Nyamenle Edwɛkɛ​— Anyelazo Maa Tutanema!

Ɛvolɛ biala, menli mgbe dɔɔnwo nriandi fi bɛ sua zo. Edwɛkɛ ɛhye mɔɔ yɛ nyane la bie ɛdo wɔ ɔ? Saa bie ɛdo wɔ a, nyia anwodozo kɛ awie wɔ ɛkɛ mɔɔ ɔbahola yeaboa wɔ a​—Nyamenle ɛmaa yɛnyia anyelazo kɛ ninyɛne bayɛ boɛ, na ɛbahola wɔazukoa nwolɛ debie wɔ Ngɛlɛlera Nwuanzanwuanza ne anu.

Christos Stylianides mɔɔ le European Union kpanyinli laa ka kɛ,“Tutanema nee menli mɔɔ bɛdu bɛvi bɛ sua zo la hyia moalɛ ndɛndɛ yɛɛ eza . . . ɔhyia kɛ bɛnyia anyelazo.”b Menli mɔɔ lɛ anyelazo la ze kɛ ninyɛne bayɛ boɛ kenle bie. Eza tutanema hyia arɛlekyekyelɛ amaa bahola bɛagyinla bɛ ngyegyelɛ ne anloa.

“Mekɛ mɔɔ menriandile menvile me sua zo mengyakyile me abusua ne la, mendele nganeɛ kɛ meminli debie kpole bie. Me ahonle dule, me rɛle bɔle yɛɛ adwenleadwenle dɔle me nwo.”​—Emmanuel, Haiti.

Asoo kɛ ɛdawɔ noko ɛte nganeɛ la ɛne? Saa wɔnriandi wɔvi wɔ sua zo a, ɛhyia awie mɔɔ bakyekye ɛ rɛle na yeamaa wɔanyia anyelazo la. Kɛzi Nyamenle Edwɛkɛ, Baebolo ne bahola aboa wɔ ɛ?

Arɛlekyekyelɛ edwɛkɛ mɔɔ wɔ Baebolo ne anu la

Baebolo ne ka kɛ: ‘Gyihovac kulo ɛyɛvolɛ.’​— Ditilɔnomi 10:17, 18.

Baebolo ne ka kɛ: “Gyihova bikye bɛdabɛ mɔɔ bɛfɛlɛ ye la kɔsɔɔti.”​—Edwɛne 145:18.

Baebolo ne ka kɛ: “Ɔnrɛra ye ɛlɛ kɛ nɔhalɛ Nyamenle ne kɛyɛ amumuyɛ . . . Tumivolɛ Bedevinli ne ɛngakyi pɛlepɛlelilɛ nye.”​—Dwobu 34:10, 12.

Ɛhye kile kɛ tɛ Nyamenle a maa ɛnwu amaneɛ a. Ɔndwe ɛ nzo yɛɛ ɔmmaa ɛbɛlabɔlɛ ne ɛnyɛ se kɛ ɔfa yeazɔ wɔ yeanlea.

Anyelazo edwɛkɛ mɔɔ wɔ Baebolo ne anu la

Baebolo ne maa yɛnwu mɔɔ Nyamenle bayɛ amaa yɛ kenle bie la. Nea kɛzi anyelazo ɛhye ɛlɛboa menli mɔɔ bɛnriandi bɛvi bɛ sua zo la.

Baebolo ne ka kɛ: “[Nyamenle bakyikyi] bɛ nye anwo monle kɔsɔɔti, na ewule ɛnle ɛkɛ bieko, yɛɛ alɔbɔlɛ nee ɛzunlɛ nee nyane ɛnle ɛkɛ bieko.”​—Yekile 21:4.

Ɛhye kile kɛ yɛnrɛnwu amaneɛ bieko. Nyamenle ɛbɔ ɛwɔkɛ kɛ ɔbaye ngyegyelɛ kɔsɔɔti mɔɔ ɔmmaa yɛnnyia anyelazo la yeavi ɛkɛ.

“Ɔnrɛhyɛ Nyamenle bamaa nzisi nee amumuyɛyɛlɛ mɔɔ kɔ zo la avi ɛkɛ. Anyelazo ɛhye boa me maa mefa me adwenle mesie mekɛ mɔɔ amaneɛnwunlɛ kɔsɔɔti bavi ɛkɛ la azo.”​—Karla, El Salvador.

