“Ɛle Sonla Mɔɔ Ɛsonle Bolɛ Kpalɛ”!

1-2. Duzu a baboa yɛ yeamaa yɛanwu kɛ yɛsonle bolɛ wɔ Gyihova anye zo a?

GYIHOVA azonvolɛ sonle bolɛ maa ye, noko bie mɔ te nganeɛ kɛ bɛ nwo ɛngyia. Bie a kɛzi awie nee bɛ lile la a maanle bɛdele nganeɛ kɛ bɛ nwo ɛngyia a. Wɔde nganeɛ kɛ ɛ nwo ɛngyia ɛlɛ ɔ? Saa wɔde nganeɛ zɔ a, kɛ ɔkɛyɛ na wɔanwu kɛ ɛsonle bolɛ wɔ Gyihova anye zo ɛ?

² Saa ɛsuzu Baebolo nu kɛlɛtokɛ mɔɔ maa yɛnwu kɛzi Gyihova kulo kɛ bɛbu menli na bɛ nee bɛ di la anwo a bie a ɔbaboa wɔ. Ɔ Ra Gyisɛse lile menli eni yɛɛ ɔbule bɛ. Ɔyɛle ɛhye ɔvale ɔhilele kɛ ɔ nee ɔ Ze bu menli mɔɔ bɛlɛ bɛ nwo aze na bɛte nganeɛ kɛ nvasoɛ ɛnle bɛ nwo zo la. (Dwɔn 5:19; Hib. 1:3) Wɔ edwɛkɛ ɛhye anu, yɛbazuzu (1) kɛzi Gyisɛse boale awie mɔ ɔmaanle bɛnwunle kɛ bɛsonle bolɛ bɛmaa Gyihova yɛɛ (2) kɛzi yɛbahola yɛanwu kɛ yɛdayɛ noko yɛsonle bolɛ kpalɛ yɛmaa Nyamenle la.—Hagae 2:7.

KƐZI GYISƐSE BOALE AWIE MƆ ƆMAANLE BƐNWUNLE KƐ BƐSONLE BOLƐ LA

3. Kɛzi Gyisɛse nee Galelima mɔɔ rale ɔ nwo ɛkɛ ne kɛ ɔboa bɛ la lile ɛ?

³ Mɔɔ Gyisɛse ɛlɛka edwɛkɛ ne wɔ Galeli la menli dɔɔnwo rale ɔ nwo ɛkɛ kɛ bɛbadie ye edwɛkɛ na bɛamaa yeayɛ bɛ ayile. Gyisɛse nwunle kɛ “ɛnee bɛle kɛ mboane mɔɔ ɛnlɛ neavolɛ mɔɔ bɛbodɛboda bɛ na bɛgyakyi bɛ ɛkɛ ne la.” (Mat. 9:36) Bɛ ɛzonlenlɛ nu mgbanyima ne mɔ bule bɛ kɛ bɛ nwo ɛngyia mɔɔ ɔwɔ kɛ bɛdwenle bɛ nwo a na bɔbɔ bɛhanle kɛ bɛle “menli mɔɔ nvasoɛ ɛnle bɛ nwo zo.” (Dwɔn 7:​47-49) Noko Gyisɛse lile bɛ eni, ɔluakɛ ɔnyianle mekɛ ɔhilehilele bɛ yɛɛ ɔyɛle bɛ ayile. (Mat. 9:35) Eza amaa yeaboa menli dɔɔnwo la, ɔtetele ye ɛzoanvolɛma ne amaa bɛayɛ edwɛkɛhanlɛ gyima ne yɛɛ ɔmaanle bɛ tumi kɛ bɛyɛ wuliravolɛma ayile.—Mat. 10:​5-8.

4. Duzu a yɛsukoa yɛfi kɛzi Gyisɛse nee ye tievolɛma lile la anu a?

⁴ Kɛmɔ Gyisɛse nee menli lile ye kɛnlɛma yɛɛ ɔbule bɛ la ati, ɔmaanle ɔlale ali kɛ ɔ nee ɔ Ze bu menli mɔɔ bɛmbu bɛ la kɛ bɛsonle bolɛ. Saa ɛlɛsonle Gyihova noko ɛte nganeɛ kɛ nvasoɛ ɛnle ɛ nwo zo a, dwenle kɛzi Gyisɛse nee menli mɔɔ bɛlɛ bɛ nwo aze na ɛnee bɛkulo kɛ bɛsukoa debie bɛfi ye ɛkɛ ne la lile la anwo. Saa ɛyɛ ye zɔ a, ɔbahola yeaboa wɔ yeamaa wɔanwu kɛzi ɛsonle bolɛ ɛmaa Gyihova la.

