Sukoa Kɛzi Gyihova Nee Gyisɛse Dwenle Ninyɛne Nwo La

1-2. Ninyɛne boni mɔ a yɛfa yɛkulo Gyihova a, na kɛzi Gyisɛse yɛle ɛhye anwo neazo ɛ?

“FA WƆ ahonle muala nee wɔ ɛkɛla muala nee wɔ anwosesebɛ muala nee wɔ adwenle muala kulo Gyihova wɔ Nyamenle ne.” (Luku 10:27) Gyisɛse maanle ɔlale ali wienyi kɛ ɛhye a le mɛla mɔɔ anwo hyia kpalɛ wɔ Mosisi Mɛla ne anu a. Yɛ ye nzonlɛ kɛ yɛ ahonle, mɔɔ kile yɛ atiakunluwɔzo nee yɛ nganeɛdelɛ la a yɛfa yɛkulo Gyihova a. Eza ɔwɔ kɛ yɛfa yɛ ɛkɛla muala nee yɛ anwosesebɛ noko yɛsonle ye. Noko akee, eza yɛfa yɛ adwenle, mɔɔ kile kɛzi yɛdwenle ninyɛne nwo la yɛkulo Gyihova. Nɔhalɛ nu, yɛnrɛhola yɛnrɛde kɛzi Gyihova dwenle ninyɛne kɔsɔɔti anwo la abo bɔkɔɔ. Noko saa yɛsukoa “Kelaese adwenle” ne anwo debie a, yɛbahola yɛade kɛzi Nyamenle dwenle ninyɛne nwo la abo kpalɛ ɔluakɛ Gyisɛse lale kɛzi ɔ Ze dwenle ninyɛne nwo la ali pɛpɛɛpɛ.—1 Kɔl. 2:16.

² Gyisɛse vale ye adwenle muala hulole Gyihova. Ɛnee ɔze mɔɔ Gyihova kulo kɛ ɔyɛ la, na ɛnee yebɔ kpɔkɛ kɛ ɔbayɛ ye zɔ ɔnva nwo kɛ ɛhye mɔɔ ɔbayɛ la bamaa yeanwu amaneɛ la. Kɛmɔ ɛnee Gyisɛse ɛva ɛzie ɔ nye zo kɛ ɔbayɛ ɔ Ze ɛhulolɛdeɛ la ati, yeammaa debie biala andwehwe ye adwenle.

3. Duzu a ɛzoanvolɛ Pita zukoale vile Gyisɛse ɛkɛ a, na duzu a Pita maanle ɔ gɔnwo mɔ Kilisienema anwosesebɛ kɛ bɛyɛ a? (1 Pita 4:1)

³ Pita nee ɔ gɔnwo mɔ ɛzoanvolɛma ati yɛle boɛ kɛ bɛnyianle nwolɛ adenle bɛ nee Gyisɛse luale na bɛzukoale kɛzi ɔdwenle ninyɛne nwo la. Pita maanle Kilisienema anwosesebɛ wɔ ye kɛlata ne mɔɔ ɔlimoale ɔhɛlɛle la anu kɛ bɛva adwenle ko ne ala mɔɔ ɛnee Kelaese lɛ la bie bɛziezie bɛ nwo.a (Kenga 1 Pita 4:1.) Wɔ aneɛ mɔɔ bɛlimoale bɛvale bɛhɛlɛle Baebolo ne la anu, edwɛkɛ “bɛziezie bɛ nwo” mɔɔ Pita vale lile gyima la kile sogyama mɔɔ bɛva akodeɛ bɛziezie bɛ nwo bɛmaa konle la. Ɔti saa Kilisienema sukoa adwenle mɔɔ Gyisɛse lɛ anzɛɛ kɛzi ɔdwenle ninyɛne nwo la a, ɔbamaa bɛanyia akodeɛ kpole mɔɔ bɛbava bɛaho bɛatia bɛ sinlidɔlɛ mɔɔ twehwe bɛ ɔmaa bɛyɛ ɛtane nee ewiade ne mɔɔ Seetan a nea zo la.—2 Kɔl. 10:​3-5; Ɛfɛ. 6:12.

