Bɛlɛsɛkye Azɛlɛ Ne​—Duzu A Baebolo Ne Ka A?

Mɔɔ António Guterres mɔɔ le secretary-general of the United Nations ka Intergovernmental Panel on Climate Change anwo edwɛkɛ wɔ April 4, 2022 la, ɔhanle kɛ, “Alesama ɛlɛyɛ ninyɛne dɔɔnwo mɔɔ ɔnrɛhyɛ ɔbamaa esiane asisi a. Nzule bayi ava azuamgbole dɔɔnwo. Maanle nu bayɛ wuluwulu kpalɛ. Ahumu ɛzulolɛ badu ɛleka dɔɔnwo. Nzule kpalɛ nwo bayɛ se wɔ ɛleka biala. Nane nee mbaka ekpunli ngakyile dɔɔnwo abo badu. Ɛhye ɛnle nwɔra anzɛɛ edwɛkɛ mɔɔ bɛwudu nu. Ɔle edwɛkɛ mɔɔ abɔdeɛ nwo nrɛlɛbɛvolɛma ka kɛ ɔbazi saa arane ne mɔ anyɛ nzenzaleɛ wɔ kɛzi bɛfa energy (tumi mɔɔ maa yɛnyia laete nee wuluwulu) bɛdi gyima la anu a.

Mɔɔ The New York Times ka Flooding Chaos in Yellowstone, a Sign of Crises to Come anwo edwɛkɛ wɔ June 15, 2022 la, ɔhanle kɛ, “Abɔdeɛ nwo nrɛlɛbɛvolɛma ɛlɛbɔ kɔkɔ kɛ ɔnrɛhyɛ national parks asɛɛ 423 mɔɔ wɔ United States la bazɛkye ɔlua maanle nu tɛnlabelɛ mɔɔ kakyi la ati. Saa maanle nu yɛ wuluwulu kpalɛ a, ɔkola ɔsɛkye ɛleka ngɛnlɛma ɛhye mɔ mɔɔ menli kɔnea la. Esiane ɛhye mɔ mɔɔ bahola azi la le kɛ mɔɔ bie a yɛkenga wɔ Baebolo ne anu la: senle nee azuyilɛ, maanle nu mɔɔ yɛ wuluwulu, nyevile mɔɔ tu ba sua zo.”

Asoo bɛbahola bɛayɛ ninyɛne mɔɔ ɛlɛsɛkye azɛlɛ ne la boɛ ɔ? Saa ɔle zɔ a, ɛnee nwane a bayɛ bɛ boɛ a? Suzu mɔɔ Baebolo ne ka la anwo.

Bɛhanle azɛlɛ ne mɔɔ bɛbazɛkye ye la anwo edwɛkɛ bɛdole ɛkɛ

Baebolo ne ka kɛ Nyamenle ‘bazɛkye bɛdabɛ mɔɔ bɛlɛsɛkye azɛlɛ ne la.’ (Yekile 11:18) Baebolo ngyɛnu ɛhye kilehile yɛ ninyɛne nsa:

1. 1. Alesama nyɛleɛ bazɛkye azɛlɛ ne.

2. 2. Bɛnrɛzɛkye azɛlɛ ne bɔkɔɔ.

3. 3. Nyamenle a bayɛ ninyɛne mɔɔ ɛlɛsɛkye azɛlɛ ne la boɛ a, tɛ alesama ɔ.

Kenle bie kpalɛ wɔ ɛkɛ maa azɛlɛ ne

Baebolo ne ka kɛ “azɛlɛ ne wɔ ɛkɛ ne dahuu.” (Nolobɔvo 1:4) Menli badɛnla zolɛ dahuu.

• “Tenlenema banyia azɛlɛ ne, na bɛadɛnla zolɛ dahuu.”​—Edwɛne 37:29.

Bɛbayɛ debie biala mɔɔ ɛzɛkye wɔ azɛlɛ ne azo la boɛ.

• “Fienemgbole nee azɛlɛ resee anye balie, yɛɛ ɛsɛlɛ bali fɛlɛko na zolɛ ayɛ felawɔse ngome.”​—Ayezaya 35:1.