5. Ka tɛnlabelɛ mɔɔ ɛnee raalɛ ne mɔɔ Gyisɛse yiale ye wɔ Galeli la wɔ nu la anwo edwɛkɛ.

⁵ Gyisɛse angilehile menli ekpunli ala, eza ɔhilehilele menli ngoko na ɔboale bɛ. Kɛ neazo la, mɔɔ Gyisɛse ɛlɛyɛ ye ɛzonlenlɛ gyima ne wɔ Galeli la, ɔyiale raalɛ bie mɔɔ ɛdudu mogya too ɛvolɛ 12 la. (Maake 5:25) Ɔlua ye anwodolɛ ne ati, ɛnee Mɛla ne kile kɛ ɔ nwo ɛnde na awie biala mɔɔ ɔbava ɔ sa yeaha ye la noko anwo bagua evinli. Ɔbayɛ kɛ ɛnee ɛhye ɛmmaa ɔngola ɔngɔ menli nu. Eza ɛnee ɔngola ɔ nee awie mɔ ɛnyia nu ɛnzonle Gyihova anzɛɛ ɛnli ɛvoyia ngakyile. (Lɛv. 15:​19, 25) Ɔti ɛnee raalɛ ɛhye ɛnde kpɔkɛ ɛdeɛ noko ɔbayɛ kɛ eza ɔdele nganeɛ kɛ nvasoɛ ɛnle ɔ nwo zo.—Maake 5:26.

6. Adenle boni a raalɛ ne mɔɔ ɛnee ɔlɛtudu mogya la luale zo dele kpɔkɛ a?

⁶ Ɛnee raalɛ ɛhye mɔɔ ɛlɛnwu amaneɛ la kulo kɛ Gyisɛse yɛ ye ayile. Noko yeanga yeangile ye kɛ ɔyɛ ye ayile. Duzu ati ɔ? Bie a ɛnee ye tɛnlabelɛ ne maa ɔse nyiane. Anzɛɛ bie a ɛnee ɔsulo kɛ kɛmɔ ɔ nwo ɛnde noko yehɔwolo menli ne anu la ati, Gyisɛse ɛnrɛdɛne ye zo. Ɔti ɔzɔle ye tɛladeɛ ne anloa ala, na ɛnee ɔdie ɔdi kɛ mɔɔ yeyɛ bɔbɔ la ala bamaa yeade kpɔkɛ. (Maake 5:​27, 28) Ɔnyianle ye diedi ne anwo ahatualɛ—ɔdele kpɔkɛ. Akee Gyisɛse bizale ahenle mɔɔ vale ɔ sa hanle ye la na raalɛ ne hanle mɔɔ ɔyɛle la. Duzu a Gyisɛse yɛle a?

