MGBAVOLƐ NEE MBƐLƐRA BIZA KƐ
Saa Me Gɔnwo Bie Maa Medi Nyane A Duzu A Mebayɛ A?
Mɔɔ ɔwɔ kɛ ɛnwu ye la
Agɔnwolɛvalɛ biala ɛnle ɛkɛ mɔɔ ngyegyelɛ ɛnle nu a. Ɔluakɛ ɛ gɔnwo mɔ ɛnli munli la ati, nuhua ne mɔɔ ɛnwu ye kɛ ɔle ɛ gɔnwo kpalɛ bɔbɔ la bahola ayɛ debie anzɛɛ aha edwɛkɛ mɔɔ bamaa wɔali nyane a. Nɔhalɛ nu, ɛdawɔ noko ɛnli munli. Ɔti, ɛkakye mekɛ mɔɔ ɛdawɔ noko ɛyɛle awie ɛtane la ɔ?—Gyemise 3:2.
Yintanɛte ne bahola amaa wɔali awie anwo nyane ndɛndɛ. Kɛ neazo la, kpavolɛ bie mɔɔ bɛfɛlɛ ye David la ka kɛ: “Saa ɛnwu nvoninli mɔɔ fale ɛ gɔnwo bie mɔɔ nee awie mɔ ɛhɔlie bɛ nye la wɔ yintanɛte ne azo a, bie ɛbadwenle deɛmɔti yeavɛlɛ wɔ la anwo. Akee ɛbahola wɔade nganeɛ kɛ ye ye wɔ yemaa na ɛ rɛle abɔ.”
Ɛbahola wɔazukoa kɛ ɛbali ngyegyelɛ ne anwo gyima.
Mɔɔ ɛbahola wɔayɛ la
Neɛnlea wɔ nu. Baebolo ne ka kɛ: “Mmafa ɛya ndɛndɛ, ɔluakɛ koasea a fa ɛya sie ye nu a.”—Nolobɔvo ne 7:9.
“Ɔdwu mekɛ ne bie a ɛnwu ye kɛ mɔɔ ɛlɛdi nwolɛ nyane la ɛnle debie mɔɔ anwo hyia biala a.”—Alyssa.
Dwenle ɛhye anwo: Asoo ɛmaa ninyɛne gyegye wɔ somaa ɔ? Asoo ɛbahola wɔanyia awie mɔ sinlidɔlɛ nwo adwenle kpalɛ?—Nolobɔvo ne 7:21, 22.
Suzu nvasoɛ mɔɔ wɔ ɛtane fakyɛ zo la anwo. Baebolo ne ka kɛ: ‘Ɔle anyunlunyia . . . kɛ ɛkɛbu ɛ nye ɛkɛgua nvonleɛ zo.’—Mrɛlɛbulɛ 19:11.
“Saa wɔ edwɛkɛ yɛ fɛ bɔbɔ a, ɔle kpalɛ kɛ ɛbava ɛtane wɔahyɛ bɔkɔɔ, ɛhye kile kɛ ɔnle kɛ ɛkɔ zo ɛkakye ahenle nvonleɛ ne na ɛmaa ɔkpa nwolɛ kyɛlɛ mekɛ ko biala mɔɔ ɛbaha nwolɛ edwɛkɛ la. Saa ɛfa awie ɛtane ɛkyɛ ye a, mmaka nwolɛ edwɛkɛ bieko.”—Mallory.
Dwenle ɛhye anwo: Asoo amgba edwɛkɛ ne anwo hyia kpalɛ? Asoo ɛbahola wɔava wɔahyɛ amaa anzodwolɛ ara?—Kɔlɔsaema 3:13.
Saa ɛta ɛka edwɛkɛ bie mɔɔ ɛzi la anwo edwɛkɛ a, ɔbayɛ kɛ asɛɛ wɔbuke sua bie anlenkɛ na anwoma weɛlɛkɔkɔ ɛlɛba nu la
Dwenle awie mɔ anwo. Baebolo ne ka kɛ: “Bɛmmadwenle bɛ ngomekye bɛ boɛyɛlɛ nwo, emomu bɛdwenle awie mɔ noko ɛdeɛ nwo.”—Felepaema 2:4.
“Saa ɛlɔlɛ nee ɛbulɛ wɔ agɔnwolɛvalɛ nu a, ɔmaa ɛdi ngyegyelɛ nwo gyima ndɛndɛ ɔluakɛ ɛyɛle gyima ɛsesebɛ na wɔahola wɔava ahenle ne agɔnwolɛ. Wɔyɛ gyima ɛsesebɛ na ɛngulo kɛ ɛsɛkye ye.”—Nicole.
Dwenle ɛhye anwo: Asoo ɛbahola wɔanwu debie kpalɛ bie wɔ edwɛkɛ mɔɔ ɛ gɔnwo ne ɛlɛka la anu ɔ?—Felepaema 2:3.
Nɔhalɛ edwɛkɛ: Saa ɛnwu kɛzi ɛbali nyanelilɛ nwo gyima a, ɔbaboa wɔ wɔ mekɛ mɔɔ wɔyɛ kpanyinli la. Duzu ati a ɛnzukoa ye ɛyɛlɛ kɛkala a?