Baebolo ne ka kɛ: “Bɛnrɛhakye ninyɛne dɛba ne mɔ yɛɛ bɛnrɛra ahonle nu bieko.”​—Ayezaya 65:17.

Ɛhye kile kɛ yɛnrɛhakye ninyɛne mɔɔ maa yɛdi nyane la bieko. Nyamenle banlea kɛ ninyɛne mɔɔ maa ɛdi nyane la ɛnrɛgyegye wɔ bieko.

“Baebolo ne bɔ ɛwɔkɛ kɛ yɛnrɛhakye ninyɛne mɔɔ ɛnee ɔmaa yɛdi nyane na yɛnwu amaneɛ la. Anyelazo zɛhae maa megyinla me tɛnlabelɛ ɛsesebɛ ɛhye anloa ɔluakɛ meze kɛ ɔnrɛhyɛ debie biala bayɛ boɛ.”​—Natalia, Ukraine.

Baebolo ne ka kɛ: “Anwuma Nyamenle ne bava belemgbunlililɛ bie azie ɛkɛ. . . . Ɔbabubu arelemgbunlililɛ ɛhye mɔ amuala na yeabɔ bɛ bo zo.”​—Daneɛle 2:44.

Ɛhye kile kɛ anwuma arane mɔɔ di munli la bali tumi wɔ azɛlɛ ye azo amuala. Ɔnrɛhyɛ Nyamenle bazɛkye sonla arane kɔsɔɔti na yeava anwuma arane bie yeazie ɛkɛ. Arane ɛhye bamaa nɔhalɛ anzodwolɛ nee banebɔlɛ ara, bɛnrɛsisi awie yɛɛ awie biala ɛnrɛli ehyia.​—Maeka 4:3, 4.

“Saa menwu kɛ ngyegyelɛ le kɛ nzisi, nyeyenu nee menli nwo adwenletane bavi ɛkɛ a, ɔmaa me anwosesebɛ​—ɔnrɛhyɛ Gyihova Belemgbunlililɛ ne baye ɛhye mɔ amuala avi ɛkɛ”​—Mustafa, Middle East.

Nrɛlɛbɛ edwɛkɛ mɔɔ wɔ Baebolo ne anu la

Nrɛlɛbɛ edwɛkɛ mɔɔ wɔ Baebolo ne anu la baboa wɔ yeamaa wɔagyinla mɔɔ ɛdo wɔ la anloa. Eza ɔbamaa wɔagyinla wɔ tɛnlabelɛ ne mɔɔ ɛhakyi, mɔɔ bie a le wɔ ninyɛne mɔɔ ɛvi ɛ sa la anloa. Nea kɛzi ngyinlazo ɛhye mɔ ɛlɛboa tutanema la:

Baebolo ne ka kɛ: “Saa sonla nyia ɔ nwo bɔbɔ a, ye ninyɛne ne ɛnrɛhola ɛnrɛmaa ye ngoane.”​—Luku 12:15.

Kɛzi nrɛlɛbɛ edwɛkɛ ɛhye baboa wɔ kpalɛ la: Bie a mɔɔ ɛdo wɔ la ɛzi ɛ nwo yɛɛ yemaa ɛ rɛle ɛbɔ. Noko, saa ɛgyinla na ɛsuzu kɛzi wɔ ngoane sonle bolɛ la anwo a, ɔbaboa wɔ yeamaa wɔanyia ninyɛne mɔɔ ɛvi ɛ sa la anwo adwenle kpalɛ.

“Ngoane sonle bolɛ tɛla nwonane afoa nu ninyɛne. Ɔdwu mekɛ ne bie a, anwonyia anzɛɛ ezukoa ɛngola ɛmboa wɔ.”​—Natalia, Ukraine.

Baebolo ne ka kɛ: “Mmaka kɛ, ‘Duzu ati a mekɛ mɔɔ ɛze ɛhɔ la le kpalɛ tɛla ɛnɛ a.’”​—Nolobɔvo 7:10.

Kɛzi nrɛlɛbɛ edwɛkɛ ɛhye baboa wɔ kpalɛ la: Bie a tɛnlabelɛ mɔɔ ɛwɔ nu kɛkala la yɛ se kpalɛ, noko saa wɔanva wɔantoto dɛba ne anwo a ɔnrɛmaa ɛnrɛva ɛya.