4. Kɛzi edwɛkɛ ɛhye baboa yɛ yeamaa yɛava Pita folɛdulɛ ne yɛali gyima ɛ?

⁴ Yɛbazuzu kɛzi Gyisɛse dwenle ninyɛne nwo la anwo na yɛanlea kɛzi yɛbahola yɛazukoa ye la. Yɛbanwu kɛzi yɛbahola (1) yɛazukoa kɛzi Gyihova dwenle ninyɛne nwo la, na yemɔ baboa yɛ muala yeamaa yɛ adwenle ayia wɔ ninyɛne nwo, (2) yɛabɛlɛ yɛ nwo aze, yɛɛ (3) yɛalua asɔneyɛlɛ zo yɛava yɛ nwo yɛado Gyihova anwo zo amaa yɛ adwenle nu ala ɛkɛ.

SUKOA KƐZI GYIHOVA DWENLE NINYƐNE NWO LA

5. Duzu a Pita yɛle ye kenle ko bie mɔɔ kile kɛ yeandwenle ninyɛne nwo kɛ Gyihova a?

⁵ Suzu debie mɔɔ Pita yɛle ye kenle ko bie mɔɔ kile kɛ yeandwenle ninyɛne nwo kɛ Gyihova la anwo. Ɛnee Gyisɛse ɛha ɛhile ye ɛzoanvolɛma ne kɛ ɔwɔ kɛ ɔkɔ Gyɛlusalɛm, na bɛbaye ye bɛawula ɛzonlenlɛ nu mgbanyima ne mɔ asa anu wɔ ɛkɛ, bɛahile ye nyane na akee bɛahu ye. (Mat. 16:21) Bie a ɛnee ɔyɛ se ɔmaa Pita kɛ ɔbalie yeali kɛ Gyihova bamaa adenle yeamaa bɛahu Gyisɛse mɔɔ le Yizilayɛma anyelazo nee Mɛzaya ne mɔɔ bɛbɔle ɔ nwo ɛwɔkɛ la. (Mat. 16:16) Ɔti Pita vale Gyisɛse hɔle ahane na ɔhanle ɔhilele ye kɛ: “Awulae, mmaka ye zɔ; ɛhye ɛnrɛdo wɔ ɛlɛ.” (Mat. 16:22) Kɛmɔ ɛnee tɛ kɛzi Gyihova dwenle edwɛkɛ ne anwo la a ɛnee Pita noko ɛlɛdwenle nwo la ati, ɔ nee Gyisɛse anyɛ adwenle.

6. Kɛzi Gyisɛse hilele kɛ ɔdwenle ninyɛne nwo kɛ Gyihova ɛ?

⁶ Ɛnee kɛzi Gyisɛse dwenle ninyɛne nwo la nee ye anwuma Selɛ ne ɛdeɛ ne le ko. Gyisɛse hanle hilele Pita kɛ: “Se di me nzi, Seetan! Ɛle azedolɛ bolɛ ɛmaa me, ɔluakɛ wɔ adwenle ne ɛnle Nyamenle adwenle, emomu sonla adwenle.” (Mat. 16:23) Bie a ɛnee Pita lɛ adwenle kpalɛ ɛdeɛ, noko Gyisɛse andie ye folɛdulɛ ne. Ɛzukoalɛdeɛ bie wɔ nu maa yɛ. Ɛnee Gyihova ɛngulo kɛ Gyisɛse dwenle ɔ ngomekye ɔ nwo. Kenle ko zɔhane, Pita zukoale kɛ ɔwɔ kɛ ɔdwenle ninyɛne nwo kɛ Gyihova la.

