Kɛzi Gyihova Alasevolɛ Yɛ Menli Mɔɔ Bɛ Nee Bɛ Ɛnzonle Bieko La Ɛ?

Yɛbɔ mɔdenle biala yɛkulo menli kɔsɔɔti, yɛda atiakunlukɛnlɛma ali yɛkile bɛ na yɛbu bɛ. Saa mɔdenle mɔɔ Gyihova Dasevolɛ bie ɛlɛbɔ wɔ ye ɛzonlenlɛ nu la ka aze anzɛɛ ɔgyakyi ɛzonlenlɛ ne a, yɛkpondɛ ye, yɛmaa ɔnwu kɛ yɛkulo ye na yɛmaa ɔsia ɔba.—Luku 15:4-7.

Ɔdwu mekɛ ne bie a, debie mɔɔ awie bayɛ la bahola amaa bɛaye ye bɛavi asafo ne anu. (1 Kɔlentema 5:13) Noko kɛmɔ yɛkulo yɛ mediema diedima la ati, yɛbɔ mɔdenle yɛboa ahenle amaa bɛanye ye bɛanvi asafo ne anu. Na saa bɛye ye bɛfi asafo ne anu bɔbɔ a, yɛkɔ zo yɛkulo ye na yɛbu ye kɛ mɔɔ Baebolo ne se yɛyɛ la.—Maake 12:31; 1 Pita 2:17.

Duzu a maa bɛye awie bɛfi asafo ne anu a?

Baebolo ne ka ye wienyi kɛ saa awie yɛ ɛtane kpole bie na yeannu ɔ nwo a, ɔwɔ kɛ bɛye ye bɛfi asafo ne anu.a (1 Kɔlentema 5:11-13) Baebolo ne maa yɛnwu ɛtane kpole mɔɔ awie yɛ a bɛkola bɛye ye bɛfi asafo ne anu la. Neazo bie mɔ a le agyalɛzɛkyelɛ, nzabolɛ, kodiawu, awie mɔɔ yɛ ye sua nu amra amumuyɛ yɛɛ awule.—1 Kɔlentema 6:9, 10; Galeehyeama 5:19-21; 1 Timote 1:9, 10.

Noko, yɛnye awie mɔɔ kɛyɛ ɛtane kpole la yɛnvi asafo ne anu ɛkɛ ne ala. Asafo nu mgbanyimab dimoa bɔ mɔdenle kɛ bɛbaboa ye bɛamaa yeahakyi ye subane. (Wulomuma 2:4) Bɛbɔ mɔdenle biala bɛda mɛlɛbɛnwoaze, bɛtɛɛyɛlɛ nee atiakunlukɛnlɛma ali bɛfa bɛboa ahenle. (Galeehyeama 6:1) Bie a ɛhye bamaa ɛtanevolɛ ne anye ara ɔ nwo zo na yeanlu ɔ nwo. (2 Timote 2:24-26) Noko, saa bɛyɛ ɛhye mɔ amuala na ahenle kɔ zo yɛ debie mɔɔ Baebolo ne se ɔnle kpalɛ la na yeannu ɔ nwo a, bɛye ye bɛfi asafo ne anu. Mgbanyima ne mɔ bɔ ye nolo sikalɛ wɔ asafo ne anu kɛ ahenle ɛnle Gyihova Dasevolɛ bieko.

Asafo mgbanyima nwiɔ ɛlɛfa Baebolo nu edwɛkɛ awula kpavolɛ bie anwosesebɛ. Ko ɛva ɔ sa ɛdo kpavolɛ ne abati ɔ nee ye ɛlɛtendɛ. — Mgbanyima ne mɔ bɔ mɔdenle da mɛlɛbɛnwoaze, bɛtɛɛyɛlɛ nee atiakunlukɛnlɛma ali bɛfa bɛboa ɛtanevolɛ ne

Saa bɛye awie mɔɔ kɔ zo yɛ ɛtane la bɛfi asafo ne anu a, kɛzi ɔboa ɛ? Ɔmaa asafo ne fa Nyamenle ɛbɛlabɔlɛ kpalɛ nwo ngyinlazo ne mɔ yɛ gyima yɛɛ ɔbɔ menli mɔɔ wɔ nu la anwo bane ɔfi ahenle subane ɛtane ne anwo. (1 Kɔlentema 5:6; 15:33; 1 Pita 1:16) Eza bie a ɔbaha ɛtanevolɛ ne yeamaa yeagyakyi ye ɛtane ne na yeayɛ nzenzaleɛ.—Hibuluma 12:11.