7. Kɛzi Gyisɛse nee raalɛ ɛhye mɔɔ ɔlɛnwu amaneɛ la lile ɛ? (Maake 5:34)

⁷ Gyisɛse lale atiakunlukɛnlɛma nee ɛbulɛ ali hilele raalɛ ne. Ɔnwunle kɛ ‘ɛzulolɛ ɛha ye yɛɛ ɔ nwo ɛlɛwoso ye.’ (Maake 5:33) Kɛmɔ ɛnee Gyisɛse te ye tɛnlabelɛ ne abo la ati, ɔdendɛle kɛnlɛma ɔhilele ye. Ɔvɛlɛle ye “me ra raalɛ.” Edwɛkɛ zɔhane mɔɔ Gyisɛse hanle la kile kɛ ɔbu raalɛ ne yɛɛ ɔluale zo ɔlale atiakunlukɛnlɛma nee ɛlɔlɛ ali ɔhilele ye. (Kenga Maake 5:34.) Ɛhye ala a le mekɛ mɔɔ Gyisɛse vɛlɛle raalɛ bie “me ra raalɛ” wɔ Baebolo ne anu a. Bie a ɔvale edwɛkɛ kɛnlɛma ɛhye ɔlile gyima ɔluakɛ ɔnwunle kɛ raalɛ ne ahonle ɛdu kpalɛ. Nea kɛzi ye ahonle badɔ ye azule nu a! Saa Gyisɛse andendɛ kɛnlɛma angile ye a anrɛɛ ɔbade kpɔkɛ ɛdeɛ noko ye adwenle babua ye fɔlɛ. Noko akee Gyisɛse boale ye maanle ɔnwunle kɛ ɔle ye anwuma Selɛ ne mɔɔ lɛ ɛlɔlɛ la ara raalɛ mɔɔ sonle bolɛ maa ye la.

8. Ngyegyelɛ boni mɔ a ɛnee adiema raalɛ bie mɔɔ wɔ Brazil la gyi ɔ nloa a?

⁸ Ɛnɛ noko, Nyamenle azonvolɛ bie mɔ ɛnyia ewule bie mɔɔ maa bɛ rɛle bɔ na bɛte nganeɛ kɛ bɛ nwo ɛngyia la. Mariaa le dahuu adekpakyelɛnli mɔɔ wɔ Brazil, bɛkawo ye la ɛnee ɔ gyakɛ amunwiɔ nee ɔ sa bɛne ne ɛnle ɛkɛ. Ɔhanle kɛ: “Kɛmɔ mele wuliravolɛ la ati, ɛnee mekɔ sukulu a bɛsele me. Bɛvale aluma ngakyile bɛvɛlɛle me. Na ɔdwu mekɛ ne bie a me abusua ne anu amra bɔbɔ nee me ɛnli ye boɛ.”

9. Duzu a boale Maria maanle ɔnwunle kɛ ɔsonle bolɛ ɔmaa Gyihova a?

⁹ Duzu a boale Maria a? Mɔɔ ɔrayɛle Gyihova Dasevolɛ la, ɔ mediema diedima kyekyele ɔ rɛle na bɛboale ye bɛmaanle ɔnwunle ɔ nwo kɛ mɔɔ Gyihova nwu ye la. Ɔhanle kɛ: “Menrɛhola menrɛbobɔ mediema mɔɔ boale me la kɔsɔɔti aluma. Meyɛ Gyihova mo somaa kɛ yemaa menyia sunsum nu abusua kɛnlɛma ɛhye la.” Mediema mɔɔ wɔ Maria asafo ne anu la boale ye maanle ɔnwunle kɛ ɔsonle bolɛ wɔ Nyamenle anye zo.

10. Ngyegyelɛ boni mɔ a ɛnee Mɛle Magedalene lɛ a? (Eza nea nvoninli ne mɔ.)

¹⁰ Suzu kɛzi Gyisɛse boale Mɛle Magedalene noko la anwo. Ɛnee sunsum ɛtane nsuu wɔ ɔ nwo! (Luku 8:2) Ɔbayɛ kɛ kɛmɔ ɛnee sunsum ɛtane wɔ nwo la ati ɛnee ɔmbɔ ɛbɛla kpalɛ ɔti ɛnee menli ɛngulo kɛ bɛbikye ye. Mekɛ mɔɔ ɛnee ɔwɔ tɛnlabelɛ ɛsesebɛ zɔhane anu la, bie a ɔdele nganeɛ kɛ bɛkpo ye. Ɔbayɛ kɛ Gyisɛse dule sunsum ɛtane ne mɔ vile ɔ nwo na ɔrayɛle ye ɛdoavolɛ. Adenle boni bieko a Gyisɛse luale zo boale Mɛle Magedalene maanle ɔnwunle kɛ ɔsonle bolɛ ɔmaa Nyamenle a?

