Milahyinli Nrɛlɛbɛ​—Ɔboa Anzɛɛ Ɔle Ngyegyelɛ?​—Duzu A Baebolo Ne Ka A?

Kenle nsa ye ewiade mgbanyima, abɔdeɛ nwo nrɛlɛbɛvolɛma yɛɛ menli mɔɔ ze adwuleso nwo debie la ɛha kɛzi milahyinli nrɛlɛbɛ anzɛɛ artificial intelligence (AI) boa la anwo edwɛkɛ dɔɔnwo. Bɛdie bɛto nu kɛ nvasoɛ wɔ zo, noko bɛsulo kɛ menli bava ali gyima wɔ adenle ɛtane zo.

• “Ɛnɛ AI a le adwuleso debie ko mɔɔ boa kpalɛ a, ɔkola ɔmaa menli ɛbɛlabɔlɛ nyia anyuhɔlɛ . . . Mekɛ ko ne ala, AI kola fa sonla nwo banebɔlɛ to esiane kpole nu, ɔtietia yɛ fanwodi zo na ɔmaa yɛ fealeranu edwɛkɛ da ali yɛɛ ɔmmaa menli ɛnnyia anwodozo wɔ menli dodo maamulɛ nu.”​—Kamala Harris, United States maanle kpanyinli boavolɛ, May 4, 2023.

• Dɔketama nee ayileyɛlɛma bie mɔɔ ɛbe mɔɔ Dr. Frederik Federspiel a li bɛ ti la hɛlɛle ye wɔ buluku bie anu kɛ, “Milahyinli nrɛlɛbɛ (AI) boa wɔ ayileyɛlɛ nu ɛdeɛ, noko ɔkola ɔsɛkye yɛ kpɔkɛdelɛ nee yɛ ɛbɛlabɔlɛ.”​—May 9, 2023, BMJ Global Health.a

• “Menli kola dua AI zo maa adalɛ edwɛkɛ salo. Ɔnrɛhyɛ ɔbahola yeazɛkye menli gyima. Menli mɔɔ ze adwuleso ninyɛne nwo gyima la bie mɔ ka kɛ ɔbahola yeayɛ ngyegyelɛ yeamaa alesama.”​—The New York Times, May 1, 2023.

Mekɛ ɛlɛkɔ la yɛbanwu ye saa AI baboa alesama anzɛɛ ɔbayɛ ngyegyelɛ yeamaa bɛ a. Duzu a Baebolo ne ka a?

Deɛmɔti alesama mɔdenlebɔlɛ nee ngyegyelɛ lua la

Baebolo ne ka deɛmɔti adwuleso ninyɛne mɔɔ alesama yɛ la kola boa yɛ anzɛɛ ɔfa ngyegyelɛ ɔba la.

1. 1. Saa menli lɛ adwenle kpalɛ bɔbɔ a bɛnrɛhola bɛnrɛnwu ngyegyelɛ mɔɔ bavi bɛ nyɛleɛ nu ara la.

   • “Adenle ne bie wɔ ɛkɛ ne a ɔle kpalɛ wɔ sonla nye zo, noko ye awieleɛ wie ewule nu.”​—Mrɛlɛbulɛ 14:12.

2. 2. Awie yɛ debie a ɔnlɛ kɛzi bɛbava bɛali gyima kpalɛ anzɛɛ gyima ɛtane la azo tumi.

   • “Ɔwɔ kɛ megyakyi [me gyima] wɔ me nzi memaa awie mɔɔ bali me nzi ara la. Na nwane a ze a, saa ɔkɛyɛ nrɛlɛbɛvolɛ anzɛɛ koasea a? Noko ɔbanlea debie biala mɔɔ mebɔ mɔdenle meva me nrɛlɛbɛ mekpondɛ wɔ ewiade la azo.”​—Nolobɔvo 2:18, 19.

Ninyɛne ɛhye mɔ mɔɔ yɛnlɛ zolɛ tumi la maa yɛnwu deɛmɔti yɛhyia yɛ Bɔvolɛ ne adehilelɛ la.

Ɛleka mɔɔ yɛbanyia anwodozo yɛavi la

Yɛ Bɔvolɛ ne ɛbɔ ɛwɔkɛ kɛ ɔnrɛmaa alesama ɛnrɛlua adwuleso ninyɛne mɔɔ bɛyɛ la azo bɛnrɛzɛkye azɛlɛ ne anzɛɛ alesama.

• “Azɛlɛ ne wɔ ɛkɛ ne dahuu.”​—Nolobɔvo 1:4.

• “Tenlenema banyia azɛlɛ ne, na bɛadɛnla zolɛ dahuu.”​—Edwɛne 37:29.

Yɛ Bɔvolɛ ne ɛlua Baebolo ne azo ɛmaa yɛ adehilelɛ mɔɔ bamaa yɛanyia anzodwolɛ nee kenle bie kpalɛ la. Amaa wɔanwu mɔɔ Baebolo ne ka la anwo edwɛkɛ dɔɔnwo la, kenga edwɛkɛ “Is There a Reliable Guide to a Secure Future?” yɛɛ “Ninyɛne Bayɛ Kpalɛ Kenle Bie.”