7. Nzinlii, kɛzi Pita hilele kɛ ɔdwenle ninyɛne nwo kɛ Gyihova ɛ? (Nea nvoninli ne.)

⁷ Awieleɛ bɔkɔɔ ne, Pita hilele kɛ ɔkulo kɛ ɔdwenle ninyɛne nwo kɛ mɔɔ Gyihova yɛ ye la. Ɛnee mekɛ ɛdwu kɛ menli mɔɔ bɛnle Dwuuma mɔɔ bɛtɛpɛle bɛ mrenyiazo la baboka Nyamenle menli ne anwo. Bɛzoanle Pita kɛ ɔhɔha edwɛkɛ ne ɔhile Kɔnileɛse mɔɔ ɔnle Dwuunli, mɔɔ ɛnee ɔbaboka azonvolɛ ekpunli fofolɛ ɛhye mɔɔ bɛlimoa la anwo la. Ɛnee Dwuuma nee menli mɔɔ bɛnle Dwuuma la ɛnga, ɔti ɔnyɛ nwanwane kɛ ɛnee Pita hyia moalɛ amaa yeahola yeaziezie ɔ nwo yeamaa ye gyimalilɛ ne la. Mɔɔ Pita nwunle adwenle mɔɔ Nyamenle lɛ wɔ menli mɔɔ bɛnle Dwuuma anwo la, ɔhakyile ye adwenle. Ɛhye ati mɔɔ Kɔnileɛse maanle bɛhɔvɛlɛ ye la, ɔhɔle mɔɔ ‘yeandwenlehwenle ɔ bo aze a.’ (Gyi. 10:​28, 29) Ɔhanle edwɛkɛ ne ɔhilele Kɔnileɛse nee ye sua nu amra, na bɛzɔnenle bɛ.—Gyi. 10:​21-23, 34, 35, 44-48.

8. Kɛ ɔkɛyɛ na yɛahile kɛ yɛdwenle ninyɛne nwo kɛ Gyihova ɛ? (1 Pita 3:8)

⁸ Ɛvolɛ dɔɔnwo anzi, Pita maanle ɔ gɔnwo mɔ anwosesebɛ kɛ “bɛnyia adwenle ko.” (Kenga 1 Pita 3:8.) Kɛ Gyihova menli la, saa yɛsukoa kɛzi Gyihova dwenle ninyɛne nwo, kɛ mɔɔ bɛhile ye wɔ ye Edwɛkɛ ne anu la a, yɛbahola yɛanyia adwenle ko. Kɛ neazo la, Gyisɛse maanle ye ɛdoavolɛma anwosesebɛ kɛ bɛva Belemgbunlililɛ ne bɛlimoa bɛ ɛbɛlabɔlɛ nu. (Mat. 6:33) Ɛhye ati, bie a nolobɔlɛnli bie mɔɔ wɔ wɔ asafo ne anu la bazi kpɔkɛ kɛ ɔkulo kɛ ɔyɛ dahuu ɛzonlenlɛ gyima ne afoa bie. Kɛ anrɛɛ yɛbaha yɛahile ye kɛ ɔyɛ ninyɛne gyɛne mɔɔ baboa ye la, ɔwɔ kɛ yɛka bodane mɔɔ yeva yezie ɔ nye zo la anwo edwɛkɛ kpalɛ na yɛboa ye.

BƐLƐ Ɛ NWO AZE

9-10. Kɛzi Gyisɛse hilele kɛ ɔbɛlɛ ɔ nwo aze kpalɛ ɛ?

⁹ Nɔe ne mɔɔ aleɛ kye a bɛbahu Gyisɛse la, ɔhilehilele Pita nee ɛzoanvolɛma mɔɔ ɛha la mɛlɛbɛnwoaze nwo debie mɔɔ hyia la. Kolaa na Gyisɛse ayɛ zɔ la, ɛnee yelimoa yezoa Pita nee Dwɔn kɛ bɛhɔziezie ninyɛne mɔɔ bɛ nee Gyisɛse bava ali ye aleɛ mɔɔ li awieleɛ wɔ azɛlɛ ye azo la. Ɔbayɛ kɛ ninyɛne mɔɔ bɛvale bɛzieziele ɛkɛ ne la bie a le kyɛnze mɔɔ bɛbaza nzule bɛagua nu yɛɛ tohulu amaa nyɛvolɛ ne mɔ ava awowo bɛ gyakɛ anwo kolaa na bɛali aleɛ ne. Noko saa mekɛ ne dwu a, nwane a bayɛ gyima ɛhye mɔɔ ba aze la a?