11. Kɛzi Gyisɛse maanle Mɛle Magedalene nwunle kɛ ɔsonle bolɛ ɔmaa Nyamenle ɛ? (Eza nea nvoninli ne mɔ.)

¹¹ Gyisɛse maanle Mɛle Magedalene nyianle nwolɛ adenle nee ye hɔhanle edwɛkpa ne wɔ ɛleka ngakyile.b Ɔti ɔhɔle zo ɔnyianle Gyisɛse ngilehilelɛ ne azo nvasoɛ wɔ mekɛ mɔɔ ɔdele kɛ ɔlɛkilehile awie mɔ la. Eza Gyisɛse yele ɔ nwo ɔhilele ye wɔ kenle ko ne ala mɔɔ bɛdwazole ye la. Ɔboka ɛdoavolɛma mɔɔ ɔlimoale ɔ nee bɛ dendɛle wɔ zɔhane kenle ne la anwo. Gyisɛse maanle ye gyima bɔbɔ kɛ ɔhɔbɔ ye ɛzoanvolɛma ne amaneɛ kɛ bɛdwazo ye. Edwɛkɛ ɛhye mɔ amuala kile kɛ ɛnee amgba ɔsonle bolɛ ɔmaa Gyihova!—Dwɔn 20:​11-18.

12. Duzu a maanle Lidia dele nganeɛ kɛ nvasoɛ ɛnle ɔ nwo zo a?

¹² Kɛ mɔɔ ɛnee ɔde wɔ Mɛle Magedalene edwɛkɛ ne anu la, ɛnɛ menli dɔɔnwo te nganeɛ kɛ awie biala ɛngulo bɛ edwɛkɛ. Adiema raalɛ Lidia mɔɔ vi Spain la hanle kɛ mɔɔ ye mame ɛlɛnrenzɛ ye la, ɛnee ɔkulo kɛ ɔye ye. Ɔkakye kɛ mɔɔ ɔle kakula ekyi bɔbɔ la, ɛnee ye mame ɛmpili ye yɛɛ ɔbɔ ye aholoba. Ɔhanle kɛ: “Ɛnee mɔɔ mekpondɛ wɔ ɛbɛlabɔlɛ nu la ala a le kɛ awie mɔ bahulo me edwɛkɛ na bɛ nee me ali ye kɛnlɛma. Ɛnee mesulo kɛ ɔnva nwo mɔɔ mebayɛ ye biala la awie biala ɛnrɛhulo me edwɛkɛ ɔluakɛ me mame maanle mendele nganeɛ kɛ menle sonla kpalɛ.”

13. Duzu a boale Lidia maanle ɔnwunle kɛ ɔsonle bolɛ ɔmaa Gyihova a?

¹³ Mɔɔ Lidia rale nɔhalɛ ne anu la, asɔneyɛlɛ nee ɔ ti anwo debiezukoalɛ yɛɛ ɔ mediema diedima edwɛkɛ kɛnlɛma nee bɛ nyɛleɛ kpalɛ boale ye maanle ɔnwunle kɛ ɔsonle bolɛ wɔ Gyihova anye zo. Ɔhanle kɛ: “Me hu ka kɛzi ɔkulo me la kile me dahuu. Dahuu ɔboa me ɔmaa mekakye me subane ngɛnlɛma ne mɔ. Me gɔnwo mɔ noko yɛ ye zɔ.” Ɛkakye awie mɔɔ ɔhyia moalɛ amaa yeanwu kɛ ɔsonle bolɛ wɔ Gyihova anye zo la ɔ?

KƐ ƆKƆYƐ NA YƐANWU YƐ NWO KƐ MƆƆ GYIHOVA NWU YƐ LA

14. Kɛzi 1 Samoɛle 16:7 boa yɛ maa yɛnwu kɛzi Gyihova bu menli la ɛ? (Eza nea ɛlɛka, “Duzu Ati A Gyihova Menli Nwo Hyia Ye A?”)

