Basabasayɛlɛ Ɛmmaa Ngyegyelɛ Bo Ɛmpɛ

Ɛnɛ menli dɔɔnwo die di kɛ basabasayɛlɛ bamaa ngyegyelɛ nee konle konle bo apɛ. Noko mɔɔ Gyisɛse hanle nee mɔɔ ɔyɛle la le ngakyile fi adwenle ɛhye mɔɔ bɛla la anwo. Dwenle edwɛkɛ mɔɔ ɔhanle nee ninyɛne mɔɔ ɔyɛle la bie mɔ anwo nea.

Mɔɔ Gyisɛse hanle la

Wɔ Gyisɛse Boka Zo Ɛdendɛlɛ Ne anu, ɔhilehilele kɛ ɛyavalɛ nee basabasayɛlɛ ɛnrɛhola ɛnrɛmaa akɛsakɛsa bo ɛnrɛpɛ. Suzu neazo ekyi anwo nea.

• “Debie biala mɔɔ bɛkulo kɛ menli yɛ maa bɛ la, bɛdabɛ noko bɛyɛ ye zɔhane ala bɛmaa bɛ.” (Mateyu 7:12; Luku 6:31) Edwɛkɛ ɛhye mɔɔ bɛfɛlɛ ye Mɛla Kpalɛ Nea la maa yɛ anwosesebɛ kɛ yɛ nee awie mɔɔ ɛli kɛ mɔɔ yɛkulo kɛ bɛ nee yɛ di la. Kɛmɔ awie biala ɛngulo kɛ bɛbayɛ ye basabasa la ati, asoo ɔnle kɛ yɛbu menli kɔsɔɔti na yɛda atiakunlukɛnlɛma ali yɛkile bɛ​—saa bɔbɔ yɛ nee bɛ ɛnyɛ adwenle a?

• “Awie biala mɔɔ kɛbɔ ɛ nzo fema ne anu la, kakyi ko ne noko maa ye.” (Mateyu 5:38, 39; Luku 6:29) Tɛ mɔɔ ɛnee Gyisɛse ɛlɛkile la a le kɛ yɛmaa awie mɔ ɛyɛ yɛ amumuyɛ. Emomu, ɛnee ɔkulo kɛ ɔtenrɛ adwenle mɔɔ ɛzonlenlɛ nu mgbanyima bie mɔ lɛ kɛ ɔle kpalɛ kɛ awie bava ɛtane adua ɛtane kakɛ la. Ɔhilehilele ye ɛdoavolɛma ne kɛ bɛmmafa ɛtane bɛtua ɛtane kakɛ, emomu, saa awie ka bɛ ɛya a bɛ nee ye ɛli ye kɛnlɛma.b

• “Bɛhɔ zo bɛhulo bɛ kpɔvolɛma.” (Mateyu 5:43, 44; Luku 6:27) Gyisɛse hanle kɛ yɛhulo yɛ kpɔvolɛma na yɛyɛ kpalɛ yɛmaa bɛ. Ɛnee tɛ mɔɔ ɔlɛkile a le kɛ yɛsosɔ ninyɛne mɔɔ ɛnle kpalɛ mɔɔ bɛyɛ la azo.c Noko saa yɛyɛ kpalɛ yɛmaa yɛ kpɔvolɛma a, bie a ɔbamaa bɛ ɛya nee aha aze na bɛ nee yɛ ali ye kɛnlɛma.

Mɔɔ Gyisɛse yɛle nee mɔɔ ɔbayɛ la

Gyisɛse hanle kɛ tɛ basabasayɛlɛ a maa ngyegyelɛ bo pɛ a​—na ɔvale mɔɔ ɔhanle la ɔyɛle gyima. Nɔe ne mɔɔ bɛhyele Gyisɛse la, ye ɛdoavolɛ ne mɔ ko hwenle dadeɛ kɛ ɔfa yeabɔ Gyisɛse anwo bane noko Gyisɛse hanle kɛ: “Sia fa wɔ dadeɛ ne wula ɔbo zo ne, ɔluakɛ bɛdabɛ mɔɔ bɛtwe dadeɛ la kɔsɔɔti bawu dadeɛ nloa.” (Mateyu 26:52) Gyisɛse hulole ye kpɔvolɛma ɔluakɛ ɔvale menli mɔɔ bɛ nee ye anli ye boɛ la bɔbɔ ɛtane ɔhyɛle bɛ!​—Luku 23:33, 34; 1 Pita 2:23.

Baebolo ne ka kɛ Gyisɛse mɔɔ le Anzodwolɛ Belemgbunli ne la bamaa basabasayɛlɛ kɔsɔɔti ara awieleɛ. (Ayezaya 9:6, 7) Saa ɛkulo kɛ ɛsukoa kenle bie mɔɔ yɛ anyelielɛ zɛhae la anwo ninyɛne dɔɔnwo a kenga edwɛkɛ “How War and Violent Conflict Will End.”