Asoo Ɛkakye?
Wɔgenga Ɛzinzalɛ Arane mɔɔ ɛra ɛvolɛ ɛhye anu la kpalɛ ɔ? Nea saa ɛbahola wɔabua kpuya ɛhye mɔ a:
Duzu a ka yɛ maa yɛwula Gyihova anyunlunyia a?
Yɛwula Gyihova anyunlunyia ɔluakɛ yɛbu ye kpole kpalɛ yɛɛ yɛkulo ye kpalɛ. Eza yɛwula ye anyunlunyia ɔluakɛ yɛkulo kɛ awie mɔ nwu ye.—w25.01, m. 3.
Saa awie fo yɛ a, kɛ ɔkɛyɛ na yɛava yɛahyɛ ye bɔkɔɔ ɛ?
Yɛmbu yɛ nye yɛngua kɛzi yɛte nganeɛ la azo; noko saa yɛye ɛya yɛfi yɛ nu a, ɔmaa yɛ nee awie mɔ di ye boɛ.—w25.02, m. 15-16.
Duzu ati a ɛdoavolɛ Maake yɛle neazo kpalɛ maanle mediema mgbavolɛ a?
Maake vile ye ɛhulolɛ nu liele dole nu kɛ ɔbazonle awie mɔ. Ɔbayɛ kɛ tɛnlabelɛ bie mɔɔ ɔhɔle nu la gyegyele ye kpalɛ ɛdeɛ, noko ɛhye ammaa yeangyakyi kɛ ɔbazonle ɔ mediema ne mɔ. Ɔ nee Pɔɔlo nee mediema gyɛne mɔɔ bɛnyi sunsum nu la nyianle agɔnwolɛvalɛ kpalɛ.—w25.04, m. 27.
Mɔɔ Gyisɛse hanle ye wɔ ye asɔneyɛlɛ ne anu kɛ: “Memaa bɛnwu wɔ duma” la, duzu a ɛnee ɔlɛkile a? (Dwɔn 17:26)
Ɛnee ye ɛdoavolɛma ne ze Nyamenle duma ne dɛba. Noko Gyisɛse maanle bɛnwunle Gyihova kpalɛ, bie a le bodane mɔɔ ɔlɛ ɔmaa azɛlɛ ne nee alesama, ninyɛne mɔɔ yeyɛ, mɔɔ ɔbayɛ ye kenle bie yɛɛ ye subane ngakyile ne mɔ.—w25.05, m. 20-21.
Saa yɛbɛlɛ yɛ nwo aze a, duzu a yɛbalie yɛado nu a?
Yɛbalie yɛado nu kɛ yɛnze ninyɛne bie mɔ. Kɛ neazo la, yɛnze mekɛ mɔɔ awieleɛ ne bara a anzɛɛ kɛzi Gyihova bayɛ ye ninyɛne wɔ mekɛ zɔhane la. Yɛɛ yɛnze mɔɔ bazi ɛhyema anzɛɛ kɛzi Gyihova ze yɛ kpalɛ la.—w25.06, m. 15-18.
Duzu a baboa yɛ yeamaa yɛanyia edwɛkɛ anzɛɛ bagua nu ɛdendɛlɛ bie azo nvasoɛ a?
Yɛbahola yɛabiza yɛ nwo kɛ: ‘Daselɛ boni a bɛlɛfa bɛali gyima amaa tievolɛma alie Baebolo nu nɔhalɛ ɛhye ado nu a? Ndonwo boni a mebahola meava meahilehile nɔhalɛ ɛhye anu meahile awie a? Nwane a ɔ nye balie edwɛkɛtile ɛhye anwo a?’—w25.07, m. 19.
Nyamenle ɛtanefakyɛ ne anwo debie boni a yɛsukoa yɛfi kɛzi ɔ nee Devidi lile la anu a?
Devidi yɛle ɛtane mgbole ɛdeɛ, noko mɔɔ ɔnlunle ɔ nwo nɔhalɛ nu la, Gyihova vale hyɛle ye. (1 Arl. 9:4, 5) Saa Nyamenle fa ɛtane kyɛ a, ɔndwe ɛtanevolɛ ne anzo wɔ ye ɛtane dɛba ne anwo anzɛɛ ɔmmaa ɔmbu nwolɛ mgbonda kenle bie.—w25.08, m. 17.
Saa wɔ Baebolo sukoavo bie ɛnde edwɛkɛ bie abo a, duzu a ɛbahola wɔayɛ a?
Saa ɔyɛ se kɛ ɔbade edwɛkɛ bie mɔɔ ɛlɛbɔ mɔdenle wɔava Baebolo ne wɔahilehile nu wɔahile ye la abo a, bɛbahola bɛagyakyi na bɛadoa zo na nzinlii bɛazia bɛara zo.—w25.09, m. 24.
Baebolo ne se ɛtane le “mɛlɛbɛla.” (Hib. 3:13) Adenle boni azo?
Ɛtane kola twehwe yɛ maa yɛyɛ ninyɛndane. Eza ɔkola ɔbɛlɛbɛla yɛ ɔmaa yɛ adwenle nu ta yɛ yɛ kesee wɔ Gyihova ɛlɔlɛ ne anwo.—w25.10, m. 16.
Ninyɛne nsa boni mɔ a bahola aboa yɛ yeamaa yɛayɛ asɔne kpalɛ a?
(1) Yɛbahola yɛadwenledwenle Gyihova subane ne mɔ anwo. (2) Yɛbahola yɛadwenle ngyegyelɛ fɔɔnwo bie mɔɔ yɛlɛyia ye kɛkala la anwo na yɛaha nwolɛ edwɛkɛ; kɛ neazo la, saa ɔwɔ kɛ yɛfa awie bie ɛtane yɛkyɛ ye a. (3) Yɛbahola yɛahyɛ ekyii wɔ yɛ asɔneyɛlɛ la. Saa yɛkyɛ ekyii a ɔbamaa yɛahola yɛaha mɔɔ wɔ yɛ ahonle nu la amuala.—w25.10, m. 19-20.
Kɛ ɔkɛyɛ na yɛaboa mrelera ɛ?
Yɛbahola yɛahɔkpɔla menli mɔɔ bɛyɛ mrelera la anzɛɛ yɛavɛlɛ bɛ. Eza yɛbahola yɛahɔzɔho bɛ wɔ asopiti. Anzɛɛ yɛbahola yɛ nee mrelera abɔ nu ayɛ ɛzonlenlɛ gyima ne afoa ngakyile ne mɔ bie.—w25.11, m. 6-7.
Ninyɛne titili boni mɔ a maa Kilisienema atɔfolɛlielɛ wula Gyihova anyunlunyia a?
Bɛdi arane mɛla biala mɔɔ hyia la azo. Bɛnea kɛ bɛbala Nyamenle sunsum ne ma ali wɔ atɔfolɛlielɛ ne nee ɔ nzi ɛkponledolɛ ne abo. Bɛnziezie bɛ nwo hyeleenyi yɛɛ bɛmbu amaamuo biala mɔɔ tia Baebolo ngyinlazo la. Bɛmaa bɛ edwɛkɛ nu ɛla ɛkɛ wɔ mekɛ mɔɔ bɛlɛyɛ bɛ atɔfolɛlielɛ ne anwo ngyehyɛleɛ la.—w25.12, m. 21-24.