¹⁴ Kakye kɛ Gyihova ɛnnwu wɔ kɛ mɔɔ ewiade ne nwu wɔ la. (Kenga 1 Samoɛle 16:7.) Ɔnnea kɛzi ɛde, wɔ ezukoa gyinlabelɛ anzɛɛ ɛleka mɔɔ wɔhɔ sukulu wɔhɔdwu la amaa yeabu wɔ kɛ ɛsonle bolɛ. (Aye. 55:​8, 9) Ɔti bɔ mɔdenle kɛ ɛbanwu ɛ nwo kɛ mɔɔ Gyihova nwu wɔ la na tɛ kɛ mɔɔ menli mɔɔ wɔ ewiade ye anu la nwu wɔ la ɔ. Baebolo ne ka bɛdabɛ mɔɔ ɔdwu mekɛ ne bie a bɛte nganeɛ kɛ bɛ nwo ɛngyia, le kɛ Yilaegya, Nawome yɛɛ Hana la anwo edwɛkɛ. Saa ɛkenga bɛ nwo edwɛkɛ a, ɛbanwu kɛzi Gyihova maanle bɛnwunle kɛ bɛsonle bolɛ la. Eza ɛbahola wɔahɛlɛ ninyɛne mɔɔ ɛsisi wɔ ɛbɛlabɔlɛ nu mɔɔ di daselɛ kɛ amgba Gyihova kulo wɔ yɛɛ ɔbu wɔ kɛ ɛ nwo hyia la. Bieko, ɛbahola wɔayɛ kɛzi ɛsonle bolɛ la anwo neɛnleanu dɔɔnwo wɔ yɛ mbuluku ne mɔ anu.c

15. Duzu ati a Gyihova bule Daneɛle kɛ ‘ɔle sonla mɔɔ sonle bolɛ kpalɛ’ a? (Daneɛle 9:23)

¹⁵ Kakye ye dahuu kɛ, kɛmɔ ɛdi nɔhalɛ la ati ɛsonle bolɛ wɔ Gyihova anye zo. Wɔ mekɛ bie wɔ ngapezonli Daneɛle ɛbɛlabɔlɛ nu mɔɔ ɔbayɛ kɛ ɛnee ɔka ekyi ɔdi ɛvolɛ 100 la, ɔdele nganeɛ kɛ ‘yevɛ kpalɛ’ yɛɛ ɔ sa nu dole. (Dan. 9:​20, 21) Kɛzi Gyihova maanle ye anwosesebɛ ɛ? Nyamenle zoanle anwumabɔvolɛ Geebeleɛle kɛ ɔhɔhakye Daneɛle kɛ ‘ɔle sonla mɔɔ sonle bolɛ kpalɛ’ yɛɛ yede ye asɔneyɛlɛ ne. (Kenga Daneɛle 9:23.) Duzu a maanle Daneɛle yɛle sonla mɔɔ sonle bolɛ maa Nyamenle a? Yemɔ a le kɛ ɛnee ɔkulo tenleneyɛlɛ yɛɛ ɔdi nɔhalɛ. (Yiz. 14:14) Gyihova maanle bɛhɛlɛle edwɛkɛ zɔhane wɔ ye Edwɛkɛ ne anu amaa yeakyekye yɛ rɛle. (Wlo. 15:4) Eza Gyihova tie wɔ asɔneyɛlɛ na ɔbu wɔ kɛ ɛsonle bolɛ ɔluakɛ ɛkulo mɔɔ le kpalɛ yɛɛ ɛfa nɔhalɛlilɛ ɛsonle ye.—Maeka 6:​8, ɔbdw.; Hib. 6:10.

16. Duzu a bahola aboa wɔ yeamaa wɔanwu Gyihova kɛ ɔle Selɛ mɔɔ lɛ ɛlɔlɛ a?

¹⁶ Nwu Gyihova kɛ ɔle Selɛ mɔɔ ɔkulo wɔ. Ɔkulo kɛ ɔboa wɔ, ɔmkpondɛ nvonleɛ mɔɔ wɔ ɛ nwo la. (Edw. 130:3; Mat. 7:11; Luku 12:​6, 7) Menli dɔɔnwo mɔɔ bɛte nganeɛ kɛ nvasoɛ ɛnle bɛ nwo zo la dwenledwenlenle edwɛkɛ ɛhye anwo la, ɔboale bɛ. Fa adiema raalɛ Eliana mɔɔ vi Spain la kɛ neazo. Wɔ ɛvolɛ dɔɔnwo anu, ɛnee ɔ hu bɔ ye aholoba ɔti ɔdele nganeɛ kɛ awie ɛngulo ye yɛɛ nvasoɛ biala ɛnle ɔ nwo zo. Ɔhanle kɛ, “Mekɛ biala mɔɔ mebade nganeɛ kɛ nvasoɛ ɛnle me nwo zo la, mebɔ mɔdenle kɛ mebapɛ ye nvoninli kɛ Gyihova via me ɔ sa zo amaa yeanlea me na yeabɔ me nwo bane.” (Edw. 28:9) Adiema raalɛ Lauren mɔɔ vi South Africa la hanle kɛ, “Kɛmɔ Gyihova luale ɛlɔlɛ zo hwenle me, ɔvale me ɔbetanle ɔ nwo wɔ ɛvolɛ ɛhye mɔ amuala anu na ɔdua me nwo zo ɔkilehile awie mɔ la ati, ɔkile kɛ mesonle bolɛ yɛɛ me nwo hyia ye.”—Hozia 11:4.

