Mediema Mɔɔ Bɛyɛ Mrelera—Bɛsonle Bolɛ Bɛmaa Asafo Ne
“Saa menea ninyɛne mɔɔ ɛnee mekola meyɛ ye dɛba ne la a, ɔsi me nwo. Kɛkala ɛrelerayɛlɛ ti, mengola menyɛ dɔɔnwo.”—Connie, yeli ɛvolɛ 83.
Bie a ɛdawɔ noko ɛngola ɛnyɛ dɔɔnwo ɔlua ɛrelerayɛlɛ ti. Ɔnva nwo kɛ wɔzonle Gyihova nɔhalɛ nu ɛvolɛ dɔɔnwo la, saa ɛfa mɔɔ ɛyɛle ye wɔ Gyihova ɛzonlenlɛ nu wɔ dɛba ne la ɛtoto mɔɔ ɛkola ɛyɛ ye kɛkala la anwo a, bie a ɛ sa nu bado. Saa zɔhane a wɔ tɛnlabelɛ ne de a, duzu a baboa wɔ yeamaa ɛ nye alie a?
MƆƆ GYIHOVA KPONDƐ KƐ ƐYƐ LA
Biza ɛ nwo kɛ, ‘Duzu a Gyihova kpondɛ kɛ meyɛ a?’ Edwɛkɛ mɔɔ wɔ Ditilɔnomi 6:5 la bahola akyekye ɛ rɛle, ɔse: ‘Fa wɔ ahonle muala nee wɔ ɛkɛla muala nee wɔ anwosesebɛ muala kulo Gyihova wɔ Nyamenle ne.’
Kɛ mɔɔ ngyɛnu ɛhye kile la, Gyihova kpondɛ kɛ ɛfa wɔ ahonle, wɔ ɛkɛla nee wɔ anwosesebɛ muala ɛsonle ye. Edwɛkɛ ɛhye ɛnrɛmaa ɛnrɛva ɛ nwo ɛnrɛtoto awie mɔ anwo—anzɛɛ ɛnrɛva mɔɔ ɛkola ɛyɛ ye kɛkala la ɛnrɛtoto mɔɔ ɛyɛle ye dɛba la anwo.
Suzu nwo nea: Mekɛ mɔɔ ɛle kpavolɛ anzɛɛ bɛlɛra la, duzu a ɛnee ɛlɛyɛ wɔamaa Gyihova a? Gyihova menli dɔɔnwo baha kɛ ɛnee bɛlɛyɛ biala mɔɔ bɛbahola la bɛamaa ye. Ɛdawɔ noko ɛyɛle biala mɔɔ wɔ anwosesebɛ bahola la ɛmaanle Gyihova wɔ mekɛ zɔhane. Duzu a ɛkola ɛyɛ ye ɛnɛ ɛmaa Gyihova a? Ɔbayɛ kɛ ɛlɛbɔ mɔdenle wɔ tɛnlabelɛ mɔɔ ɛwɔ nu ɛnɛ la anu, mɔɔ ɛbahola wɔayɛ ye kɛkala la ɛne. Saa ɛdwenle nwo zɛhae a, ɔbamaa wɔanwu ye kɛ ɛlɛyɛ biala mɔɔ ɛbahola la wɔamaa Gyihova kɛ mɔɔ ɛyɛle ye dɛba ne la. Ɛbɔle mɔdenle ɛzonlenle ye dɛba ne na ɛlɛyɛ ye zɔ ɛnɛ noko.
Ɛyɛle biala mɔɔ ɛbahola la ɛmaanle Gyihova wɔ mekɛ mɔɔ ɛle kpavolɛ anzɛɛ bɛlɛra la, na ɛlɛyɛ biala mɔɔ ɛbahola la ɛnɛ noko
ƐBAHOLA WƆABOA AWIE MƆ KPALƐ
Kɛ anrɛɛ ɛbadwenle ninyɛne mɔɔ ɛngola ɛnyɛ la anwo la, dwenle nwolɛ adenle dɔɔnwo mɔɔ ɛlɛ mɔɔ ɛbahola wɔalua zo wɔaboa awie mɔ la anwo. Kɛkala mɔɔ wɔyɛ ɛrelera la, ɛbahola wɔayɛ ninyɛne bie mɔɔ wɔangola wɔanyɛ wɔ mekɛ mɔɔ ɛle kpavolɛ anzɛɛ bɛlɛra la. Kɛ neazo la, ɛbahola wɔayɛ ninyɛne ɛhye mɔ:
Ka wɔ anwubielɛ kile awie mɔ. Suzu edwɛkɛ ɛhye mɔ mɔɔ bɛhɛlɛ wɔ Baebolo ne anu la anwo:
Belemgbunli Devidi: “Ɛnee mele kakula, na kɛkala meyɛ kpanyinli; na metɛnwunle tenlenenli mɔɔ bɛkpo ye, anzɛɛ ɔ mra kɛ bɛlɛsɛlɛzɛlɛ aleɛ.”—Edw. 37:25.
