BƐHƆ ZO BƐZINZA!
Ukraine Konle Ne Ɛva Ɛhɔne Ɛra Ewiade Amuala
Wɔ May 19, 2022, Maamgbole Koyɛlɛ Banebɔlɛ Ayiama ne nyianle amaneɛbɔlɛ vile arane mgbanyima kɛyɛ 75 ɛkɛ ne kɛ “ɛhɔne mɔɔ COVID-19 ne nee maanle nu mɔɔ kakyi vale rale la akee ɛyɛ kpole kpalɛ wɔ ewiade amuala ɔlua Ukraine konle ne ati.” Eza The Economist adwelie kɛlata ne noko bɔle amaneɛ kɛ, “ngyegyelɛ dɔɔnwo wɔ ewiade ye anu dɛba ɛdeɛ, noko konle ɛhye bamaa menli dɔɔnwo ala ɛhɔne.” Baebolo ne hanle dole ɛkɛ ne kɛ ɛhɔne bara yɛ mekɛ ye azo, noko eza ɔkile yɛ mɔɔ ɔwɔ kɛ yɛyɛ na yɛagyinla ɔ nloa la.
Baebolo ne hanle kɛ ɛhɔne bara
Gyisɛse hanle dole ɛkɛ ne kɛ: ‘Maanle badwazo atia maanle yɛɛ belemgbunlililɛ badwazo atia belemgbunlililɛ, na ɛhɔne bara.’—Mateyu 24:7.
Yekile buluku ne mɔɔ wɔ Baebolo ne anu la ka sɛkɛlɛneɛ adenle zo mgbɔnwɔkavoma nna bie anwo edwɛkɛ. Bɛ nuhua ko gyi ɛkɛ maa konle. Mɔɔ doa ye la gyi ɛkɛ maa ɛhɔne, kile kɛ aleɛ nwo bayɛ se yɛɛ bɛbadɔne ye bolɛ ɛsesebɛ kpalɛ. ‘Na menwunle ye, na nea! ɛkpɔnwɔ bile bie, na ahenle mɔɔ de zo la lɛ tone wɔ ɔ sa nu. Mendele debie mɔɔ dielie kɛ ɛnelɛ la kɛ: “Hwiiti koate ko denale ko [ɔle kenle ko ahatualɛ] yɛɛ baale koate nsa denale ko [ɔle kenle ko ahatualɛ.]”’—Yekile 6:5, 6.
Yɛnwu Baebolo ngapezo mɔɔ fale ɛhɔne nwo la kɛ yera nu wɔ yɛ mekɛ ye mɔɔ Baebolo ne fɛlɛ ye “mekɛ mɔɔ li awieleɛ la anu.” (2 Timote 3:1) Saa ɛkulo kɛ ɛnwu “mekɛ mɔɔ li awieleɛ la” nee mgbɔnwɔkavoma nna ne mɔɔ Yekile buluku ne ka bɛ nwo edwɛkɛ la a, nea vidio Ewiade Ɛhakyi Ɔvi 1914 Mɔɔ Ba La na kenga edwɛkɛ “Mgbɔnwɔkavoma Nna Ne—Bɛmɛ A Le Nwane Mɔ?”
Kɛzi Baebolo ne bahola aboa yɛ la
Baebolo ne fa tɛnlabelɛ mɔɔ anu yɛ se le kɛ aleɛ mɔɔ yɛngola ye tɔ anzɛɛ ɛhɔne mɔɔ yera la anwo folɛdulɛ kpalɛ maa yɛ. Folɛdulɛ ɛhye bie wɔ edwɛkɛ “How to Live on Less” anu.
Baebolo ne eza maa yɛnyia anyelazo kɛ ninyɛne bayɛ boɛ. Ɔka kɛ mekɛ bie ɛlɛba mɔɔ “aleɛ babu azɛlɛ ne azo” na awie biala banyia aleɛ dɔɔnwo ali. (Edwɛne 72:16) Kenga edwɛkɛ “Ninyɛne Bayɛ Kpalɛ Kenle Bie” na sukoa Baebolo nu ɛwɔkɛ ngakyile ne mɔ nee deɛmɔti ɛbahola wɔalie zɔhane ɛwɔkɛ ne mɔ wɔali la anwo debie.