛbali ndile kɛ ɛbɔ nu nane la. Noko kɛ mɔɔ anwumabɔvolɛ ne hanle kɛ bɛgyakyi dosinli ne nee ye ndinli ne la ati, ɛbazia wɔayɛ belemgbunli bieko.’

Ɛvolɛ ko anzi mɔɔ Nɛbukadenɛza lua ye belemgbunli sua ne ati zo ɛlɛnea kɛzi Babelɔn le kɛnlɛma la. Ɔhanle kɛ: ‘Nea suakpole kɛnlɛma ko mɔɔ mekyekye a. Melɛ tumi kpole!’ Mɔɔ ɔ nloa wɔ ɔlɛtendɛ la ɛnelɛ bie vi anwuma hanle kɛ: ‘Nɛbukadenɛza! Kɛkala belemgbunlililɛ ne bavi ɛ sa.’

Ɛkɛ ne ala, Nɛbukadenɛza adwenle hanle ɔ nwo na ɔyɛle kɛ ɛbɔ nu nane la. Bɛvoanle ye bɛvile ye belemgbunli sua nu ɛkɛ, na ɔ nee ɛbɔ nu nane hɔdɛnlanle. Nɛbukadenɛza ati enrinli yɛle ndendenle kɛ kɔleɛ ndɛkɛ na ɔ gyakɛ ati yɛle kɛ aloma gyakɛ ati.

Ɛvolɛ nsuu anzi, Nɛbukadenɛza anye rale ɔ nwo zo, na Gyihova maanle ɔyɛle Babelɔn belemgbunli. Akee Nɛbukadenɛza hanle kɛ: ‘Ayɛlɛyelɛ ɛha Gyihova, anwuma Belemgbunli ne. Kɛkala menwu kɛ Gyihova a le Tumivolɛ a. Ɔbɛlɛ anwomemaazoma aze, na ɔfa belemgbunlililɛ ɔmaa awie biala mɔɔ ɔkulo la.’