Dwɔhyua: “Bɛnlea! Ɔka ekyii mewu, na bɛze ye wienyi wɔ bɛ ahonle muala nee bɛ ɛkɛla muala anu kɛ ɛwɔkɛ mgbalɛ kɔsɔɔti mɔɔ Gyihova bɛ Nyamenle ne bɔle bɛ la anu edwɛkɛkpɔkɛ ko bɔbɔ anga nu. Ɔ muala ɛra nu ɛmaa bɛ. Edwɛkɛkpɔkɛ ko bɔbɔ anga nu.”—Dwɔh. 23:14.
Bie a ɛdawɔ noko wɔha edwɛkɛ ɛhye bie ɛlɛ. Devidi nee Dwɔhyua anu biala hanle mɔɔ ɔnwunle ye la. Kɛmɔ ɛnee Gyihova azonvolɛ nɔhavoma ɛhye mɔ ɛlɛka mɔɔ bɛdabɛ mumua ne bɛguale bɛ nye aze bɛnwunle ye anzɛɛ mɔɔ bɛdele wɔ ɛvolɛ dɔɔnwo anu la anwo edwɛkɛ la ati, bɛ edwɛkɛ ne hyia kpalɛ.
Saa wɔva ɛvolɛ dɔɔnwo wɔzonle Gyihova a, ɛdawɔ noko ɛbahola wɔaha wɔ anwubielɛ wɔamaa awie mɔ anwu nvasoɛ mɔɔ wɔ zo kɛ bɛbazonle Gyihova la. Ɛkakye mekɛ bie mɔɔ ɛnwunle kɛ Gyihova ɛboa ye azonvolɛ wɔ adenle titili bie azo la ɔ? Saa ɔle zɔ a, ɛnee ka nwolɛ edwɛkɛ kile awie mɔ! Ɛyɛ ye zɔ a, ɔbamaa bɛ anwosesebɛ kɛ mɔɔ ɛka wɔ anwubielɛ ɛkile awie mɔ a, ɔmaa bɛ anwosesebɛ la.—Wlo. 1:11, 12.
Adenle bieko mɔɔ ɛbahola wɔalua zo wɔamaa awie mɔ anwosesebɛ la a le kɛ ɛbahɔ debiezukoalɛ wɔ Belemgbunlililɛ Asalo, saa wɔ tɛnlabelɛ ne bamaa wɔ adenle a. Saa ɛyɛ zɔ a, ɛbamaa ɛ mediema diedima anwosesebɛ na bɛamaa ɛdawɔ noko anwosesebɛ. Adiema raalɛ Connie mɔɔ yɛlimoa yɛha ɔ nwo edwɛkɛ la ka kɛ: “Mekɔ debiezukoalɛ a ɔmmaa me sa nu ɛndo. Saa mekɔ Belemgbunlililɛ Asalo na menwu kɛzi mediema ne mɔ kulo me edwɛkɛ la a, ɔmmaa me rɛle ɛmbɔ. Mekyɛ mediema ne mɔ ninyɛne ngyikyi mefa mekile kɛ me nye sɔ mɔɔ bɛyɛ la. Na mebɔ mɔdenle kɛ me nee mediema babɔ nu ayɛ sunsum nu ninyɛne dahuu.”
GYIHOVA ANYE SƆ NƆHALƐLILƐ MƆƆ ƐLƐFA WƆAZONLE YE LA
Menli mɔɔ ɛnee Gyihova kulo bɛ ɔnva nwo kɛ ɛnee bɛngola bɛnyɛ dɔɔnwo la anwo neazo dɔɔnwo wɔ Ngɛlɛlera ne anu. Suzu Semɛyɔn, Yizilayɛnli ɛrelera bie mɔɔ ɛnee de aze wɔ mekɛ mɔɔ bɛwole Gyisɛse la anwo. Saa Semɛyɔn kɔ ɛzonlenlɛsua ne anu a, bie a ɔnwu mgbavolɛ mɔɔ bɛlɛyɛ gyima mɔɔ anwo hyia la wɔ ɛkɛ. Na ɔbayɛ kɛ bie a Semɛyɔn nyianle adwenle kɛ ɔ nwo ɛngyia Gyihova kpalɛ ɔluakɛ ɔngola ɔnyɛ dɔɔnwo wɔ Gyihova ɛzonlenlɛ nu kɛ mgbavolɛ ne mɔ la. Noko ɛnee tɛ kɛ Gyihova nwu ye la ɛne. Gyihova nwunle kɛ Semɛyɔn le “tenlenenli yɛɛ ɔsulo Nyamenle” na ɔyilale ye ɔmaanle ɔnwunle adɔma Gyisɛse. Gyihova maanle Semɛyɔn bɔbɔ hanle ngapezo kɛ Gyisɛse a bayɛ Mɛzaya ne a! (Luku 2:25-35) Ɔda ali kɛ, Gyihova anva ye adwenle anzie kɛzi ɛnee Semɛyɔn ɛyɛ ɛrelera la azo, emomu ɔnwunle kɛ ɔle awie mɔɔ ɔlɛ diedi kpole yɛɛ “ɛnee sunsum nwuanzanwuanza wɔ ɔ nwo zo.”
