Kakula kpavolɛ bie anye gyi menli mɔɔ ɛlɛkɔ Belemgbunlililɛ Asalo la anwo

MGBAVOLƐ NEE MBƐLƐRA BIZA KƐ

Duzu Ati A Ɔwɔ Kɛ Mekɔ Belemgbunlililɛ Asalo A?

Gyihova Alasevolɛ yia nu fane nwiɔ wɔ ɛleka mɔɔ bɛyia nu bɛsonle la, bɛfɛlɛ ɛkɛ ne Belemgbunlililɛ Asalo. Duzu a bɛyɛ ye wɔ ɛkɛ a, saa ɛkɔ ɛkɛ a, nvasoɛ boni a ɛbanyia ye a?

Duzu a bɛyɛ ye wɔ Belemgbunlililɛ Asalo ɛkɛ a?

Bɛsukoa Baebolo nu folɛdulɛ mɔɔ boa kpalɛ la wɔ Belemgbunlililɛ Asalo ɛkɛ. Nyianu ngakyile mɔɔ bɛyɛ ye wɔ ɛkɛ la baboa wɔ yeamaa:

wɔazukoa Nyamenle anwo nɔhalɛ ne.
wɔade deɛmɔti ninyɛne ɛlɛkɔ zo zɛhae la abo.
wɔayɛ sonlakpalɛ.
wɔanyia agɔnwolɛma mɔɔ tɛla biala.

Ɛze ɔ? Bɛfɛlɛ ɛleka mɔɔ Gyihova Alasevolɛ yia nu la Belemgbunlililɛ Asalo ɔluakɛ, Nyamenle Belemgbunlililɛ ne a le debie titili mɔɔ bɛkɔsuzu nwo wɔ ɛkɛ a.—Mateyu 6:9, 10; 24:14; Luku 4:43.

Duzu ati a ɔwɔ kɛ ɛkɔ bie a?

Ninyɛne mɔɔ bɛsuzu nwo wɔ ɛkɛ ne la baboa wɔ. Baebolo ngyinlazo mɔɔ bɛsuzu nwo wɔ Gyihova Alasevolɛ ayia bo la baboa wɔ yeamaa ‘wɔanwu nrɛlɛbɛ.’ (Mrɛlɛbulɛ 4:5) Ɛhye kile kɛ Baebolo ne bahola aboa wɔ yeamaa wɔazi kpɔkɛ kpalɛ wɔ ɛbɛlabɔlɛ nu. Eza ɔbaboa wɔ yeamaa wɔabua ɛbɛlabɔlɛ nu kpuya mɔɔ hyia le kɛ:

Ɛhye mɔ le ɛdendɛlɛ mɔɔ yɛtie wɔ yɛ dapɛne awieleɛ ayia ne mɔ abo la anu ekyi edwɛkɛtile:

Deɛ Mɔɔ Ɔti Ɛkola Ɛdie Baebolo Ne Ɛdi La?
Nienwu A Ɛbanyia Moalɛ Wɔ Ngyegyelɛ Mekɛ Nu A?
Duzu A Nyamenle Belemgbunlililɛ Ne Ɛlɛyɛ Amaa Yɛ Ɛnɛ A.

“Me gɔnwo sukulu kakula ko rale yɛ ayia ne mɔ ko. Ɔ nee yɛ abusua ne dɛnlanle yemɔti yɛmaanle ɔnleanle yɛ mbuluku ne mɔ anu bie. Yɛkpɔnenle la, ɔhanle ɔhilele me kɛ ɔ nye liele kpalɛ wɔ mekɛ mɔɔ ɔnwunle kɛ menli ɛlɛmaa bɛ sa zo adendɛ wɔ tievolɛma adawubɔlɛ foa ne anu la. Eza ɔhanle kɛ, wɔ ye asɔne ne anu, bɛnlɛ ninyɛne mɔɔ bɛfa bɛsukoa debie kɛ yɛ ɛdeɛ ne la.”—Brenda.

Ɛze ɔ? Ɛkola ɛtɛnla ebia biala azo wɔ Belemgbunlililɛ Asalo ɛkɛ yɛɛ bɛnlie collection.