Kɛzi Gyihova Alasevolɛ yɛ menli mɔɔ bɛye bɛ bɛvi asafo ne anu la ɛ?

Baebolo ne ka kɛ Kilisienema nee awie mɔɔ bɛye ye bɛvi asafo ne anu la “mmatu” yɛɛ “bɛ nee sonla zɛhae mmadi debie bɔbɔ.” (1 Kɔlentema 5:11) Ɔti yɛ nee awie mɔɔ bɛye ye bɛvi asafo ne anu la ɛndu. Noko ɔngile kɛ yɛkpo ye bɔkɔɔ. Yɛbu ye. Ɔbahola yeara yɛ debiezukoalɛ ne mɔ bie, yɛɛ ɔba a, Gyihova Alasevolɛ mɔɔ wɔ ɛkɛ ne la bahola abiza ye ahye.c Eza ɔbahola yeaha yeahile mgbanyima ne mɔ kɛ bɛboa ye bɛmaa ɔzia ɔrɛla asafo ne anu bieko.

Agyalɛma bie ɛlɛsoma raalɛ bie mɔɔ bɛyele ye bɛvile asafo ne anu na yezia yera la wɔ Belemgbunlililɛ Asalo ɛkɛ. — Menli mɔɔ bɛye bɛ bɛvi asafo ne anu la kola ba yɛ debiezukoalɛ ne mɔ bie

Na awie mɔɔ bɛye ye bɛvi asafo ne anu noko ɔ hu anzɛɛ ɔ ye nee ɔ mra le mediema ɛ? Ɔnrɛhola ɔ nee bɛ ɛnrɛbɔ nu ɛnrɛzonle ɛdeɛ, noko bɛle ye mbusuafoɔ. Kɛmɔ bɛ muala a bɛde la ati, kunli ne anzɛɛ yelɛ ne boka abusua ne anwo na ɔwɔ kɛ bɛ muala bɛbɔ nu bɛtɛnla wɔ ɛlɔlɛ nu.

Awie mɔɔ bɛye ye bɛvi asafo ne anu la bahola aha ahile mgbanyima ne mɔ kɛ bɛrakpɔla ye, mgbanyima ne mɔ bagyinla Ngɛlɛlera ne azo adu ye folɛ na bɛamaa ye anwosesebɛ kɛ ɔnlu ɔ nwo na ɔzia ɔrɛla Nyamenle ɛkɛ. (Zɛkalaya 1:3) Saa ɔgyakyi ye ɛtane ne na ye nyɛleɛ kile kɛ ɔkulo kɛ ɔfa Baebolo ngyinlazo ɔbɔ ye ɛbɛla a, bie a bɛbalie ye wɔ asafo ne anu bieko. Asafo ne ‘bava ahyɛ ye bɔkɔɔ na bɛakyekye ɔ rɛle,’ kɛ mɔɔ Kilisienema mɔɔ wɔ Kɔlente la yɛle ɛtanevolɛ bie mɔɔ hakyile ye subane la.—2 Kɔlentema 2:6-8.

Kɛzi menli mɔɔ bɛyele bɛ bɛvile asafo ne anu mekɛ bie la te nganeɛ kɛkala ɛ?

Tie edwɛkɛ mɔɔ bɛdabɛ mɔɔ bɛyele bɛ bɛvile asafo ne anu na nzinlii bɛziale bɛrale Nyamenle ɛkɛ la bie mɔ ɛha la.

“Mɔɔ menzile kpɔkɛ kɛ mesia meara asafo ne anu la, ɛnee meze kɛ mgbanyima ne mɔ bamaa meaha debie biala mɔɔ menyɛle wɔ mekɛ mɔɔ bɛyele me la. Noko mɔɔ bɛhanle la ala a le kɛ, ‘Yɛkulo kɛ ɛfa wɔ adwenle ɛsie mɔɔ la ɛ nyunlu la azo.’ Mɔɔ bɛhanle la maanle me ahonle dɔle me azule nu.”—Maria, United States.