Gyihova yilale Semɛyɔn ɔmaanle ɔnwunle adɔma Gyisɛse yɛɛ ɔhanle ngapezo kɛ ɔdaye a ɔbayɛ Mɛzaya ne a
Ɛdawɔ noko ɛbahola wɔanyia anwodozo kɛ Gyihova anye sɔ nɔhalɛlilɛ mɔɔ ɛlɛfa wɔazonle ye la ɔnva nwo kɛ ɛngola ɛnyɛ dɔɔnwo la. Wɔ Gyihova anye zo “mɔɔ awie lɛ la a sɔ ɛnyelɛ a, na tɛ mɔɔ ɔnlɛ la ɔ.”—2 Kɔl. 8:12.
Yemɔti fa wɔ adwenle sie mɔɔ ɛbahola wɔayɛ la azo. Kɛ neazo la, ɛzonlenlɛ gyima ne afoa boni mɔ a ɛbahola wɔayɛ a—saa bɔbɔ mekɛ nzinrenzinra a ɛbahola wɔava wɔayɛ zɔ a? Asoo ɛbahola wɔavɛlɛ ɛ mediema wɔ fonu zo anzɛɛ wɔahɛlɛ edwɛkɛ bie wɔ kɛlata zo wɔava wɔamaa bɛ anwosesebɛ ɔ? Kɛmɔ wɔva ɛvolɛ dɔɔnwo wɔzonle Gyihova la ati, ninyɛne ngyikyi mɔɔ ɛbayɛ wɔamaa ɛ mediema diedima la bahola amaa bɛ anwosesebɛ kpalɛ.
Bie mɔ ɛnlɛ anwosesebɛ dɔɔnwo. Nea anwubielɛ bie mɔɔ vi East Africa la wɔ ɛlɛka ne mɔɔ ɔ ti ne se “Ɔluale Baebolo Ne Azo Ɔliele Ye Ngoane” la anu.
Kakye kɛ ɛvolɛ dɔɔnwo mɔɔ wɔva wɔzonle Gyihova nɔhalɛ nu noko ɛtɛgyakyile la bahola amaa awie mɔ anwosesebɛ. Ɛlɛyɛ kpundiigyinlanlɛ nwo neazo na ɛbahola wɔanyia anwodozo kɛ ‘Nyamenle ɛnle nzisi mɔɔ ɔ rɛle bavi wɔ gyima nee ɛlɔlɛ mɔɔ ɛlale ye ali wɔ ye duma ne anwo ɛzonlenle nwuanzanwuanzama na ɛlɛkɔ zo wɔazonle bɛ la.’—Hib. 6:10.
YƐ MƆƆ ƐBAHOLA LA BOA AWIE MƆ
Neɛnleanu kile kɛ mrenyia nee mraalɛ dɔɔnwo mɔɔ ɛyɛ mrelera noko bɛboa awie mɔ la lɛ kpɔkɛdelɛ kpalɛ, bɛkola bɛdwenle kpalɛ yɛɛ bɛtɛnla aze bɛkyɛ.
Noko saa ɛboa awie mɔ a yemɔ ɛngile kɛ ɔbaye ngyegyelɛ biala mɔɔ ɛrelerayɛlɛ fa ba la yeavi ɛkɛ. Nyamenle Belemgbunlililɛ ne ala a bahola aye debie mɔɔ maa yɛyɛ mrelera na yɛwu la avi ɛkɛ a—yemɔ a le sinlidɔlɛ mɔɔ yɛnyianle yɛvile Adam ɛkɛ la.—Wlo. 5:12.
Kɛkala bɔbɔ saa ɛyɛ mɔɔ Gyihova se ɛyɛ, mɔɔ bie a le kɛ ɛbaboa awie mɔ wɔamaa bazukoa ɔ nwo debie la a, ɔbamaa wɔ anyelazo ne ayɛ kpole na bie a yeaboa wɔ kpɔkɛdelɛ bɔbɔ. Mediema mɔɔ bɛyɛ mrelera, yɛsɛlɛ bɛ bɛnwu ye kɛ mɔɔ bɛyɛ wɔ Gyihova ɛzonlenlɛ nu la sonle bolɛ maa ye yɛɛ asafo ne anye sɔ bɛ nɔhalɛlilɛ nwo neazo ne.