17. Duzu a baboa wɔ yeamaa wɔalie wɔali kɛ wɔnyia Gyihova anyunlu ɛlolɛ a? (Edwɛne 5:12) (Eza nea nvoninli ne.)

¹⁷ Die di kɛ wɔnyia Gyihova anyunlu ɛlolɛ. (Kenga Edwɛne 5:12.) Devidi vale Gyihova anyunlu ɛlolɛ totole “enyinlike” kpole mɔɔ bɔ tenlenema anwo bane la anwo. Kɛmɔ ɛze kɛ wɔnyia Gyihova anyunlu ɛlolɛ yɛɛ ɔgyi ɛ nzi la ati, ɔbabɔ ɛ nwo bane amaa wɔande nganeɛ kɛ nvasoɛ ɛnle ɛ nwo zo. Kɛ ɔkɛyɛ na wɔanwu kɛ wɔnyia Gyihova anyunlu ɛlolɛ ɛ? Kɛ mɔɔ yɛnwu ye la, Gyihova dua ye Edwɛkɛ ne azo maa ɛnyia anwodozo zɔhane. Eza ɔdua asafo nu mgbanyima, agɔnwolɛma kpalɛ nee menli gyɛne nwo zo ɔkakye wɔ kɛ ɛsonle bolɛ wɔ ɔ nye zo. Saa awie mɔ maa wɔ anwosesebɛ zɛhae a, duzu a ɔwɔ kɛ ɛyɛ a?

18. Duzu ati a ɔwɔ kɛ ɛdie nganvolɛ ɛto nu a?

¹⁸ Saa menli mɔɔ bɛze wɔ na bɛkulo wɔ la kanvo wɔ a, die to nu. Kakye kɛ bie a Gyihova ɛlɛdua bɛ nwo zo aboa wɔ yeamaa wɔanwu kɛ wɔnyia ɔ nyunlu ɛlolɛ. Eliana mɔɔ yɛhanle ɔ nwo edwɛkɛ la hanle kɛ: “Ngyikyi ngyikyi, melɛsukoa kɛ awie mɔ ka edwɛkɛ mɔɔ maa anwosesebɛ la kile e a, mebalie meado nu kɛ mɔɔ bɛlɛka la le nɔhalɛ. Ɔnla aze noko meze kɛ mɔɔ Gyihova kulo kɛ meyɛ la ɛne.” Eliana nyianle mɔdenle mɔɔ mgbanyima ne mɔ bɔle kɛ bɛboa ye la azo nvasoɛ. Kɛkala ɔle adekpakyelɛnli yɛɛ ɔtɛnla sua nu ɔyɛ gyima ɔboa Bɛtɛle.

19. Kɛ ɔkɛyɛ na wɔanyia anwodozo kɛ ɛsonle bolɛ wɔ Nyamenle anye zo ɛ?

¹⁹ Gyisɛse maa yɛkakye kɛ yɛ nwo hyia yɛ anwuma Selɛ ne kpalɛ. (Luku 12:24) Ɔti yɛbahola yɛanyia anwodozo kɛ Gyihova nwu yɛ kɛ ɛsonle bolɛ. Bɛmmamaa yɛ rɛle fi ɛhye ɛlɛ! Na bɛmaa yɛyɛ biala mɔɔ yɛbahola la yɛboa awie mɔ yɛmaa bɛnwu kɛzi bɛsonle bolɛ wɔ Nyamenle anye zo la!