Agɔnwolɛma mɔɔ ɛbanyia bɛ la bamaa wɔ anwosesebɛ. Baebolo ne ka kɛ, deɛmɔti ɔwɔ kɛ Kilisienema yia nu la anu ko a le kɛ ‘yɛmaa yɛ nwo anwosesebɛ.’ (Hibuluma 10:24, 25) Wɔ ewiade mɔɔ angomedi ɛyi nu la anu, saa yɛyia agɔnwolɛma mɔɔ bɛfa Nyamenle bɛdimoa bɛ ɛbɛlabɔlɛ nu a, ɔmaa yɛ nye die.

“Aleɛ kadwo la, ɛnee mevɛ yɛɛ nyane ɛha me, noko menli mɔɔ meyia bɛ wɔ Belemgbunlililɛ Asalo ɛkɛ la maa menyia ahomeka. Saa yɛkpɔne ayia ne na melɛkɔ sua nu a, ɛnee me nye ɛlie na menyia anwosesebɛ fofolɛ.”—Elisa.

Ɛze ɔ? Gyihova Alasevolɛ asafo mɔɔ wɔ ewiade amuala la bo 120,000, na bɛyia ɛleka ngakyile mɔɔ bo 60,000. Ɛkyehyɛ nu a, ɛvolɛ biala, bɛsi Belemgbunlililɛ Asalo kɛyɛ 1,500 ɔluakɛ dahuu menli dodo mɔɔ kɔ ɛkɛ la kɔ ɔ nyunlu.a

Mɔɔ ɛ tipɛnema ka la

“Mekɛ mɔɔ mekɔ sukulu la, me gɔnwo sukulu kakula bie nee me hɔle yɛ ayia ne mɔ fane dɔɔnwo. Mekɛ mɔɔ ɔnwunle kɛzi Baebolo sukoavoma ngakyile mɔɔ asolo biala ɛvolɛ ɛbɔ nu ɛlɛsukoa debie, ɔhanle ye ahonle. Kenle nsa ye ala, me gyima nu kpanyinli ko rale bie na ɔ nye liele kɛzi yɛfa Baebolo ne yɛdi gyima la anwo. Kɛzi ɔhilele ayia ne anwo anyezɔlɛ la ɛmaa medame noko me nye ɛlie kpole!”—Jessica.

“Menwu ye kɛ ayia ne mɔ maa me ngyegyelɛ nee me adwenleadwenle zo te. Yɛsukoa kɛzi yɛ nye balie wɔ ɛbɛlabɔlɛ nu, kɛ ɔkɛyɛ na yɛayɛ sonlakpalɛ nee dɔɔnwo mɔɔ boka nwo la. Dahuu mekavi Belemgbunlililɛ Asalo ɛkɛ la ɛnee menyia anwosesebɛ na me nwo ɛdɔ me.”—Timothy.

“Nrenyia bie mɔɔ bɛdole ɛsalɛ bɛvɛlɛle ye wɔ ayia ne abo la hanle ye wɔ mekɛ mɔɔ bɛkpɔne la kɛ: ‘Ɛnee mekulo kɛ mekɔkpondɛ debie megyinla zo mesu bɛ diedi ne anwo kpolera. Noko menwunle kɛ me diedi ɛdeɛ ne a ɛnle kpalɛ a!’ Eza ɔ nye liele agɔnwolɛvalɛ kɛnlɛma mɔɔ wɔ Gyihova Alasevolɛ avinli la. Ɔhanle kɛ: ‘Ɔwɔ nu kɛ ɛnɛ ala a meyia bɛ a, noko bɛyɛ me kɛ asɛɛ bɛze me dɛba!’”—Jacob.

“Ɔdwu mekɛ ne bie a, meka kɛ, ‘Bɛkpɔne ala a, mebahɔ sua nu.’ Noko debiezukoalɛ ne ɛlɛkɔ zo a, ɛnee nganeɛdelɛ zɔhane ɛminli. Saa bɛkpɔne ayia ne a, ɛnee me nee menli ɛlɛbɔ adawu, mennwu deɛmɔti mɔɔ mendele nganeɛ zɔhane bɔbɔ a. Saa tɛ ayia ɛhye mɔ a, anrɛɛ menlɛ agɔnwolɛma kpalɛ zɛhae mɔ.”—Madison.

a Saa ɛkpondɛ ɛleka mɔɔ bɛyia nu la a, kɔ “Gyihova Alasevolɛ Debiezukoalɛ Ne Mɔ” foa ne na tinli “Kpondɛ Ɛleka Mɔɔ Bikye Wɔ” azo.