¹⁰ Gyisɛse maanle bɛnwunle ye ndɛndɛ kɛ ɔbɛlɛ ɔ nwo aze. Ɔyɛle debie mɔɔ sonvolɛ a ta yɛ la, na ɛhye zinle ye ɛzoanvolɛma ne anwo kpole. Gyisɛse yele ye tɛladeɛ aguzo ne, ɔvale tohulu ɔpɛle ɔ bo, ɔvale nzule ɔguale kyɛnze ne anu na ɔbɔle ɔ bo kɛ ɔwowo bɛ gyakɛ anwo. (Dwɔn 13:​4, 5) Bie a ɔliele mekɛ ekyii na yeahola yeawowo ɛzoanvolɛma 12 ne, mɔɔ Dwudase mɔɔ ɔbaye ye yeamaa la boka nwo la agyakɛ anwo yeawie. Noko Gyisɛse bɛlɛle ɔ nwo aze ɔyɛle gyima ne ɔwiele. Akee Gyisɛse zile abotane hilehilele nu hilele bɛ kɛ: “Bɛte mɔɔ meyɛ memaa bɛ la abo ɔ? Bɛfɛlɛ me ‘Kilehilevolɛ’ nee ‘Awulae,’ na ɔle ye adenle zo, ɔluakɛ mele zɔhane. Yemɔti saa medame mɔɔ mele Awulae nee Kilehilevolɛ la mewowo bɛ gyakɛ anwo a, ɛnee ɔwɔ kɛ bɛdabɛ noko bɛwowo bɛ gɔnwo mɔ agyakɛ anwo.”—Dwɔn 13:​12-14.

11. Kɛzi Pita hilele kɛ yezukoa kɛ ɔbabɛlɛ ɔ nwo aze ɛ? (1 Pita 5:5) (Eza nea nvoninli ne.)

¹¹ Pita zukoale debie vile Gyisɛse mɛlɛbɛnwoaze ne anu. Mɔɔ Gyisɛse ziale hɔle anwuma la, Pita luale nwanwane adenle zo yɛle nrenyia bie mɔɔ bɛwole ye abubura la ayile. (Gyi. 1:​8, 9; 3:​2, 6-8) Menli dɔɔnwo nwunle nwanwane deɛ ɛhye na bɛrale Pita anwo ɛkɛ. (Gyi. 3:11) Kɛmɔ bɛtetele Pita wɔ ɛleka mɔɔ bɛ nye die dumalielɛ nwo la ati, asoo ɔbagyinla mɔɔ yezi la azo yealie nganvolɛ ne yeamaa ɔ nwo ɔ? Kyɛkyɛ, Pita bɛlɛle ɔ nwo aze vale nganvolɛ ne maanle Gyihova nee Gyisɛse, na ɔhanle kɛ: “Ɔlua ye duma ne nee diedi mɔɔ yɛlɛ ye wɔ ye duma ne anu la ati a nrenyia ɛhye mɔɔ bɛnwu ye na bɛze ye la ɛnyia anwosesebɛ a.” (Gyi. 3:​12-16) Bie a edwɛkɛ agbɔkɛ mɔɔ Pita vale lile gyima wɔ ye kɛlata ne mɔɔ ɔhɛlɛle ɔhɔmaanle Kilisienema ne anu ɔvale ɔhilehilele kɛzi ɔhyia kɛ bɛbɛlɛ bɛ nwo aze anu la maa yɛkakye mekɛ mɔɔ Gyisɛse vale tohulu pɛle ɔ bo na ɔwowole ye ɛzoanvolɛma ne agyakɛ anwo la.—Kenga 1 Pita 5:5.

