Bɛlɛtoto Adu Bɛahu Menli Wɔ Ewiade Amuala​​—Duzu A Baebolo Ne Ka A?

Wɔ July 2022, bɛtotole adu bɛhunle menli wɔ ewiade ɛleka ngakyile:

• “Mɔɔ bɛhunle Japan maanyɛlɛnli bie mɔɔ yelie duma kpalɛ [Shinzo Abe mɔɔ ɛnee ɔle maanle ne anu kpanyinli la] ɔyɛle maanlema ne nyane na ɔzinle menli mɔɔ wɔ ewiade amuala la anwo, ɔluakɛ Japan le maanle mɔɔ basabasayɛlɛ anzo wɔ ɛkɛ yɛɛ eza bɛlɛ etu nwo mɛla mɔɔ kyekye maanlema ne a.”​—July 10, 2022, The Japan Times.

• “Menli mɔɔ wɔ Denmark la ahonle dule wɔ mekɛ mɔɔ nrenyia bie hwenle etu hunle menli nsa wɔ Copenhagen sotɔɔ kpole bie anu la.”​—July 4, 2022, Reuters.

• “South Africa: Menli bie totole adu hunle menli 15 wɔ baa bie mɔɔ wɔ Soweto la anu.”​​—July 10, 2022, The Guardian.

• “Mɔɔ bɛlɛdi July 4 holiday ne wɔ U.S. la, bɛvale etu bɛhunle menli mɔɔ bo 220.”​​—July 5, 2022, CBS News.

Asoo basabasayɛlɛ ɛhye bara awieleɛ? Duzu a Baebolo ne ka a?

Basabasayɛlɛ Bo Bapɛ

Baebolo ne ka kɛ yɛde “mekɛ mɔɔ li awieleɛ la” anu, mekɛ mɔɔ menli mɔɔ anwo yɛ ɛzulolɛ bayɛ basabasa la. (2 Timote 3:1, 3) Basabasayɛlɛ zɛhae mɔ maa ɛzulolɛ ka menli. (Luku 21:11) Noko, Baebolo ne bɔ ɛwɔkɛ kɛ basabasayɛlɛ bo bapɛ na menli “badɛnla anzodwolɛ ɛleka, tɛnlabelɛ mɔɔ banebɔlɛ nee anwodɔlɛ wɔ ɛkɛ la.” (Ayezaya 32:18) Kɛ ɔkɛyɛ na basabasayɛlɛ bo apɛ ɛ?

Nyamenle bazɛkye amumuyɛma nee bɛ akodeɛ ne amuala.

• “Na amumuyɛma ɛdeɛ, bɛbaye bɛ bɛavi azɛlɛ ye azo.”​​—Mrɛlɛbulɛ 2:22.

• Nyamenle maa “bɛgyakyi konle wɔ azɛlɛ ye kɔsɔɔti azo. Ɔbubu ɛda nu na ɔsɛkye atwɛ ne mɔ; ɔfa senle ɔyela konle ehwili ne mɔ.”​​—Edwɛne 46:9.

Nyamenle bahile menli kɛzi bɛtɛnla anzodwolɛ nu la na ɔlua zo yeaye mɔɔ ɔfa basabasayɛlɛ ɔba la yeavi ɛkɛ.

• “Bɛnrɛboda awie anzɛɛ bɛnrɛzɛkye debie wɔ me boka nwuanzanwuanza ne azo amuala, ɔluakɛ Gyihova anwo nrɛlɛbɛ bayi azɛlɛ ye tɛkɛɛ kɛ mɔɔ nzule keda nyevile zo la.”​​—Ayezaya 11:9.

• Ɛnɛ bɔbɔ, Nyamenle ɛlɛkilehile menli mɔɔ wɔ ewiade amuala la yeamaa bɛagyakyi basabasayɛlɛ nee akodeɛ mɔɔ bɛfa bɛdi gyima la, amaa bɛava “bɛ konle dadeɛ ne mɔ bɛayɛ funduazɛlɛ na bɛabolo bɛ atwɛ ne mɔ bɛayɛ ɛyazonlɛ mbulalɛ”​—Maeka 4:3.

Amaa wɔazukoa ewiade mɔɔ ɛzulolɛ ɛnle ɛkɛ mɔɔ Baebolo ne ɛbɔ nwolɛ ɛwɔkɛ anwo ninyɛne dɔɔnwo la, kenga edwɛkɛ “Freedom From Fear​​—Is It Possible?”

Kenga “Peace on Earth at Last!” amaa wɔanwu kɛ ɔkɛyɛ na bɛaye basabasayɛlɛ bɛavi ɛkɛ ne bɔkɔɔ la anwo debie.