“Ɛnee asafo ne anu amra anye la kɛ mebazia meara. Bɛmaanle mendele nganeɛ kɛ nvasoɛ wɔ me nwo zo. Mediema ne mɔ boale me maanle mendele nganeɛ kɛ bɛva me ɛtane bɛhyɛ me na yemɔ boale me maanle menvale me adwenle menziele mɔɔ la me nyunlu la azo. Mgbanyima ne mɔ boale me dahuu bɛmaanle menyianle anwosesebɛ. Bɛkyekyele me rɛle na bɛboale me bɛmaanle menwunle kɛ Gyihova kulo me yɛɛ mesonle bolɛ memaa ye.”—Malcom, Sierra Leone.

“Ɔyɛ me fɛ kɛ Gyihova kulo ye menli kpole la ati ɔnea kɛ bɛbamaa ye ahyehyɛdeɛ ne anwo ade la. Menli mɔɔ bɛnle Alasevolɛ la bu awie mɔɔ bɛye ye bɛfi asafo ne anu la kɛ ɔkile atisesebɛ noko nwolɛ hyia yɛɛ ɔkile ɛlɔlɛ. Ɔyɛ me fɛ kɛ yɛ anwuma Selɛ ne lɛ ɛlɔlɛ yɛɛ ɔfa ɛtane ɔkyɛ la.”—Sandi, United States.

Edwɛkɛ mɔɔ lɔyama mɔɔ bɛnle Gyihova Alasevolɛ ɛha la

Edwɛkɛ boni a kɔɔto ngakyile nee lɔyama ɛha wɔ ɛtanevolɛma mɔɔ bɛnnu bɛ nwo mɔɔ Gyihova Alasevolɛ ye bɛ fi bɛ asafo ne mɔ anu la anwo a? Yɛ edwɛkɛ mɔɔ doa zo la nzonlɛ.

“Yɛ nye la kɛ ɛzonlenlɛ mɔɔ di Baebolo adehilelɛ zo na bɛbɔ mɔdenle bɛfa bɛbɔ ɛbɛla la bahola [aye ɛtanevolɛ bie avi bɛ avinli, saa ɔfɛta a]. Bɛyɛ ɛhye a ɔfɛta yɛɛ nwolɛ hyia, ɔluakɛ saa awie ɛngulo kɛ ɔfa Baebolo ngyinlazo ɔbɔ ye ɛbɛla a, ɛnee ɔnfɛta kɛ ɔboka bɛ nwo. Eza saa bɛanye ye bɛanvi nu a, bie a menli mɔɔ ɛha la bazukoa ye nyɛleɛ ɛtane ne.”—The High Court of Justice, England and Wales, June 7, 2019.
“Kɔɔto ngakyile mɔɔ wɔ Europe nee ɛleka gyɛne la ɛlie ɛdo nu kɛ fanwodi mɔɔ Gyihova Alasevolɛ lɛ kɛ bɛkola bɛdua mɛla adenle zo bɛsonle la maa bɛ adenle maa bɛkola bɛye awie bɛfi bɛ asafo ne anu . . . yɛɛ kɔɔto ngakyile ne mɔ ɛnlɛ tumi kɛ bɛfa bɛ nloa bɛwulowula bɛ edwɛkɛ nu.”—Professor Paulo Pinto de Albuquerque, ɛnee ɔle ndɛnebuavolɛ wɔ European Court of Human Rights.

a Dɛba ne, ɛnee yɛka kɛ bɛtu ɛtanevolɛ mɔɔ ɔnnu ɔ nwo la bɛfi asafo ne anu. Noko kɛkala yɛka kɛ bɛye ye bɛfi asafo ne anu kɛ mɔɔ ɔwɔ Baebolo ne anu la.

b Mgbanyima ne mɔ le Kilisiene mrenyia nɔhavoma mɔɔ bɛlɛ anwubielɛ mɔɔ bɛdua Ngɛlɛlera ne azo bɛkilehile na bɛnea Gyihova menli ne, bɛboa bɛ na bɛmaa bɛ anwosesebɛ la. Bɛndua bɛ kakɛ wɔ gyima mɔɔ bɛyɛ la anwo.—1 Pita 5:1-3.

c Ɔdwu mekɛ ne bie a, a awie mɔɔ kɛvi asafo ne anu la bɔ mɔdenle kɛ ɔsɛkye asafo ne duma anzɛɛ ɔdi menli mɔɔ wɔ nu la adwenle yeamaa bayɛ ɛtane. Saa ɔba ye zɔ a, yɛtie mɔɔ Baebolo ne ka la na ‘yɛmbiza sonla zɛhae bɔbɔ ahye.’—2 Dwɔn 9-11.