“Saa medie tɛnlabelɛ mɔɔ mewɔ nu kɛkala la meto nu a, ɔboa me.”​—Eli, Rwanda.

Baebolo ne ka kɛ: “Saa yɛlɛ aleɛ nee adɛladeɛ a, yɛbamaa yɛ kunlu adwo ɛhye mɔ anwo.”​—1 Timote 6:8.

Kɛzi nrɛlɛbɛ edwɛkɛ ɛhye baboa wɔ kpalɛ la: Maa ɛ kunlu ɛdwo ninyɛne mɔɔ hyia mɔɔ ɛlɛ la anwo. Saa ɛmaa ɛ kunlu dwo nwolɛ a, ɔnrɛmaa adwenleadwenle ɛnrɛdɔ ɛ nwo.

“Baebolo ne ɛboa me yemaa menyia adwenle kpalɛ wɔ ninyɛne bie mɔ anwo, menva me adwenle menzie mɔɔ ɛvi yɛ sa la azo. Me nee me ye anye die kɛ yɛde ngoane nu na yɛlɛ banebɔlɛ la.”​—Ivan, Ukraine.

Baebolo ne ka kɛ: “Debie biala mɔɔ bɛkulo kɛ menli yɛ maa bɛ la, bɛdabɛ noko bɛyɛ ye zɔhane ala bɛmaa bɛ.”​—Mateyu 7:12.

Kɛzi nrɛlɛbɛ edwɛkɛ ɛhye baboa wɔ kpalɛ la: Saa ɛnyia abotane na ɛyɛ atiakunlukɛnlɛma a ɛbahola ɛ nee awie mɔ adɛnla anzodwolɛ nu. Saa ɛyɛ zɔ a bie a ɔbamaa menli anye alie ɛ nwo na bɛnrɛnyia ɛ nwo adwenletane.

“Saa ɛbu debie, ɛyɛ atiakunlukɛnlɛma na ɛkulo menli a ɔmaa bɛkulo wɔ edwɛkɛ. Ɛhye maa menli mɔɔ ɛ nee bɛ de la anye die ɛ nwo.”​—Angelo, Sri Lanka.

Baebolo ne ka kɛ: ‘Bɛva bɛ nzɛlɛlɛ bɛdo Nyamenle anyunlu; na Nyamenle anzodwolɛ ne babɔ bɛ ahonle nee bɛ adwenle nzuzulɛ nwo bane.’​—Felepaema 4:6, 7.

Kɛzi nrɛlɛbɛ edwɛkɛ ɛhye baboa wɔ kpalɛ la: Ka kɛzi ɛte nganeɛ, wɔ ngyianlɛ, ninyɛne mɔɔ ka wɔ ɛzulolɛ nee mɔɔ gyegye wɔ la nwo edwɛkɛ kile Nyamenle wɔ asɔneyɛlɛ nu. Asɔneyɛlɛ zɛhae bahola amaa wɔ adwenleadwenle zo ade na wɔ ngyegyelɛ ne ambo ɛ nwo zo.

“Saa melɛyia ngyegyelɛ a meka nwolɛ edwɛkɛ mekile Nyamenle na ɔtie me. Mɔɔ mezukoa mevi Baebolo ne anu la ɛmaa menyia anzodwolɛ.”​—Yol, South Sudan.

“Baebolo ne folɛdulɛ ne boa me maa menyia anzodwolɛ mɔɔ bamaa meagyinla tɛnlabelɛ ɛsesebɛ nloa la.”​—Valentina, Ukraine.

“Ɛwɔkɛ mɔɔ Gyihova Nyamenle ɛbɔ kɛ ninyɛne bayɛ kpalɛ kenle bie la kyekye me rɛle.”​—Emmanuel, Haiti

Ɛkulo kɛ ɛsukoa arɛlekyekyelɛ nee anyelazo edwɛkɛ mɔɔ wɔ Baebolo ne anu nee deɛmɔti ɛbahola wɔalie wɔali la anwo ninyɛne dɔɔnwo ɔ? Maa Gyihova Alasevolɛ ɛrakpɔla wɔ, bɛnlie ezukoa. Bɛ nye balie nwo kɛ bɛbaboa wɔ.