12. Kɛ ɔkɛyɛ na yɛahɔ zo yɛabɛlɛ yɛ nwo aze kɛ mɔɔ Pita yɛle la ɛ?

¹² Yɛbahola yɛazukoa Pita neazo ne na yɛabɛlɛ yɛ nwo aze. Kakye kɛ, tɛ edwɛkɛ mɔɔ yɛka la angomekye a kile kɛ yɛbɛlɛ yɛ nwo aze nɔhalɛ nu a. Edwɛkɛkpɔkɛ mɔɔ Pita vale lile gyima maanle mɛlɛbɛnwoaze la kile yɛ nzuzulɛ mɔɔ vea la—adwenle mɔɔ yɛlɛ wɔ yɛdayɛ mumua ne yɛ nwo nee awie mɔ anwo la. Yɛyɛ ninyɛne mgbalɛ yɛmaa awie mɔ ɔluakɛ yɛkulo Gyihova yɛɛ yɛkulo menli, na tɛ kɛ yɛkulo kɛ menli anye die yɛ nwo la ati ɔ. Saa yɛfa anyelielɛ yɛsonle Gyihova nee yɛ mediema wɔ adenle biala mɔɔ yɛbahola la azo, saa bɔbɔ menli nwu yɛ anzɛɛ bɛnnwu yɛ a, ɔkile kɛ yɛbɛlɛ yɛ nwo aze.—Mat. 6:​1-4.

MAA WƆ “ADWENLE NU ƐLA ƐKƐ”

13. Saa bɛka kɛ ɛmaa wɔ “adwenle nu ɛla ɛkɛ” a, ɔkile duzu?

¹³ Saa bɛka kɛ ɛmaa wɔ “adwenle nu ɛla ɛkɛ” a, ɔkile duzu? (1 Pita 4:7) Kilisienenli mɔɔ ye adwenle nu la ɛkɛ la yɛ biala mɔɔ ɔbahola la kɛ ɔbazi kpɔkɛ kpalɛ mɔɔ da kɛzi Gyihova dwenle ninyɛne nwo la ali la. Kilisienenli zɛhae ze kɛ debie biala ɛnle ɛkɛ mɔɔ nwolɛ hyia kpalɛ wɔ ɛbɛlabɔlɛ nu tɛla ɔ nee Gyihova agɔnwolɛvalɛ ne a. Ɔlɛ ɔdaye mumua ne ɔ nwo adwenle kpalɛ, ɔze kɛ tɛ debie biala a ɔze ye a. Yɛɛ ɔbɛlɛ ɔ nwo aze ɔyɛ asɔne fane dɔɔnwo ɔfa ɔkile kɛ ɔfa ɔ nwo ɔto Gyihova anwo zo.b

14. Duzu a Pita yɛle ye kenle ko bie mɔɔ ɛnee ɔkile kɛ yeanva ɔ nwo yeando Gyihova anwo zo a?

¹⁴ Nɔe ne mɔɔ aleɛ kye a bɛbahu Gyisɛse la, ɔbɔle ye ɛdoavolɛma ne kɔkɔ kɛ: “Ɔlua medame ti, ɛnɛ nɔe bɛ muala bɛbakpo me.” Pita vale anwodozo buale kɛ: “Saa bɛ muala bɛkpo wɔ bɔbɔ a, me ngome ɛdeɛ, menrɛkpo wɔ ɛlɛ!” Zɔhane nɔe ne, Gyisɛse dule ye ɛdoavolɛma bie mɔ folɛ kɛ: “Bɛhɔ zo bɛzinza na bɛyɛ asɔne dahuu.” (Mat. 26:​31, 33, 41) Saa Pita limoale vale zɔhane folɛdulɛ ne lile gyima a, anrɛɛ bie a ɔbanyia akɛnrasesebɛ yeaha kɛ ɔ nee Gyisɛse a lua a. Noko Pita kpole ɔ Menle ne, na ɛhye maanle ɔlile nyane kpole.—Mat. 26:​69-75.

15. Wɔ Gyisɛse nɔe ne mɔɔ li awieleɛ wɔ azɛlɛ ye azo la anu, kɛzi ɔmaanle ye adwenle nu lale ɛkɛ ɛ?

¹⁵ Gyisɛse vale ɔ nwo dole Gyihova anwo zo bɔkɔɔ. Ɛnee Gyisɛse di munli ɛdeɛ, noko ɔyɛle asɔne dahuu. Ɛhye maanle ɔnyianle akɛnrasesebɛ ɔyɛle mɔɔ ɛnee Gyihova kulo kɛ ɔyɛ la. (Mat. 26:​39, 42, 44; Dwɔn 18:​4, 5) Mɔɔ Pita nwunle kɛzi Gyisɛse yɛle asɔne fane dɔɔnwo la, ɔboale ye kpole kpalɛ wɔ ye ɛbɛlabɔlɛ nu.

16. Kɛzi Pita hilele kɛ yenyia adwenle mɔɔ anu la ɛkɛ la ɛ? (1 Pita 4:7)

¹⁶ Nzinlii, ɛnee akee Pita dua asɔneyɛlɛ zo fa ɔ nwo to Gyihova anwo zo kpalɛ. Gyisɛse mɔɔ ɛnee bɛdwazo ye la maanle Pita nee ɛzoanvolɛma mɔɔ ɛha la anwosesebɛ kɛ bɛbanyia sunsum nwuanzanwuanza amaa bɛahola bɛayɛ edwɛkɛhanlɛ gyima ne mɔɔ bɛva bɛmaa bɛ la. Noko akee Gyisɛse hanle hilele bɛ kɛ bɛhendɛ wɔ Gyɛlusalɛm bɛhɔdwu mekɛ mɔɔ bɛ sa baha ye la. (Luku 24:49; Gyi. 1:​4, 5) Mekɛ mɔɔ bɛlɛkendɛ la, duzu a Pita yɛle a? Ɛnee Pita nee ɔ gɔnwo mɔ Kilisienema ‘ɛbɔ nu ɛlɛyɛ asɔne.’ (Gyi. 1:​13, 14) Nzinlii, Pita maanle ɔ gɔnwo mɔ anwosesebɛ wɔ ye kɛlata mɔɔ limoa la anu kɛ bɛmaa bɛ adwenle nu ɛla ɛkɛ na bɛlua asɔneyɛlɛ zo bɛbikye Gyihova. (Kenga 1 Pita 4:7.) Pita zukoale kɛ ɔbava ɔ nwo yeado Gyihova anwo zo na ɔrayɛle kɛ pila wɔ asafo ne anu.—Gal. 2:9.

17. Ɔnva nwo kɛzi yɛbɔ yɛ nwo mɔdenle biala la, duzu a ɔwɔ kɛ yɛkɔ zo yɛyɛ a? (Eza nea nvoninli ne.)

¹⁷ Amaa yɛ adwenle nu ala ɛkɛ la, ɔwɔ kɛ yɛta yɛfa yɛ asɔneyɛlɛ yɛto Gyihova anyunlu. Yɛnwu kɛ ɔwɔ kɛ yɛkɔ zo yɛfa yɛ asɔneyɛlɛ yɛto Gyihova anyunlu ɔnva nwo kɛzi yɛbɔ yɛ nwo mɔdenle biala la. Ɛhye ati, saa ɔwɔ kɛ yɛsi kpɔkɛ titili bie a, yɛsɛlɛ Gyihova yɛmaa ɔkile yɛ adenle, ɔluakɛ yɛdie yɛdi kɛ ɔze mɔɔ le kpalɛ maa yɛ la.

18. Kɛ ɔkɛyɛ na yɛadwenle ninyɛne nwo kɛ Gyihova ɛ?

¹⁸ Ɔyɛ yɛ fɛ kɛ Gyihova bɔle yɛ wɔ adenle mɔɔ ɔmaa yɛkola yɛda ye subane ne mɔ bie ali la azo la. (Gyn. 1:26) Nɔhalɛ nu, yɛnrɛhola yɛnrɛzukoa Gyihova pɛpɛɛpɛ. (Aye. 55:9) Noko kɛ mɔɔ Pita yɛle la, yɛbahola yɛadwenle ninyɛne nwo kpalɛ kɛ mɔɔ Gyihova yɛ ye la. Ɔrɛla ye kɛ yɛbahɔ zo yɛazukoa kɛzi Gyihova dwenle ninyɛne nwo la, yɛabɛlɛ yɛ nwo aze na yɛamaa yɛ adwenle nu ala ɛkɛ.